Tijing insaed long Hom—Wan Tabu Responsabiliti we I Givim Glad
I Kam long Devin G. Durrant
Fas Kaonsela long Sandei Skul Jeneral Presidensi
Mi askem help blong heven taem yumi stap traehad blong stap ol tija olsem Kraes insaed long ol hom blong yumi.
Dia waef blong mi, Julie, mo mi, i lukaotem sikis gudfala pikinini, mo haos i jes kam emti. Mi misim blong gat ol pikinini blong mifala long hom fultaem. Mi misim blong lanem samting aot long olgeta mo tijim olgeta.
Tedei, mi toktok i go long evri papa mo mama, mo evriwan we i wantem kam papa mo mama. Plante long yufala i stap lukaotem ol pikinini naoia. Long sam narawan, taem ia bae i stap kam i no longtaem. Mo long sam moa, blong kam papa o mama bae i wan blesing long fiuja. Mi prea se yumi evriwan i luksave se tabu responsabiliti ia we i givim glad, hem i blong tijim wan pikinini.1
Olsem papa mo mama, yumi presentem ol pikinini blong yumi long Papa long Heven mo long Pikinini blong Hem, Jisas Kraes. Yumi helpem ol pikinini blong yumi blong talem fas prea blong olgeta. Yumi lidim mo sapotem olgeta taem oli kam long rod blong kavenan2 tru long baptaes. Yumi tijim olgeta blong stap obei ol komanmen blong God. Yumi tijim olgeta abaot plan we God i gat long ol pikinini blong Hem, mo yumi helpem olgeta blong haremsave ol toktok blong Tabu Spirit. Yumi talem long olgeta ol stori blong ol profet bifo mo leftemap tingting blong olgeta blong folem olgeta we oli stap laef. Yumi stap prea blong oli win long laef mo harem i soa wetem olgeta long ol taem blong tes. Yumi testifae long ol pikinini blong yumi abaot ol blesing blong tempol, mo yumi traehad blong mekem olgeta oli rere gud blong go long ol fultaem misin. Yumi givim kaonsel wetem lav taem ol pikinini blong yumi oli kam papa mo mama. Be—iven afta—yumi neva stop blong stap papa mo mama blong olgeta. Yumi neva stop blong stap ol tija blong olgeta. Yumi neva rilis long ol koling ia we oli no save finis.
Tedei, bae yumi lukluk moa long samfala gudfala janis we yumi gat blong tijim ol pikinini blong yumi insaed long hom blong yumi.
Tijing long Famli Haos Naet
Bae yumi stat wetem famli haos naet, we i wan impoten samting tumas insaed long hom blong bilif we mi groap long hem. Mi tingbaot wan stret lesen we oli tijim mi long hem long famli haos naet, be mi tingbaot se mifala i neva mestem wan wik.3 Mi save wanem i impoten long papa mo mama blong mi.4
Mi tingbaot wan famli haos naet aktiviti we mi laekem tumas. Papa, bae i invaetem wan long ol pikinini blong hem blong tekem “Bigfala Tes.” Bae hem i givim, long pikinini, plante kaen instraksen, olsem, “Faswan, go long kijin, mo openem mo sarem aesbokis. Afta, ron i go long bedrum blong mi, mo karem wan stoking i kam we i stap long smol kabod blong mi. Afta, kambak luk mi, jiamjiam 3 taem, mo talem: ‘!Papa, mi mekem finis!’”
Mi laekem tumas taem hem i taem blong mi. Mi wantem se mi mas mekem gud long evri step, mo mi laekem tumas taem ia we mi save talem: “!Papa, mi mekem finis!” Aktiviti ia, i helpem mi blong bildimap tras blong mi mo i mekem i isi moa blong wan boe we i no save stap kwaet, blong lisingud taem Papa mo Mama i tijim wan gospel prinsipol.
Presiden Gordon B. Hinckley i kaonsel: “Sapos yu gat tu tingting long saed blong paoa blong famli haos naet, yu traem. Pulum ol pikinini blong yu oli kam raonem yu, tijim olgeta, serem testemoni blong yu long olgeta, ridim ol skripja tugeta mo gat wan gudfala taem tugeta.”5
Oltaem, bae i gat samting i kam blokem blong gat famli haos naet.6 I nomata hemia, mi invaetem yu blong faenem wan wei raon long ol samting we oli stanap long rod ia mo mekem famli haos naet i kam faswan—mo gat wan gudfala taem.
Famle Prea Tijing
Famli prea i wan nara stamba janis blong tij.
Mi lavem olsem wanem papa blong Presiden N. Eldon Tanner i tijim hem long taem blong famli prea. Presiden Tanner i talem hemia:
“Mi tingbaot wan taem we mifala i nildaon long famli prea, mo papa blong mi i talem long Lod: ‘Eldon i mekem wan samting tedei we hem i no sapos blong mekem; hem i sore from, mo sapos yu fogivim hem, bambae hem i nomo mekem samting ia bakegen.’
“Hemia i mekem se mi gat strong tingting blong nomo mekem samting ia bakegen—i wok i gud moa bitim hem i kilim mi.”7
Taem mi yang boe, samtaem bae mi harem inaf long wanem mi luk se tumas famli prea, mo tingting long miwan: “?Be yumi jes prea nomo?” Naoia, olsem wan papa, mi save se yumi neva save prea tumas olsem wan famli.8
Oltaem, mi sapraes tumas long wei we Papa long Heven i presentem Jisas Kraes olsem Pikinini blong Hem we Hem i Lavem.9 Mi laekem blong prea from ol pikinini blong mi mo talem nem blong olgeta, mo oli lisin long mi talemaot long Papa long Heven hamas mi lavem olgeta. Mi luk se i no gat wan moa gud taem blong talemaot lav blong yumi long ol pikinini blong yumi, bitim taem yumi stap prea wetem olgeta o stap blesem olgeta. Taem ol famli oli kam tugeta blong prea wetem tingting we i stap daon, oli stap tijim ol lesen we oli gat paoa mo oli stap olwe.
Stap Tij Oltaem
Tijing blong papa mo mama, i olsem wan dokta we i stap wok olwe, i wok oltaem. Yumi nidim blong stap rere oltaem blong tijim ol pikinini blong yumi from se yumi neva save wetaem janis ia bae i kam.
Yumi olsem Sevya, we tijing blong hem i no hapen oltaem long ol haos blong prea, be long ol nara ples blong evri dei—olsem long taem blong kakae wetem ol disaepol blong Hem, long taem blong kasem wota long wel, o taem i pas i bitim wan figtri.10
Sam yia i pas, mama blong mi i bin serem se tufala bes gospel storian blong hem wetem bigfala brata, Mat, hem i long wan taem we hem i stap foldem klos, mo nara taem, taem hem i stap draevem hem i go long dentis. Wan long ol plante samting we mi laekem tumas abaot mama blong mi, i we hem i rere oltaem blong tijim ol pikinini blong hem.
Tijing blong hem olsem mama i neva stop. Taem mi bin stap olsem wan bisop, mama blong mi, we i bin gat 78 yia long tetaem ia, i talem long mi se mi nidim blong go katem hea blong mi. Hem i bin save se mi nid blong stap wan eksampol, mo hem i no fraet blong talem stret long mi. !Mi lavem yu Mama!
Olsem wan papa, mi gat strong tingting blong stadi mo tingting hevi miwan long ol skripja blong save ansa taem ol pikinini blong mi, o ol apupikinini blong mi, oli kam mo singaot blong mi tij.11 “Sam long ol bes tijing taem i stat wetem wan kwestin, o wan wari insaed long hat blong wan memba blong famli.”12 ?Yumi, yumi stap lisin long ol taem ia?13
Mi laekem invitesen blong Aposol Pita: “Mo sapos ol man [mo mi ademap, pikinini] oli askem long yufala from wanem yufala i putum tingting blong yufala i stap long Kraes, oltaem yufala i mas rere blong givim ansa long olgeta.”14
Taem mi yang boe, papa blong mi mo mi i laekem blong jalenjem mitufala blong luk huia i save sekhan strong. Bae mitufala i skwisim han blong mitufala i strong blong mekem narawan i mekem fani fes from i harem i soa. Naoia, gem ia i no luk olsem wan fani gem, be long taem blong mifala, yes. Afta wan gem ia, Papa i lukluk stret long ae blong mi mo talem: “Yu gat ol strong han, Boe. Mi hop se han blong yu bae i gat paoa blong neva tajem wan yang woman long nogud fasin.” Afta, hem i invaetem mi blong stap klin long saed blong seks mo blong stap helpem ol narawan blong mekem semmak.
Elda Douglas L. Callister i serem hemia abaot papa blong hem: “Taem mifala i stap gobak hom afta wok wan dei, Papa, wantaem nomo i talem: ‘mi pem taeting blong mi tedei. Mi raetem “tangkyu” long jek blong taeting. Mi tangkyu long Lod blong save blesem famli blong yumi.
Elda Callister, afta i givim ona long papa-tija blong hem: “Hem i tijim mi tufala samting ia, aksen mo fasin blong stap obei.”15
Mi ting se hem i waes blong askem yumiwan wanwan taem: “?Wanem bae mi tijim,? o ?wanem nao mi stap tijim ol pikinini blong mi tru long ol aksen mo ol fasin blong mi blong stap obei?
Tijing long Famli Skripja Stadi
Famli skripja stadi i wan stret ples blong tijim doktrin insaed long hom.
Presiden Russell M. Nelson i talem: “Ol papa mo mama oli mas hang strong long toktok blong Lod, be tu, oli gat tabu wok ia blong tijim toktok ia long ol pikinini blong olgeta.”16
Taem Julie mo mi i stap lukaotem ol pikinini blong mitufala oli kam bigwan, mitufala i traem blong mekem samting oltaem mo yusum sam niu wei. Wan yia, mifala i disaed blong ridim Buk blong Momon long Spanis olsem wan famli. ?Ating from hemia nao Lod i bin singaotem wanwan long ol fofala pikinini blong mitufala blong go long ol fultaem misin long ples we oli toktok Spanis? Es Posible. (?I Posibol?)
Wan samting we i tajem mi, i taem Brata Brian K. Ashton i bin serem wetem mi, se hem mo papa blong hem i bin ridim evri pej blong Buk blong Momon tugeta taem hem i stap long sekendri skul. Brata Ashton i laekem ol skripja. Ol skripja, oli raetem i stap long maen mo hat blong hem. Papa blong Hem i planem sid ia taem brata Aston i wan yangfala boe, mo sid ia17 i bin gro i kam wan tri blong trutok wetem strong dip rus. Brata Ashton i bin mekem semmak wetem ol pikinini blong hem.18 Eit yia boe blong hem i bin askem hem: “?Papa, wetaem bae mi ridim Buk blong Momon wetem yu?”
Eksampol Tijing
Laswan, tijing blong yumi we bae i wok gud moa, i eksampol blong yumi. Yumi kasem kaonsel ia blong stap “soemaot gudfala eksampol long ol Kristin man, [long toktok, long storian, long jareti, long fet, long klin fasin.]”19
Long wan trip we i jes pas, Julie mo mi i go long jos mo luk ves ia long aksen. Wan yang man, we i stap rere blong go long misin, i toktok long sakramen miting.
Hem i talem: “Bae yufala i ting se papa blong mi i wan gudfala man long jos, be …” Hem i stop smol taem, i tingting gud, long wanem bae hem i talem afta. Hem i gohed mo talem: “Hem i wan man we i gud moa long hom.”
Mi talem tangkyu long yangfala man ia afta, from bigfala ona we hem i givim long papa blong hem. Afta, mi faenemaot se papa blong hem i bisop blong wod. Nomata we bisop ia i fetful long wok blong hem long wod, boe blong hem i bin filim se bes wok blong hem, hem i stap mekem long hom.20
Elda D. Todd Christofferson i givim kaonsel ia: “Yumi gat plante defren wei i stap blong tijim jeneresen we i stap kam antap, mo yumi mas givim bes tingting mo paoa blong yumi blong yusum ol defren wei ia. Antap long evriwan, yumi mas gohed blong leftemap tingting mo helpem ol papa mo mama blong kam ol tija we oli moa gud mo oli mekem samting oltaem, speseli, tru long eksampol blong olgeta.”21
Hemia nao wei we Sevya i stap tij long hem.22
Las yia, taem mifala i stap holidei wetem tufala yang pikinini blong mitufala, Julie i talem se bae mifala i go mekem ol proksi baptaes long tugeta tempol ia, Sent Joj mo San Diego Tempol. Mi komplen—long miwan—mi tingting: “Mifala i stap go long tempol long hom, mo naoia, mifala i stap long holidei. ?From wanem bae yumi no mekem wan samting we i blong holidei nomo? Afta long baptaes, Julie i wantem blong tekem pikja aotsaed long tempol. Kwaet nomo, mi komplen bakegen. Yufala i save wanem i hapen afta: mifala i tekem ol pikja.
Julie i wantem ol pikinini blong mitufala blong gat ol memori long hao mifala i bin helpem ol bubu blong mifala, mo mi tu. Mifala i no nidim wan lesen blong save se tempol i impoten. Mifala i stap laef folem tijing ia—from wan mama we i lavem tempol mo i wantem ol pikinini blong hem blong serem sem lav ia.
Taem papa mo mama i luklukaotem tufala, mo givim ol stret mo gud eksampol, ol pikinini oli gat ol blesing blong taem we i no save finis.
Las Toktok
Long yufala evriwan we i stap traehad blong mekem bes blong yufala blong tij insaed long hom blong yufala, bae yufala i faenem pis mo glad long ol hadwok blong yufala. Mo sapos yu filim se yu gat rum blong mekem gud moa, o nid blong rere moa, plis mekem folem wanem Spirit i talem yu blong mekem mo komitim yu blong tekem aksen.23
Elda L. Tom Perry i talem: “Helt blong eni sosaeti, hapines blong pipol blong hem, hao oli kam antap, mo pis blong olgeta, evriwan ia, rus blong olgeta i stap long fasin blong tijim pikinini insaed long hom.”24
Yes, hom blong mi naoia, i emti gud, be mi wet long singaot, mi rere mo wantem tumas blong gat sam moa janis blong tijim ol bigfala pikinini blong mi, ol pikinini blong olgeta mo sam dei, mi hop, ol pikinini blong olgeta bakegen.
Mi askem help blong heven taem yumi stap traehad blong stap ol tija olsem Kraes insaed long ol hom blong yumi. Long nem blong Jisas Kraes, amen.