Elda Takashi Wada

Long wan kolkol dei long Novemba, wan kwestin we i kam long wan misinari blong Amerika we i stap askem rod blong hem long wan lokol postofis, i pulum ae blong Takashi Wada.

Boe ia blong 15 yia, papa blong hem i givim woning long hem blong stap longwe long Ol Momon, we oli stap visitim ol pipol long ol rod blong Nagano, Japan, jes tri minit longwe long hom blong olgeta. Be Takashi i sapraes we elda blong Amerika ia i stap toktok lanwis blong Japan.

Sam dei afta, wan nara misinari i stopem Takashi. Hem i jes kasem Japan nomo. Long brokbrok Japanis, hem i traem blong serem stori blong Josef Smit.

Takashi i no andastanem evri samting, “be mi filim se mi mas lisin,” hem i rimemba.

Ol misinari oli tijim hem ol step blong prea mo ol lesen. Hem i go long ol miting blong Jos mo testemoni blong ol lokol memba i tajem hem. From se hem i fraet blong toktok blong famli blong hem we oli Budis, Takashi i wokem talem long ol misinari: “Mi no save joenem Jos, be mi wantem lanem moa.”

Tu yia afta, bifo Takashi i aot blong stadi long Yunaeted Stet taem hem i gat 17 yia, papa mo mama blong hem, tufala i agri, mo hem i joenem Jos.

Elda Wada, we i bon long 5 Febwari 1965, mo papa mo mama i Kenzo mo Kazuko Wada, i kasem wan digri long lanwis long 1990, mo wan masta digri long bisnis administresen long 1996, long Brigham Yang Yunivesiti.

Hem i go long misin long Yuta Sol Lek Siti Not Misin, mo i bin maredem Naomi Ueno long 18 Jun 1994, long Tokyo Japan Tempol. Kapol ia i gat tu boe.

Wok blong Elda Wada i putum hem long ol defren posisen wetem ol bigfala kampani long Yunaeted Stet mo Japan, mo tu, long posisen blong daerekta blong ol afea blong Jos long Not Amerika Wes, Not Amerika Not Wes, mo Esia Not Eria.

Elda Wada, i wan foma bisop, hae kaonsela, mo seminari tija. Hem i givim seves olsem presiden blong Japan Tokyo Saot Misin stat long 2013 kasem 2016. Oli bin sastenem hem olsem wan Jeneral Atoriti Seventi long 31 Maj 2018.