Toro i te rima i te ta’ata ma te aumihi

’Ia pe’e ’outou i te hi’ora’a aumihi o te Fa’aora, e ’ite mai ’outou ē, e ti’a ia ’outou ’ia fa’atupu i te tahi ’ohipa ta’a ’ē i roto i te orara’a o te ta’ata.

Te aumihi, ’o te vai-ara-ra’a ïa i te hepohepo o te ta’ata ma te hina’aro e ha’amāmā i te reira ’aore rā e tātara i te reira. Te fafaura’a ’ia pe’e i te Fa’aora, ’o te fafaura’a ïa nō te aumihi ’ia « tauturu te tahi i te tahi i te hōpoi i tā ’outou mau hōpoi’a » (Mosia 18:8). Te fa’ata’ara’a i te hō’ē ta’ata nō te ha’apa’o ia vetahi ’ē, e fāna’ora’a ïa ’ia aupuru mai tā te Fatu e rave ’āhani ’o ’ōna terā : ma te « aroha atu i te tahi pae, ’ei ha’apa’ora’a ’ē » (Iuda 1:22). ’Ua fa’aue te Fatu : « E fa’a’ite atu i te hāmani maita’i ’e te aroha, te ta’ata ato’a i tōna ihora taea’e » (Zekaria 7:9).

Te ’ā’au aumihi o te Fa’aora

E pūai arata’i te aumihi i roto i te tāvinira’a a te Fa’aora (hi’o i te hiti ’api : « E Fa’aora aumihi »). Nā tōna aumihi i te ta’ata tupu i fa’ati’a iāna e toro i tōna rima i te ta’ata ’ati a’e iāna e rave rahi roa taime. Nā roto i te hāro’aro’ara’a i te mau hina’aro ’e te mau hia’ai o te ta’ata, ’ua ti’a iāna ’ia ha’amaita’i ia rātou ’e ’ia ha’api’i ia rātou i te huru e faufa’a ai rātou. Nā te hia’ai o te Fa’aora ’ia fa’ateitei ia tātou i ni’a atu i tō tātou hepohepo i arata’i iāna i te ’ohipa aumihi hope’a roa : tāna tāra’ehara nō te mau hara ’e nō te mamae o te ta’ata nei.

Tōna ’aravihi e pāhono i te mau hina’aro o te ta’ata, o te hō’ē ïa mea e ti’a ia tātou ’ia tūtava ’a tāvini noa ai tātou. ’Ia ora parau ti’a tātou ’e ’ia fa’aro’o tātou i te mau muhumuhu o te Vārua, e fa’auruhia tātou nō te toro atu i te rima ma te rāve’a au maita’i.

Tā tātou fafaura’a nō te aumihi

’Ua hina’aro te Metua i te Ao ra nō tāna mau tamari’i ’ia vai te ’ā’au aumihi (hi’o 1 Korinetia 12:25–27). Nō te riro ’ei pipi mau, ’ia fa’atupu tātou ’e ’ia fa’a’ite tātou i te aumihi ia vetahi ’ē e ti’a ai, ia rātou iho ā rā i roto i te ’ati (PH&PF 52:40).

Nā roto i te ravera’a i ni’a ia tātou te i’oa o Iesu Mesia, nā roto i tā tātou fafaura’a bāpetizora’a, tē fa’a’ite pāpū nei tātou ē, ’ua ineine tātou ’ia fa’a’ite i te aumihi. ’Ua ha’api’i te peresideni Henry B. Eyring, tauturu piti i roto i te Peresidenira’a Mātāmua ē, tē tauturu nei te hōro’ara’a i te Vārua Maita’i ’ia nā reira : « E melo fafaura’a ’outou nō te ’Ēkālesia a Iesu Mesia…

« Terā te tumu i vai ai i roto ia ’outou te hina’aro e tauturu i te hō’ē ta’ata e tauto’o ra ’ia haere i mua ’a amo noa ai i tōna ’ati ’e tōna mau pe’ape’a. ’Ua fafau ’outou ē, e tauturu ’outou i te Fatu ’ia amo i tā rātou mau hōpoi’a ’ia māmā te reira ’e ’ia tāmāhanahanahia rātou. ’Ua hōro’ahia ia ’outou te mana nō te tauturu i te Fatu ’ia ha’amāmā te feiā tei teimaha i te taime ’a fāri’i ai ’outou i te hōro’ara’a i te Vārua Maitai ».¹

’Ei hi’ora’a, hō’ē tuahine i te fenua Rusia tei fifi i tōna orara’a ’utuāfare, ’aita i roa’a iāna i te haere i te purera’a hau i te hō’ē matahiti te maoro. ’Ua toro atu te tahi tuahine i roto i te ’āma’a i te rima aumihi, pauroa te mau sābati nā roto i te niuniura’a iāna nō te paraparau iāna nō ni’a i te mau a’ora’a, te mau ha’api’ira’a, te mau pi’ira’a misiōni, te mau ’aiū fānau ’āpī ’e te tahi atu mau parau ’āpī nō te ’āma’a. I te ’āfarora’a mai te orara’a ’utuāfare o teie tuahine, ’aita tōna e mana’o ’ē i te ’āma’a nō te mea ’ua tāniuniu noa mai tōna hoa, pauroa te hepetoma.

© 2018 nā Intellectual Reserve, Inc. Fatura’a pāruruhia. Nene’ihia i Marite. Parau fa’ati’a nō te reo peretāne : 6/17. Parau fa’ati’a nō te ’īritira’a : 6/17. ’Īritira’a nō Ministering Principles, July 2018. Tahitian. 15050 895

Maha mana’o nō te fa’atupu i te aumihi

Noa atu ā e mea pinepine te aumihi i te rahi mai nā roto i te fa’arurura’a tātou iho i te tahi tāmatara’a, tē vai nei rā te tahi mau mea tā tātou e nehenehe e rave i teie mahana e nehenehe e fa’atupu rahi atu ā i tō tātou aumihi. E feruri i te tahi mau rāve’a e fa’a’ohipa i teie mau parau tumu e maha :

E pure nō te reira. ’Ia ti’aoro ’oe i te Metua i te Ao ra, e ha’amahora ’oia i tō ’oe ’ā’au, ’e « e ’ite ’oe i te hō’ē ha’ape’ape’ara’a mau nō te orara’a mure ’ore ’e te ’oa’oa o te tahi atu mau ta’ata » (’Ia Poro Haere i Ta’u Nei ’Evanelia: Hō’ē arata’i nō te ’Ohipa mīsionare [2004], 135 ; hi’o ato’a Moroni 7:48).
E fa’a’ohipa i te reira. E nehenehe tā ’oe e fa’a’ite i te aumihi nā roto i te fa’aro’ora’a i te ta’ata ’e i te māramaramara’a iāna. E tu’u ia ’oe i tōna vaira’a ’e ’a feruri atu ai i tōna mau mana’o. Mai te peu e ’ohipa tano ’ia rave, ’e tē vai ra te taime, e nehenehe e pūpū atu i te tauturu ’e te tāmarūra’a i te māuiui, te mamae ’aore rā te hepohepo.
E pe’e i te mau muhumuhu. E ti’a i te Fatu ’ia heheu mai ia tātou i te rāve’a nō te fa’a’ite atu i te aumihi, ’o tā tātou iho i ’ore i ’ite. ’Ia tūra’i mai te Vārua ia ’oe ’ia tauturu i te ta’ata, ’eiaha e ha’amarirau nō te rave i te reira.
E riro ’ei hoa piri mau. E nehenehe te fa’a’itera’a i te aumihi e riro ’ei ’ohipa ’ōhie ma te fa’a’itera’a i te māna’ona’ora’a mau nō te orara’a o te ta’ata. E ha’api’i i te fa’aro’o maita’i (hi’o « Parau tumu nō te aupurura’a : E pae ’ohipa e rave te hō’ē ta’ata e fa’aro’o mai ra i tā ’oe parau », Liahona, Tiunu 2018, 6–9). E rahi mai tō ’oe here ia rātou ’e e ’ōhie a’e nō ’oe ’ia ’ite mai i te mau rāve’a nō te fa’a’ite i terā here.