Givhan Olsem we Sevya I Mekem

!Hem i wan top blesing blong laef long wan taem we yumi gohed blong kasem revelesen we i kam long God! Taem yumi luk fored mo akseptem fulwan “evri samting we God i stap putumbak,”¹ we i stap hapen mo bae i gohed blong hapen tru ol profesi long taem blong yumi, i soem se yumi rere from Seken Kaming blong Sevya.²

Mo wei we i moa gud blong rere blong mitim Hem i blong traehad blong kam olsem Hem, tru long fasin blong lav mo givhan long ol narawan! Olsem we Jisas Kraes i bin tijim olgeta we oli stap folem Hem long stat blong dispensesen ia, “Sapos yufala i lavem mi, bae yufala i wok blong mi.”³ Seves blong yumi long ol nara man i soem fasin blong yumi olsem disaepol mo tangkyu mo lav blong yumi long God mo long Pikinini blong Hem, Jisas Kraes.

Samtaem yumi ting se yumi mas mekem wan bigfala samting blong “kaontem” se yumi givim seves ia nao long neiba blong yumi. Be yet, ol smol wei blong givim seves i tajem bigwan ol narafala man—mo tu, yumiwan bakegen. ?Wanem nao Sevya i mekem? Tru long hae presen ia blong Atonmen mo Laef Bakegen long Ded blong Hem—we yumi selebretem long naesfala Ista Sandei ia—“i nomo gat wan nara man we i gat strong paoa olsem ova evri samting we i bin laef mo hemia we bae i laef yet long wol ia.”⁴ Be Hem i smael tu, i bin toktok wetem, wokbaot wetem, lisin long, gat taem blong, leftemap tingting, bin tijim, fidim, mo fogivim. Hem i bin givim seves long ol famli mo fren, ol neiba mo ol strenja long sem fasin, mo Hem i bin invaetem pipol Hem i mitim mo ol fren blong glad long ol rij blesing blong gospel blong Hem. Ol “simpol” aksen blong seves mo lav ia i stap tedei olsem eksampol blong hao yumi givhan tedei.

Taem yu gat spesel janis ia blong ripresentem Sevya long ol wok blong yu blong givhan, askem yuwan, “?Hao nao mi save serem laet blong gospel wetem man ia o famli ia? ?Wanem nao Spirit i givim insperesen long mi blong mekem?”

Fasin blong Givhan i save hapen long plante defren wei. ?So hem i luk olsem wanem?

Fasin blong givhan i luk olsem ol kworom blong ol elda mo Rilif Sosaeti oli kaonsel tugeta wetem prea long saed blong ol wok blong olgeta. Ol lida bae oli nomo stap givimaot ol pis pepa, be wok ia blong kaonsel fes tu fes from wanwan man, woman, mo famli, oli givim long ol givhan brata mo givhan sista.Hem i olsem yumi go wokbaot, kam tugeta blong wan gem naet, givim seves, o givim seves tugeta. Hem i olsem blong go visit mo mit tugeta o toktok long fon o onlaen o teks. Hem i olsem blong go putum wan betdei kad mo singsingaot from wan soka gem. Hem i olsem blong serem wan skripja o kwotem wan konfrens toktok we bae i gat mining long man, woman, pikinini ia we yu stap visitim. Hem i olsem blong toktok raon long wan gospel kwestin mo serem testemoni blong mekem i moa klia mo pis i stap. Hem i olsem se yumi kam pat blong laef blong wan nara man mo kea long hem. Hem i olsem wan givhan intaviu we yumi toktok raon, long wan kwaet mo stret wei abaot ol nid mo ol samting we oli gat. Hem i olsem wod kaonsel i kam tugeta blong ansa long wan bigfala nid.

Kaen fasin blong givhan ia i mekem wan sista we i muvaot longwe long hom i kam strong moa taem hasban blong hem i stat blong go long yunivesiti. Hem i no gat telefon blong yusum mo wetem wan smol bebi blong lukaotem, hem i no filim gud long ples ia, hem i lus mo stap hemwan. Wan Rilif Sosaeti sista we i no bin givim notis fastaem, i bin kam long doa wetem wan sus blong bebi, tekem tufala long trak blong hem, mo go soem stoa long tufala. Sista ia we i hapi tumas i se, “!Hem i sevem laef blong mi!”

Wan olfala sista blong Afrika i soem wanem ia tru givhan taem oli bin askem hem blong lukaotem wan sista we i no bin kam long Jos longtaem.Taem hem i go long haos blong sista ia, hem i faenem se oli bin kilim mo stilim ol samting blong hem, hem i no gat inaf kaekae, mo i nomo gat klos mekem se hem i no filim gud blong go long jos long Sandei. Woman ia we oli askem hem blong givhan long hem, i bin karem sora blong hem blong lisin, ol kaekae long garen blong hem, ol skripja blong ridim, mo kam fren blong hem. Sista ia we i “lus” i kambak kwik long jos mo naoia hem i gat wan koling from hem i save oli lavem hem mo hem i impoten.

Blong kombaenem ol hadwok blong Rilif Sosaeti wetem niufala fasin blong wok blong kworom blong ol elda bae i givim wan yuniti we i save givim sam gudgudfala risal. Fasin blong givhan i kam wan wok we oli oganaesem tugeta blong fulfilim prishud diuti blong “visitim haos blong wanwan memba” mo blong “lukaotem jos oltaem, mo stap wetem mo mekem olgeta i kam strong moa,”⁵ semmak olsem blong kasem stamba tingting blong Rilif Sosaeti i blong helpem wanwan long olgeta i rere from ol blesing blong laef we i no save finis.⁶ Blong wok tugeta folem daereksen blong bisop, kworom blong ol elda mo Rilif Sosaeti presidensi oli save kasem insperesen taem oli lukaotem ol moa gud wei blong lukaot mo kea long wanwan man, woman mo famli.

Bae mi givim yu wan eksampol. Wan mama i bin kasem kansa. Hem i bin kasem tritmen i no longtaem, mo kwiktaem, ol Rilif Sosaeti sista i bin stat wok, oli plan hao blong mekem kaekae, transpot i go long apoenmen long dokta, mo ol nara sapot. Oli visitim hem oltaem, stap laf wetem hem. Long semtaem, kworom blong Melkesedek Prishud i stat muv. Wok blong olgeta i blong jenisim bedrum mo ples blong swim blong mekem i isi blong lukaot long sik sista ia. Ol yang man oli yusum han mo bodi blong olgeta long impoten tim wok ia. Mo ol yang woman tu oli joen: oli bin arenjem blong stap fetful blong karem dog i go wokbaot evri dei. Taem i pas, mo wod i gohed wetem seves blong olgeta, blong gat moa, mo stretem weaples i gat nid. I klia se i wan wok blong lav, wanwan memba i givim hemwan, we i soem se oli wan blong stap kea long spesel wei we i no blesem nomo sista ia we i safa be wanwan memba blong famli blong hem.

Afta ol traehad ia, sista ia i ded from kansa mo oli berem hem. ?Wod ia i pulum win afta we oli tingting se oli bin mekem wan gud wok mo i finis? No, ol yang woman oli gohed blong karem dog i go wokbaot, ol prishud kworom i gohed blong givhan long papa ia mo famli blong hem, mo ol Rilif Sosaeti sista oli gohed blong help wetem lav blong faenem nid mo wanem oli gat. Ol brata mo sista, hemia hem i givhan—!hemia hem i lav olsem we Sevya i mekem!

Wan moa blesing blong anaonsmen ia we i kam antap, hem i wan janis blong ol yang woman stat long yia 14 i go 18, blong oli tekpat long givhan olsem ol kompanion long ol Rilif Sosaeti sista, semmak olsem ol yang man, olgeta tu, oli kompanion blong olgeta Melkesedek Prishud brata. Ol yut oli save serem ol spesel presen we oli gat mo gro long saed blong spirit taem oli givim seves long saed blong ol adalt long wok blong sevem man.Blong mekem ol yut oli pat blong wok blong givhan i save leftemap namba blong Rilif Sosaeti mo leftemap namba blong ol memba we kworom blong ol elda i stap kea long olgeta.

Taem mi stap tingbaot ol top yang woman we mi bin save, mi glad long ol Rilif Sosaeti sista we bae oli gat spesel janis blong kasem blesing tru strong tingting, talen, mo spirit blong olgeta yang woman ia taem oli wok saedsaed o kasem givhan tu long olgeta. Mo mi glad tumas long janis ia we ol yang woman bae oli lid mo kasem tijing mo kam strong moa tru long ol sista long Rilif Sosaeti. Janis ia blong tekpat blong bildim kingdom blong God bae hem i blong gud blong ol yang woman, blong helpem olgeta blong rere gud blong fulfilim ol rol blong olgeta olsem ol lida long Jos mo long komuniti mo olsem wan we i help insaed long ol famli blong olgeta. Olsem we Sista Bonnie L. Oscarson i bin serem yestedei, ol yang woman, oli “wantem givim seves. Oli nidim blong save se oli spesel mo oli impoten long wok blong sevem man”⁷

I tru, from ol yang woman oli stap givhan finis long ol narafala man, nomata se oli no talem long olgeta o no luksave olgeta long wanem oli mekem. Wan famli we mi save oli bin muvaot longwe i go long wan niu ples we oli no save wan man nating. Long fas wik nomo, wan gel blong 14 yia long niu wod blong olgeta i stanap long fored blong doa wetem wan plet blong ol kuki biskit blong welkamem olgeta long eria.Mama blong hem i stanap biaen long hem mo stap smael from hem i draevem hem i kam, mo sapotem wanem gel blong hem i wantem mekem blong givhan.

Wan nara mama i bin wari wan dei long gel blong hem we i gat 16 yia mo i no kam hom long taem we hem i stap kam long hem. Taem gel ia i kasem haos, mama blong hem i askem se hem i kam wea wetem wari. Gel ia blong 16 yia i ansa kwaet nomo se hem i tekem flaoa i go long wan wido we i stap klosap long olgeta. Hem i bin luksave se olfala woman ia i stap hemwan nomo mo filim blong visitim hem. Mama blong hem i agri fulwan, yang woman ia i gohed blong visitim olfala woman ia. Tufala i bin gud fren, mo frensip blong tufala i bin gohed olsem blong plante yia.

Wanwan long ol yang woman ia, mo plante moa olsem olgeta, oli luksave nid blong nara man mo wok blong mitim nid ia. Hem i nomol blong ol yang woman blong kea mo serem samting, mo oli save yusum olgeta wetem ol adalt sista olsem patna blong olgeta.

Nomata yia blong yumi, taem yumi tingting blong givhan long wan moa gud wei, yumi askem, “Wanem nao hem i nidim?” Putum tugeta kwestin ia wetem wan tru fasin blong givim seves, bae Spirit i lidim yumi blong leftemap mo mekem wan i kam moa strong. Mi bin harem plante stori blong ol brata mo sista we oli gat blesing tru long wan simpol aksen blong mekem oli pat mo welkamem olgeta long jos, wan gudfala imel o teks mesej, wan kontak blong mit long hadtaem, wan invitesen blong tekpat long wan grup aktiviti, o wan ofa blong help taem i gat wan hadtaem. Ol singgel papa mo mama, ol niu konvet, ol lesaktiv, ol wido, o ol yut we oli stap traehad, oli nidim blong yumi lukluk moa long olgeta mo oli kam fas wok blong ol givhan brata mo sista. Wok tugeta blong Presidensi blong kworom blong ol Elda mo Rilif Sosaeti i blong givimaot ol wok long stret fasin.

Long en, wanem we i moa impoten hem i we, tru givhan i hapen wan afta wan wetem lav i pusum yu blong mekem wok ia. Praes mo blesing mo gud samting we i kam tru long tru fasin blong givhan i we hem i jenisim laef! Taem we hat blong yumi i open mo glad blong lavem mo mekem pat, leftemap tingting mo kamfotem man, nao paoa blong yumi blong givhan i no save stop. Wetem lav we i pusum yumi, ol merikel bae oli hapen, mo bae yumi faenem ol wei blong karemol sista mo brata we oli “lus” oli kam pat fulwan long gospel blong Jisas Kraes.

Sevya i eksampol blong yumi long evri samting—i no long wanem we bae yumi mekem nomo be from wanem yumi mas mekem.⁸ “Laef blong Hem long wol i bin [wan] invitesen long yumi—blong lukluk i go longwe moa, blong fogetem ol problem blong yumiwan mo [blong] go mo helpem ol nara man.”⁹ Taem yumi akseptem janis, wetem tru hat, blong givhan long ol sista mo brata blong yumi, yumi gat blesing ia blong kam moa gud long saed blong spirit, kam save gud moa tingting blong God, mo andastanem moa plan blong Hem blong helpem wanwan man blong gobak long Hem. Bae yumi rere gud moa blong luksave ol blesing mo glad blong serem ol blesing ia long ol nara man. Hat blong yumi bae i singsing tugeta wetem ol voes blong yumi:

Bae yumi soem glad mo tangkyu mo lav blong yumi long God tru givhan blong yumi wetem lav long ol sista mo brata blong yumi we i no save finis.¹¹ Long en bae oli wan long filing olsem ol pipol blong Amerika blong fastaem oli bin eksperiensem blong 100 yia afta we Sevya i bin kamaot long graon blong olgeta.

Mo i bin hapen se i no bin gat eni rao … from lav blong God we i bin stap insaed long ol hat blong ol pipol.

“… I no bin gat ol tingting blong wantem samting blong narafala man, o ol rao, … mo i tru we i no save gat wan pipol we i moa hapi long medel blong evri pipol we han blong God i bin mekem olgeta.”¹²

Mi glad blong serem witnes blong miwan se hemia hem i ol jenis we oli kam tru long revelesen mo insperesen blong God mo we, taem yumi folem olgeta wetem wiling hat, bae yumi rere moa gud blong mitim Pikinini blong Hem, Jisas Kraes, taem Hem i kambak. Yumi stap kam klosap blong kam Saeon pipol mo bae yumi filim bigfala glad wetem olgeta we yumi helpem olgeta long rod blong stap disaepol. Blong yumi mekem olsem, hem i prea blong mi long nem blong Jisas Kraes, amen.