Elda José A. Teixeira

Elda José A. Teixeira i tingbaot wan lesen we hem i bin lanem taem hem i wan yangfala boe long Potugal. Long taem blong wan famli kam tugeta, hem i bin ronwe, i go huk. Hem i filim blong talem long papa mo mama blong hem weaples nao hem i stap go long hem, be hem i disaed blong no go from se oli bisi blong stap toktok.

Sam aoa afta, papa mo mama blong hem we oli bin wari, oli faenem hem long saed reva. Aot long eksperiens ia, hem i lanem blong stap obei long papa mo mama blong hem, be tu, blong stap obei long ol toktok blong Tabu Spirit.

Stat long tetaem ia, Elda Teixeira i mekem i kam fasin blong hem, blong stap mekem folem kwaet, smol voes. Hem mo famli blong hem, oli kam blong save gospel long 1976, afta we oli openem misinari wok long Potugal. Hem i kasem baptaes taem hem i gat 16 yia, mo afta, hem i go long wan misin long Lisbon Potugal Misin.

“Ol joes blong yumi, oli gat paoa ia we yumi no save tanem baksaed long hem, blong jenisim laef blong yumi,” Elda Teixeira i talem; oli bin sastenem hem i kam wan memba blong Presidensi blong Olgeta Seventi long 31 Maj 2018. “Presen ia, i wan bigbigfala saen blong tras we God i gat long yumi, mo semtaem, i wan responsabiliti blong yumiwan we yumi mas glad mo lukaot long hem, mo yusum wetem waes;” hem i bin tijim hemia long Epril 2009 Jeneral Konfrens.

Elda Teixeira i winim ol digri long saed blong akaonting mo bisnes manejmen, mo i bin wok blong Jos olsem wan Intanasonal Kontrola. Hem i bin wok tu long Ea Fos (Ami) blong Potugal olsem pat blong NATO yunit. Long tetaem ia, oli bin singaotem hem i kam nasonol pablik afea daerekta blong Jos. I no longtaem afta, hem i bin mitim waef blong hem, Maria Filomena Lopes Teles Grilo. Tufala i mared long 1984 long Bern Switsilan Tempol, mo tufala i kam papa mo mama blong tri pikinini.

José Augusto Teixeira da Silva i bon long Vila Real, Potugal, long 24 Febwari 1961. Hem i bin holem wok olsem kaonsela long wan bisoprik, distrik presiden, stek presiden, Eria Seventi, mo presiden blong Brasil Sao Paolo Saot Misin. Oli bin sastenem hem olsem wan Jeneral Atoriti Seventi long 5 Epril 2008. Hem i stap naoia olsem wan Presiden blong Saot Amerika Saot Eria mo bae i statem seves blong hem insaed long Presidensi blong Olgeta Seventi long namba 1 Ogis 2018.

Antap long evri samting ia, Elda Teixeira i bin givim kaonsel long yumi long Epril 2015 Jeneral Konfrens blong “andastanem Sevya i moa dip. … Yumi no mas lego blong mekem tumoro samting ia we yumi save mekem tedei. Naoia nomo, yumi mas kam long Kraes.”