2018
Elder Juan Pablo Villar
May 2018


Elder Juan Pablo Villar

Hitu ’Ahuru Hui mana fa’atere rahi

Hōho’a
Elder Juan Pablo Villar

’Ua tupu te fārereira’a ’o Elder Juan Pablo Villar ’e te ’Ēkālesia i Santiago (Tīreni), i te paraura’a tōna tua’ana, ’o Ivan, i tōna ’utuāfare ē, ’ua bāpetizo ’oia iāna ma te tīa’i ’ore i te parau fa’ati’a a tōna nā metua, ē muri iho, ’ua parau ’oia tē ’ōpua ra ’oia e tāvini i te hō’ē misiōni. I te anira’ahia ’oia nō te aha, ’ua fa’a’ite Ivan i tōna ’itera’a pāpū ’e tōna hia’ai e tāvini.

« ’Aita vau i māramarama i te tā’āto’ara’a », tē parau ra Elder Villar, e 17 matahiti tōna i terā tau. « ’Ua tanu mai rā ’oia i te hō’ē huero i roto i tō’u ’ā’au ».

’E ’ua noa’a i teie huero ’ia tupu i te fa’afārereira’a tōna taea’e iāna i te mau misiōnare. I roto i te ha’api’ira’a mātāmua, ’ua fāri’i ’o Elder Villa i tōna ’itera’a pāpū nō te parau mau o te Buka a Moromona.

« Nō’u nei, ’aita i tītauhia ’ia tūturi i raro nō te pure, inaha i te taime ra iho ā rāua i fa’a’ite mai i tō rāua ’itera’a pāpū, ’ua ’itehia iā’u ē, e parau mau », tē parau ra ’oia. « I te ’itera’a vau i te reira, e parau mau ato’a ana’e ïa te tahi atu mau mea. »

Tē tāvini ra Ivan i roto i te hō’ē misiōni tāpiri i tō rātou vāhi, nō reira, ’ua fāri’i ’oia i te parau fa’ati’a nō te bāpetizo ia Villar i te matahiti 1988. Ē muri a’era, ’ua tomo ato’a mai tōna metua vahine ’e te tahi atu taea’e, ’o Claudio, i roto i te ’Ēkālesia.

Hō’ē matahiti i muri iho i tōna bāpetizora’a, ’ua ha’amata Elder Villar i tāna tāvinira’a i roto i te misiōni nō Chile Viña del Mar, e ha’amatara’a ïa nō te hō’ē orara’a tāvinira’a ’ei peresideni titi ato’a, ’ei ’episekōpo, ’ei tauturu i roto i te ’episekōpora’a, ’ei tauturu i roto i te misiōni nō Chile Santiago East, ’e ’ei Hitu ’Ahuru ārea i roto i te ārea nō Amerika Apato’a - te tuha’a apato’a. ’Ua pāturuhia ’oia i te 31 nō Māti 2018, ’ei Hitu ’Ahuru Hui mana fa’atere rahi.

’Ua fānauhia Elder Villar i te 11 nō Setepa 1969, i Valparaiso (Tīreni), nā Sergio Villar Vera ’e Genoveva Sa’averdra. ’Ua fa’aipoipo ’oia ia Carola Cristina Barrios i te 31 nō Māti 1994, i roto i te hiero nō Santiago (Tīreni). E toru tā rāua tamari’i.

I te noa’ara’a tāna parau tū’ite Licence nō te tūreiara’a sōtiare ’e te aura’a ’e te huira’atira, nā reira ato’a te parau tū’ite Master nō te tapiho’ora’a, ’ua ’ohipa ’oia i roto i te tapiha’ara’a rā’au ’e te mau mātini nō te mau taote. I te matahiti 2007, ’ua noa’a ato’a mai te parau fa’a’ite Master nō te fa’aterera’a faufa’a i Brigham Young University. ’Ei reira, ’ua ho’i atu ’oia i Tīreni nō te rave i te ’ohipa nō te taiete Orica, e taiete heru repo, ’e upo’o fa’atere ’oia i reira.