2018
Bildim Ol Rilesensip We I Gat Mining
Ogis 2017


Pikja
ministering

Ol Givhan Prinsipol, Ogis 2018

Bildim Ol Rilesensip We I Gat Mining

Paoa blong yumi blong kea long ol narafala man bae i kam antap taem yumi gat wan rilesensip wetem olgeta we i gat mining.

Invitesen blong givhan long ol narafala man i wan janis blong bildimap ol rilesensip blong kea wetem olgeta—kaen rilesensip we bae i mekem olgeta i filim kamfot blong askem o blong akseptem help blong yumi. Taem yumi traehad blong developem ol kaen rilesensip olsem, God i save jenisim ol laef blong tugeta saed blong rilesensip ia.

“Mi bilivim fulwan se i no save gat wan impoten jenis sapos i nogat ol impoten rilesensip,” Sharon Eubank i talem, Fas Kaonsela insaed long Rilif Sosaeti Jenerol Presidensi. Mo blong mekem se ol seves we yumi mekem bae i mekem bigfala jenis long ol laef blong ol narafala man, hem i talem se ol seves ia i mas “hapen wetem wan tru hat blong wantem hilim, lisin mo gat wan gud rilesensip mo respek.”1

Ol rilesensip we i gat mining oli no folem wan stael o teknik. Oli hapen tru lav mo sore, ol traehad wetem tru hat, mo “tru lav” (D&C 121:41).2

Ol Wei blong Bildim mo Mekem I Kam Strong Moa Ol Rilesensip

“Yumi bildim [ol rilesensip] wetem wan man fastaem,” Elda Dieter F. Uchtdorf blong Kworom blong olgeta Twelef Aposol i talem.3 Taem yumi wokhad blong bildim ol rilesensip we i gat mining wetem olgeta we yumi givhan long olgeta, Tabu Spirit i save lidim yumi. Ol tingting ia oli folem wan paten we Elda Uchtdorf i bin givim.4

  • Lanem abaot olgeta.

    Presiden Ezra Taft Benson (1899–1994) i bin tijim, “Yu no save givim gud seves long olgeta we yu no save gud long olgeta.” Hem i bin givim tingting ia blong save ol nem blong wanwan famle memba mo save ol impoten taem olsem ol bedeit, ol blesing, ol baptaes, mo ol mared. Hemia bae i givim janis blong raetem wan not o ring blong kongratuletem wan famli memba long wan spesel ajivmen o wok we hem i komplitim.5

  • Spendem Taem Tugeta

    Wan rilesensip i tekem taem blong gro. Lukaotem ol janis blong stap mit oltaem. Stadi i soem se taem yu letem ol pipol oli save se yu kea hemia i impoten mo i mekem ol rilesensip oli helti.6 Visitim oltaem olgeta we oli singaotem yu blong givim seves long olgeta. Toktok wetem olgeta long jos. Yusum eni nara samting we i gud blong yusum—olsem imel, Fesbuk, instagram, Twita, Skaep, ol fon kol, o sendem wan kad. Elda Richard G. Scott (1928–2015) blong Kworom blong Olgeta Twelef Aposol i bin tokbaot paoa blong simpol wei mo fasin blong soemaot lav mo sapot: “Plante taem bae mi openem ol skripja blong mi, … mo bae mi faenem wan not we i fulap long lav mo sapot we [waef blong mi] Janin i putum insaed long ol pej blong skripja. … Ol spesel not ia … oli gohed blong stap wan presen blong kamfot mo insperesen we i spesel tumas long mi.”7

    Mo tu, tingbaot se i tekem tu blong mekem wan rilesensip. Yu save givim lav mo frensip, be rilesensip bae i no gro sapos wanwan long tufala i no akseptem o mekem wan saen i gobak. Sapos narawan i no akseptem, no fosem rilesensip ia. Givim hem taem blong luk ones traehad blong yu, mo sapos i nid, kaonsel wetem ol lida blong yu sapos rilesensip ia we i gat mining bae i save wokaot o no.

  • Komuniket wetem kea.

    Blong bildim ol rilesensip we i gat mining i nidim yumi blong mekem moa bitim wanem we i stap. Komuniket abaot wanem we i stap, i save fulap long ol samting olsem tokbaot plan, weta, mo nara smolsmol problem, be i no gat insaed fasin blong serem ol filing, ol bilif, ol gol, mo ol wari we yumi nidim, blong mekem se yumi joen gud tugeta long wan wei we i gat moa mining. Papa long Heven i bin soem eksampol blong kaen komunikesen we i gat mining taem Hem i stap serem ol filing mo plan blong Hem wetem Pikinini blong Hem (luk long Jon 5:20) mo wetem yumi tru long ol profet blong Hem (luk long Amos 3:7). Taem serem ol samting we wan i mekem wanwan dei mo ol jalenj blong laef tugeta olsem we Spirit i lidim yumi blong mekem, yumi filim glad long wanwan long yumi taem yumi faenem ol interes we i semmak mo serem ol eksperiens.

    Stap lisin hem i wan impoten pat blong stap komuniket blong soem se yu kea.8 Taem yu lisin gud, janis blong yu blong helpem ol narafala man i kam long Kraes, i bigwan taem yu kam blong andastanem moa gud ol nid blong olgeta, taem oli filim lav blong yu, yu andastanem olgeta, mo oli filim sef.

  • Luksave ol samting we i defren mo i semmak long olgeta.

    “Sam … oli biliv se Jos i wantem blong krietem evri memba long sem wei—blong wanwan i mas luk, filim, tingting mo mekem olsem evri narafala man,” Elda Uchtdorf i talem. “Hemia bae i agensem save blong God we i krietem evri man i defren long brata blong hem. …

    “Jos i gro taem yumi yusum ol defdefren samting ia mo leftemap tingting blong yumi wanwan blong developem mo yusum ol talen blong yumi blong leftemap mo mekem ol disaepol brata blong yumi oli kam strong moa.”9

    Blong lavem ol narafala man olsem we God i lavem yumi, i nidim yumi blong traem luk ol narafala man long wei we God i luk olgeta. Presiden Thomas S. Monson (1927–2018) i bin tijim se, “Yumi mas jenisim lukluk blong yumi long wan moa gud wei long [ol narafala man] i no olsem we oli stap naoia be olsem we bae oli save kam.”10 Yumi save prea from help blong luk ol narafala man long wei we God i mekem. Taem yumi tritim ol narafala man folem hamas oli save mekem blong gro, bae oli save girap long taem ia.11

  • Givim Seves long Olgeta.

    Save gud ol nid blong olgeta we yu givhan long olgeta mo wiling blong givim taem mo ol talen blong yu, nomata long taem blong nid o from nomo se yu kea long olgeta. Yu save stap long taem ia blong givim kamfot, sapot, mo help we oli nidim taem i gat wan imejensi, siknes, o situesen we i nidim kwik help. Be long plante plante rilesensip yumi mekem from oli askem yumi blong mekem. God i givim yumi fridom blong joes blong yumi save tekem aksen be i no blong man i tekem aksen long yumi(see 2 Nifae 2:14). Semmak olsem we Aposol Jon i tijim se yumi lavem God from Hem i faswan we i lavem yumi (luk Fas Jon 4:19), taem ol narafala man i filim kaen lav blong yumi tru long ol fasin blong yumi blong givim seves, bae i save mekem ol hat blong olgeta i kam sopsop mo mekem lav mo tras i kam antap.12 Hemia i krietem wan fasin blong wok we i kaen we i save bildim gud ol rilesensip.

Givhan Olsem we Sevya I Bin Mekem

Jisas Kraes i bildim ol rilesensip we i gat mining wetem ol disaepol blong Hem. (luk long Jon 11:5). Hem i save olgeta (luk long Jon 1:47–48). Hem i spendem taem wetem olgeta (luk long Luk 24:13–31). Komunikesen blong Hem wetem olgeta i moa bitim wanem we i stap (luk long Jon 15:15). Hem i luksave ol defdefren talen we oli gat (luk long Matiu 9:10) mo luk paoa we oli gat blong mekem samting (luk long Jon 17:23). Hem i givim seves long evriwan, nomata Hem i Lod blong evriwan, we i talem se Hem i bin kam i no blong man i givhan long Hem be blong Hem i givhan long ol man (luk long Mak 10:42–45).

?Wanem nao bae yu mekem blong bildim wan strong rilesensip wetem olgeta we oli bin singaotem yu blong givim seves long olgeta?

Ol Not

  1. Sharon Eubank, in “Humanitarian Acts Must Be Rooted in Relationship, Sharon Eubank Says,” mormonnewsroom.org.

  2. Luk long “Ministering Principles: Reach Out in Compassion,” Liahona, July 2018, 6–9.

  3. Dieter F. Uchtdorf, “Of Things That Matter Most,” Liahona, Nov. 2010, 22.

  4. Luk long Dieter F. Uchtdorf, “Of Things That Matter Most,” 22.

  5. Luk long Ezra Taft Benson, “To the Home Teachers of the Church,” Ensign, May 1987, 50.

  6. Luk long Charles A. Wilkinson and Lauren H. Grill, “Expressing Affection: A Vocabulary of Loving Messages,” in Making Connections: Readings in Relational Communication, ed. Kathleen M. Galvin, 5th ed. (2011), 164–73.

  7. Richard G. Scott, “The Eternal Blessings of Marriage,” Liahona, May 2011, 96.

  8. Luk long “Ol Givhan Prinsipol: Ol Faef Samting wan Man We i lisen Gud i save Mekem,” Liahona, June 2018, 6–9.

  9. Dieter F. Uchtdorf, “Four Titles,” Liahona, May 2013, 59.

  10. Thomas S. Monson, “See Others as They May Become,” Liahona, Nov. 2012, 69.

  11. Luk long Terence R. Mitchell and Denise Daniels, “Motivation,” in Handbook of Psychology, vol. 12, ed. Walter C. Borman and others (2003), 229.

  12. Luk longEdward J. Lawler, Rebecca Ford, and Michael D. Large, “Unilateral Initiatives as a Conflict Resolution Strategy,” Social Psychology Quarterly, vol. 62, no. 3 (Sept. 1999), 240–56.