Ol Odinens blong Stap Sevem Man Bae I Givim Yumi Gudfala Laet
I Kam long Elda Taniela B. Wakolo
Blong Olgeta Seventi
Blong tekpat long ol odinens mo onarem ol kavenan we i go wetem, bae i givim gudfala laet mo proteksen long wol ia we i stap go tudak moa oltaem.
Ol brata mo sista. Mi glad wetem yu from gospel ia, o from doktrin blong Kraes.
Wantaem, wan fren i bin askem Elda Neil L. Andersen taem hem i wan Seventi, se olsem wanem nao hem i bin filim blong toktok long fored blong 21,000 man long Konfrens Senta.Elda Andersen i bin ansa se, “I no ol 21,000 pipol ia we i mekem mi fraet; be hem i ol 15 brata ia we oli sidaon biaen long yu.” Mi bin laf long taem ia, be naoia, mi filim nao. O, mi lavem mo sastenem ol 15 man ia olsem ol profet, sia mo reveleta.
Lod i talem long Ebraham se tru long sid mo prishud blong hem, evri famli long wol bae oli kasem blesing “wetem ol blesing blong Gospel, … mo tu, hemia blong laef we i no save finis” (Abraham 2:11; luk tu long ol ves ia 2–10).
Ol promes blesing ia blong gospel mo prishud oli bin putumbak long wol ia mo afta long 1842, Profet Josef Smit i bin mekem se endaomen i gat sam man mo woman nomo i bin kasem. Mercy Fielding Thompson hem i bin wan long olgeta.Profet i talem long hem se, “[endaomen] ia bae i tekem yu aot long tudak i kam long gudfala laet.”1
Tedei mi wantem lukluk long ol odinens blong sevem man, we bae i givim long yu mo mi, gudfala laet ia.
Ol Odinens mo Ol Kavenan
Long Stap Tru Long Fet yumi ridim se: “Wan odinens hem i wan samting we oli mekem, we hem i tabu, mo atoriti blong prishud nomo i save mekem. [Ol] odinens [we] yumi nidim tumas blong save kam olsem wan god … oli singaotem ol odinens blong sevem man.I gat baptaes, konfemesen, oden i go long Melkesedek Prishud (blong ol man), tempol endaomen, mo siling mared.”2
Elda David A. Bednar i tijim se, “Ol odinens blong sevem man mo blong kam olsem wan god i stap tekem ples long Jos blong Lod we i kambak … we i folem ol stret rod we tru long hem ol blesing mo paoa blong heven i save folem i go long ol laef blong wanwan man.”3
Olsem wan koen we i gat tu saed, evri odinens blong sevem wan i fas wetem ol kavenan blong God. God i bin promesem yumi ol blesing sapos yumi fetful mo ona long ol kavenan ia.
Profet Amulek i bin talem, “Laef ia … i taem … blong rere blong mitim God” (Alma 34:32). ?Hao nao yumi rere? Taem yumi klin inaf blong kasem ol odinens. Mo tu, long toktok blong Presiden Russell M. Nelson, “yumi mas gohed blong stap long rod blong kavenan.” Presiden Nelson i gohed i se, “Komitmen blong yu blong folem Sevya taem yu mekem ol kavenan wetem Hem, mo afta, blong gohed blong holem ol kavenan ia, bambae i openem doa long evri blesing long saed blong spirit, mo blong kasem spesel janis ia we i stap long ol man, woman, mo pikinini long evri ples.”4
John mo Bonnie Newman, olsem plante long yufala, i bin wan ia we oli kasem ol blesing long saed blong spirit olsem we Presiden Nelson i promesem. Wan Sandei, afta we Bonnie i go long jos wetem ol trifala pikinini blong tufala, hem i talem long John, we hem i no wan memba blong Jos, “Mi no save mekem hemia miwan. Yu nid blong talem sapos yu wantem kam long jos blong mi o yu jusum wan jos we yumi save go tugeta long hem, be ol pikinini ia oli nidim blong save se papa blong olgeta i lavem God tu.” Long nekis Sandei mo evri nara Sandei, John i no kam long jos nomo; be hem i mekem wok, i stap plei piano blong plante wod, branj, mo ol Praemeri blong sam yia.Mi bin gat spesel janis ia blong mitim John long Epril 2015, mo long miting ia, mitufala i toktokraon se wan moa gud wei blong soem lav blong hem long Bonnie i blong tekem hem i go long tempol, be hemia i save hapen nomo sapos hem i baptaes.
Afta we hem i stap kam long Jos blong Jisas Kraes blong Ol Lata-dei Sent blong 39 yia, John i bin baptaes long 2015. Wan yia afta, John mo Bonnie i bin sil long Memfis Tenesi Tempol, hemia 20 yia afta we Bonnie i bin kasem endaomen blong hem. Boe blong tufala we i gat 47 yia i talem: “Papa i bin kam antap bigwan afta we hem i kasem prishud.” Bonnie i talem se “John i wan hapi man we i smael mo glad oltaem, be taem hem i kasem ol odinens mo ona long ol kavenan blong hem, i mekem hem i kam moa kwaet mo kaen.”
Atonmen ia blong Kraes mo Eksampol blong Hem
Plante yia i pas, Presiden Boyd K. Packer i bin givim woning se, “Gud fasin, sapos i no gat ol odinens blong gospel, bae i no save pemaot man mo i no save mekem man i kam olsem wan god.”5 I tru, yumi no nidim nomo ol odinens mo kavenan blong gobak long Papa, be yumi nidim tu, Pikinini blong Hem, Jisas Kraes, mo Atonmen blong Hem.
King Benjamin i bin tijim se tru mo long nem blong Kraes nomo bae Lod i sevem ol pikinini blong man (luk long Mosaea 3:17; luk tu long Ol Toktok blong Bilif 1:3).
Tru long Atonmen blong Hem, Jisas Kraes i pemaot yumi long ol risal blong Foldaon blong Adam mo mekem se yumi save sakem sin mo stap traem blong kam olsem wan god.Tru long laef blong Hem, Hem i putum eksampol blong yumi folem, blong kasem ol odinens blong sevem man, we long hem “i soem paoa blong God” (D&C 84:20).
Afta we Sevya i bin kasem odinens ia blong baptaes blong mekem “evri stret mo gud fasin i hapen” (luk long 2 Nifae 31:5–6), Setan i bin temtem Hem. I semmak, ol temtesen blong yumi i no save en afta baptaes o siling, be taem yumi kasem ol tabu odinens mo stap ona long ol kavenan we i kam wetem, i fulumap yumi wetem gudfala laet ia mo givim yumi paoa blong save kamaot mo winim ol temtesen.
Woning
Aesea i bin profesae se long ol las dei, “wol ia i kam doti … from se oli … jenisim ol odinens” (Aesea 24:5; luk tu long D&C 1:15).
Wan semmak woning, we i kam long Profet Josef Smit, we i se sam “bae oli kam kolosap long [Lod] wetem maot blong olgeta, … [mo] oli tijim doktrin olsem ol komanmen blong ol man, long fasin olsem blong God, be oli no luksave paoa blong tijing ia” (Joseph Smith—History 1:19
Pol tu i givim woning se plante bae “oli folem fasin blong Kristin man, be [oli no wantem] paoa blong God nating: no go kolosap long ol man olsem” (2 Timoti 3:5). Mi ripitim, no go kolosap long ol man olsem.
Plante long ol rabis fasin mo temtesen long laef oli olsem “ol wael dog” (Matiu 7:15). Bae hem i tru man ia blong lukaot sipsip nao we bae i rere, protektem mo wonem ol sipsip taem ol wael dog oli stap kam kolosap (luk long Jon 10:12). Olsem man we i wok blong man we i lukaot long sipsip mo wantem folem gud fasin blong hem, ?yumi yumi no man blong lukaot long ol sol blong yumiwan mo blong ol narawan tu? Wetem kaonsel blong ol profet, sia, mo reveleta, we yumi jes sastenem, mo wetem paoa blong presen we i Tabu Spirit, yumi save luk ol wael dog oli stap kam sapos yumi lukaot gud mo rere gud. Long nara wei, taem yumi ol man we i no lukaot gud long sol blong yumiwan, mo blong ol narawan, i putum evriwan long denja. Wok olbaot i lid i go long denja. Mi invaetem wanwan long yumi blong stap wan fetful man blong lukaot long sipsip.
Promes mo Testemoni
Sakramen i wan odinens we i helpem yumi blong stap long rod, mo taem yu klin inaf mo tekpat long hem i soem se yumi stap kipim ol kavenan we i go wetem ol nara odinens. Sam yia i pas, taem mi mo waef blong mi, Anita, i bin stap wok long Arkansas Smol Strong Ston Misin, nao mi bin go aot wetem tu yang misinari blong tij.Long taem blong lesen, gudfala brata ia we mifala i stap tijim i talem se “Mi bin go long jos blong yufala; ?from wanem yufala i mas kakae bred mo dring wota evri Sandei? Long jos blong mi, mifala i mekem tu taem nomo long wan yia, long Ista mo long Krismes, mo hemia i gat bigfala mining.”
Mifala i serem se hem i wan komanmen long yumi blong “mit tugeta fulap blong kakae bred mo dring waen” (Moronae 6:6; luk tu long D&C 20:75). Mifala i ridimaot strong Matiu 26 mo 3 Nifae 18. Hem i ansa se hem i no luk nating from wanem i impoten.
Afta mifala i serem tingting ia long hem: “Traem tingbaot se yu kasem wan aksiden. Yu bin kasem kil mo no save muv. Wan man i pas, mo i luk se yu no muv, mo i ringim imejensi namba, 911. Help i kam mo yu save muv bakegen.”
Mifala i askem brata ia, “Taem yu kam blong luksave raon long yu, ?wanem kwestin nao yu gat?”
Hem i talem se: “Bae mi wantem save se hao nao mi kam ia mo huia i faenem mi. Bae mi wanem talem tangkyu long hem evri dei from hem i bin sevem laef blong mi.”
Mifala i bin serem wetem gudfala brata ia olsem wanem Sevya i bin sevem laef blong yumi, mo olsem wanem yumi nidim blong talem tangkyu long hem !evri dei, evri dei, evri dei!
Afta mifala i askem: “Taem yu save se Hem i givim laef blong Hem from yu mo mifala, ?bae yu wantem kakae bred mo dring wota hamas taem olsem saen blong bodi mo blad blong Hem?”
Hem i se, “!mi kasem, mi kasem! Be wan moa samting. Jos blong yufala i no laef nating olsem hemia blong mifala.”
Wetem hemia, mifala i ansa: “?Bae yu mekem wanem sapos Sevya Jisas Kraes i kamtru long doa ia?”
Hem i se: “Naoia nomo, bae mi nildaon.”
Mifala i askem: “?Yu no filim olsem ia nao taem yu wokbaot i kam insaed long ol japel blong Ol Lata-dei Sent—fasin blong respek long Sevya?”
Hem i se, “!mi kasem, mi kasem, mi kasem!”
Hem i kam long jos long Ista Sandei mo stap kambak bakegen.
Mi invaetem wanwan long yumi blong askem yumiwan, “?Wijwan odinens, wetem sakramen, we mi nidim blong kasem? Mo ?wijwan kavenan we mi nidim blong mekem, blong kipim mo blong onarem?” Mi promes se blong tekpat long ol odinens mo onarem ol kavenan we i go wetem, bae i givim gudfala laet mo proteksen long wol ia we i tudak oltaem. Long nem blong Jisas Kraes, amen.