2018
Rere blong Mitim God
May 2018


Rere blong Mitim God

Blong wokem ol tabu responsabiliti we oli givim long yumi long stret mo gud fasin, yuniti mo ikwol fasin bae i mekem yumi rere blong mitim God.

Eliza R. Snow, taem hem i tokbaot blong Ketlan Tempol dedikesen (we hem i bin stap long hem) i talem: “Ol seremoni blong dedikesen ia, oli save praktis long olgeta, be i no gat wan lanwis long wol ia we i save tokbaot hao heven i soemaot hem long memori dei ia. Ol enjel oli kamkamaot long sam, mo evriwan we i stap i filim se sam pipol blong heven oli stap, mo wanwan hat i fulap long wan glad we oli no save tokbaot, mo i fulap long glori.”1

Wanem heven i bin soemaot long Ketlan Tempol, oli fandesen blong stamba tingting blong Jos we i kambak blong Jisas Kraes, we i blong mekem Jisas i sevem ol pikinini blong Papa long Heven mo blong oli kam olsem ol god.2 Taem yumi stap rere blong mitim God, yumi save kam blong save wanem nao ol tabu responsabiliti we God i givim taem yumi luklukbak long ol tabu ki ia we oli bin putumbak insaed long Ketlan Tempol.

Long dedikesen prea, Profet Josef Smit i putum hem daon mo askem Lod blong “akseptem haos ia … we Hem i bin givim komanmen blong oli bildim.”3

Wan wik afta, long Ista Sandei, Lod i bin kamaot long wan naes visen mo i bin akseptem tempol blong Hem. Hemia i bin hapen long 3 Epril 1836, kolosap 182 yia stret bifo Ista Sandei tedei. Hem i bin taem tu blong Pasova—wan long ol taem ia we Ista mo Pasova oli folfolem olgeta. Afta we visen ia i finis, trifala profet blong bifo, Moses, Elaeas, mo Ilaeja, oli kamkamaot mo oli givim ol ki we i bin nid blong mekem ol stamba tingting blong Lod blong Jos blong Hem we i kambak long dispensesen ia. Stamba tingting ia, oli talem i simpol, be wetem respek, we i kam tugeta blong Isrel, blong silim olgeta olsem ol famli, mo mekem wol i rere from Seken Kaming blong Lod.4

Tugeta ia, Ilaeja mo Moses, blong tufala i kamkamaot, “i semmak wetem tradisen blong Ol Man Jiu, we bae Moses mo Ilaeja, bae tufala i kam tugeta long en blong taem.”5 Long doktrin blong yumi, hemia i mekem i kamtru stamba kambak blong samfala ki “we oli givim blong ol las dei mo blong wan las taem, insaed long dispensesen ia we evri wok blong God i kamtru.”6

Ketlan Tempol, folem ples mo saes blong hem, i no klia tumas. Be long saed blong bigfala mining blong hem long famli blong man, i tajem man blong taem we i no save finis. Ol profet blong bifo oli bin putumbak ol prishud ki blong mekem se ol odinens blong gospel blong Jisas Kraes we i sevem man blong taem we i no save finis oli stap. Hemia i mekem se bigbigfala glad i kam long ol fetful memba.

Olgeta ki ia, oli givim “paoa we i kam long heven,”7 from ol tabu responsabiliti we God i givim, we bifo mo tedei, oli stap olsem fas stamba tingting blong Jos.8 Long gudfala dei ia long Ketlan Tempol, oli putumbak ol trifala ki ia:

Faswan, Moses i kamkamaot mo i givim ol ki blong kam tugeta blong Isrel aot long ol fo kona blong wol ia, we i misinari wok.9

Nambatu, Elaeas i kamkamaot mo givim ol ki blong dispensesen blong gospel blong Ebraham, we insaed, i putumbak kavenan blong Ebraham.10 Presiden Russell M. Nelson i bin tijim se stamba tingting blong ol ki blong kavenan i blong mekem ol memba oli rere from kingdom blong God. Hem i talem: “Mifala i save huia mifala, mo mifala i save wanem God i wantem mifala blong mekem.”11

Nambatri, Ilaeja i kamkamaot mo givim ol ki blong siling paoa insaed long dispensesen ia, we i wok blong famli histri mo mekem ol tempol odinens, we i mekem se Kraes i save sevem olgeta we oli laef mo olgeta we oli ded.12

I gat, anda long daereksen blong Fas Presidensi mo Kworom blong Olgeta Twelef Aposol, trifala eksekutiv kaonsel long ol hedkwota blong Jos we oli lukluk long ol trifala tabu responsabiliti we God i givim, folem olgeta ki we oli bin putumbak long Ketlan Tempol.Oli, Misinari Eksekutiv Kaonsel, Prishud mo Famli Eksekutiv Kaonsel, mo Tempol mo Famli Histri Eksekutiv Kaonsel.

?Yumi Stap Stanap Wea Tedei blong Stap Mekem Olgeta Tabu Responsabiliti ia we God I Givim?

Faswan, long saed blong wok ia we Moses i kam putumbak ol ki blong kam tugeta blong Isrel, tedei, kolosap 70 taosen misinari oli stap raon long wol, oli stap prijim gospel blong karem olgeta we Hem i bin jusum oli kam wanples. Hemia i stat blong bigfala mo gudfala wok ia i kamtru, wok ia we Nifae i bin luk finis long medel blong, tugeta, Ol Jentael mo haos blong Isrel. Nifae i bin luk taem blong yumi taem olgeta Sent blong God bambae oli stap long ful fes blong wol, be namba blong olgeta i smol nomo from fasin nogud we i stap. Be, hem i bin luk finis se “bae oli holem stret mo gud fasin olsem naef blong faet mo bae oli holem paoa blong God wetem bigfala glori.”13 Taem oli lukluk i gotru long smol histri blong Jos we i kambak, misinari wok i bin gudwan tumas. Yumi stap luk visen blong Nifae i stap kamtru. Nomata ol namba oli smol nomo, bambae yumi gohed long hadwok mo go kasem olgeta we bae oli ansa long mesej blong Sevya.

Nambatu, Elaeas i kamkamaot mo givim ol ki blong dispensesen blong gospel blong Ebraham, mo talem se tru long yumi mo laen blong yumi, evri jeneresen afta long yumi bae oli kasem blesing. Long konfrens ia, oli presentem ol impoten infomesen blong help blong mekem olgeta Sent oli kam stret moa mo blong mekem olgeta oli rere from kingdom blong God.14 Anaonsmen ia, long prishud sesen, long saed blong ol kworom blong ol elda mo ol hae pris, bambae i mekem se i gat moa prishud moa mo atoriti. Hom mo visiting tijing, naoia we i “givhan” olsem oli bin tijim gud long sesen ia, bambae i mekem ol Ol Lata-dei Sent oli rere blong mitim God.

Nambatri, Elaeja i givim ol siling ki blong dispensesen ia. Long yumi, we yumi stap laef tedei, wok insaed long ol tempol mo blong famli histri i bigbigwan evriwan. Spid ia bae i gohed mo bae i spid moa kasem Seken Kaming blong Sevya, nogud ful wol ia bae Lod i “spolem gud … long taem we bae Hem i kam.”15

Famli histri wok, we heven i blesem tru long teknoloji, i kam antap bigwan ova long ol las yia. Bae yumi no waes nating blong stap glad nomo from tabu responsabiliti ia we God i givim mo ting se Anti Jen o sam nara famli moa bae i lukluk long hemia. Bae mi serem ol toktok blong Presiden Josef Filding Smit we i mekem man i sek: “I no gat wan bae i save ronwe long bigfala wok ia.” Aposol i mas mekem wok ia, semmak olsem eni elda mo sista. Ples, o taetol, o long seves insaed long Jos, … bae i no givim raet long wan blong i sarem ae blong givim janis blong sevem wan ded famli blong hem.”16

Naoia, yumi gat ol tempol oli raonem wol, mo yumi gat ol mane we oli stap long basket blong Tempol Sapot blong helpem olgeta we oli stap long nid, we oli stap longwe long wan tempol.

Olsem wanwan man mo woman, bae i gud blong yumi skelem wok blong yumi blong stap mekem misinari wok, tempol mo famli histri wok, mo ol wok blong stap rere blong mitim God.

Stret mo Gud Fasin, Yuniti, mo Ikwol Fasin long Fes blong Lod Oli Stap Andanit blong Sapotem Ol Tabu Responsabiliti Ia

Long saed blong stret mo gud fasin, laef ia i taem blong yumi evriwan i rere blong mitim God.17 Buk blong Momon i givim plante eksampol long ol nogud risal we i hapen taem wanwan man o woman, o grup i no stap obei long ol komanmen blong God.18

Long laeftaem blong mi, ol trabol mo wari blong wol ia oli muv long wan en i go kasem nara en longwe—stat long ol samting nating i go kasem ol series nogud fasin. I gud tumas blong luk se rabis fasin we man i no agri wetem, oli soemaot mo talemaot long pablik.19 Kaen rabis fasin ia we man i no agri long hem, i agensem ol loa blong God, mo blong sosaeti. Olgeta we oli andastanem plan blong God oli mas agensem rabis fasin we man i agri long hem, we i wan sin tu. Ofisol famli toktok blong yumi i go long wol, i givim woning se “olgeta we oli stap brekem ol kavenan blong jastiti, olgeta we oli stap mekem nogud long ol man, woman o pikinini blong olgeta, [o, long kes ia, eni narawan] … bambae olgeta ia oli mas lukaot from God bambae i jajem olgeta from ol samting ia.”20

Taem yumi stap lukluk raon, yumi stap luk fasin nogud mo adiksen we i prapa spolem gud ol man long evri kona. Sapos, olsem wanwan man o woman, yumi rili wari abaot las jajmen blong Sevya abaot yumi, yumi mas lukaotem rod blong sakem sin. Mi fraet se plante pipol oli nomo filim se bae oli ansa long God mo oli no luk long ol skripja o ol profet blong faenem rod. Sapos yumi, olsem wan sosaeti, bae yumi luklukgud long risal blong sin, bae fulap fulap man bae oli agensem ponografi mo fasin blong tekem woman olsem samting nating.21 Olsem we Alma i bin talem long boe blong hem, Korianton, insaed long Buk blong Momon, “fasin nogud i neva bin fasin blong stap glad.”22

Long saed blong yuniti, Sevya i talem: “sapos yufala i no stap wan, yufala i no blong mi.”23 Yumi save se spirit blong raorao, hem i blong devel.24

Long dei blong yumi, oda long skripja blong yumi kam wan, man i no wantem save, mo long plante pipol, oli lukluk moa blong stap folem ol klan o grup,25 folem posisen, folem man o woman, kala blong skin mo mane. Long plante kantri, ating kolosap evriwan, ol pipol oli seraot bigwan folem wei blong laef blong olgeta. Insaed long Jos blong Lod, wan kalja nomo we yumi stap folem mo stap tijim, i kalja blong gospel blong Jisas Kraes. Yuniti we yumi stap lukaotem, i blong yumi kam wan wetem Sevya mo ol tijing blong Hem.26

Taem yumi stap lukluk long ol fas stamba tingting blong Jos, evriwan oli stanap long ikwol fasin long fes blong Lod27 o blong stap folem kalja blong gospel blong Jisas Kraes. Long saed blong misinari wok, ol fas samting blong kwalifae from baptaes oli, blong putum i stap daon long fes blong God, mo kam fored wetem wan hat we i gat sore mo wan spirit we i wantem sakem sin.28 Edukesen, mane, kala blong skin, o ples we yu kamaot long hem, oli no luk nating long hem.

Antap long hemia, ol misinari oli givim seves, wetem tingting we i stap daon, long weaples oli singaotem olgeta long hem. Oli no traem blong wok folem ol standet blong wol long saed blong posisen, o hao oli rere from ol fiuja wok. Oli givim seves wetem ful hat, ful paoa blong tingting, ful maen mo ful paoa blong olgeta long eni ples oli putum olgeta long hem. Oli no jusum misinari kompanion blong olgeta, mo oli lukaot wetem strong tingting blong developem ol fasin olsem hemia blong Kraes,29 we i stap long hat blong kalja blong Jisas Kraes.

Ol skripja oli soem rod long rilesensip blong yumi we i moa impoten. Sevya i tijim se fasfala komanmen i blong “lavem Lod, God blong yu.” Mo sekenwan i blong “mas lavem neiba blong yu olsem yuwan bakegen.”30

Afta, Sevya i eksplenem se evriwan i neiba blong yumi.31 Buk blong Momon i mekem i klia se i no save gat ol grup, ol traeb, o level.32 Yumi mas stap wan mo ikwol long fes blong God.

Ol tabu odinens mo tabu responsabiliti, oli bildimap antap long hemia nao. Mi wantem luk se eksperiens blong yu i semmak long hemia blong mi insaed long tempol. Taem bae mi aot long evri dei wok blong mi long San Fransisko mo go long Oklan Tempol, bae mi filim wan bigfala lav mo pis. Bigfala pat nao i blong filim se mi stap kolosap moa long God mo ol stamba tingting blong Hem. Ol odinens blong sevem laef, oli fas lukluk blong mi, be wan impoten pat blong ol naesfala filing ia, i ikwol fasin mo yuniti we i stap insaed long tempol. Evriwan i dresap long waet klos. I no gat pruf we wan i gat mane, i gat posisen, o i skul gud o no; yumi evriwan ol brata mo sista we i putum tingting i stap daon long fes blong God.

Insaed long tabu siling rum, mared we i no save finis i semmak long evriwan. Mi lavem se kapol ia we i kamaot long wan smol famli mo kapol ia we i kamaot long wan rij famli, bae tufala i gat semfala eksperiens nomo. Oli werem sem kaen klos, mo mekem ol semfala kavenan taem oli stap long semfala olta. Oli kasem tu ol semfala prishud blesing we i no save finis. Hemia, hem i hapen insaed long wan naes tempol we ol taeting blong ol Sent oli bildim olsem wan tabu haos blong Lod.

Blong stap mekem ol tabu responsabiliti we God i givim, folem stret mo gud fasin, yuniti, mo ikwol fasin long fes blong Lod, i tekem hapines mo pis long yuwan insaed long wol ia, mo i stap mekem yumi rere from laef we i no save finis long wol we i stap kam.33 Hem i stap mekem yumi rere blong mitim God.34

Mifala i stap prea se wanwan long yufala, nomata wanem situesen blong yu, bae i toktok wetem bisop blong yu mo kam klin inaf blong kasem wan tempol rekomen.35

Mifala i glad se plante moa memba oli stap rere blong go long tempol. Blong plante yia, namba i stap go antap, blong ol adalt we oli klin inaf blong gat tempol rekomen. Ol limit yus rekomen tu blong ol yut we oli klin inaf tu i kam antap. I klia se ol fetful stamba memba blong Jos, oli strong bitim bifo.

Olsem las toktok, plis yufala i mas save gud se ol senia lida blong Jos we oli stap prisaed ova long ol tabu stamba tingting blong Jos, oli stap kasem help we i kam long heven. Help ia i kam tru long Spirit mo samtaem, i kam stret long Sevya. Tufala kaen help ia nao, oli stap kasem. Mi mi glad tumas se mi bin kasem kaen help ia. Be help ia, i kam long stret taem blong Lod, tijing folem tijing, rul folem rul,36 taem “wan Lod we i save evri samting i minim blong jusum blong tijim yumi.”37 Rod blong Jos i folem i kam nomo long profet blong Hem.

Yumi evriwan i gat spesel janis ia blong sastenem Presiden Russell M. Nelson olsem profet mo Presiden blong Jos blong Jisas Kraes blong Ol Lata-dei Sent long konfrens ia. Olgeta Twelef, olsem wan grup mo hemwan, i gat bigfala eksperiens taem mifala i bin putum han antap long hed blong Presiden Nelson, mo Presiden Dallin H. Oaks, we i voes, i odenem mo setem hem apat olsem Presiden blong Jos. Mi testifae se God i bin odenem hem bifo finis i kam, mo i mekem mekem hem i rere tru long ful laef blong hem blong stap olsem Profet blong Lod blong taem blong yumi. Long nem blong Jisas Kraes, amen.

Ol Not

  1. Eliza R. Snow, insaed long Janiece Johnson and Jennifer Reeder, The Witness of Women: Firsthand Experiences and Testimonies from the Restoration (2016), 124; luk tu long Eliza R. Snow, insaed long Edward Tullidge, The Women of Mormondom (1877), 65.

  2. Luk long Handbook 2: Administering the Church (2010), 2.2.

  3. Doctrine and Covenants 109:4.

  4. Luk long Russell M. Nelson, “Epistles of the Lord” toktok we hem i bin givim long semina blong ol niu misin presiden, 25 Jun 2015), 1–2.

  5. Stephen D. Ricks, “The Appearance of Elijah and Moses in the Kirtland Temple and the Jewish Passover,” BYU Studies, vol. 23, no. 4 (Fall 1983), 485.

  6. Doctrine and Covenants 112:30.

  7. Doctrine and Covenants 38:38; luk tu long Doctrine and Covenants 43:16; 84:20–21.

  8. Luk long Handbook 2, 2.2. Nambafo responsabiliti, kea long olgeta we oli pua mo olgeta long nid, i no bin nidim blong oli putumbak ol ki, be i dipen long Jos oganaesesen we i kasem insperesen we i kam long heven.

  9. Misinari Eksekutiv Kaonsel i lukluk ova long tabu responsabiliti ia we God i givim. Luk long Doctrine and Covenants 38:27.

  10. Prishud mo Famli Eksekutiv Kaonsel i lukluk ova long tabu responsabiliti ia we God i givim. Luk long Doctrine and Covenants 110:12.

  11. Russell M. Nelson, “Covenants,” Liahona, Nov. 2011, 88.

  12. Tempol mo Famli Eksekutiv Kaonsel i lukluk ova long tabu responsabiliti ia we God i givim. Luk long Doctrine and Covenants 110:13–16.

  13. 1 Nifae 14:14; luk tu long 1 Nifae 14:5, 7, 12.

  14. Luk long Mosaea 18:9; Alma 6:1; 32:37; luk tu long Jeffrey R. Holland, “Emissaries to the Church,” Liahona, Nov. 2016, 61–62, 67.

  15. Doctrine and Covenants 2:3.

  16. Joseph Fielding Smith, Doctrines of Salvation, comp. Bruce R. McConkie (1955), 2:148–49.

  17. Luk long Alma 34:32.

  18. Wan stamba toktok we i stap kamkamaot oltaem insaed long Buk blong Momon i we, sapos ol pipol oli stap obei long ol komanmen, bambae oli kam antap long graon, be sapos oli no obei ol komanmen, bae Lod i katemaot olgeta long fes blong Hem. Wetem sam narawan moa, luk long 2 Nifae 1:9; 4:4; Alma 9:13.

  19. Hemia i bin hapen insaed long #MeToo movement.

  20. “Famli: Wan Ofisol Toktok I Go long Wol,” Liahona, May 2017, 145.

  21. Luk long Ross Douthat, “Let’s Ban Porn,” New York Times, Feb. 11, 2018, sr11.

  22. Alma 41:10.

  23. Doctrine and Covenants 38:27.

  24. Luk long 3 Nifae 11:29.

  25. Luk long David Brooks, “The Retreat to Tribalism,” New York Times, Jan. 2, 2018, A15.

  26. Luk long Jon 17:21–22.

  27. Luk long 2 Nifae 26:33: “evriwan oli olsem God,” hemia i tekem tu olgeta oli “blak mo waet, olgeta we oli slef mo oli fri, ol man mo ol woman.”

  28. Luk long Doctrine and Covenants 20:37.

  29. Luk long Prijim Gospel blong Mi: Wan Gaed long Misinari Seves (2004), japta 6.

  30. Luk long Matiu 22:36–39.

  31. Luk long Luk 10:29–37.

  32. Luk long 4 Nifae 1:17.

  33. Luk long Doctrine and Covenants 59:23.

  34. Luk long Alma 34:32.

  35. Ol intaviu kwestin oli wan gudfala samting blong skelem olsem wanem yumi stap mekem blong stap laef folem gospel.

  36. Luk long 2 Nifae 28:30; Doctrine and Covenants 98:12; 128:21.

  37. Neal A. Maxwell, All These Things Shall Give Thee Experience (2007), 31.