Elder Ulisses Soares

E tāpa’o te mau peropheta ora, mai te peresideni Russel M. Nelson, nō te here o te Atua i tāna mau tamari’i, ’ua fa’a’ite pāpū mai ’o Elder Soares i roto i tāna a’ora’a mātāmua i te ’āmuira’a rahi ’ei melo nō te pupu nō te Tino ’Ahuru Ma Piti ’āpōsetolo.

« E ’ere ānei i te ha’amaita’ira’a tē vai ra te mau peropheta, te mau hi’o ’e te mau heheu parau i ni’a i te fenua i te tau e ora nei tātou, ’o tē ’imi nei ho’i ’ia ’ite i te hina’aro o te Fatu ’e ’ia pe’e i te reira ? E mana’o tāmāhanahana te ’itera’a ē, e ’ere tātou i te ’ōtahi i roto i te ao, noa atu ā te mau tāmātara’a o te orara’a. »

Noa atu tōna mana’o fāito rahi roa ’ino teie pi’ira’a ’āpōsetolo nōna, ’ua parau Elder Soares ē, maoti te mau parau a te peresideni Nelson ’oia i « ’ite… i te here o te Fa’aora i ni’a [iāna] nā roto i tāna mau parau ’e tōna mata aroha, ’a tu’u mai ai ’oia i teie hōpoi’a ».

Nā roto i te pāturura’ahia ’oia i te 31 nō Māti 2018 ra, ’ua riro mai Elder Soares i te ’āpōsetolo mātāmua o te ’Ēkālesia nō Amerika Latino mai. Nā mua a’e teie pi’ira’a tāna, e melo ’oia nō te peresidenira’a nō te Hitu ’Ahuru, mai te 6 nō Tēnuare 2013 mai ā, ’e tē tāvini ra ’oia i ni’a i te hō’ē tonora’a ta’a ’ē a te ’Episekōpora’a fa’atere rahi, i Roto Miti.

’Ua pāturuhia Elder Soares ’ei Hitu ’Ahuru Hui mana fa’atere rahi i te 2 nō ’Eperēra 2005. I ni’a i terā ti’ara’a, ’ua tāvini ’oia ’ei tauturu i te mau ārea nō Afirika Apatoa Hiti’a o te rā ’e nō Beresiria Apato’a, nā reira ato’a ’ei peresideni nō te ārea nō Beresiria.

’Ua tāvini Elder Soares i ni’a i te mau pi’ira’a rau i roto i te ’Ēkālesia. ’Ua tāvini ’oia ’ei misiōnare rave tāmau i roto i te misiōni nō Brazil Rio de Janeiro Mission, ’ei peresideni pupu peresibutero, ’ei tauturu i roto i te ’episekōpora’a, ’ei melo ’āpo’ora’a teitei, ’ei pāpa’i parau fa’atere nō te titi, ’ei ti’a retioni nō te ’ohipa tōtauturu, ’ei peresideni titi ’e ’ei peresideni nō te misiōni nō Portugal Porto, mai te matahiti 2000 i te matahiti 2003.

Tāna pi’ira’a faufa’a roa a’e, e 15 ïa matahiti tōna, ’ua ani mai tōna ’episekōpo e ha’api’i nō te hō’ē tau poto i te hō’ē piha feiā ’āpī i te Ha’api’ira’a Sābati. I te fa’aineinera’a ’oia i te ha’api’ira’a nō ni’a i te rāve’a ’ia noa’a te hō’ē ’itera’a pāpū, ’ua pure te taure’are’a ra Ulisses nō te ani i te hō’ē ha’apāpūra’a nō te parau mau o te ’evanelia.

Tē ha’amana’o ra ’oia ē : « I te taime ’ua tūturi au i raro nō te ani i te Fatu e parau mau ānei te ’evanelia, ’ua tae mai i tō’u ’ā’au i te hō’ē mana’o au roa, e reo iti ha’iha’i tei ha’apāpū mai iā’u ē, ’ia tūtava noa vau i roto i te reira e ti’a ’ai. Nō te pūai roa ho’i o te reira, e’ita tā’u e nehenehe e parau ē, ’aita vau i ’ite ».

I te matahiti 1985, ’ua noa’a mai tāna parau tū’ite Licence nō te ’ohipa nūmerara’a faufa’a ’e te fa’arava’ira’a faufa’a i te fare ha’api’ira’a School of Economic Science nō te fare ha’api’ira’a teitei nō São Paulo Pontifical Catholic University. I te noa’ara’a tāna parau tū’ite Master nō te fa’aterera’a faufa’a, ’ua ’ohipa ’oia ’ei ti’a nūmera faufa’a ’e te hi’opo’a nō te mau taiete rarahi i Beresiria ’e ’ei ti’a fa’atere o te mau ’ohipa pae faufa’a nō te ’Ēkālesia, i te piha tōro’a ārea nō São Paulo.

’Ua fānauhia Ulisses Soares i São Paulo (Beresiria), i te 2 nō ’Ātopa 1958. ’Ua fa’aipoipo ’oia ia Rosana Fernandes i te ’āva’e ’Ātopa 1982. I roto i tāna a’ora’a i te ’āmuira’a rahi, ’ua ha’amāuruuru ’oia i tāna vahine nō tōna here ’e tōna pāturura’a iāna.

« ’Ua riro noa ’oia ’ei hi’ora’a nō te maita’i ’e te here ’e te pūpūra’a hope iāna i te Fatu ’e nō’u ’e nō tō’u ’utuāfare », ’oia ho’i tā rāua nā tamari’i e toru ’e nā mo’otua e toru, ’o tāna ïa i parau i roto i tāna a’ora’a i te ’āmuira’a. « ’Ua here au iāna mā tō’u ’ā’au ato’a, ’e ’ua māuruuru vau nō tōna mana au i ni’a ia mātou. »