Elda David P. Homer

Wan memori blong Elda David P. Homer long saed blong gospel, i taem we oli givim wok long hem, taem hem i gat 14 yia blong i hom tijing patna long wan memba blong wod blong hem, we i stap “mekem hom tijing long wan defren wei,” Elda Homer i talem. “I no blong go insaed long hom mo visitim ol pipol; hem i blong givhan long olgeta from ol nid blong olgeta.”

Olsem wan kompanionsip, bae tufala i prea from, mo tokbaot ol famli we tufala i lukaotem, i no olsem wan adalt i toktok long wan yut, be olsem tufala fren long seves blong prishud. “Mi lanem se Spirit i kam mo i joen wetem seves,” Elda Homer i talem.

Lesen ia i bin stap wetem hem truaot long laef blong hem, mo afta tu, long seves blong hem insaed long Jos, taem hem i bin stap givim seves olsem wan Eria Seventi, wan neseri lida, o speselis blong lukaot long notis bod—hemia wan koling we hem mo waef blong hem i bin mekem taem tufala i laef long Melbun, Ostrelia.

David Paul Homer, i bon long 25 Epril 1961, long Sol Lek Siti, Yuta, YSA; papa mo mama i, Frederick mo Phyllis LeNila Homer. Afta long misin blong hem long Hong Kong stat long 1980 kasem 1982, hem i mitim Nancy Dransfield, wan graduet blong Brigham Yang Yunivesiti, long wan institiut faeasaed long Sol Lek Siti; Sista Dransfield i bin stap wok, mo semtaem, i bin skul long Yunivesiti blong Yuta. Tufala i bin sil long Sol Lek Tempol long 31 Julae 1984. Tufala i lukaotem faef gel mo wan boe.

Elda Homer i kasem digri long saed blong ekonomi long Yunivesiti blong Yuta mo wan masta digri long bisnis administresen long Warton Skul long Yunivesiti blong Pensilvania.

Long 30 yia wok blong hem olsem wan eksekutiv wetem Jeneral Mills, hem mo waef blong hem i bin stap long Maeami, Florida, YSA; Miniapolis, Minesota, YSA; Belington, Ontario, Kanada mo Sent Suplis, Vod, Switsilan.

Elda Homer i bin stap olsem wan stek presiden, wan bisop, wan presiden blong kworom blong ol elda, mo wan wod eksekutiv sekretari. Olsem wan Eria Seventi, hem i statem seves blong hem long Kanada mo i bin gohed long Yurop; long ples ia hem i bin givim seves blong fo yia bifo oli sastenem hem olsem wan Jeneral Atoriti Seventi long 31 Maj 2018.