2018
Wan Moa Dei
May 2018


Wan Moa Dei

Yumi evriwan i gat wan “tedei” blong laef, mo ki blong mekem dei ia blong yumi, i sakses, i blong wantem blong mekem sakrifaes.

Samfala yia i pas, ol fren blong mi oli gat wan naesfala bebi we nem blong hem Brigham. Afta we hem i bon, Brigham i bin kasem wan sik we i mekem hem i handikap, mo i minim tu se Brigham bae i no save laef longtaem. Wan dei taem Brigham mo famli blong hem i bin stap visitim tempol, Brigham i bin talem wan toktok; tu taem hem i se, “Wan moa dei.” Long nekis dei blong hem, Brigham i ded.

Pikja
Brigham
Pikja
Famli blong Brigham
Pikja
Gref blong Brigham

Mi bin visitim gref blong Brigham wanwan taem, mo taem mi mekem, bae mi tingting long toktok ia “wan moa dei.” Mi traem blong tingting se i minim wanem, wanem nao toktok ia i minim long laef blong mi blong save se mi gat wan moa dei nomo blong laef. ?Hao nao bae mi tritim waef blong mi, ol pikinini blong mi, mo ol narafala man? ?Hao nao bae mi save gat fasin blong save wet longtaem mo stap naes? ?Hao nao bae mi lukaotem gud bodi blong mi? ?Hao nao bae mi save prea mo stadi long ol skripja long wan moa gud wei? Mi ting se, long wan wei o long nara wei, yumi evriwan long wan taem bae i gat “wan moa dei” blong luksave—blong luksave se yumi mas yusum gud taem we yumi gat.

Insaed long OlTesteman, yumi ridim stori blong Hesekia, king blong Juda. Profet Aesea i bin anaonsem long Hesekia se bae hem i ded.Taem we hem i harem ol toktok blong profet, Hesekia i bin stat blong prea, askem strong, mo krae wetem wan strong tingting. Mekem se long taem ia, God i bin letem Hesekia i laef blong 15 moa yia. (Luk Aesea 38:1–5.)

Sapos oli talem long yumi se yumi no save laef longtaem, bae yumi tu yumi askem strong blong laef moa longtaem from ol samting we yumi sapos blong mekem, o save mekem i defren.

Nomata long taem, Lod, wetem waes blong Hem, i plan blong givim long wanwan long yumi wan samting we yumi sua long hem: yumi evriwan i gat wan “tedei” blong laef, mo ki blong mekem dei blong yumi i sakses i blong wantem blong mekem sakrifaes.

Lod i se, “Luk, naoia oli singaotem tedei kasem taem we Pikinini blong Man i kam, mo i tru, hem i wan dei blong sakrifaes” (D&C 64:23; oli ademap italik).

Toktok ia sakrifaes i kamaot long toktok ia long Latin sacer, we i minim “tabu,” mo facere, we i minim “blong mekem,” long nara toktok blong mekem ol tabu samting, blong givim ona long olgeta.

“Sakrifaes i givim i kam ol blesing blong heven” (“Praise to the Man,” Hymns, no. 27).

?Long ol wanem wei nao bae sakrifaes i mekem ol dei blong yumi i gat mining mo i gat blesing?

Faswan, sakrifaes blong yuwan i mekem yu kam strong moa mo givim valiu long ol samting we yumi sakrifaes from.

Sam yia i pas long wan fast Sandei, wan olfala sista i bin kam long pulpit mo serem testemoni blong hem. Hem i stap long wan siti we oli singaotem Ikitos, we hem i long Amason long Peru. Hem i bin talem long mifala se long taem we hem i bin baptaes, hem i bin gat wan gol blong kasem ol odinens blong tempol long Lima, Peru.Hem i bin fetful blong pem wan ful taeting mo sevem smol mane blong sam yia.

Glad blong hem blong go long tempol mo kasem ol tabu odinens insaed, hem i bin tokbaot olsem: “Tedei mi save talem se mi filim rere blong go tru long vel. Mi mi wan hapi woman olgeta long wol ia; mi bin sevem mane, mo yu no save talem blong hamas yia, blong go visitim tempol, mo afta seven dei long reva mo 18 aoa long bas, long en mi bin go insaed long haos blong Lod.Taem mi aot long tabu ples ia, mi talem long miwan, afta evri sakrifaes we mi bin nidim blong mekem blong go long tempol, bae mi no letem eni samting i mekem mi blong no tinghevi long kavenan we mi bin mekem; from i olsem se mi westem taem nomo. !Hemia i wan komitmen we i series!”

Mi bin lanem long swit sista ia se sakrifaes blong yuwan i wan spesel paoa we i lidim yumi long ol desisen mo blong stanap long ol strong tingting blong yumi. Sakrifaes blong yumiwan i lidimol aksen blong yumi, ol komitmen mo ol kavenan blong yumi mo i mekem ol tabu samting oli gat mining.

Nambatu, ol sakrifaes we yumi mekem blong ol nara man, mo hemia we ol nara man oli mekem blong yumi, oli kam ol blesing blong yumi evriwan.

Taem mi bin wan studen long skul blong fiksim tut, i luk olsem ekonomi blong kantri i no bin gud tumas. From se praes blong ol samting i go antap, i mekem valiu blong mane i go daon bigwan long wan dei i go long nekis dei.

Mi tingbaot yia we mi sapos blong stat blong go long klas blong lanem fiksim tut; mi nidim blong gat evri tul blong mekem wan operesen bifo mi statem semesta ia. Papa mo mama i bin sevem mane we mi nidim. Be wan naet, wan bigfala samting i hapen. Mifala i go blong pem ol tul ia, mo faenemaot se mane ia we mifala i gat naoia hem i naf nomo blong pem tu twisa blong pulumaot tut—hemia nomo. Mifala i bin kambak hom emti han mo wetem hat we i hevi mo wetem tingting ia, blong mi nomo save go long yunivesiti long semesta ia. Wan taem nomo, mama blong mi i se, “Teila, kam wetem mi; yumitu go.”

Mitufala i bin go long ol ples blong pem mo salem ol ring mo jen. Taem mitufala i bin kasem wan stoa, mama i bin karemaot long paos blong hem wan smol blu sofsof bag we insaed i gat wan naes gol jen blong han we oli raet long hem se, “Blong dia gel blong mi i kam long papa blong yu.” Hem i bin jen we bubuman blong mi i bin givim long hem long betdei blong hem. Afta hem i salem jen ia long fored blong mi.

Taem hem i tekem mane, hem i se, “Sapos i gat wan samting we mi sua long hem, hem i we bae yu kam wan dentis. Go mo pem evri tul we yu nidim.” Nao, ?yu save talem wanem kaen studen mi bin kam stat long taem ia afta? Mi wantem kam wan bes studen mo finisim ol stadi kwik from mi bin save hae praes blong sakrifaes we hem i stap mekem.

Mi bin lanem se ol sakrifaes we olgeta we yumi lavem oli mekem blong yumi i givimbak paoa long yumi olsem wan kolkol wota long medel blong drae ples. Kaen sakrifaes olsem i givim hop mo paoa blong mekem samting.

Nambatri, eni sakrifaes we yumi mekem i smol komperem long sakrifaes blong Pikinini blong God.

?Wanem nao praes blong wan gol jen blong han komperem long sakrifaes blong stret Pikinini blong God? ?Olsem wanem nao yumi save givim ona long sakrifaes ia we i nogat en? Evri dei yumi save tingbaot se yumi gat wan moa dei blong laef mo stap fetful. Amulek i tijim se: “Yes, mi wantem se yufala i kam fored mo yufala i nomo mekem hat blong yufala i kam strong; from luk, nao i taem mo dei blong fasin blong sevem man blong yufala; mo taswe, sapos yufala i sakem sin mo no mekem hat blong yufala i kam strong, naoia nomo bae bigfala plan blong fasin blong pemaot man i wok long yufala” (Alma 34:31 Long nara toktok, sapos yumi givim long Lod sakrifaes ia blong wan hat we i fulap wetem sore mo wan spirit we i wantem sakem sin, naoia nomo ol blesing blong bigfala plan ia blong glad bae i kam long laef blong yumi.

Plan blong pemaot man i hapen mo hemia tangkyu long sakrifaes blong Jisas Kraes. Olsem we Hem i tokbaot, sakrifaes ia “i bin mekem mi, mi God, we mi hae long evriwan, mi seksek from soa long bodi, mo blad blong mi i ronaot long evri hol blong skin blong mi, mo mi safa tugeta long bodi mo long spirit—mo mi no wantem dring kap ia we i konkon, mo mi wantem holemtaet mi” (D&C 19:18).

Mo hem i from sakrifaes ia nao, afta folem stret fasin blong sakem sin tru, yumi save filim hevi blong ol mistek mo sin blong yumi oli aot.I tru gilti, sem, soa, harem nogud, mo lukdaon long yumiwan i nomo gat be klia tingting, stap hapi, glad mo hop i tekem ples.

Semtaem tu, taem yumi ona mo talem tangkyu from sakrifaes blong Hem, yumi save kasem long wan moa gud wei strong tingting ia wantem kam wan ol moa gud pikinini blong God, blong stap longwe long sin, mo blong kipim ol kavenan bitim bifo.

Mo, olsem Inos, afta we Lod i fogivim ol sin blong yumi, bae yumi filim yumiwan se yumi wantem sakrifaesem mo wantem wan gudlaef blong ol brata mo sista blong yumi (luk long Inos 1:9 Mo bae yumi wantem evri “wan moa dei” blong folem moa invitesen we Presiden Howod W. Hanta i givim long yumi taem hem i se: “Stretem wan rao. Lukaotem wan fren we yu fogetem. Karemaot tu tingting mo riplesem wetem tras. … Givim wan sopsop ansa. Leftemap tingting blong wan yut. Soemaot respek blong yu long toktok mo long ol wok blong yu. Kipim wan promes. No gat filing ia blong harem nogud, kros, mo fraet. Fogivim wan enemi. Talem sore. Traem blong andastanem samting. Jekem wanem we yu wantem wetem ol nara man.Tingbaot nara man fastaem. Stap kaen. Stap naes. Laf smol moa. Talem tangkyu. Welkamem wan strenja. Mekem hat blong wan pikinini i glad. … Talemaot lav blong yu mo talem bakegen” (Teachings of Presidents of the Church: Howard W. Hunter [2015], 32; oli karem long “What We Think Christmas Is,” McCall’s, Dec. 1959, 82–83).

Bae yumi fulumap ol dei blong yumi wetem ol samting ia mo paoa ia we sakrifaes blong yuwan mo sakrifaes we yumi mekem blong ol narawan, o kasem long ol narawan, oli givim long yumi. Mo long wan spesel wei, bae yumi glad long pis mo glad se sakrifaes blong Wan Stret Pikinini Ia Nomo i givim long yumi; yes, pis ia we oli tokbaot taem yumi ridim se Adam i bin foldaon blong mekem se man i save stap, mo ol man oli stap—yu yu stap—blong yu save gat glad (luk long 2 Nifae 2:25). Glad ia i wan tru glad we sakrifaes mo Atonmen blong Sevya Jisas Kraes nomo i save provaedem.

Hem i prea blong mi se yumi folem Hem, se yumi bilivim Hem, se yumi lavem Hem, mo se yumi filim lav ia we Hem i bin soem tru long sakrifaes blong Hem evri taem we yumi gat janis blong laef wan moa dei. Long nem blong Jisas Kraes, amen.