2018
Lukluk Gud long Wok blong Givhan
May 2018


Lukluk Gud long Wok blong Givhan

Hom tijing mo visiting tijing bae i nomo gat, Presiden Russell M. Nelson i bin anaonsem long Sandei aftenun sesen blong jeneral konfrens. “Givhan, wan wei we i moa tabu,” blong stap kea long ol narawan long fasin blong Kraes, bambae i givim wan rod blong joenem ol wok blong help blong lukluk long ol nid blong ol memba long saed blong spirit mo long saed blong laef.

Sista Jean B. Bingham, Rilif Sosaeti Jeneral Presiden mo Elda Jeffrey R. Holland blong Kworom blong Olgeta Twelef Aposol, oli bin tokbaot tu olsem wanem niufala wei ia bae i mekem se ol wok blong ol kworom blong Melkesedek Prishud mo ol Rilif Sosaeti oli lukluk nomo blong givhan semmak olsem we Sevya i bin mekem (luk long ol pej 101 mo 104).

Ol Lorel mo ol Maea Med, naoia oli save stap olsem ol givhan kompanion long ol Rilif Sosaeti sista. Long kwota intaviu, ol givhan brata mo sista bae oli toktok tugeta wetem ol lida long saed blong ol nid mo ol strong saed blong olgeta we oli gat wok blong lukaot long olgeta. Namba blong ol intaviu we ol lida oli gat long kwota ia, bambae i wan ripot ia nomo we bae oli mekem. I impoten blong mekem ol visit taem i posibol, be blong givhan i no putum wan stret wei blong gat kontak long evri manis.

“Ol yut oli save serem ol spesel presen we oli gat mo gro long saed blong spirit taem oli givim seves long saed blong ol adalt long wok blong sevem man,” Sista Bingham i talem. Blong yusum ol yut i mekem tu se namba blong ol memba we oli kea long ol narawan i go antap, mo i helpem ol yut blong rere gud blong fulfilim ol rol blong olgeta olsem ol lida long Jos mo long komuniti mo olsem wan we i help insaed long ol famli blong olgeta.”

Mifala, long hedkwota blong Jos i no nidim blong save hao o weaples o wetaem yu mekem kontak wetem ol pipol blong yu,” Elda Holland i talem; “mifala i jes nid blong save mo mifala i kea blong save se yu stap mekem hemia. Mo we yu stap blesem olgeta long evri wei we yu save mekem.”

Folem wan leta we i kam long Fas Presidensi, ol jenis blong wok blong givhan ia i save tekem sam taem blong i wok fulwan, be i mas stat naoia. Ministering.lds.org/bis i givim sam moa ditel, mo tu, i gat ol ansa long ol kwestin we oli askem oltaem. Ol instraksen vidio mo ol nara risos, bambae oli ademap long websaet long ol wik we oli stap kam.

Stat long Jun, insaed long Liahona bambae i gat wan atikol we bae i kamaot evri manis we oli singaotem “Ol Givhan Prinsipol,” blong helpem ol memba blong andastanem olsem wanem blong kam moa olsem Kraes taem yumi stap givhan long wanwan long yumi.