’O tei tāpe’a noa ē tae noa atu i te hope’a ra, e ora ïa

E au mau taea’e ’e e au mau tuahine, tē mauruuru nei au i te rāve’a nō te fa’a’ite atu ia ’outou i te tahi o tō’u mau mana’o.

I te mau matahiti i ma’iri a’enei, ’ua pārahi māua ta’u vahine i roto i te ’ōro’a ha’amatara’a o te fa’a’itera’a a te mau tamari’i i te Fare manaha nō te ’Ā’amu o te ’Ēkālesia i Roto Miti. I te hope’a o te ’ōro’a, ’ua haere mai te peresideni Thomas S. Monson ia mātou ra, ’e ’a aroha rima ai ia mātou, ’ua nā ’ō a’era ’oia, « ’A tāmau noa, ’e e upo’oti’a ’outou »—hō’ē ha’api’ira’a hōhonu ’e te hō’ē parau mau, e nehenehe tā tātou pā’āto’a e ha’apāpū.

’Ua ha’apāpū mai Iesu Mesia ia tātou ē « ’o tei tāpe’a noa ē tae noa atu i te hope’a ra, e ora ïa ».¹

Te aura’a e tāpe’a noa, ’oia ho’i ’o « te vai-noa-ra’a i roto i te hō’ē fafaura’a ’ia ha’apa’o i te mau fa’auera’a a te Atua noa atu te fa’ahemara’a, te pāto’ira’a, ’e ’aore rā, te ’ati ».²

Noa atu te feiā tei fāri’i i te mau ’itera’a vārua pūai ’e tei tāvini ma te ha’apa’o maita’i, e nehenehe ato’a rātou e hahi ’ē i te haere’a i te hō’ē mahana, ’e ’aore rā e paruparu, mai te mea ē, ’aita rātou e tāpe’a noa ē tae roa atu i te hope’a. E mata na tātou i te tāpe’a tāmau pāpū noa i roto i tō tātou ferurira’a ’e tō tātou ’ā’au i te parau ē : « E’ita teie e tupu i ni’a iho iā’u ».

I tō Iesu Mesia ha’api’ira’a i Kaperenaumi, « fa’aru’e mai ra te hō’ē pae rahi pipi āna i reira ra, ’aita mai ra i pe’e fa’ahou iāna.

« ’Ua parau maira Iesu i te ’ahuru ma piti ra, e haere ato’a ānei ’outou ? »³

Tē ti’aturi nei au ē, i teie mahana, ’ua ani Iesu Mesia ia tātou pā’āto’a tei rave i te mau fafaura’a mo’a i mua iāna, « e haere ato’a ānei ’outou ? »

Tē pure nei au ē, e feruri hōhonu māite tātou pā’āto’a nō ni’a i te mea e vai ra nō tātou i roto i te mau tau mure ’ore, ’a pāhono ai mai tā Simona Petero : « E te Fatu, ’o vai tā mātou e haere ? Tei ia ’oe nā te parau nō te ora mure ’ore ».⁴

Ha’apa’o maita’i ana’e i te mea tā tātou i ti’aturi ’e i ’ite. Mai te mea ē, ’aita tātou i ora mai te au i tō tātou ’itera’a, tāui ana’e. Te feiā hara ’o tē tāmau noa i roto i tā rātou mau hara, ’e ’aita rātou e tātarahapa, e hōhonu roa atu ā ïa rātou i roto i te vi’ivi’i, ē tae roa atu ē, e tītau mai Sātane ia rātou, ’ua ’ino rahi atura ïa tā rātou rāve’a nō te tātarahapa, ’ia fa’aorehia tā rātou hara ’e ’ia ha’amaita’ihia rātou i te mau ha’amaita’ira’a ato’a nō te tau mure ore.

’Ua fa’aro’o vau e rave rahi ’ōtohetohera’a nō roto mai i te mau ta’ata, ’ua fa’aea i te haere mai i te purera’a ’e ’ua mo’ehia ia rātou te hi’ora’a ātea ti’a o te ’ōpuara’a o tō tātou tere i ni’a i teie fenua. Tē fa’aitoito nei au ia rātou ’ia feruri ’e ’ia ho’i mai, nō te mea tē ti’aturi nei au ē, ’aita e ta’ata e nehenehe e rave i te mau ’ōtohera’a i mua i tō tātou Fatu ’o Iesu Mesia.

I tō tātou bāpetizora’ahia, ’ua rave tātou i te mau fafaura’a—’eiaha i mua i te mau huru ta’ata ato’a, maori rā te Fa’aora, ma te fāri’i e « rave i ni’a ia tātou iho i te i’oa o Iesu Mesia, ma te hina’aro pāpū ’ia tāvini iāna ē tae noa atu i te hōpe’a ».⁵

Te haerera’a i te mau purera’a ’ōro’a ’o te hō’ē ïa o te mau rāve’a tumu e ti’a ai ia tātou ’ia hi’opo’a i tō tātou hina’aro mau ’ia tāvini iāna, tō tātou pūai pae vārua, ’e te tupura’a tō tātou fa’aro’o ia Iesu Mesia i te rahi.

Te ’amura’a i te ’ōro’a mo’a ’o te ’ohipa faufa’a roa a’e ïa tā tātou e rave i te mahana sābati. ’Ua ha’amāramarama te Fatu i teie ’ōro’a i tāna mau ’āpōsetolo hou ’a pohe ai ’oia. ’Ua nā reira ato’a ’oia i te fenua Amerika. ’Ua parau mai ’oia ia tātou ē, mai te mea ē, e rave tātou i teie ’ōro’a, e riro ïa ’ei fa’a’itera’a i te Metua ē, e ha’amana’o tāmau noa tātou iāna, ’e e fafau mai ’oia ē, nā roto i te reira, e fāri’i tātou i tōna vārua ’ia pārahi i pīha’i iho ia tātou.⁶

I roto i te mau ha’api’ira’a a Alama tamaiti i tāna tamaiti ’o Sibelona, tē ’ite nei tātou i te a’ora’a pa’ari ’e te mau fa’aarara’a ’o te tauturu ia tātou ’ia vai ha’apa’o maita’i noa i tā tātou mau fafaura’a :

« ’Eiaha ’oe e fa’ateiteihia i te te’ote’o ; ’oia ïa, ’eiaha ’oe e fa’aahaaha i tō ’oe iho pa’ari, ’eiaha ho’i i tō ’oe ’eta’eta rahi.

« ’Ia mata’u ’ore ’oe, ’eiaha rā e fa’ahepo ; ’a tāpe’a i tō te tino hina’aro ato’a ra, ’ia fa’a’īhia ’oe i te aroha ; ’eiaha ’oe ’ia fa’atau ».⁷

E rave rahi a’enei matahiti, i te hō’ē tau fa’afa’aeara’a, ’ua hina’aro vau e haere e hoehoe nā ni’a i te va’a ama ’ore nō te taime mātāmua. ’Ua tārahu vau i te hō’ē va’a ama ’ore, ’e ma te ’oa’oa rahi, ’ua tere au i ni’a i te miti.

Tau minuti i muri mai, ’ua fa’ata’ahuri te hō’ē ’are miti i te va’a. Ma te tauto’ora’a itoito, te hoe i roto i te hō’ē rima ’e te va’a i roto i te tahi rima, ’ua ti’a iā’u ’ia ti’a i ni’a i tō’u ’āvae.

’Ua tāmata fa’ahou vau i te hoe i tō’u va’a, terā rā, tau minuti noa i muri a’e, ’ua ta’ahuri fa’ahou te va’a. ’Ua tāmata noa vau ma te tu’utu’u ’ore, ’aita rā i manuia, tae roa atu i te taime ’a parau mai ai te hō’ē ta’ata tei ’ite i te ’ohipa hoehoe va’a ama ’ore ē, tē vai ra paha te hō’ē ’afā i ni’a i te va’a, ’e e miti tō roto i te kayak, nō reira e ta’ahuri noa ai e e’ita e nehenehe e fa’a’āfaro. ’Ua huti mai au i te va’a i te pae tahatai ’e ’ua tātara i te ’ōroi, ’e ’oia mau, e pape rahi tei tahe mai i rāpae.

Tē feruri nei au ē, i te tahi taime, tē tere nei tātou i roto i te orara’a nei ma te hara, mai te ’āpo’o i roto i te va’a, ’o tē fa’ataupupu i tō tātou haerera’a pae vārua i mua.

Mai te mea ē, e tāmau noa tātou i roto i tā tātou mau hara, e mo’ehia ia tātou te mau fafaura’a tā tātou i rave ’e te Fatu, noa atu ē, e tāmau noa tātou i te ta’ahuri nō te ’aifāito ’ore tā teie mau hara e fa’atupu i roto i tō tātou orara’a.

Mai te ’āpo’o i roto i tō’u va’a, e tītauhia ’ia ha’apa’o i te mau ’āpo’o i roto i tō tātou orara’a. E tītau te tahi mau hara i te tauto’ora’a hau atu i tā te tahi atu nō te tātarahapa.

Nō reira, e ti’a ia tātou ’ia ui ia tātou iho ē : Tei hea tātou i roto i te parau nō tō tātou huru i mua i te Fa’aora ’e i tāna ’ohipa ? Tei roto ānei tātou i te hi’ora’a o Petero ’a huna ai ’oia ia Iesu Mesia ? ’E ’aore rā, ’ua nu’u ānei tātou i mua, i te fāito o te huru ’e te hina’aro o Petero i muri a’e, i te fa’auera’a rahi tāna i fāri’i nō ’ō mai i te Fa’aora ra ?⁸

Tītauhia ia tātou ’ia rohi nō te ha’apa’o i te mau fa’auera’a ato’a ’e ’ia hi’o maita’i i te mau fa’auera’a teimaha nō tātou ’ia ha’apa’o. Tei piha’i iho te Fatu ia tātou, i te tauturura’a ia tātou i te mau taime hina’arohia ’e te taime paruparu, e mai te mea ē, e fa’a’ite tātou i te hina’aro mau ma te ’ohipa ato’a i muri iho, e fa’atupu ’oia i « te mau mea paruparu ’ei mea pūai ».⁹

E hōro’a mai te ha’apa’o i te pūai nō te upo’oti’a i ni’a i te hara. Tītau-ato’a-hia ia tātou ’ia hāro’aro’a ē, e tītau te tāmatara’a o tō tātou fa’aro’o ’ia ha’apa’o tātou, ’e pinepine ma te’ ite ’ore i te mau hope’ara’a.

Te hōro’a atu nei au i te hō’ē fa’anahora’a ’o tē tauturu ia tātou ’ia tāpe’a noa ē tae noa atu i te hōpe’a :

1. I te mau mahana ato’a, ’a pure ’e ’a tai’o i te mau pāpa’ira’a mo’a.

2. Hō’ē taime i te hepetoma, ’a rave i te ’ōro’a mo’a ma te ’ā’au tātarahapa ’e te vārua marū.

3. ’Aufau i tā tātou tuha’a ahuru ’e tā tātou ō ha’apaera’a mā’a i te ’āva’e hō’ē.

4. Pauroa te piti matahiti—pauroa te matahiti no te feiā ’āpī—fa’a’āpī i tā tātou parau fa’ati’a nō te hiero.

5. I te roara’a o tō tātou orara’a tā’āto’a, ’a tāvini i roto i te ’ohipa a te Fatu.

’Ia ha’apāpū te mau parau mau rahi o te ’evanelia i tō tātou nei ferurira’a, ’e ’ia fa’ati’amā tātou i tō tātou orara’a i te mau ha’avare ’o tē nehenehe e ha’ape’ape’a i tō tātou tere hau nā ni’a i te moana o teie nei orara’a.

E ho’o tō te manuiara’a mai te au i te ravera’a a te Fatu, e te rāve’a hō’ē roa nō te fa’aoti i te reira, ’o te ’aufaura’a ïa i taua ho’o ra.

E māuruuru rahi tō’u i te mea ē, ’ua fa’a’oroma’i te Fa’aora ē tae noa atu i te hōpe’a, nō te fa’aoti hope roa i tāna tusia tāra’ehara rahi.

’Ua mamae ’oia nō tā tātou mau hara, te mau māuiui, te mau hepohepo rahi, te pe’ape’a, te mau paruparu, ’e te mau mata’u, ’e nō reira, ’ua ’ite ’oia e nāhea ’ia tauturu ia tātou, nāhea ’ia fa’auru ia tātou, nāhea ’ia ha’amāhanahana ia tātou, e nāhea ’ia ha’apūai ia tātou ’ia ti’a ia tātou ’ia tāpe’a noa ’e ’ia fāri’i i te korona tei fa’ata’ahia nō te feiā tei ’ore i pau.

E mea ta’a ’ē te orara’a nō tātou tāta’itahi. E taime tāmatara’a tō tātou pā’āto’a, e taime ’oa’oara’a, e taime ravera’a i te mau fa’aotira’a, e taime upo’oti’ara’a i roto i te mau fa’atafifira’a, ’e e taime nō te fa’a’ohipa-maita’i-ra’a i te mau rāve’a.

Noa atu e aha tō tātou iho huru orara’a, tē fa’a’ite pāpū nei au ē, tē parau pinepine nei tō tātou Metua i te Ao ra ē : « Tē here nei au ia ’oe. Tē pāturu nei au ia ’oe. Tei pīha’i iho vau ia ’oe. ’Eiaha e fa’aru’e. ’A tātarahapa ’e ’a tāmau māite i ni’a i te ’ē’a tā’u i fa’a’ite atu ia ’oe. ’E tē ha’apāpū atu nei au ia ’oe ē, e ’ite fa’ahou tāua, te tahi i te tahi, i roto i tō tātou ’utuāfare tiretiera ». I te i’oa o Iesu Mesia, ’āmene.