Hem I No Stap Flas mo Tingting blong Hat blong Hem I Stap Daon

Long Niu Testeman, yumi lanem abaot wan rij yang rula we i bin askem Jisas: “?Tija, mi mi mas mekem wanem gudfala wok blong bambae mi save kasem laef ya we i no save finis?”² Faswan, Sevya i askem hem blong hem i obei long ol komanmen. Afta, Masta i talem wan moa samting we i stret wetem ol nid mo situesen blong rijman ia.

“Jisas i talem hem se: “Sapos yu wantem kam stret gud olgeta, yu go, yu salemaot olgeta samting blong yu, yu tekem mane … yu givim long ol puaman, … yu kam yu biaen long mi.”

“Be taem yang man ia i harem tok ia, hem i gowe long Jisas we i harem nogud tumas, from we hem i gat plante samting.”³

Komperem ansa blong rij yang man ia wetem eksperiens blong Amulek, olsem oli tokbaot long Buk blong Momon. Amulek i man we i save wok mo i gat plante samting, mo i gat fulap famli mo fren.⁴ Hem i tokbaot hemwan, se hem i wan man we God i singaotem hem plante taem, be hem i no wantem harem; i wan man we i bin save ol samting blong God, be i no wantem save.⁵ Hem i wan gudfala man, be Amulek, tingting blong hem i stap long ol samting blong wol, semmak olsem rij yang man ia we oli tokbaot long Niu Testeman.

Nomata we hem i bin mekem hat blong hem i kam strong bifo, Amulek i bin obei long voes blong wan enjel, i akseptem profet Alma long haos blong hem, mo i fidim hem. Hem i wekap long saed blong spirit taem Alma i visitim hem, mo oli singaotem hem blong prijim gospel. Amulek i “livim evri gol blong hem, mo silva, mo ol gudgudfala samting blong hem, … blong kam talem toktok blong God, [mo] olgeta ia we oli bin fren blong hem long bifo, mo tu papa blong hem, mo tu famli blong hem, oli bin sakemaot hem.”⁶

Long tingting blong yu, ?wanem nao i eksplenem wanem i defren bitwin ansa blong rij yang man mo Amulek?

Long taem blong wan denja taem blong wo we oli tokbaot long Buk blong Momon, sam leta oli go raon bitwin Moronae, kapten blong ol ami blong Ol Man blong Nifae, mo Pahoran, jif jaj mo gavna blong kantri. Moronae, we ami blong hem i stap safa from se oli no gat inaf sapot long gavman, i bin raet i go long Pahoran “long fasin blong no agri”⁷ mo i poenem fingga long hem mo ol nara lida, se tingting blong olgeta i no wok, oli stronghed, oli no lukaot gud long olgeta, mo tu, se oli stap salem kantri blong olgeta.⁸

Bae i isi blong Pahoran blong i kros long Moronae mo rong tingting blong hem, be hem i no mekem. Wetem lav mo sore, hem i ansa mo i tokbaot wan faet agensem gavman we Moronae i no save long hem. Mo afta, Pahoran i talem:

“Luk, mi talem long yu, Moronae, se mi no glad long ol bigfala hadtaem blong yufala, yes, hemia i mekem sol blong mi i harem nogud.

“Long leta blong yu, yu bin toktok agensem mi, be i nomata; mi mi no kros, be mi glad long hat blong yu we i gud tumas.”⁹

Long tingting blong yufala, ?wanem nao i eksplenem from wanem Pahoran i skelem ansa blong hem long ol rong tok blong Moronae agensem hem?

Long jeneral konfrens, sikis manis i pas, Presiden Russell M. Nelson i tokbaot olsem wanem hem i ansa long invitesen blong Presiden Thomas S. Monson blong stadi, tingting hevi mo yusum ol trutok we oli stap insaed long Buk blong Momon. Hem i talem: “Mi bin traem blong folem advaes blong hem. Wetem sam samting moa, mi bin mekem wan lis long wanemhem i Buk blong Momon, wanem hem i konfemem, wanem i sakemaot, wanem i mekem i kamtru, wanem i kam klia mo wanem i stap talemaot we i bin haed. !Blong lukluk long Buk blong Momon tru long ol glas ia, i givim niu lukluk mo i givim insperesen! Mi leftemap tingting blong wanwan long yufala blong mekem.”¹⁰

Presiden Henry B. Eyring, semmak, i tokbaot fulap olsem wanem rikwes blong Presiden Monson i bin impoten long laef blong hem. Hem i talem:

“Mi bin ridim Buk blong Momon evri dei blong ova 50 yia. So maet mi bin save tekem nomo se ol toktok blong Presiden Monson i blong wan narawan. Be yet, olsem plante long yufala, mi bin filim we Profet i leftemap tingting blong mi mo promes blong hem i invaetem mi blong traem moa had.

“Hapi risal, long mi, mo long plante long yufala, i wanem we profet i bin promesem.”¹¹

Long tingting blong yu, ?wanem nao i eksplenem ol kwik ansa we i kam long hat long invitesen blong Presiden Monson, we i kam long tufala lida ia blong Jos blong Lod?

Mi no stap talem se ol strong ansa blong Amulek, Pahoran, Presiden Nelson, mo Presiden Eyring, bae wan fasin ia nomo blong Kraes i save eksplenem. I tru, i gat fulap fasin i go wetem, mo i gat fulap eksperiens i go wetem spirit fasin we i kamaot long laef blong ol fofala hae wokman ia. Be Sevya mo ol profet blong Hem oli haelaetem wan stamba kwaliti we yumi evriwan i nid blong andastanem moa, mo i nid blong traehad moa blong putum insaed long laef blong yumi.

Plis lukgud fasin ia we Lod i stap yusum blong tokbaot Hemwan bakegen, long skripja ia: “Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. … nao bambae yufala i save faenem pis long laef blong yufala.”¹²

Olsem wan tijing, Sevya i jusum blong poenemaot fasin blong no stap flas long medel blong evri fasin mo klin fasin we Hem i bin save jusum.

Wan semmak paten i kamaot klia long wan revelesen we Profet Josef Smit i bin kasem long 1829. Lod i talem: “Lanem samting aot long mi, mo lisin long ol toktok blong mi; wokbaot wetem fasin blong no stap flas we i kam long Spirit blong mi, mo bae yu kasem pis long mi.”¹³

Fasin blong no stap flas i wan bigfala fasin blong Ridima mo man i save luksave tru long fasin blong Hem blong save mekem samting wetem stret tingting, i wantem blong folem tingting blong Papa blong Hem mo i strong blong save holembak Hem. Kwaliti ia i helpem yumi blong andastanem moa fulwan wanwan aksen ia blong Amulek, Pahoran, Presiden Nelson mo Presiden Eyring.

Eksampol, Presiden Nelson mo Presiden Eyring, long stret mo gud fasin mo kwiktaem, tufala i mekem folem advaes blong Presiden Monson blong ridim mo stadi long Buk blong Momon. Nomata we tufala man ia, tufala i stap wok long ol impoten posisen blong Jos we fulap man i save luk tufala long hem, mo tufala i bin stadi plante blong plante yia, yet, tufala i soemaot long aksen blong tufala se tufala i no wet, mo tufala i no tingting long tufalawan.

Amulek, i bin glad blong folem tingting blong God, i akseptem wan koling blong prijim gospel, mo i livim gudfala laef blong hem mo ol famli blong hem. Mo Pahoran i kasem blesing ia blong save luk longwe, mo i save holembak hem blong tekem strong aksen be i eksplenem long Moronae ol jalenj we oli kam antap from faet agensem gavman.

Kwaliti ia blong Kraes, blong no stap flas, plante taem, man i no andastanem long wol blong yumi tedei. Fasin blong no stap flas i blong stap strong, i no blong stap slak; i blong tekem aksen, i no blong stap nating; i blong gat strong paoa long tingting, i no blong stap kwaet; i blong holembak yuwan, i no blong bosta; i blong yu no soemaot yu, i no blong tokbaot bigwan yu; mo i blong toktok kaen, i no blong tok strong tumas. Wan we i no stap flas, bae man i no save mekem hem i kros kwik, i no stap soemaot hem o toktok bigwan, be i rere blong luksave wok blong ol narafala man.

I nomata se fasin blong gat tingting i stap daon i soem se yumi dipen long God mo yumi nidim oltaem blong Hem i lidim mo sapotem yumi, nara fasin ia we i defren, we i fasin blong no blong stap flas, i mekem se yu rere long saed blong spirit blong lanem samting long tugeta, Tabu Spirit mo ol pipol we man i luk se oli no save mekem tumas samting, oli no gat tumas eksperiens, o edukesen, we maet oli no holem ol impoten posisen, o, bae oli luk se oli no gat tumas blong givhan wetem. Tingbaot olsem wanem we Neman, kapten blong ami blong king, long Siria, i bin winim hae tingting blong hem mo i no bin flas mo i bin akseptem advaes blong ol wokman blong hem blong obei long profet Ilaesa, mo i go wasem hem insaed long Jodan reva seven taem.¹⁴ Fasin blong no stap flas, i stamba proteksen agensem blaen fasin blong gat hae tingting, we plante taem, i kam antap from man i gat samting, posisen, paoa, mane mo pres blong man.

Fasin blong no stap flas i wan fasin we yumi kam blong gat from yumi wantem, from yumi yusum fridom blong joes blong yumi long stret fasin, mo from yumi traehad oltaem blong holemtaet fasin blong kam klin aot long ol sin.¹⁵ Mo tu, hem i wan presen long saed blong spirit, we i stret blong yumi lukaot blong gat.¹⁶ Be, yumi mas tingbaot se ol stamba tingting we bae oli givim blesing ia from, i blong gud mo i blong givim seves long ol pikinini blong God.¹⁷

Taem yumi stap kam long Sevya mo stap folem Hem, yumi kam, sloslo i go antap, blong kam moa olsem Hem. Spirit i givim moa paoa, mo wetem disiplin, yumi save holembak yumi mo yumi gat fasin we i kwaet. Olsem ia nao, yumi kam blong no stap flas mo ol disaepol blong Masta, mo i no wan samting we yumi jes stap mekem nomo.

Moses, “oli tijim hem long waes blong ol man Ijip, nao hem i kam wan strong man blong toktok mo blong wok tu.”¹⁸ Be yet, “tingting blong hem i stap daon moa, i no gat wan narafala man long wol we tingting blong hem i stap daon olsem hem.”¹⁹ Save mo wok blong hem bae i save mekem se hem i gat hae tingting. Be, fasin mo presen ia blong spirit blong no stap flas, we hem i kasem olsem wan blesing, i daonem hae tingting blong hem long laef blong hem, mo i putum Moses olsem wan tul blong mekem ol stamba tingting blong God oli kamtru.

Ol bigfala mo gudfala eksampol blong fasin blong no stap flas, yumi faenem insaed long laef blong Sevya Hemwan.

Hae Ridima we i bin “kamdaon i bitim evri samting”²⁰ mo i bin safa, blad blong Hem i ron, mo i bin ded “blong klinim yumi long evri fasin we i no stret mo i no gud,”²¹ long kwaet fasin i bin wasemaot das long leg blong ol disaepol blong Hem.²² Kaen fasin ia, blong no stap flas, i wan stamba mak blong fasin blong Lod olsem wan wokman mo wan lida.

Jisas i stap olsem bigfala eksampol blong stret mo gud fasin, mo fasin blong save folem tingting blong God taem Hem i bin safa long bigfala harem nogud long Getsemane.

“Nao taem hem i kasem ples ia, hem i talem long olgeta se: ‘Yufala i mas prea blong i no gat wan samting i save traem yufala blong yufala i foldaon.

“Mo hem i nildaon, mo i prea,

“i talem se: ‘Papa, sapos i stret long tingting blong yu, plis yu tekemaot ol samting ya we i stap mekem mi mi harem nogud, Be yu no mekem olsem we mi mi wantem, yu mekem olsem we yu nomo yu wantem.”²³

Fasin blong Sevya blong no stap flas, long taem blong eksperiens ia we i nid mo i soa tumas, i soemaot long wanwan long yumi hamas i impoten blong putum waes blong God i stap antap long waes blong yumi.

Fasin blong Lod blong oltaem putum tingting blong Hem i folem hemia blong Papa, mo strong fasin blong Hem blong save holembak Hem, i givim plante insperesen, mo tu, i tijim plante samting long yumi evriwan. Taem wan grup blong ol gadman blong tempol we i holem tul blong faet, mo ol soldia blong Rom oli kasem Getsemane blong holem mo arestem Jisas, Pita i karemaot naef blong faet blong hem mo i katemaot raet sora blong wokman blong wan hae pris.²⁴ Nao, Sevya i tajem sora blong wokman, mo i bin hilim Hem.²⁵ Plis, luk se Hem i go mo i blesem man we bae i kam holem hem, mo i yusum semfala paoa blong heven we Hem i bin save yusum blong blokem blong oli holem Hem mo hangem Hem long kros.

Tingting long olsem wanem nao oli putum Masta i pas long Kot mo oli panisim Hem long fored blong Paelat blong oli hangem Hem long kros.²⁶ Long taem we Hem i pas long Kot, Hem i talem: “?Yufala i ting se mi no save singaot long Papa blong mi blong i givhan long mi? Sapos mi singaot long hem, wantaem nomo bambae hem i sanem ol enjel, we oli moa long twelef kampani blong ol soldia, blong oli kam lukaot long mi.”²⁷ Be yet, “Jaj we I No Save Finis blong olgeta we oli stap laef tugeta wetem olgeta we oli ded”²⁸ i kasem jajmen long wan man blong politik. “Mo Jisas i no talem wan samting nating long olgeta. Nao Paelat i sapraes tumas long hem.”²⁹ Fasin blong Sevya blong no stap flas, i gat pruf long hem long ansa blong Hem we i gat disiplin, i save holembak Hem, mo fasin blong no wantem yusum bigfala paoa blong Hem, blong gud blong Hemwan bakegen.

Momon i talem se fasin blong no stap flas i fandesen we evri paoa mo presen long saed blong spirit oli kamaot long hem.

“From samting ia, sapos wan man i gat fet, hem i mas nid gat hop; from sapos i no gat fet, i no save gat eni hop.

“Mo bakegen, luk mi talem long yufala se hem i no save gat fet mo hop, hemia nomo sapos i hem i no gat fasin blong no stap flas mo tingting blong hat blong hem i stap daon.

“Sapos i olsem, fet blong hem mo hop i blong nating, from i no gat wan we God i akseptem long fored blong hem, sapos i no olgeta we i no stap flas mo tingting blong hat blong olgeta i stap daon, mo sapos wan man i no stap flas mo tingting blong hat blong hem i stap daon, mo i talemaot tru long paoa blong Tabu Spirit se Jisas i Kraes, hem i mas nid gat bigfala lav; from sapos hem i no gat bigfala lav hem i nating; from samting ia hem i mas nid gat bigfala lav.³⁰

Sevya i talem: “Mo olgeta we oli no stap flas bae oli kasem blesing from bae oli kasem wol ia.”³¹ Fasin blong no stap flas i wan pat we i nid insaed long tabu fasin blong man, mo yumi save kasem mo developem insaed long laef blong yumi, from, mo tru long Atonmen blong Sevya.

Mi testifae se Jisas Kraes i Ridima blong yumi we i laef bakegen long ded mo i stap laef. Mo mi promes se bambae Hem i lidim, protektem mo mekem yumi kam strong moa taem yumi stap wokbaot wetem Spirit blong Hem we i no stap flas.Mi talemaot tru witnes blong mi long saed blong ol trutok mo promes ia, long tabu nem blong Jisas Kraes, amen.