2018
Ndibop Nti Ebuana
August 2018
Ndise
Ministering

Ukpebnkpo Ukworo-iko Abasi, Ofiong Itiokiet ke isua 2018

Ndibop Nti Ebuana

Ukeme nnyin ke ndise nkpo mbanga kiet eken eyekori ke ini emi nnyin inyenede nti ebuana ye mmo.

Ikoot ndikworo iko nno mbon efen edi ifet ke ndibop nti ebuana ye mmo—oruk ebuana emi edinamde mmo ekop inem ndibup nyom ye ndibo unwam eke nnyin. Kini nnyin ima inam ukeme ke nditongo oruk ebuana oro, Abasi enyene ukeme ndikpuhore uwem ke nkang ebuana owo mbiba oro.

Sharon Eubank, Akpa Onoitem ke Relief Society General Presidency odoho ete, “Ami mmenim ke akpaniko ke akpan ukpuhore iduhe ke akpan ebuana miduhe.” Ndien man utom unwam nnyin enehede enyene ukpuhore ke uwem mme owo, enye odoho ete, ke ana nte utom oro “okongo ke ata udong ndinwam nnyung nno mkpang-utong nnyung ndiana otokiet nnyung nno ukpono.”1

Nti ebuana idihe nkari unam nkpo. Ebop mme utom oro ke esit mbom , nti ukeme ye ”ima emi mikopke ekaha” (D&C 121:41).2

Mme Usung Ndibop nnyung Nsongo Ebuana

Elder Dieter F. Uchtdorf eke Eboho mme Apostle Duopeba odoho ete ke “Nnyin ibop [mme ebuana] ye owo kiet ke ini kiet.”3 Nte nnyin idomoke ndibop nti ebuana ye mbon emi nnyin ikworoke iko Abasi ino, Edisana Spirit ekeme ndino nnyin ndausung. Mme ekikere emi okongo ke usung se Elder Uchtdorf okonode.4

  • Ekpebe ebanga mme ekikere oro.

    President Ezra Taft Benson (1899–1994) ekpeb ete, “Mbufo idikemeke ndinehede nnwam mbon emi mbufo mitimke idiongo.” Enye okono ekikere abanga ndidiongo enying owo ufokemana kiet-kiet ye ndifiok mme akpan edinam nte usen emana, usen ekediongde, usen uduok-mmong, ye usen ndo mmo. Emi eyeno ufang ke ndiwet ekpri nwed mme ke ndikot ke phone ndara ye owo ufokemana kiet oro ke akpan edinam ye nam nkure oro.5

  • Ebiat ini etie otokiet.

    Eyeda ini ke nditongo ebuana. Eyom ufang man esisobo ye kiet eken. Ukpeb owut ete ke ndinam mme owo ediongo ete ke mbufo emema mmo edi akpan nkpo ke inem ebuana.6 Ewak ndikise mbon owo emi ekotde mbufo ete eka ekenwam. Eneme nneme ye mmo ke Ufok Abasi. Eda usung ekededi emi enyenede ufon—nte email, Facebook, Instagram, Twitter, Skype, ndikot ke phone, ye ndino card esok. Elder Richard G. Scott (1928–2015) eke Eboho mme Apostle Duopeba eketing abanga odudu eke ndimem ye edinam nwut ima ye osongo ete: “Ediwak ini ke nkubokede nwed Abasi mi, … ndien ami nyekut inem, osongo ekpri nwed [nnwan mi] Jeanene ekewetde afak ke esit nwed Abasi oro. … Mme osongurua mkpri nwed … ke akaka iso edi anana ekom urua mkpouto eke ndongesit ye odudu.”7

    Nko, eti ete ke ebuana oyom owo iba. Mbufo emekeme ndino ima ye edinam ufan, edi ebuana idikorike ke unyime ebuana ye iboro miduhe. Edieke etiede nte owo enye eken inyimeke, ekukpakpak ebuana oro. Eyak enye ada ini man ese ata ukeme mbufo, ndien edieke odotde, eneme ye mme adausung mbufo ebanga mme ufang eyedu ke eti ebuana nditibe mme ididuhe.

  • Eneme nneme ke esit ima.

    Ndibop nti ebuana oyom ete nnyin ibe ndaha eke inua-inua. Nneme inua- inua oyoho ye mkpri iko kabanga ini unam nkpo, nte usen editiede, ye mkpri nkpo eken, edi oro isineke ibanga ndibuana ekikere, se enimde ke akpaniko, uduak ye mfina emi ekemede ndinam nti edinam ebuana awak. Ete ke Enyong ama onim ediwak nti oruk ebuana emi ke ndibuana ekikere ye uduak Esie ye Eyen Esie (se ke John 5:20) ye nnyin oto ke mme prophet Esie (se ke Amos 3:7). Nte ibuanade mme nkpo ntibe ye mfina eke uwem k’usen-k’usen ye kiet eken ke nte Spirit etemede, nnyin iyekop inemesit ino kiet eken ke nte nnyin ikutde nti udong ye ebuana ifiok ukpeb.

    Mkpang-utong edi ata ubak akpan nkpo ke nneme ndiwut ete ke mbufo emese enyin.8 Kini mbufo enehede eno mkpang-utong, ufang mbufo ke ndinwam mbon efen edi etiene Christ eyekpon ke nte mbufo enyenede ifiok ye ekikere ekut unana mmo ye ke nte mmo ebode ima, unyime ye ifure.

  • Efiok ete ke ukpuhore ye ndidi nkanga-owo eyedu nko.

    Elder Uchtdorf odoho ete ke, “Ubakowo … ekere ke Ufok Abasi eyom ndinam ofuri member edi ukem-ukem—ke owo kiet-kiet ekpebiet, ekpekere, enyung ekpenam nkpo nte ofuri mbon efen.” “Emi akpabiat akwa ubono nkpo eke Abasi, emi okobotde owo kiet-kiet okpuho okpong eyeneka esie. …

    “Ufok Abasi eyekori kini nnyin idade ufang ukpuhore emi inyung inwam kiet eken ke ndikori nnyung nda eno nnyin man imenede inyung isongo ndito-eka nnyin eken idem.”9

    Ndima mbon efen ke usung nte Abasi amade nnyin oyom ete yak nnyin idomo ndikut kiet eken ke nte Abasi okutde mmo. President Thomas S. Monson (1927–2018) ekpeb ete ke, “Ana nnyin itongo inyene ukeme ndikut [mbon efen] ke ndaha emi mmo midige idahaemi edi ke ndaha nte mmo ekemede ndikabare ndi.”10 Nnyin imekeme ndibenge nyom unwam man ikut mbon efen ke ndaha nte Abasi okutde. Ke nte nnyin isede mbon efen ke ndaha emi mmo ekemede ndikori nkesim, mmo ekeme ndikori nkesim ndaha oro.11

  • Enam nkpo eno mmo.

    Enehede ese ebnaga unana eke mbon owo emi mbufo ekworode iko Abasi eno enyung enyime ndino ini ye eno mbufo, mme ekpedi ke ini unana mme koro mbufo emema mmo. Mbufo emekeme ndidu do man eno ndongesit, nsongonda, ye unwam emi eyomde kini emi abuabuat nkpo, udongo, ye nnanaenyin etibede. Edi ke ediwak ebuana nnyin imesinam utibe nkpo. Abasi ama ono nnyin unen ndimek man otodo nnyin ikeme ndinam nkpo idige ndinanam nkpo ndori ke nnyin (se ke 2 Nephi 2:14). Ukem nte Apostle John ekekpebde ete ke nnyin ima Abasi koro Enye ekebem iso ama nnyin (se ke 1 John 4:19), ke ini mbon efen efiokde ata ima nnyin oto ke mme edinam utom unwam nnyin, oro ekeme ndinam esit enem onyung anam ima ye mbuotidem okori.12 ke ini mbon efen efiokde ata ima nnyin oto ke mme edinam utom unwam nnyin, oro ekeme ndinam esit enem onyung anam ima ye mbuotidem okori.

Ndikworo iko Abasi ke nte Andinyanga Akanamde

Jesus Christ ama obop nti ebuana ye mme mbet Esie (se ke John 11:5). Enye ama odiongo mmo (se ke John 1:47–48). Enye ama abiat ini odu ye mmo (se ke Luke 24:13–31). Nneme Esie ama ebe ndaha eke inua-inua (se ke John 15:15). Enye ama ofiok ukpuhore ndaha mmo (se ke Matthew 9:10) onyung okut ndaha nkori mmo (se ke John 17:23). Enye akanam nkpo ono kpukpru owo, ekpedi nte Enye ekedide Obong mme mbong, odoho ete ke Imo ikedige man edinam nkpo eno imo edi ke ikedi man idinam nkpo ino mbon owo efen (se ke Mark 10:42–45).

Nso nkpo ke mbufo ekpenam man ebop osongo ebuana ye mbon owo emi ekotde mbufo ete enam nkpo eno?

© 2018 otode Intellectual Reserve, Inc. Ekpan kpukpru unen ndiming. Ekeming ke USA. Enyime edikabare ke Iko Mbakara: 6/17. Enyimme Ndikabare: 6/17. Edikabare eke Ministering Principles, June 2018. Efik 15051 553

Mkpri nwed

  1. Sharon Eubank, ke “Ana nte Utom Unwam Okongo ke Ebuana, Sharon Eubank Eketing,” mormonnewsroom.org.

  2. Se ke “Ukpebnkpo Ukworo-iko Abasi: Enwam Mbon efen ke Esit mbom,” Liahona, July 2018, 6–9.

  3. Dieter F. Uchtdorf, “Kabanga mme Nkpo Emi Enehede Enyene Ufon,” Liahona, Nov. 2010, 22.

  4. Se ke Dieter F. Uchtdorf, “Kabanga mme Nkpo Emi Enehede Enyene Ufon,” 22.

  5. Se ke Ezra Taft Benson, “Ewet Ono mme Home Teachers eke Ufok Abasi,” Ensign, May 1987, 50.

  6. Se ke Charles A. Wilkinson ye Lauren H. Grill, “Ndiwut Ima: Ediwak iko eke Etop Ima,” in Ndinam Ebuana: Se Ekotde ke Nneme Ebuana, ed. Kathleen M. Galvin, 5th ed. (2011),

  7. Richard G. Scott, “Nsinsi Edidiong eke Ndo,” Liahona, May 2011, 96.

  8. Se ke “Ukpebnkpo Ukworo-iko Abasi: Nkpo Ition emi Nti mbon Mkpang-utong Esinamde,” Liahona, June 2018, 6–9.

  9. Dieter F. Uchtdorf, “Ibuot-iko Inang,” Liahona, May 2013, 59.

  10. “Ekut Mbon Efen nte Mmo Ekpekemede Ndikabare Ndi,” Liahona, Nov. 2012, 69.

  11. Se ke Terence R. Mitchell ye Denise Daniels, “Nkpo-eyen Utom,” ke Nwed Ukpeb ifiok, vol. 12, ed. Walter C. Borman ye mbon efen (2003), 229.

  12. Se ke Edward J. Lawler, Rebecca Ford, ye Michael D. Large, “ Mme Usung emi Ekebierede ndida Ntre Mfina,” Social Psychology Quarterly, vol. 62, no. 3 (Sept. 1999), 240–56.