Elda Juan Pablo Villar

Fas taem we Elda Juan Pablo Villar i kam blong save Jos, hem i long Santiago, Jile, taem we bigfala brata blong hem, Ivan, i bin anaonsem long famli blong hem se hem i bin baptaes, mo i no askem raet long papa mo mama blong hem, mo afta, i talem se hem i plan blong go long wan misin. Taem oli askem long hem se, from wanem, Ivan i serem testemoni blong hem mo i bin wantem blong go long misin.

“Mi no bin andastanem mining blong evri samting ia,” Elda Villar i tingbaot, taem we long tetaem ia hem i gat 17 yia. “Be long tetaem ia, hem i putum wan sid insaed long hat blong mi.”

Sid ia, i bin gat janis blong gro taem we brata blong hem i givim nem blong hem long ol misinari. Long taem blong fas lesen, Elda Villar i kasem testemoni blong hem we Buk blong Momon i tru.

“Long miwan, i no bin nid blong nildaon mo prea, from se, taem we oli bin serem testemoni blong olgeta, mi bin save insaed long hat blong mi se hem i tru,” hem i talem. “Taem mi save hemia, evri nara samting i mas tru nomo.”

Ivan, we i bin go long misin long wan ples kolosap, i kasem raet blong baptaesem Elda Villar long 1988. Afta long hemia, mama blong olgeta, mo nara brata, Claudio, hem tu i joenem Jos.

Wan yia afta long baptaes blong hem, Elda Villar i statem seves blong hem long Jile Vina del Mar Misin, i statem wan laef blong seves, we stat long taem ia, i bin stap olsem wan stek presiden, wan bisop, wan kaonsela long wan bisoprik, wan kaonsela long Jile Santiago Is Misin, mo wan Eria Seventi long Saot Amerika Saot Eria. Oli bin sastenem hem i kam wan Jeneral Atoriti Seventi long 31 Maj 2018.

Elda Villar i bin bon long 11 Septemba 1969, long Valparaiso, Jile, mo papa mo mama blong hem i Sergio Villar Vera mo Genoveva Saaverdra. Hem i maredem Carola Cristina Barrios long 31 Maj 1994 insaed long Santiago Jile Tempol. Tufala i papa mo mama blong trifala pikinini.

Afta we hem i kasem wan digri long sosol komunikesen mo pablik rilesen mo wan masta digri long maketing, hem i bin wok long indastri blong famasi mo ol medikol tul. Long 2007, hem i karem wan moa masta digri long bisnis administresen long Brigham Yang Yunivesiti. Afta, hem i gobak long Jile blong wok blong Orica, wan maening seves kampani, mo i no longtaem i pas, hem i kam wan senia maneja.