’O te ta’ata ana’e ïa

I te fa’aineinera’a mātou i te patura’a o te hiero nehenehe nō Paris (Farāni), e ’ohipa tei tupu e’ita roa e mo’e iā’u. I te matahiti 2010, i te ’itera’ahia mai te vāhi nō te hiero, ’ua tītau te tāvana ’ia fārerei ia mātou nō te uiui rahi atu ā nō ni’a i tā tātou ’Ēkālesia. ’Ua riro te reira fārereira’a i te ta’ahira’a faufa’a rahi e noa’a ai te parau patura’a. ’Ua fa’aineine māite mātou i te tahi vauvaura’a tei roto te tahi mau hōho’a nehenehe maita’i nō te mau hiero a te ’Ēkālesia. Tō’u hia’ai rahi ho’i, ’ia ’ume teie mau hōho’a patura’a nehenehe i te tāvana ’ia turu i teie ’ōpuara’a tā mātou.

’Ua hitimahuta vau i te fa’a’itera’a mai te tāvana ē, e’ita rātou e hi’o i tā mātou vauvaura’a, e fa’atere rā tāna pupu i te tahi tītorotorora’a nō te ’ite ē, e aha mau ā tā tātou ’ēkālesia. Te ’āva’e nō muri iho, ’ua tītau-fa’ahou-hia mātou e haere e fa’aro’o i te parau fa’a’ite a te hō’ē melo ’āpo’ora’a ’oire, e ’orometua ha’api’i ho’i i te pae nō te ’ā’amu o te mau ha’apa’ora’a fa’aro’o. ’Ua nā ’ō mai terā vahine : « Nā mua roa, ’ua hina’aro mātou e māramarama ’o vai te mau melo o tā ’outou ’ēkālesia. ’A tahi, ’ua haere mātou i te hō’ē o tā ’outou mau purera’a ’ōro’a. ’Ua pārahi mātou i muri roa ’e ’ua hi’opo’a maita’i mātou i te mau ta’ata i roto i te ’āmuira’a, i te mea tā rātou e rave ra. I muri iho ’ua fārerei mātou i te mau ta’ata e fa’aea ra nā pīha’i iho—pīha’i iho i tā ’outou mau fare titi—’e ’ua ui atu mātou ia rātou e aha te huru te mau mōmoni ».

« Nā reira, e aha ïa tā ’outou i ’apo mai ? » ’Ua ui atu vau ma te taiā. ’Ua nā ’ō mai ’oia ē : « Tā mātou i ’ite mai, ’oia ho’i, ’o te ’Ēkālesia a Iesu Mesia i te Feiā Mo’a i te mau Mahana Hope’a Nei te mea piri roa a’e i te ’Ēkālesia tumu a Iesu Mesia, piri a’e i te tahi noa atu ’ēkālesia tā mātou i mātau ». ’Ua fātata roa vau i te parau atu ē : « ’Aita i tano roa ! E ’ere te ’Ēkālesia piri roa a’e ; ’o te ’Ēkālesia a Iesu Mesia—hō’ē ā ’Ēkālesia, te ’Ēkālesia mau ! » ’Ua fa’aea noa rā vau, ’ua pūpū atura vau i te hō’ē pure ha’amāuruuru i roto iā’u. ’Ua fa’a’ite maira te tāvana ia mātou ē, ’ia au i tā rātou i ’apo mai, ’aita tō rātou e mana’o pāto’i nō te patura’a i te hō’ē hiero i roto i tō rātou ’oire.

I teie mahana, ’ia mana’o vau i teie semeio, e mana’o māuruuru tō’u nō te pa’ari o te tāvana ’e nō tōna vārua hāro’aro’a. I ’ite ’oia ē, te tāviri nō te māramarama nō ni’a i te ’Ēkālesia, e ’ere ïa nā roto i te hi’ora’a i te hōho’a rāpae o te mau patu ’aore rā te ’itera’a i tāna huru fa’anahora’a nahonaho maita’i, e mea nā roto rā i te hi’ora’a i te mau mirioni melo ha’apa’o maita’i e tūtava nei ’ia pe’e i te hi’ora’a o Iesu Mesia i te mahana tāta’itahi.

Nō roto mai paha te tātarara’a nō te ’Ēkālesia i te tahi ’īrava i roto i te Buka a Moromona e nā ’ō ra : « ’E ’o tei bāpetizohia [’oia ho’i te mau pipi a te Fatu] i te i’oa o Iesu, ’o te parauhia ïa rātou i te ’ēkālesia a te Mesia ».¹

E nehenehe e parau ē, te parau nō te ’Ēkālesia, ’o te ta’ata ana’e ïa. ’O te parau nō ’outou, te mau pipi a te Fatu—rātou e here ’e e pe’e iāna ’e ’o tei rave i tōna i’oa i ni’a ia rātou nā roto i te fafaura’a.

’Ua fa’aau a’ena te peresideni Russell M. Nelson i te ’Ēkālesia mai te hō’ē pere’o’o nehenehe. E mea au roa nā tātou ’ia mā maita’i te pere’o’o, ’e ’ia ’ana’ana maita’i. E ’ere rā te pere’o’o nō te fatara’a i mua i te ta’ata ; nō te fa’auta rā i te mau ta’ata.² Mai te reira ato’a, e mea au nā tātou te mau melo o te ’Ēkālesia ’ia fāna’o i te mau vāhi ha’amorira’a nehenehe ’e te mā ’e te maita’i, ’e e mea au ato’a nā tātou te mau fa’anahora’a tupu maita’i. Terā rā e mau ’ohipa turu noa te reira. Tā tātou fā rahi, ’o te anira’a ïa i te tamaiti ’e te tamāhine tāta’itahi a te Atua ’ia haere mai i te Mesia ra ’e ’ia arata’i iāna i ni’a i te ’ē’a o te fafaura’a. ʼAore e mea faufa’a roa atu. Tā tātou ’ohipa, nō ni’a ana’e ïa i te ta’ata ’e te mau fafaura’a.

E ’ere ānei i te mea fa’ahiahia ē, te i’oa i heheuhia nō te ’Ēkālesia i fa’aho’ihia mai, tē tā’amu nei ïa i nā tuha’a faufa’a roa e piti i roto i te fafaura’a tāta’itahi o te ’evanelia ? ’A tahi, te i’oa o Iesu Mesia. Nāna teie ’Ēkālesia ’e ’o tāna noa tāra’ehara ha’amo’a ’e tāna mau fafaura’a ha’amo’a te ’ē’a i te fa’aorara’a ’e te fa’ateiteira’a. Te piti o te i’oa nō tātou ïa : te feiā mo’a, ’aore rā, tāna mau ’ite ’e tāna mau pipi.

’Ua ha’api’i mai au i te faufa’a nō te rōtahira’a i ni’a i te ta’ata i te tāvinira’a vau ’ei peresideni titi i Farāni. I te ha’amatara’a ta’u tāvinira’a, ’ua feruri au i te mau fā teitei nō te titi : te fa’atupura’a i te mau pāroita ’āpī, te patura’a i te mau fare purera’a ’āpī ’e te patura’a ato’a i te hō’ē hiero i tō mātou vāhi. I te ha’amāuruurura’ahia vau e ono matahiti i muri mai, ’aita hō’ē a’e o teie mau ’ōpuara’a i fa’aotihia. E nehenehe e mana’o i te reira ē, e manuia-’ore-ra’a rahi, terā rā, i roto i nā matahiti e ono, ’ua taui ri’i tā’u mau ’ōpuara’a.

I te pārahira’a vau i ni’a, i te mahana o tō’u ha’amāuruurura’a, e mana’o māuruuru ’e te manuia rahi tei ’ī i roto iā’u. ’Ua hi’o vau i te mata o nau hānerera’a melo i roto i te ’āmuira’a. ’Ua ti’a roa iā’u ’ia ha’amana’o i te hō’ē ’ohipa pae vārua i tupu ’e rātou tāta’itahi.

Tē vai ra te mau taea’e ’e te mau tuahine tei tomo i roto i te pape nō te bāpetizora’a, ’o rātou ’o tā’u i tu’urima i te parau fa’ati’a mātāmua nō te haere rātou e fāri’i i tō rātou mau ’ōro’a mo’a o te hiero ’e te feiā ’āpī ato’a ’e te mau ta’ata fa’aipoipo tā’u i fa’ata’a ’e i ha’amāuruuru ’ei misiōnare rave tāmau. E rave rahi atu ā ta’ata tā’u i aupuru atu ’a nā roto ai rātou i te tahi mau tāmatara’a ’e te mau ’ati o te orara’a. E here autaea’e pūai tō’u nō rātou tāta’itahi. ’Ua ’itehia mai iā’u te ’oa’oa mau i te tāvinira’a ia rātou ’e ’ua ’oa’oa vau i tō rātou mana’o fa’atura rahi atu ā ’e tō rātou ho’i fa’aro’o i te Fa’aora.

’Ua ha’api’i te peresideni M. Russell Ballard : « Te mea faufa’a roa a’e i roto i tā tātou mau hōpoi’a nō te ’Ēkālesia, e ’ere ïa te mau nūmera tei parauhia mai ’aore rā te mau ’āpo’ora’a i fa’atupuhia, ’o te mau ta’ata rā—tei aupuruhia hō’ē i te taime hō’ē mai tā te Fa’aora i rave—mai te peu ’ua fa’ateiteihia ’e ’ua fa’aitoitohia ē ’ua taui roa mai i te hope’a ».³

E au mau taea’e, e au mau tuahine, ’ua itoito ānei tātou i roto i te ’evanelia, ’aore rā ’ua ’ohipa rahi noa tātou i roto i te ’Ēkālesia ? Te tāviri, ’oia ho’i, e pe’e i te hi’ora’a o te Fa’aora i roto i te mau mea ato’a. Mai te peu e nā reira tātou, e rōtahi iho ā tātou i ni’a i te mau ta’ata ’eiaha rā i ni’a i te ravera’a i te mau ’ohipa i fa’auehia ’e te fa’atupura’a i te mau fa’anahora’a.

’Ua ui a’enei ’outou ’ia ’outou iho ē, e aha rā ’āhani e haere mai te Fa’aora i tā tātou pāroita ’aore rā ’āma’a i teie sābati i muri nei ? E aha tāna e rave ? E ha’ape’ape’a ānei ’oia ē, ’ua tano maita’i i te mau hōho’a ’aore rā ’ua ’āpapa-tano-hia te mau pārahira’a i roto i te piha ? ’Aore rā e hi’o ānei ’oia i te hō’ē ta’ata tāna e nehenehe e here, e ha’api’i ’e e ha’amaita’i ? Penei a’e e hi’o atu ’oia i te hō’ē melo ’āpī ’aore rā te hō’ē hoa e fāri’i popou, te hō’ē taea’e ’aore rā te hō’ē tuahine ma’ima’i tei hina’aro i te tāmarū, ’aore rā te hō’ē taure’are’a ’arori nō te fa’ateitei atu ’e nō te fa’aitoito atu.

E aha te piha ha’api’ira’a tā Iesu e haere atu ? E’ita vau e māere ’ia haere ’oia i te mau tamari’i o te Paraimere nā mua. E tūturi paha ïa ’oia nō te paraparau ia rātou mata ’e mata. E parau atu ’oia i tōna here ia rātou, e fa’ati’a ’oia i te tahi ’ā’amu, e ha’amāuruuru ’oia ia rātou i tā rātou mau hōho’a pāpa’i ’e e fa’a’ite pāpū atu ’oia nō tōna Metua i te Ra’i. E ’ōhie noa tōna huru ’e te ’āfaro, ’aita e ha’avarevarera’a. E nehenehe ānei tā tātou e nā reira ?

Tē parau fafau atu nei au ia ’outou ē, ’ia tūtava ’outou i te pe’e i te tārena a te Fatu, ’aita e mea faufa’a a’e i te ’imira’a i terā mau ta’ata tā ’outou e nehenehe e tauturu ’e e ha’amaita’i. I te purera’a, e rōtahi atu ’outou i ni’a i te ha’api’ira’a i te ta’ata ’e te ha’aputapūra’a i tō rātou ’ā’au. Tā ’outou māna’ona’ora’a, ’o te fa’aitoitora’a ïa i te taime ha’aputapūra’a pae vārua ’eiaha rā te fa’anahonahora’a i terā fa’a’oa’oara’a hope te au, ’o te aupurura’a ïa i te mau hoa melo ’eiaha rā te tāpa’opa’ora’a i te nūmera hāhaera’a i ravehia. E ’ere ïa tō ’outou parau, tō rātou rā ’o tā tātou e pi’i nei tō tātou mau taea’e ’e tō tātou mau tuahine.

I te tahi taime e parau tātou [nā roto i te reo peretāne] ē, e haere tātou i te ’ēkālesia. Teie noa rā, ’ua hau atu te ’Ēkālesia i te hō’ē fare ’aore rā te hō’ē vāhi ta’a ’ē. E parau pāpū teie, i roto ānei i te hō’ē nohora’a ha’eha’a, i te hō’ē vāhi mo’emo’e o te ao ’aore rā i’ō nei i te pū fa’atere o te ’Ēkālesia i Roto Miti nei. Nā te Fatu iho i parau : « I te vāhi e ’āmui ai e to’opiti e to’otoru ma tō’u nei i’oa, tei rotopū ato’a ïa vau ia rātou i reira ».⁴

Noa atu te vāhi e haere tātou, e nā muri te ’Ēkālesia ia tātou : i te ’ohipa, i te ha’api’ira’a, i te tau fa’afa’aeara’a ’e i tō tātou iho ā rā fare. E nehenehe tō tātou pārahira’a i te hō’ē vāhi ’e tō tātou mana fa’auru e fa’ariro i te hō’ē noa atu vāhi ’ei vāhi mo’a.

Tē ha’amana’o ra vau i te hō’ē paraparaura’a ’e tō’u hoa e ’ere i te melo nō tā tātou ha’apa’ora’a. ’Ua māere ’oia i te ’itera’a ē, ’o te ta’ata ti’amā ato’a i roto i tā tātou ’Ēkālesia tē nehenehe e fāri’i i te autahu’ara’a. ’Ua nā ’ō mai ’oia : « E fea ïa ta’ata tei mau i te autahu’ara’a i roto i tā ’oe pāroita ? »

’Ua pāhono atu vau : « I roto i te 30 ’e te 40 ».

’Ua napu ri’i ’oia, ’ua nā ’ō mai : « I roto i tā’u ’āmuira’a, hō’ē noa tahu’a. Nō te aha e mea tītauhia terā rahira’a tahu’a i te po’ipo’i sābati ?

’Ua ha’aferuri tāna uira’a iā’u, ’ua fa’auruhia vau e pāhono atu ē : « ’Ua tano ’oe. ’Aita vau e mana’o ra e tītauhia terā rahira’a ta’ata tei mau i te autah’uara’a i te purera’a i te sābati. Tītauhia rā hō’ē ta’ata tei mau i te autahu’ara’a i roto i te ’utuāfare tāta’itahi. ’E ’ia ’ere te hō’ē ’utuāfare i te taea’e tei mau i te autahu’ara’a, e anihia i te tahi atu mau ta’ata tei mau i te autahu’ara’a ’ia hi’o ’e ’ia aupuru i terā ’utuāfare ».

E ’ere tā tātou ’Ēkālesia i te ’ēkālesia sābati noa. E tāmau noa tā tātou ha’amorira’a i roto i te hepetoma, noa atu te vāhi tei reira tātou ’e te mea e rave ra tātou. ’O tō tātou iho ā rā mau fare « te mau vāhi mo’a mātāmua o tō tātou ha’apa’ora’a ».⁵ Tei tō tātou fare tātou e pinepine ai i te pure, i te ha’amaita’i, i te tuatāpapa, i te ha’api’i i te parau a te Atua ’e i te tāvini ma te aroha mau. E nehenehe tā’u iho e fa’a’ite pāpū atu ē, e mau vāhi mo’a tō tātou mau fare i reira te Vārua e rahi ai—mai tō tātou mau vāhi ha’amorira’a, ’e i te tahi taime, hau atu i te reira.

Tē hōro’a atu nei au i tō’u ’itera’a pāpū ē, ’o te ’Ēkālesia teie a Iesu Mesia. Tōna pūai ’e tōna oraora, nō roto mai ïa i te mau ’ohipa i te mau mahana ato’a o tā tāna mau miriōni pipi e tūtava nei i te mahana tāta’itahi ’ia pe’e i tōna hi’ora’a teitei hope nā roto i te aupurura’a ia vetahi ’ē. Tē ora nei te Mesia, ’e tē fa’atere nei ’oia i tāna ’Ēkālesia. ’O te peresideni Russell M. Nelson te peropheta tāna i mā’iti nō te fa’atere ’e nō te arata’i ia tātou i teie nei tau. Tē fa’a’ite pāpū nei au nō te reira, i te i’oa o Iesu Mesia, ’āmene.