Maglab-ot nga may Kaluoy

Sa inyo pagsunod sa halimbawa sang Manluluwas sang pagkaluoy, makita ninyo nga pwede kamo magtuga sang kinalain sa mga kabuhi sang iban.

Ang pagkaluoy amo ang paghibalo sang kabudlayan sang iban upod ang handum nga pamag-anon ukon paumpawan ini. Ang kasugtanan nga sundon ang Manluluwas isa ka kasugtanan sang kaluoy nga “magpas-an sang palas-anon sang isa kag isa” (Mosias 18:8). Ang toka nga tamdan ang iban isa ka oportunidad sa pag-atipan pareho sa buhaton sang Ginuo: nga may “kaluoy, nga nagahimo sang kinatuhay” (Judas 1:22). Ang Ginuo nagmando, “Magpahayag sing kalulo kag kaawa ang tagsa ka tawo sa iya utod” (Zacarias 7:9).

Ang Kaluoy sang Manluluwas

Ang kaluoy isa ka pwersa sa likod sang pag-alagad sang Manluluwas (tan-awa sa sidebar: “Isa ka Maluluy-on nga Manluluwas”). Ang Iya kaluoy sa Iya isigkatawo nagtugot sa Iya sa paglab-ot sa ila nga nagapalibot sa Iya sa indi maisip nga tinion. Nga naaninag ang mga panginahanglan kag handum sang mga tawo, mahimo Niya sila bugayan kag tudloan sa mga paagi nga may kabilinggan para sa ila. Ang handum sang Manluluwas nga alsahon kita sa aton mga kabudlayan nagpadulong sa pinakamataas nga buhat sang kaluoy: ang Iya Pagpasag-uli (Atonement) para sa mga sala kag pag-antos sang katawhan.

Ang Iya ikasarang sa pagsabat sang mga panginahanglan sang mga tawo isa ka butang nga mahimo naton tinguhaan sa aton pag-alagad. Sa aton pagpangabuhi sing matarong kag sa pagpamati sa mga pagpabatyag sang Espiritu, mangin inspirado kita sa paglab-ot sa mga paagi nga makahuluganon.

Ang Aton Kasugtanan sang Kaluoy

Gusto sang Amay nga Langitnon nga mangin maluluy-on ang Iya mga anak (tan-awa sa 1 Mga Taga-Corinto 12:25–27). Agud mangin matuod-tuod nga mga disipulo, dapat kita magpatubo kag magpakita sang kaluoy sa iban, ilabi na gid sa mga nagapanginahanglan (D&C 52:40).

Nga ginadala sa aton mga kaugalingon ang ngalan ni Jesucristo paagi sa aton kasugtanan sa bunyag, nagasaksi kita nga handa kita sa pagpakita sang kaluoy. Si Pangulong Henry B. Eyring, Ikaduhang Manuglaygay sa Unang Panguluhan, nagpanudlo nga ang dulot sang Balaan nga Espiritu ang nagabulig sa aton nga himuon ini: “Kamo mga miyembro sang kasugtanan sa Simbahan ni Jesucristo. …

“Gani makabatyag kamo sang kaluyag nga buligan ang isa ka tawo nga nagahimulat nga mag-idog pasulong nga nagalukdo sang kalisod kag kabudlayan. Nagpromisa kamo nga buligan ninyo ang Ginuo nga pamag-anon ang ila palas-anon kag paumpawan sila. Ginhatagan kamo sang gahum sa pagbulig pamag-an sadtong mga lulan sang inyo nabaton ang dulot sang Balaan nga Espiritu.”¹

Halimbawa, isa ka sister sa Russia ang yara sa mabudlay nga sitwasyon sa pamilya nga nagpugong sa iya sa pagsimba sing masobra isa ka tuig. Isa pa ka sister sa branch ang naglab-ot nga may kaluoy tagsa ka Dominggo paagi sa pagtawag sa iya agud sugiran sia parte sa mga pamulong-pulong, leksyon, tawag sa misyon, nabun-ag nga mga lapsag, kag iban pa nga balita sa branch. Sang nasolbar na ang sitwasyon sa panimalay sang sister nga indi makasimba, nabatyagan niya nga parte sia sa gihapon sang branch tungod sang semanal nga tawag sang iya abyan.

© 2018 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Pagtugot sa Ingles: 6/17. Petsa sang pagtugot sa paglubad: 6/17. Paglubad sang Ministering Principles, July 2018. Hiligaynon. 15050 861

Apat ka mga Panugyan sa Pagpatubo sang Kaluoy

Samtang nga ang kaluoy sa masami nagatubo kon maagyan naton mismo ang mga pagtilaw, may pila ka mga butang nga mahimo naton sa karon agud magpatubo sang kaluoy. Magbinagbinag sang mga paagi nga inyo mahimo ining apat ka mga prinsipyo:

Pangamuyo-i ini. Sa inyo pagpangayo sa Amay nga Langitnon, pagabuksan Niya ang inyo tagipusuon agud “makabatyag kamo sang sinsero nga pagkabalaka para sa wala’y katapusan nga ikaayo kag kalipayan sang iban nga tawo” (Preach My Gospel: A Guide to Missionary Service [2004], 118; tan-awa man sa Moroni 7:48).
Himoa ini. Sarang kamo magpakita sing kaluoy paagi sa pagpamati kag pag-intiendi. Ibutang ang inyo kaugalingon sa ila lugar kag hunahunaa kon ano ang posible nila nga batyagon. Kon nagakabagay sa sitwasyon kag tion, mahimo kamo magtanyag sang bulig sa pagpahagan-hagan sang ila kasakit, pag-antos, ukon kabudlayan.
Sunda ang mga pagpabatyag. Ang Ginuo mahimo nga magpahayag sa aton sang mga paagi sa pagpakita sang kaluoy nga mahimo indi naton matalupangdan kon kita lang. Kon makabatyag kamo sang pagtandog gikan sa Espiritu nga magbulig sa iban, indi magpangduha-duha sa pag-akto diri.
Mangin Isa ka personal nga abyan. Ang pagpakita sang kaluoy mahimo nga simple lang pareho sang pagpakita sang matuod-tuod nga interes sa kabuhi sang mga tawo. Tun-i ang magpamati sing maayo (tan-awa sa “Mga Prinsipyo sa Ministering: Lima ka mga Butang nga Ginahimo sang mga Maayo Magpamati,” Liahona, Hunyo 2018, 6–9). Ang inyo gugma para sa ila magadako, kag mangin mas mahapos ang pagkilala sang mga paagi nga ipakita inang gugma.