Elda Mathias Held

Elda Mathias Held mo waef blong hem, Irene, bae oli save talem se tufala i eksampol ia blong wanem i wan wol Jos. Tufala tugeta i kamaot long Kolombia mo Jemani. Ol wok mo skul i bin tekem tufala aot long homples blong tufala long Saot Amerika i go long Kanada, Jemani, Gwatemala, Brasil mo, laswan, i gobak long Kolombia. Long wanwan kantri, tufala i bin lanem ol niu lanwis mo kalja.

“Be Jos i bin semmak nomo long eni ples we mifala i bin go long hem,” Elda Held i talem; oli bin sastenem hem olsem wan Jeneral Atoriti Seventi long 31 Maj 2018.

“Samting ia we i semmak” long saed blong spirit, i mekem kapol ia i hang gud long tufala taem we tufala i bin lukaotem tri pikinini, mo tufala i stap gro long gospel.

Tufala Held ia, tufala i fren blong skul long wan skul we oli stap toktok lanwis blong Jemani long homtaon blong tufala long Bogota, Kolombia. Tufala i bin sil long 13 Jun 1989, long Frankfet Jemani Tempol, afta we Mathias i kasem wan digri long mekanik enjina long Bogota, mo wan masta digri long bisnes administresen long Kanada.

Ol wok i tekem kapol ia i go long Hanova, Jemani, mo Sista Held i kasem strong filing se bae laef blong tufala bae i jenis.

“Mi talem long Mathias se mi filim se bae mitufala i kasem wan mesej we i kam long heven,” hem i talem. Mesej blong heven ia i bin kasem tufala long wan aftenun we ren i ren, long 1987, mo wan i noknok long doa. Aotsaed i gat tufala Momon misinari i stanap, we tufala i toktok lanwis Jemani wetem tiun blong Amerika.

Long ol nekis 10 manis, tufala Held i stadi wetem ol misinari, mo tufala i kam fren wetem lokol LDS kongregesen. Afta plante prea, tufala i kasem konfemesen long saed blong spirit se gospel i tru, mo tufala i baptaes long 1988.

Elda Held i wok blong moa long 25 yia long kampani blong trak Daimler-Benz, mo ol manejmen diuti blong hem i tekem hem i go raon long wol. Tufala Held i bin dipen long Lod long evri ples tufala i stop long hem.

“I nomata wanem tes yu stap go tru long hem,” hem i talem, “sapos yu stap toktok wetem heven, bambae yu oraet i stap.”

Hem i bon long 5 Jun 1960, mo papa mo mama blong hem, i Michael mo Elisabeth Held; Elda Held i bin givim seves olsem wan kaonsela long wan stek presidensi, olsem wan kaonsela long wan bisoprik, mo olsem wan Eria Seventi long Saot Amerika Not Wes Eria.