Elder David P. Homer

Hō’ē o tā Elder David P. Homer ha’amana’ora’a mātāmua nō ni’a i te ’evanelia, ’ua 14 ïa matahiti tōna i te ravera’a ’oia i te hāhaerera’a ’utuāfare ’e te hō’ē melo o tāna pāroita tei « feruri ta’a ’ē nō ni’a i te hāhaerera’a ’utuāfare », tē parau ra Elder Homer. « ’Aita ’oia i feruri e tere i te fare ’e e hāhaere i te ta’ata; ’ua feruri rā i te aupurura’a i tō rātou mau hina’aro. »

’A haere ai rāua, e pure rāua ’e e paraparau rāua nō ni’a i te mau ’utuāfare tei fa’ata’ahia nā rāua, e ’ere mai te ta’ata pa’ari i te hō’ē tamaiti, mai nā tāvini rā o te autahu’ara’a. « ’Ua ha’api’i au ē, e tae mai te Vārua nā roto ’e ma te ’āpiti i te tāvinira’a », ’ua parau Elder Homer.

’Ua vai noa te reira ha’api’ira’a i te roara’a o tōna orara’a ’e tāna tāvinira’a i roto i te ’Ēkālesia, ’ei Hitu ’Ahuru ārea ānei, ’ei fa’atere aupuru tamari’i ri’i ’aore rā ’ei ta’ata ’aravihi nō te tāpura piara’a parau—e pi’ira’a tāna i amo i te taime ’a ora ai rāua tāna vahine i Melbourne (Auterāria).

’Ua fānauhia David Paul Homer i te 25 nō ’Ēperēra 1961, i Roto Miti, i Utaha (Marite), nā Frederick ’e Phyllis LeNila Homer. I muri mai i tāna misiōni i Hong Kong, mai te matahiti 1980 i te matahiti 1982, ’ua mātau ’oia ia Nancy Dransfield, e pīahi tei noa’a te parau tū’ite i Brigham Young University, i te hō’ē purera’a pae auahi i Roto Miti, tē ’ohipa ra ’oia i reira ’e tē haere ra i te fare ha’api’ira’a University of Utah. ’Ua tā’atihia rāua i te hiero nō Roto Miti, i te 31 nō Tiurai 1984. E pae tamāhine tā rāua i aupuru ’e hō’ē tamāroa.

’Ua noa’a tā Elder Homer te parau tū’ite Licence nō te fa’arava’ira’a faufa’a i te fare ha’api’ira’a University of Utah, ’e tae noa atu i te hō’ē parau tū’ite Master nō te fa’aterera’a faufa’a i te fare haapi’ira’a Wharton School nō te University of Pennsylvania.

I roto i nā 30 matahiti ’ohipa ’ei ti’a fa’atere nō te taiete General Mills, ’ua noho rāua tāna vahine i Miami, i Florida (Marite); i Minneapolis, i Minnesota (Marite); i Burlington, i Ontario (Canada) ’e i Saint-Sulpice, i Vaud (Helevetia).

’Ua tāvini Elder Homer ’ei peresideni titi, ’ei ’episekōpo, ’ei peresideni pupu peresibutero ’e ’ei pāpa’i parau fa’atere nō te pāroita. ’Ei Hitu ’Ahuru ārea, ’ua ha’amata ’oia i tāna tāvinira’a i Canada ’e ’ua haere atura i Europa, i reira ’oia i te tāvinira’a i nā matahiti e maha i ma’iri hou ’a pāturuhia ai ’oia ’ei Hitu ’Ahuru Hui mana fa’atere rahi i te 31 nō Māti 2018.