Ol Smol mo Simpol Samting

Ol dia brata mo sista blong mi. Olsem yufala, olgeta mesej mo miusik, mo ol filing blong taem ia tugeta oli tajem mi bigwan, mo oli leftemap mi, mo givim insperesen Mi sua se mi stap toktok long bihaf blong yufala blong talem tangkyu long ol brata mo sista, we, olsem ol tul long han blong Lod, oli givim yumi paoa we i kamaot long taem ia we yumi kam tugeta.

Mi glad blong toktok long yufala long Ista Sandei ia. Tedei, yumi joenem ol nara Kristin man blong selebretem Laef Bakegen long Ded blong Lod Jisas Kraes. Blong plante memba blong Jos blong Jisas Kraes blong Ol Lata-dei Sent, Laef Bakegen long Ded blong Jisas Kraes i wan stamba pos blong bilif blong yumi.

From se yumi stap bilivim ol stori long tugeta ia, Baebol mo Buk blong Momon, long saed blong Laef Bakegen long Ded blong Jisas Kraes, yumi stap bilivim tu samfala skripja tijing se wan semfala laef bakegen long ded, bae i kam long evriwan we i bin stap laef long wol ia. Laef bakegen long ded ia, i givim wanem we Aposol Pita i singaotem: wan hop we i laef. (1 Pita 1:3). Hop ia we i laef, i strong tingting blong yumi blong bilivim se ded i no en blong aedentiti blong yumi, be i jes wan step we i nid insaed long plan blong sore blong Papa long Heven blong sevem ol pikinini blong Hem. Plan ia, i putum se i gat wan jenis blong laef long wol ia i go long hemia we yumi nomo save ded long hem. Long medel blong jenis ia, hem i taem san i draon long ded, mo moning blong glori we i posibol tru long Laef Bakegen long Ded blong Lod mo Sevya blong Yumi we yumi stap selebretem long Ista Sandei ia.

Long wan gudfala hym we Ilaesa R. Sno i bin raetem, yumi singsing

Blong mekem plan mo yuniti ia i go moa, yumi stap kam tugeta long ol miting, wetem konfrens ia, blong tijim mo leftemap tingting blong wanwan long yumi.

Long moning ia, mi bin filim blong yusum, olsem toktok blong mi, tijing blong Alma long boe blong hem, Hileman, we oli raetem i stap long Buk blong Momon: “Tru long ol smol mo simpol samting, ol bigfala samting oli kam blong hapen” (Alma 37:6).

Oli bin tijim yumi plante smol mo simpol samting insaed long gospel blong Jisas Kraes.I nid blong oli mekem yumi tingbaot se long ful taem mo ova long wan longfala taem, olgeta smol samting ia oli mekem ol bigfala samting oli stap hapen. I gat plante toktok long saed blong topik ia, we ol Jeneral Atoriti oli mekem, mo tu, ol nara tija we yumi respektem. Topik ia i impoten tumas, mekem se mi filim blong tokbaot bakegen.

Lod i rimaenem mi long paoa blong ol smol mo simpol samting ova long plante taem tru long wan samting we mi bin luk long wan moning wokbaot. Hemia pikja we mi tekem. Tik mo strong simen ples blong wokbaot ia i stat blong brokbrok. ?Hemia i risal blong sam bigfala mo strong fos? No, i brokbrok from sloslo, smol wan smol rus blong ol tri long saed i stap kamaot. Hemia wan semmak eksampol blong wanem mi luk long wan nara rod.

Pikja

Ples we i brokbrok long ples blong wokbaot

Pikja

Wan nara ples we i brokbrok long ples blong wokbaot

Strong paoa ia, we i brebrekem smol bigfala simen ia long saed rod, i smol tumas blong skelem evri dei, o evri manis. Be paoa blong hem ova long longfala taem i strong tumas.

Semmak long strong paoa, long longfala taem blong ol smol mo ol simpol samting we ol skripja oli tijim yumi, mo tu, ol profet we oli stap laef. Tingting long skripja stadi we oli tijim yumi blong putum insaed long evri dei laef blong yumi. O tingting long prea blong yuwan, mo nildaon long famli prea, we i nomol praktis blong ol fetful Ol Lata-dei Sent.Tingting long atendens long seminari blong ol yut, o institiut klas blong ol yang adalt. Nomata se wanwan long ol praktis ia, bae yumi luk se oli smol mo simpol, ova long longfala taem, oli kamaot olsem ol strong paoa blong spirit blong leftemap yumi mo mekem yumi gro. Hemia i hapen from se wanwan long ol smol mo simpol samting ia i stap invaetem kampani blong Tabu Spirit, Man we i Testifae, we i givim moa laet, mo i soem rod long yumi i go long trutok, olsem we Presiden Eyring i bin eksplenem.

Wan nara ples blong strong paoa long spirit we i leftemap mo mekem yumi gro, i praktis blong gogohed blong sakem sin, iven blong ol smol rod blong brekem loa. Taem yumi skelem yumiwan wetem insperesen, i save helpem yumi blong luk olsem wanem yumi foldaon mo hao yumi save kam gud moa. Kaen wei ia blong sakem sin, i mas hapen bifo yumi tekem sakramen. Sam topik blong tingting long rod ia blong sakem sin oli stap long hym ia “?Mi mi mekem eni gud samting?

I tru, hemia ol smol samting, be i tru, oli ol gudfala eksampol blong wanem Alma i bin tijim long boe blong hem, Hileman: “Mo Lod God i stap wok long ol wei blong mekem ol bigfala mo ol stamba tingting blong hem we i no save finis oli hapen; mo tru long ol wei we oli smol tumas Lod i … mekem fasin blong sevem man blong plante sol i hapen. (Alma 37:7).

Presiden Steven C. Wheelwright i givim long wan grup blong ol pipol long Brigham Yang Yunivesiti-Hawae insperesen ia blong tijing blong Alma: “Alma i konfemem long bihaf blong boe blong hem se, i tru, paten we Lod i stap folem taem yumi praktisim fet long Hem mo folem kaonsel blong Hem long ol smol mo simpol samting, i we bae Hem i blesem yumi wetem ol smol evri dei merikel, mo long longfala taem, wetem ol bigfala wok.”³

Elda Howard W. Hunter i tijim se “plante taem, hem i ol evri dei samting we i mekem ol gudfala risal long laef blong ol narawan, komperem long ol samting we wol ia i stap talem se oli gud tumas.”⁴

Wan strong tijing, we i no blong relijin, abaot sem prinsipol ia i kam long foma Senata Dan Kots blong Indiana, we i raetem: “Wan fasin ia nomo blong rere from wan bigfala desisen we i save jenisim wan laef, o iven wan kantri, i ol handred mo taosen desisen we yumi no ting tumas long ol, oli minim fulap, mo oli no impoten, we yumi mekem long praevet.”⁵

Olgeta praevet desisen ia “we oli no luk impoten,” oli hao yumi yusum taem blong yumi, wanem yumi stap wajem long televisen o intanet, wanem yumi stap ridim, art mo miusik we yumi raonem yumi wetem long wok mo long hom, wanem yumi lukaotem olsem entetenmen, mo hao yumi praktisim komitmen blong yumi blong stap ones mo stap tru. Wan nara smol mo simpol samting i blong stap gat stret fasin mo naes fasin wetem ol nara man.

I no gat wan long ol gudfala smol mo simpol samting ia we bae i leftemap yumi i go long ol bigfala samting sapos yumi no stap praktisim olgeta oltaem mo oltaem, mo gogohed blong praktisim. Presiden Brigham Yang, oli ripot se hem i talem: “Laef blong yumi, i mekap long ol smol, simpol situesen we oli go bigwan taem olihivimap wanples, mo oli totolemap ful laef blong man o woman.”⁶

Raon long yumi i gat paoa blong media mo kalja we i foldaon we bae i mekem yumi go arier long ol valiu blong yumi sapos yumi no stap gogohed blong stanap agens. Blong muv i go antap i go long gol blong taem we i no save finis, yumi mas oltaem barel i go. Hem i help taem yumi pat blong wan tim we i stap barel tugeta i go, olsem wan rowing tim long aksen. Blong tekem eksampol ia i go moa, ol kalja taed oli strong tumas, mekem se sapos oli stop blong barel, bae i mekem oli go arier i go long wan ples we yumi no wantem, be i mas olsem nomo sapos yumi no stap muv i go fored oltaem.

Afta we hem i talem bakegen wan smol samting we i bin hapen we risal blong hem i bigwan, Nifae i bin raetem: “Mo olsem ia nao yumi luk we tru long ol smol wei Lod i save mekem plante bigfala samting i hapen.” (1 Nifae 16:29). OlTesteman i tekem wan memori eksampol blong hemia. Long ples ia yumi ridim hao Ol laen blong Isrel, oli sik from ol posen snek i kakae olgeta. Plante long olgeta oli ded (luk long Namba 21:6). Taem Moses i bin prea from help, hem i kasem insperesen blong wokem wan snek wetem bras mo putum long wan pos. Afta, “sapos wan snek i kakae wan man, man ia i save luk long pijka blong snek ia, nao bambae i kam gud bakegen.” (ves 9). !I wan smol samting tumas blong wan bigfala risal! Be yet, olsem we Nifae i eksplenem taem Hem i bin tijim eksampol ia long olgeta we oli stap agensem Lod, iven we taem Lod i mekem rere wan simpol wei blong oli save kam oraet, “from we wei ia i no had, o i isi, i gat plante we oli ded.” (1 Nifae 17:41).

Eksampol ia mo tijing ia i rimaenem yumi se, i no from se rod ia i isi, o wok ia i isi, we i minim se hem i no impoten blong save kasem ol gudfala tingting blong hat blong yumi.

Semmak, iven ol smol aksen blong no stap obei, o ol smol mistek blong no folem ol stret mo gud praktis, i save pulum yumi i go daon i go long wan ples we oli givim woning long yumi blong stap longwe long hem. Tok blong Waes i wan gudfala eksampol blong hemia. I tru, paoa long bodi blong wan sigaret o wan dring nomo blong alkohol, o wan mak blong nara drag, yumi no save makem. Be long longfala taem, paoa blong hem i strong tumas, mo samtaem, i no save tanembak. Tingbaot smol hol long saedrod from rus blong tri i stap gro sloslo. Wan samting i sua. Bigfala trabol blong stap tekem eni samting we i save kam adiksen, olsem ol drag we i stap atakem bodi blong yumi, o ol ponografi we i spolem rabisim tingting blong yumi, yumi save stap longwe long ol sapos yumi neva tekem blong fas taem—no iven wan taem.

Plante yia i pas, Presiden M. Russell Ballard i tokbaot long wan jeneral konfrens “olsem wanem ol smol mo simpol samting oli save kam wan nogud samting mo prapa spolem rod blong Lod i sevem man.” Hem i tijim: “Olsem ol lus smol rop oli mekem wan tintin rop, mo afta wan smol rop mo afta wan rop, olgeta smol samting ia, taem oli joen tugeta wanples, oli kam strong tumas blong oli brekem.” Hem i talem: “Yumi mas lukaotgud long paoa we ol smol mo simpol samting oli save gat taem yumi stap bildimap spirit blong yumi.” Long sem taem, yumi mas savegud se Setan bae i yusum ol smol mo simpol samting ia blong lidim yumi blong lusum hop mo stap harem nogud bigwan.”⁷

Presiden Wheelwright i givim sem kaen woning ia long olgeta long BYU–Hawae: “Taem yumi stap foldaon mo no mekem ol smol mo simpol samting, nao fet i muvmuv, merikel i stop, mo progres i go from Lod mo kingdom blong Hem, faswan, Hem i holembak, mo afta i go lus, from se yumi nomo lukaotem kingdom blong God, be yumi wok from ol samting blong wol mo yumi lukaotem ol samting blong wol.”⁸

Blong protektem yumi agensem ol fulap nogud paoa we oli prapa spolem progres blong yumi long spirit, yumi nid blong folem spirit paten blong ol smol mo simpol samting. Elda David A. Bednar i tokbaot prinsipol ia long wan BYU Woman Konfrens: “Yumi save lanem plante samting abaot fasin mo hamas spirit paten ia i impoten aot long teknik blong wota we i drop sloslo long graon,” komperem wetem bigfala wota o blong sprei bigfala wota long ples we i no nid.

Hem i eksplenem: “Ol smol smol drop blong wota oli draon insaed long graon mo i mekem graon i save wetwet longtaem, mekem ol plant oli save karem flaoa. Long semmak wei, sapos yu mo mi, i lukluk nomo mo lukluk oltaem blong kasem ol smol smol drop blong spirit kaekae, nao bae ol gospel rus i save draon insaed long sol blong yumi, i gat strong rus, mo i save givim ol bigfala mo swit frut.”

Hem i gohed, i talem: “Spirit paten blong ol smol mo simpol samting we oli tekem ol bigfala samting i kam, oli givim fasin blong stap strong mo stanap strong, strong tingting we i dip, mo wan moa ful jenis blong laef i go long Lod Jisas Kraes mo gospel blong Hem.”⁹

Profet Josef Smit i tijim prinsipol ia long ol toktok we oli stap naoia long Doktrin mo Ol Kavenan: “No mas letem man i kaontem olgeta olsem se oli ol smol samting; from se i gat plante samting … long saed blong ol sent, we i dipen long ol samting ia” (D&C 123:15).

Long saed blong ol fas wok blong traem stanemap Jos long Misuri, Lod i givim advaes blong gat longfala tingting from se “evri samting i mas kam blong hapen long stret taem blong olgeta” (D&C 64:32). Mekem se Hem i givim bigfala tijing ia: “Yufala i no taed blong mekem gud samting, from we yufala i stap putum fandesen blong wan bigfala wok. Mo aot long ol smol samting, ol samting we oli bigwan oli kamaot” (DC 64:33).

Mi biliv se yumi evriwan i wantem blong folem jalenj blong Presiden Russell M. Nelson blong gohed fored long rod blong kavenan.”¹⁰ Komitmen blong yumi blong mekem olsem bae i kam strong sapos yumi oltaem folem “ol smol samting” we oli tijim long yumi insaed long gospel blong Jisas Kraes mo ol lida blong Jos blong Hem. Mi testifae abaot Hem mo askem ol blesing blong Hem i stap long evriwan we i stap lukaot blong stap long rod blong Hem blong kavenan, long nem blong Jisas Kraes, amen.