Te peropheta a te Atua
Nā Elder Neil L. Andersen
Nō te Pupu nō te Tino ’Ahuru Ma Piti ’āpōsetolo
’Aita te hō’ē peropheta e ti’a i rōpū ia ’oe ’e te Fa’aora. E ti’a maoti rā ’oia i tō ’oe pae ma te fa’atoro i te rima i ni’a i te ’ē’a o te Fa’aora.
Tē fāri’i pōpou ato’a nei au ia Elder Gerrit Gong ’e ia Elder Ulisses Soares i te autaea’era’a ta’a ’ē mau o te Pupu nō te Tino ’Ahuru Ma Piti.
I roto i te pāturura’a i te peresideni Russell M. Nelson ’ei peropheta a te Fatu ’e ’ei peresideni o Te ’Ēkālesia a Iesu Mesia i te Feiā Mo’a i te mau Mahana Hope’a Nei, nō roto mai tātou i te hō’ē ’āmuira’a hanahana fa’auehia e tō te ra’i—mea hanahana nō te mea ’ua tīa’i-maoro-hia i te ra’i te mau ’ohipa i tupu i te hora i ma’iri, nā mua atu i te hāmanira’a o te ao. I teie mahana, nā roto i te peresideni Eyring, ’ua fa’a’ite mai te Fatu Iesu Mesia, ’oia e fa’atere nei i tāna ’ohipa, i tāna peropheta, tāna ti’a fa’atere i fa’atāhinuhia, ia tātou nei tōna mau ta’ata o te fafaura’a, ma te fa’ati’a ia tātou ’ia fa’a’ite i mua i te ta’ata i tō tātou ineine ’ia pāturu iāna ’e ’ia pe’e ho’i i tāna parau a’o.
I teie mau mirioni melo ’aita i’ō nei ia tātou i te pū ’āmuira’a nei, tē hina’aro nei au ’ia ’ite ’outou ē te Vārua o te Fatu i roto i teie fare i te taime nō te pāturura’a i te peresideni Nelson, ’ua ti’a roa mai tā ’outou i feruri a’ena—’ua ’ī i te mana vārua. E ’ere teie ’āmuira’a tā tātou tei fa’auehia e tō te ra’i i’ō nei noa i te pū ’āmuira’a nei, nā te ao ato’a nei rā—i roto i te mau fare purera’a nō Asia, nō Afirika ’e nō Amerika Apato’erau ; i te mau fare iho i Amerika rōpū ’e Amerika Apato’a ’e i Europa ; i raro a’e i te tahi mau tāmaru i Pātifita ’e te mau motu o te moana. Teie ’āmuira’a, tei te vāhi ïa o te ao tei reira ’outou, noa atu ā ’aita atu tā ’outou e rāve’a maori rā tē ha’aparera’a reo o tā ’outou niuniu ’āfa’ifa’i. ’Aita tā tātou ’āfa’ira’a rima i tai’ohia e tō tātou mau ’episekōpo, pāpū roa rā ’ua tāpa’ohia te reira i ni’a i te ra’i ’ei fafaura’a nā tātou i te Atua, ’e ’ua tāpa’ohia tā tātou ’ohipa i roto i te buka nō te ora.
E mā’iti te Fatu i tāna peropheta
Nā te Fatu iho e mā’iti i tāna peropheta. ’Aita e paraparaura’a poritita, ’aita e mārōra’a, ’aita e tāpa’ora’a i’oa, ’aita e fa’aru’era’a pupu, ’aita e hi’o-’ē-ra’a i te ta’ata, ’aita e ’āhuehue ’aore rā e ’ārepurepura’a. ’O vau ato’a, tē ha’apāpū atu nei au ē, ’ua pārahi mai te mana o te ra’i i rotopū ia mātou i roto i te piha ni’a o te hiero, ’a hā’ati ai mātou nā roto i te pure, i te peresideni Nelson, ’e ma te tapitapi ’ore ’ua putapū mātou i te fāri’ira’a te Fatu iāna.
Te mā’itira’a i te peresideni Nelson nō te tāvini ’ei peropheta nā te Fatu, erā ’ē te tau i ravehia. ’Ua tano te parau a te Fatu ia Ieremia i ni’a i te peresideni Nelson : « ’Aita ’oe i hāmanihia e au i roto i te ’ōpū, i ’ite ai au ia ’oe ; ’e ’aita ’oe i fānau, i fa’ata’ahia ai ’oe e au ; ’e ’ua ha’apa’ohia ’oe e au, ’ei peropheta nā te mau fenua ».1 ’A toru noa matahiti i ma’iri, e 90 matahiti tō Elder Nelson, ’o ’ōna te maha o te ’āpōsetolo maoro roa a’e, ’e e piti i roto i te toru maoro a’e iāna tei mea ’āpī a’e iāna. Nā te Fatu e mā’iti i tāna peropheta, nāna e fa’atere i te ora ’e te pohe. E 93 matahiti tō te peresideni Nelson, e mea maita’i roa tōna ea. Tē ti’aturi nei mātou e vai fa’ahou mai ’oia hō’ē ’aore rā e piti ’ahuru matahiti, tē tāmata nei rā mātou e tāparu iāna ’eiaha fa’ahou e fa’ahe’e i ni’a i te mau tua’āivi.
Tē pāturu nei tātou i te peropheta ’ei ta’ata fa’atāhinuhia nā te Fatu, ’ia pāpū maita’i rā ē, ’o te Atua noa tā tātou e ha’amori nei, tō tātou Metua i te Ao ra, ’e tāna Tamaiti hanahana. E mea nā roto i te mana, te aroha ’e te maita’i o tō tātou Fa’aora Iesu Mesia e noa’a ai ia tātou ’ia ho’i i mua i tō rāua aro i te hō’ē mahana.2
Nō te aha tātou e pe’e ai i te peropheta
’Ua ha’api’i ato’a rā Iesu i te hō’ē parau mau faufa’a rahi nō ni’a i te mau tāvini tāna e tono nei ia tātou. ’Ua nā ’ō ’oia : « ’O tei ’ite mai ia ’outou na, ’ua ’ite ïa iā’u, ’e ’o tei ’ite mai iā’u nei, ’ua ’ite ïa i tei tono mai iā’u nei ra ».3
Te ’ohipa faufa’a roa a’e a te peropheta o te Fatu, ’o te ha’apira’a ïa ia tātou nō ni’a i te Fa’aora ’e te arata’ira’a ia tātou iāna ra.
E rave rahi tumu ’ōhie nō te pe’era’a i te peresideni Russell M. Nelson. Tē parau ato’a nei te tahi e ’ere nō tā tātou ha’apa’ora’a e mea fa’ahiahia roa ōna. ’Ua riro mai ’oia ’ei taote i te 22ra’a o tōna matahiti, e taote tāpū māfatu tei fa’aturahia ’e e pionie tuiro’o i roto i te fa’atupura’a i te tāpūra’a māfatu oraora.
E rave rahi e ’ite i tōna pa’ari ’e te pa’ari o tāna mau fa’aotira’a : E iva ’ahuru matahiti i te ha’api’ira’a nō ni’a i te ora ’e te pohe, i te orara’a ma te pipiri ’ore, i te herera’a ’e i te ha’api’ira’a i te mau tamari’i a te Atua i te mau peho ato’a o te fenua, ’e tei pa’ari ma te ’itera’a rau i te fāri’ira’a e 10 tamari’i, e 57 mo’otua ’e e 118 hina (e nūmera e pa’uma noa nei ; nō fānau-noa-hia mai ra te hina tāne i teie mahana toru i ma’iri a’e nei).
Te feiā i mātau maita’i iāna, e fa’a’ite mai i tō te peresideni Nelson fa’aro’o ’e te itoito i mua i te mau fifi o te orara’a. I te ravera’a te māriri ’aita’ata i te ora o tāna tamāhine 37 matahiti, ’o Emily, ma te vaiiho mai i tōna hoa here ’e tā rāua e pae tamari’i na’ina’i, ’ua fa’aro’o vau iāna i te nā-’ō-ra’a ē : « ’O vau tōna metua tāne, e taote au ’e e ’āpōsetolo ho’i nā te Fatu Iesu Mesia, ’ua tītauhia rā iā’u ’ia pi’o i tō’u upo’o nō te fā’i ē : ‘’Ia tupu… tō ’oe hina’aro ’eiaha tō’u’ ».4
Te ta’ata tīa’i i ni’a i te pare
Noa atu ā, tē fa’ahiahia nei tātou i tōna mau ’aravihi tura ari’i, nō te aha tātou e pe’e ai i te peresideni Nelson ? Nō te aha tātou e pe’e ai i te peropheta ? Nō te mea ’ua pi’i te Fatu Iesu Mesia iāna ’e ’ua mā’itihia ’oia ’ei tīa’i i ni’a i te pare.
E pare fa’ahiahia te ’oire nō Carcassonne (Farāni) tei patuhia i te tau tahito ra o te mau fa’ehau ’ā’au ’uraeva ’e tē vai noa ra. E mau pare teitei i ni’a i te mau patu pāruru, tei patuhia nō te mau tīa’i e ti’a i ni’a i te ao ’e te pō, ma te tūtonu noa i te ātea i te mau ’enemi. ’Ia ’ite mai te tīa’i i te hō’ē ’enemi e haere mai ra, nā tōna reo fa’aara e pāruru i te ta’ata nō Carcassonne i te ’ohipa ata’ata e’ita tā rātou e nehenehe e ’ite.
E tīa’i i ni’a i te pare te hō’ē peropheta, i te pārurura’a ia tātou i te mau ata’atara’a pae vārua e’ita tā tātou e nehenehe e ’ite.
’Ua parau te Fatu ia Ezekiela ē : « ’Ua fa’ariro vau ia ’oe ’ei tīa’i i te ’utuāfare o ’Īserā’ela nei ; ’e teienei, e fa’aro’o mai ’oe i te parau [o] tō’u nei vaha, ’e nā ’ō nei atu ’oe i te a’o ia rātou ».5
Pinepine tātou i te parau nō tō tātou hina’aro e pe’e i te peropheta, e feruri na rā i te hōpoi’a teimaha tā te Fatu i tu’u i ni’a i tāna peropheta : « ’Aore a’era ’oe i parau atu ’ei a’o iāna i tāna ra parau ’ino ; e pohe ā taua ta’ata parau ’ino ra… e tītau mai ra vau i te ho’o i tōna toto i tō ’oe ra rima ».6
Hō’ē ’itera’a pāpū nō te ta’ata iho
Tē fāri’i nei tātou i te peresideni Nelson mai tā tātou e fāri’i ia Petero ’e ia Mose ’āhani tātou i ora i tō rāua ra tau. ’Ua parau te Atua ia Mose : « ’Ei pīha’i ato’a iho vau i tō vaha, ’e nā’u e fa’a’ite ia ’oe i te parau ’ia parau ’oe ra ».7 E fa’aro’o tātou i te peropheta o te Fatu ma te fa’aro’o ē, tāna mau parau « nō roto mai [ïa i tōna] iho vaha ».8
E fa’aro’o matapō ānei ? E ’ere. Tātou tāta’itahi tei fāri’i i te ’itera’a pāpū pae vārua nō te parau mau o te fa’aho’i-fa’ahou-ra’a mai o te ’evanelia a Iesu Mesia. E mea nā roto i tō tātou iho hina’aro, tō tātou ’āfa’ira’a i tō tātou rima i ni’a i teie po’ipo’i, te fa’a’itera’a i tō tātou hia’ai ’ia pāturu i te peropheta a te Fatu ma tō tātou « ti’aturi, [tō tātou] fa’aro’o ’e [tā tātou mau] pure ato’a »9 ’e ’ia pe’e i tāna parau a’o. Tei ia tātou nei, te feiā mo’a nō te mau mahana hope’a nei, te faufa’a ’ia fāri’i i tō tātou iho ’itera’a pāpū ē, nō ’ō mai te pi’ira’a o te peresideni Nelson i te Atua ra. Noa atu ā ’ua mātau roa tā’u vahine, ’o Kathy, i te peresideni Nelson fātata e toru ’ahuru matahiti i teienei, ’e noa atu ho’i ’aita tōna e fē’a’ara’a i te pere’ue hanahana i ni’a iāna, i te fa’ata’ara’ahia ’oia, ’ua ha’amata ’o Kathy i te tai’o i te tā’āto’ara’a o tāna mau a’ora’a ’āmuira’a rahi nō nā 34 matahiti i ma’iri, ma te pure nō te ha’apāpū rahi atu ā nō tōna ti’ara’a peropheta. Tē fafau atu nei au ē, e tae mai te reira ha’apāpūra’a rahi atu ā ia ’outou ’ia ’imi ’outou i te reira ma te ha’eha’a ’e te ti’amā.
Nō te aha ’ua ineine rahi tātou nō te pe’e i te reo o te peropheta ? Nō rātou e ’imi māite ra i te ’ora mure ’ore, e hopo’i mai te reo o te peropheta i te pāruru pae vārua i te taime ’āoira’a (turbulence) rahi.
Tē ora nei tātou i ni’a i te hō’ē paraneta ma te tahi mirioni reo. Te fa’ateni nei te natirara, tā tātou mau niuniu ’āfa’ifa’i, te mau mātini tei ’ī te ha’uti i tō tātou mata ma te fa’ateimaha i tō rātou mana i ni’a ia tātou, ma te tīa’i ē, e ho’o tātou i tā rātou mau tao’a ’e e pe’e ho’i i tā rātou mau tītaura’a.
Tē fa’aha’amana’o mai nei teie mau parau ’e te mau mana’o huru pau ’ore i te mau fa’aarara’a i roto i te pāpa’ira’a mo’a, e « ’āueue noa… i terā parau, i terā parau »,10 « patuhia e te mata’i »,11 ’e ’ia pau tātou « i te rāve’a a te ta’ata nei… o te ha’avare ra ».12
E tītau te tūtaura’a i tō tātou vārua i ni’a i te Fatu Iesu Mesia i te fa’aro’ora’a ia rātou tāna i tono. Mai te huru te pe’era’a i te peropheta i roto i te hō’ē ao ’ārepurepu, i te pū’ohura’a ia tātou i te ’ahu ta’oto tāmarū ’e te māhanahana i te mahana to’eto’e roa.
Te ao tā tātou e ora nei, e ao feruri, te mārō, te titotito mana’o, te ’āna’i parau ’e te tātara parau. E rave rahi hi’ora’a e mea au te uiuira’a te mana’o « Nō te aha ? » i roto i tō tātou orara’a, e fa’ati’a te reira i te mana o tō tātou ferurira’a ’ia arata’i i tā tātou mau mā’itira’a ’e mau fa’aotira’a rau tā tātou e fa’aruru nei i te mahana tāta’itahi.
Pinepine rā te reo o te Fatu e tae mai ma te tatara parau ’ore.13 Nā mua roa ’ino tō te ha’api’ira’a teitei tuatāpapara’a i te ’ino o te tai’ata i ni’a i te mau hoa fa’aipoipo ’e te mau tamari’i, ’ua parau te Fatu : « ’Eiaha ’oe e fa’aturi ».14 I ni’a atu i te ferurira’a, tē ha’afaufa’a nei tātou i te hōro’a o te Vārua Maita’i.
’Eiaha e māere
Noa atu ā tōna māru, pinepine te reo o te peropheta i te riro ’ei reo e ani ia ’outou ’ia taui, ’ia tātarahapa ’e ’ia ho’i mai i te Fatu ra. ’Ia tītauhia te fa’atītī’aifarora’a, ’eiaha e fa’ataere. ’E ’eiaha e huru ’ē i te taime e pāto’i te reo fa’aara o te peropheta i te mau mana’o tu’iro’o i tō tātou nei tau. E taora noa te feiā ti’aturi ’ore ’e te riri i tā rātou mau ’ōfa’i fa’ao’ō’ora’a i te taime e ha’amata te peropheta i te paraparau. ’Ia vai ha’eha’a ’outou i te pe’era’a i te parau a’o a te peropheta a te Fatu, tē fafau atu nei au ia ’outou i te ha’amata’ira’a pāruru hau atu ’e te hau.
’Eiaha e māere mai te mea i te tahi taime i te ha’amatara’a, ’aita tā ’outou huru hi’ora’a i tū’ati roa i te mau ha’api’ira’a a te peropheta a te Fatu. E taime te reira nō fāri’i i te ha’api’ira’a, nō te fa’aha’eha’ara’a, ’ia tūturi tātou nā roto i te pure. Tē haere nei tātou i mua ma te fa’aro’o, ma te ti’aturi i ni’a i te Atua, ma te ’ite ē, i roto i te tau e fāri’i mai tātou i te māramarama rahi a’e nō ’ō mai i tō tātou Metua i te Ao ra. ’Ua fa’ata’a mai te hō’ē peropheta i te hōro’a ’aifāito ’ore a te Fa’aora mai tei « horomi’ihia te hina’aro o te Tamaiti i te hina’aro o te Metua ».15 Inaha ho’i, te aurarora’a i tō tātou hina’aro i tō te Atua hina’aro, e ’ere roa atu ïa i te aurarora’a, ’o te ha’amatara’a rā o te hō’ē upo’oti’ara’a hanahana.
Vetahi e tāmata i te tātara hu’ahu’a roa i te mau parau a te Fatu, e fifi rātou ’ia ’ite e aha te reo o te peropheta ’e e aha te reo o te ta’ata.
I te matahiti 1982, e piti matahiti hou ’oia ’a pi’ihia ai ’ei huimana fa’atere rahi, ’ua nā ’ō te taea’e Russell M. Nelson : « ’Aita roa atu vau e uiui nei : ‘E aha te taime te peropheta e paraparau ai ’ei peropheta ’e te taime ’aita ?’ Tā’u e hi’o nei : ‘Nāhea vau i te riro rahi a’e mai iāna te huru ?’ » ’E ’ua nā ’ō fa’ahou ’oia : « Tā’u [arata’ira’a ’o tē] fa’aeara’a ïa e tu’u i te ui i ni’a i te mau parau a te peropheta, e tu’u rā i te hitirere ».16 E mea nā reira te hō’ē ta’ata ha’eha’a ’e te ha’apa’o i te pae vārua e mā’iti i te fa’atītī’aifaro i tōna orara’a. I teienei, e 36 matahiti i muri mai, ’o ’oia te peropheta.
’A ha’amara’a i tō ’outou fa’aro’o i te Fa’aora
I roto i tō’u iho nei orara’a ’ua ’ite au ē, ’ia tuatāpapa vau i te mau parau a te peropheta a te Atua nā roto i te pure, ’e ’ia fa’a’āfaro vau i te pae vārua i tō’u hina’aro, ma te fa’a’oroma’i, i ni’a i teie mau ha’api’ira’a fa’auru, e mara’a ato’a mai tō’u fa’aro’o i te Fatu ia Iesu Mesia.17 Mai te peu e mā’iti tātou e vaiiho i tāna parau a’o i te hiti ’e ’ia fa’aoti ’ua ’ite maita’i tātou iāna, e māuiui tō tātou fa’aro’o ’e e rumaruma tō tātou hi’ora’a ātea mure ’ore. Tē fafau atu nei au ia ’outou ē, ’a vai pāpū noa ai ’outou i roto i te pe’era’a i te peropheta, e mara’a noa ato’a tō ’outou fa’aro’o i te Fa’aora.
’Ua parau te Fa’aora : « Te mau peropheta ato’a… ’ua fa’a’ite ātea ato’a mai na ïa iā’u ».18
’Aita te hō’ē peropheta e ti’a i rōpū ia ’oe ’e te Fa’aora. E ti’a maoti rā ’oia i tō ’oe pae ma te fa’atoro i te rima i ni’a i te ’ē’a o te Fa’aora. Te hōpoi’a rahi roa a’e ’e te tao’a hōro’a faufa’a roa a’e a te hō’ē peropheta nō tātou, ’o tōna ’itera’a pāpū mau, tōna ’ite pāpū ē, ’o Iesu te Mesia. Mai ia Petero i tahito ra, tē fa’a’ite nei tō tātou nei peropheta : « ’O te Mesia [’o ’oia], te Tamaiti a te Atua ora ».19
’Ia tae i te hō’ē mahana, ’ia hi’o tātou i muri i tō tātou nei orara’a tāhuti, e pōpou tātou ’ua ta’ahi tō tātou ’āvae i te fenua i te tau o te hō’ē peropheta ora. I taua mahana ra, tē pure nei au ē e ti’a ia tātou ’ia parau ē :
’Ua fa’aro’o tātou iāna.
’Ua ti’aturi tātou iāna.
’Ua tuatāpapa tātou i tāna mau parau ma te fa’a’oroma’i ’e te fa’aro’o.
’Ua pure tātou nōna.
’Ua ti’a tātou i tōna pae.
’Ua nava’i tō tātou ha’eha’a nō te pe’e iāna.
’Ua here tātou iāna.
Tē vaiiho nei au i tō’u ’itera’a pāpū hanahana ē, ’o Iesu te Mesia, tō tātou Tāra’ehara ’e tō tātou Fa’aora, ’e ’o te peresideni Russell M. Nelson tāna peropheta fa’atāhinuhia i ni’a i te fenua nei. I te i’oa o Iesu Mesia, ’āmene.