Te here mau : Te tāpa’o mau o te pipi mau a Iesu Mesia.

’Ua here tātou ’e tē mihi nei ho’i i te peresideni Thomas S. Monson, ’e ’ua here tātou ’e tē pāturu nei ho’i i te peresideni Russell M. Nelson. E vāhi ta’a ’ē tō te peresideni Nelson i roto i tō’u ’ā’au.

I te tau e metua tāne ’āpī au, ’ua ho’i mai tā māua tamaiti iti, e pae matahiti, nā te ha’api’ira’a mai ma te ani i tōna metua vahine : « E aha tā pāpā ’ohipa ? » Fa’ata’a mai nei ’oia ē, ’ua paraparau tōna mau hoa ’āpī i te ha’api’ira’a nō te ’ohipa a tō rātou pāpā. ’Ua nā ’ō hō’ē ē, ’o tōna pāpā te fa’atere rahi o te mau mūto’i ’oire, ’a fa’ati’ati’a mai ïa te tahi ē, e fa’atere rahi tōna pāpā nō te hō’ē taiete rahi.

’E i te anira’ahia ta’u tamaiti e aha tōna pāpā, ’ua pāhono noa atura ’oia : « E ’ohipa tō’u pāpā i roto i te hō’ē piha i ni’a i te mātini rorouira ». Nō te ’itera’a atu ’ōna ’aita tōna mau hoa i fa’ahiahia roa i tāna pāhonora’a, tāora atura ’oia ē : « ’O tō’u pāpā ato’a te fa’atere rahi o te ao nui ».

I’ō noa paha te paraparaura’a i te fa’aeara’a.

’Ua nā ’ō atu vau i ta’u vahine : « E taime tano nō te ha’api’i rahi atu ā iāna nō ni’a i te fa’anahora’a ō te fa’aorara’a ’e ’o vai mau te fa’atere rahi. »

I te ha’api’ira’a rā māua i tā māua nau tamari’i nō ni’a i te fa’anahora’a nō te fa’aorara’a, ’ua rahi mai tō rātou here i te Metua i te Ao ra ’e i te Fa’aora, ’a ha’api’i noa ai rātou e fa’anahora’a nō te here te reira. ’Ua fa’atumuhia te ’evanelia a Iesu Mesia i ni’a i te here o te Metua ’e o te Fa’aora nō tātou ’e i ni’a i tō tātou here ia rāua ’e tō tātou here te tahi i te tahi.

’Ua parau Elder Jeffrey R. Holland ē : « Te fa’auera’a rahi mātāmua o te tau mure ’ore, ’o te herera’a ïa i te Atua ma tō tātou ’ā’au ato’a ’e te pūai ’e te mana’o ’e te itoito—’o te fa’auera’a rahi mātāmua ïa teie. Te parau mau rahi mātāmua rā o te mure ’ore, ’o te herera’a ïa te Atua ia tātou ma tōna ’ā’au ato’a ’e te pūai ’e te mana’o ’e te itoito. ’O te reira here te ’ōfa’i niu o te tau mure ’ore, ’ia riro ato’a ho’i te reira ’ei ’ōfa’i niu nō tō tātou orara’a i te mahana tāta’i tahi e ti’a ai ».¹

Nō te rirora’a ’ei ’ōfa’i niu nō tō tātou orara’a i te mahana tāta’i tahi, tītauhia te here mau nō te pipi mau ato’a a Iesu Mesia.

’Ua ha’api’i te peropheta Moromona ē : « Nō reira, e au mau taea’e here, e pure atu i te Metua ma te pūai hope o te ’ā’au ’ia ’ī ’outou i teie nei aroha, o tāna i hō mai i te ta’ata ato’a e pe’e mau i tāna tamaiti ia Iesu Mesia ».²

’Oia mau ’o te here te tāpa’o mau o te pipi mau a Iesu Mesia.

E mea au nā te pipi mau ’ia tāvini. ’Ua ’ite rātou ē, e fa’a’itera’a te tāvinira’a nō te here mau ’e e fafaura’a ho’i tā rātou e rave i te taime nō te bāpetizora’a.³ Noa atu tā rātou pi’ira’a i roto i te ’Ēkālesia ’aore rā tō rātou ti’ara’a i roto i te huira’atira, tē vai nei i roto ia rātou i te hia’ai rahi ’ia here ’e ’ia tāvini i te Fatu, ’e ’ia tāvini te tahi i te tahi.

E mea au nā te pipi mau ’ia fa’aore i te hapa. ’Ua ’ite rātou ē, e ’aufau te tāra’ehara a te Fa’aora i te tā’āto’ara’a o tō tātou tāta’itahi mau hara ’e mau hapehape. ’Ua ’ite rātou ē, te ho’o tāna i ’aufau, « tei roto pauroa ïa ». Te mau tute, te ho’o, te tuha’a moni, te ha’amau’ara’a pae vārua e tū’ati i te mau hara, te mau hapehape ’aore rā te ’ohipa ’ino i ravehia, ’ua ’aufau-pauroa-hia ïa.E fa’a’ore ’oi’oi te mau pipi mau i te hapa ’e e ani ’oi’oi ato’a rātou i te fa’aorera’a hapa.

E au mau taea‘e, e au mau tuahine, mai te peu te fifi ra ’outou ’ia ’ite i te pūai nō te fa’aore i te hapa, ’eiaha e feruri i tā vetahi i rave i ni’a ia ’outou, e feruri rā i tā te Fa’aora i rave nō ’outou, e ’ite mai ïa ’outou i te hau i roto i te mau ha’amaita’ira’a fa’aora o tāna tāra’ehara.

E mea au nā te pipi mau ’ia auraro i te Fatu ma te hau i te ’ā’au. E mea ha’eha’a rātou ’e te auraro, nō te mea ’ua here rātou iāna. Tē vai ra tō rātou fa’aro’o e fāri’i hope i tōna hina’aro, i roto i te mea tāna e rave ra, i te huru ato’a rā ’e i te taime ’oia e rave ai i te reira. ’Ua ’ite te mau pipi mau ē, e ’ere te mau ha’amaita’ira’a mau i te mau mea noa tā rātou i hina’aro, ’o te mea rā tā te Fatu e hina’aro ra nō rātou.

E mea here rahi a’e te pipi mau i te Fatu i tō te ao, ’e e mea pāpū ’e te ’āueue ’ore tō rātou fa’aro’o. E vai pūai rātou ’e te pāpū i roto i te hō’ē ao taui haere ’e te ta’a ’ore. E mea au nā te pipi mau ’ia fa’aro’o i te reo o te Vārua ’e o te mau peropheta, ’e ’aita rātou e ’ārepurepu i te mau reo o te ao. E mea au nā te pipi mau ’ia « ti’a i te mau vāhi mo’a »⁴ ’e e mea au nā rātou ’ia fa’ariro i te vāhi e ti’a rātou ’ei vāhi mo’a. I te vāhi ato’a e haere rātou, e fa’atae rātou i te here o te Fatu ’e te hau i te ’ā’au o te ta’ata. E mea au nā te pipi mau ’ia ha’apa’o i te mau fa’auera’a a te Fatu, ’e e ha’apa’o rātou nō te mea ’ua here rātou i te Fatu. ’Ia here rātou ’e ’ia ha’apa’o ho’i rātou i tā rātou mau fafaura’a, e fa’a’āpīhia tō rātou ’ā’au ’e e taui tō rātou nātura mau.

’O te here mau te tāpa’o mau o te pipi mau a Iesu Mesia.

’Ua ha’api’i au i te here mau mai roto mai i tō’u metua vahine. E ’ere ’oia i te melo o te ’Ēkālesia.

I te hō’ē mahana, e mea maoro i teienei, ’ua paraparau māua tō’u metua vahine, tē ’aro ra ïa ’oia i te ma’i mariri ’aita’ata. ’Ua ’ite na vau ē, e pohe ’oia, tā’u rā māna’ona’ora’a, ’o tōna ïa māuiui. ’Aita vau i paraparau, ’e nō tōna mātau iā’u, ’ua nā ’ō mai ’oia : « Tē fifi ra ’oe i te tahi ’ohipa ».

’Ei reira ’ua māere au, ma te reo iti marū, ’ua nā ’ō mai ’oia : « E ti’a ānei ia ’oe ’ia ha’api’i iā’u i te pure ? ’Ua hina’aro vau e pure nō ’oe. ’Ua ’ite au e ha’amata ’oe ma te parau ē ‘E te Metua i te Ao ra’, e aha ïa tē parau i muri iho ? »

’A tūturi ai au i pīha’i iho i tōna ro’i ’e ’a pure ai ’oia nō’u, ’ua putapū vau i te here ’aita a’enei au i ’ite. E here ’ōhie ’e te ha’avare ’ore ’e te mau. Noa atu ā ’aita ’oia i ’ite nō ni’a i te fanahora’a nō te fa’aorara’a, tē vai ra i roto i tōna ’ā’au i tāna iho fa’anahora’a nō te here, te fa’anahora’a nō te here o te hō’ē metua vahine i tāna tamaiti. Tē māuiui ra ’oia, tē fifi ato’a nei ’oia ’ia ’ite i te pūai nō te pure. Fātata ’aita tō’u tari’a i fa’aro’o i tōna reo, pāpū roa rā ’ua putapū vau i tōna here.

Tē ha’amana’o nei au i tō’u mana’o : « Nāhea pa’i te hō’ē ta’ata i roto i te māuiui rahi e nehenehe e pure nō te tahi atu ta’ata ? ’O ’ōna ho’i te ta’ata i roto i te fifi ».

I reira te pāhonora’a i te tae-pāpū-ra’a i tō’u ferurira’a : te here mau. Nō tōna here rahi iā’u, ’aita fa’ahou ’oia i feruri iāna iho. I te taime ri’ari’a rahi nōna, ’ua here rahi atu ’oia iā’u i iāna iho.

I teienei, e au mau taea’e, e au mau tuahine, e ’ere ānei te mea tā te Fa’aora i rave ? ’Oia iho ā ïa, e fāito mure ’ore a’e ’e te ’ā’ano a’e. I roto rā i tōna mamae rahi, i roto i te ’ō i terā pō, ’o ’oia te ta’ata i hina’aro i te tauturu, i te māuiuira’a ’oia i te fāito e’ita tā tātou e nehenehe e feruri ’e e ta’a maita’i. I te pae hope’a rā, ’aita ’oia i feruri iāna iho ’e ’ua pure atura nō tātou ē tae roa iāna i te ’aufau-hope-ra’a i te ho’o. Nāhea i ti’a ai iāna ’ia rave i te reira ? Nō tōna here mau i te Metua, tei tono iāna, ’e tōna here mau ia tātou. ’Ua here rahi a’e ’oia i te Metua ’e ’ia tātou, i iāna iho.

’Ua ’aufau ’oia nō te hō’ē ’ohipa e ’ere nāna i rave. ’Ua ’aufau ’oia nō te mau hara e ’ere nāna i rave. Nō te aha ? Te here mau. Nō tōna ’aufau-hope-ra’a i te ho’o, ’ua ti’a iāna ’ia pūpū ia tātou i te mau ha’amaita’ira’a o te mea tāna i ’aufau, mai te mea e tātarahapa tātou.Nō te aha ’oia i pūpū ai i te reira ? Fa’ahou ā ’e nā ni’a noa, ’o te here mau.

’O te here mau te tāpa’o mau o te pipi mau a Iesu Mesia.

’Ua parau te peresideni Thomas S. Monson : « Mai teie atu taime, i teie iho mahana, ’ia fa’a’ite tātou i te here i te mau tamari’i ato’a a te Atua, e melo ānei nō tō tātou ’utuāfare, e mau hoa ānei nō tātou, e ta’ata mātauhia ānei, ’e ’aore rā, e ta’ata ’ē roa ānei. ’Ia ti’a mai tātou i te mau po’ipo’i ato’a, e fa’aoti tātou ’ia paraparau ma te here ’e te maita’i i te mau huru ta’ata ato’a e fārereihia e tātou ».⁵

Te mau taea’e ’e te mau tuahine, te ’evanelia a Iesu Mesia, e ’evanelia ïa nō te here. Te fa’auera’a rahi roa a’e, nō ni’a ïa i te here. Nō’u nei, nō ni’a pauroa i te here. Te here o te Metua, tei fa’atūsia i tāna Tamaiti nō tātou. Te here o te Fa’aora, tei fa’atūsia iāna nō tātou pā’āto’a. Te here o te hō’ē metua vahine ’aore o te hō’ē metua tāne e hōro’a pauroa nō tāna mau tamari’i. Te here o te feiā e tāvini māniania ’ore nei, tā te rahira’a o tātou i ’ore i ’ite, ’o tā te Fatu rā i mātau maita’i. Te here o te feiā e fa’aore pauroa nei i te hapa, ē a muri noa atu. Te here o rātou e hōro’a rahi a’e i tā rātou e fāri’i.

’Ua here au i tō’u Metua i te Ao ra. ’Ua here au i tō’u Fa’aora. ’Ua here au i te ’evanelia. ’Ua here au i teie ’Ēkālesia. ’Ua here au i tō’u ’utuāfare. ’Ua here au i teie orara’a nehenehe. Nō’u nei, nō ni’a pauroa i te here.

’Ia riro teie mahana ha’amana’ora’a i te ti’a-fa’ahou-ra’a o te Fa’aora ’ei mahana nō te fa’a’āpīra’a pae vārua nō tātou tāta’itahi. ’Ia riro teie mahana i te ha’amatara’a nō te orara’a tei ’ī i te here, te « ’ōfa’i niu nō tō tātou orara’a tāmahana ».

’Ia ’ī tō tātou ’ā’au i te here mau o te Mesia, te tāpa’o mau o te pipi mau a Iesu Mesia. ’O tā’u nei ïa pure i te i’oa o Iesu Mesia, ’āmene.