2018
Fa’atupura’a i te mau aura’a pāpū
August 2018
Hōho’a
Ministering

Te mau parau tumu nō te aupurura’a, ’Ātete 2018

Fa’atupura’a i te mau aura’a pāpū

E mara’a tō tātou ’aravihi nō te ’atu’atu ia vetahi ’ē ’ia vai ana’e te hō’ē aura’a pāpū tātou ’e o rātou.

Te anira’a ’ia aupuru ia vetahi ’ē ’o te hō’ē ïa rāve’a nō te fa’atupu i te mau aura’a ha’amaita’i ’e o rātou—te hō’ē aura’a ’o te fa’ataiā ’ore ia rātou ’ia ani ’e ’aore rā e fāri’i i tā tātou tauturu. ’Ia tūtava ana’e ’outou i te fa’ananea i teie aura’a ha’amaita’i, e nehenehe te Atua e taui i te orara’a i nā pae e piti o te aura’a.

’Ua parau ’o Sharon Eubank, tauturu hō’ē i roto i te peresidenira’a rahi o te Sōtaiete Tauturu « ’ua ’ite pāpū roa vau e ’aita e tauira’a pāpū ’aita ana’e e aura’a pāpū ». ’E nō te fa’ariro i tā tātou ’ohipa tāvinira’a ’ei fa’atauira’a i te orara’a o vetahi ’ē, ’ua parau ’oia e mea ti’a te reira « ’ia a’ahia i roto i te hia’ai mau ’ia fa’aora, ’ia fa’aro’o, ’ia turu ’e ’ia fa’atura ».1

E ’ere te mau aura’a pāpū i te mau perera’a. E patu te reira i te aroha, te tauto’ora’a mau ’e te « here mau » (PH&PF 121:41).2

Te mau rāve’a nō te fa’atupu ’e nō te ha’apūai i te mau aura’a

« Tē fa’atupu nei tātou i (te mau aura’a) hō’ē ta’ata i te taime hō’ē » ’ua parau o Elder Dieter F. Uchtdorf nō te Pupu nō te Tino ’Ahuru ma Piti ’āpōsetolo.3 ’A tūtava ai tātou i te patu i te mau aura’a pāpū e te feiā tā tātou e tāvini nei, e nehenehe te Vārua Maita’i e arata’i ia tātou. ’Ua niuhia te mau mana’o i muri nei i ni’a i te hō’ē hōho’a tei pūpūhia mai e Elder Uchtdorf.4

  • Ha’api’i mai nō ni’a ia rātou.

    ’Ua ha’api’i te peresideni Ezra Taft Benson (1899–1994), « e’ita ’outou e nehenehe e tāvini maita’i i te feiā ’aita ’outou i mātau maita’i ». ’Ua ani mai ’oia ’ia mātau maita’i te mau i’oa o te mau melo tāta’itahi o te ’utuāfare ’e ’ia ha’amana’o i te mau ’ohipa faufa’a rahi e tupu mai te mahana fānaura’a, te mau ha’amaita’ira’a. E hōro’a mai te reira i te rāve’a ’ia pāpa’i atu ’aore rā ’ia niuniu atu nō te ha’apoupou i te hō’ē melo o te ’utuāfare nō te hō’ē ’ohipa tei tupu ’aore rā hō’ē fa’aotira’a ta’a ’ē.5

  • Haere ’āmui te tahi taime

    E taime rahi e ravehia nō te fa’atupu i te hō’ē aura’a. ’Imi i te mau rāve’a nō te tāpe’a noa i te auhoara’a. Tē fa’a’ite nei te mau mā’imira’a ē te vaiihora’a i te mau ta’ata ’ia ’ite ē tē ha’ape’ape’a ra ’outou nō rātou e mea faufa’a nō te mau aura’a maita’i.6 Fārerei pinepine i te feiā tei pi’ihia ’ia ’outou ’ia tāvini. Paraparau ia rātou i te fare purera’a. Fa’a’ohipa i te mau rāve’a faufa’a hau atu, mai te ’imere, te Facebook, Instagram, Twitter, Skype, te niuniura’a ’aore rā te hāponora’a i te hō’ē tāreta. ’Ua parau o Elder Richard G. Scott (1928–2015) nō te Pupu nō te Tino ’Ahuru ma Piti ’āpōsetolo nō ni’a i te mana nō te mau fa’a’itera’a ’ōhie ’e te hāmanira’a o te here ’e te turura’a : « Pinepine au i te hōhora i tā’u mau pāpa’ira’a mo’a … ’e e ’ite mai au i te hō’ē nota aroha ’e te au a Jeanene [tā’u vahine] tei tu’uhia i roto i te mau ’api. E tāmau noa teie mau nota faufa’a rahi … i te riro ’ei tao’a faufa’a rahi roa nō te tāmahanahana ’e nō te fa’aurura’a ».7

    ’Oia ato’a, e ha’amana’o ē te hō’ē aura’a e piti ïa. E nehenehe ’outou e pūpū i te here ’e te auhoara’a, ’aita rā te aura’a e rahi atu ’āhani ra e fāri’ihia ’e e fa’aho’ihia mai te hōro’ara’a. Mai te mea ’aita te tahi e fāri’i, ’eiaha e fa’ahepo i te aura’a. Hōro’a iāna i te taime nō te hi’o i tā ’outou mau tauto’ora’a mau, ’e mai te mea e tītauhia, ’a paraparau atu i tō ’outou feiā fa’atere nō ni’a i te aura’a pāpū, e tupu mau ānei te reira.

  • ’Āparaura’a ma te maita’i

    E tītau te patura’a i te mau aura’a pāpū ia tātou ’ia haere i te rahi atu. ’Ua ’ī te ’āparaura’a arivarivatao (superficiel) i te mau paraparau nō ni’a i te mau tārena hora, te anuvera ’e te tahi atu mau fifi rau, ’aita rā te reira e fa’a’ite atu i te mau mana’o, te mau ti’aturira’a, ’e te mau mana’ona’ora’a e tītauhia nō te fa’atupu i te mau tā’amura’a pāpū hau atu. ’Ua fa’ahōho’a te Metua i te Ao ra i teie huru ’āparaura’a hau atu i te pāpū ma te fa’a’itera’a atu i tōna mau ’āehuehura’a ’e tāna mau fa’anahora’a i tāna Tamaiti (hi’o Ioane 5:20) ’e ia tātou nā roto mai i tāna mau peropheta (hi’o Amosa 3:7). Ma te ’āparaura’a i te ’ohipa e tupu ra i te mau mahana ato’a, ’e te mau tītaura’a o te orara’a te tahi ’e te tahi mai te au i te arata’ira’a a te Vārua, e tupu mai i roto ia tātou te au maita’i nō te tahi e te tahi, ’a ’ite mai ai tātou i te mau mea e au-’āmui-hia ’e te mau ’itera’a e tāu’aparau-’āmui-hi’a.

    Te fa’aro’ora’a ’o te hō’ē ïa tuha’a faufa’a roa o te ’āparaura’a ’o tā ’outou e ha’apa’o maita’i.8 ’Ia fa’aro’o maita’i ana’e ’outou, e mara’a tā ’outou rāve’a nō te tauturu ia vetahi ’ē ’ia haere i te Mesia ra, ’a ha’api’i mai ai ’outou ’ia ta’a maita’i ’e ’ia māramarama i tō rātou mau hina’aro ’e ’ia ’ite rātou ’ua herehia, ’ua ta’a-maita’i-hia ’e e pāruruhia rātou.

  • E au i te mau ta’a-’ē-ra’a ’oia ato’a te mau mea e au-’āmui-hia.

    « Vetahi mau ta’ata… te ti’aturi nei rātou ē, te hina’aro nei te ’Ēkālesia e hāmani hō’ē ā huru fāito melo—’oia ho’i, ’ia hi’o, ’ia mana’o, ’ia feruri ’e ’ia ha’a mai te tahi atu mau huru ta’ata » ’ua parau Elder Uchtdorf. « E fa’ahape te reira i te pa’ari o te Atua, tei hāmani i te ta’ata ma te ta’a ’ē i tōna taea’e …

    « E tupu rahi te ’Ēkālesia mai te mea e fa’a’ohipa maita’i tātou i teie huru ta’a-’ē-ra’a, ’e e fa’aitoito tātou te tahi i te tahi ’ia fa’ahotu ’e ’ia fa’a’ohipa i tō tātou mau tārēni nō te fa’aitoito ’e nō te ha’apūai i tō tātou ta’ata tupu ».9

    Here ia vetahi ’ē mai tā te Atua e tītau ’ia tātou ’ia here ē ’ia tāmata tātou ’ia hi’o ia vetahi ’ē mai tā te Atua e hi’o ia rātou. ’Ua ha’api’i mai te peresideni Thomas S. Monson (1927–2018), « e ti’a ia tātou ’ia fa’atupu i te ’aravihi ’ia hi’o [’ia vetahi ’ē], ’eiaha mai te ta’ata tā rātou e fa’a’ite ra, ’ei ta’ata rā tā rātou e nehenehe e riro mai ».10 E nehenehe tātou e pure nō te fāri’i i te tauturu ’ia hi’o ia vetahi ’ē mai tā te Atua e rave nei. ’A fa’ariro ai tātou ia vetahi ’ē mai te au i tō rātou ’aravihi e tupu ra, e nehenehe rātou e mara’a atu nō te reira huru.11

  • Tāvini ia rātou.

    ’Ia ’ite atu i te mau hina’aro o te feiā tā ’outou e aupuru ra ’e ’ia ineine i te hōro’a atu i tō ’outou taime ’e tā ’outou tāleni, i te mau taime e hina’arohia ’aore rā nō te mea noa tē ha’ape’ape’a ra ’outou. E ti’a ia ’outou ’ia vai i reira nō te tāmāhanahana, te pāturu ’e ’ia tauturu i te mau taime fifi, te ma’i ’aore rā te ’ohipa rū. Tera rā i roto i te mau aura’a rau e ’ohipa tātou. ’Ua hōro’a mai te Atua ia tātou i te mana ’ia ti’a ia tātou ’ia ’ohipa ’eiaha rā ’ia ’ohipahia (hi’o 2 Nephi 2:14). Mai tā te ’āpōsetolo Ioane i ha’api’i ē tē here nei tātou i te Atua nō te mea tē here nei ’oia ia tātou nā mua roa (hi’o 1 Ioane 4:19), ’ia fāri’i ana’e vetahi i tō tātou here mau nā roto i tā tātou ’ohipa tāvinira’a, e nehenehe te reira e tāmārū i te mau ’ā’au ’e e ha’amara’a i te here ’e te ti’aturira’a.12 E hāmani te reira i te hō’ē ’āureure ni’a nō te mau ’ohipa mata aiai ’o te nehenehe e fa’atupu i te mau aura’a.

Aupuru mai tā te Fatu i rave

’Ua fa’atupu Iesu Mesia i te mau aura’a pāpū ’e tāna mau pipi (hi’o Ioane 11:5). ’Ua mātau ’oia ia rātou (hi‘o Ioane 1:47-48). ’Ua haere nā muri ia rātou (hi’o Luka 24:13-31). Tei ni’a roa atu tāna tāu’ara’a parau (hi’o Ioane 15:15). ’Ua au ’oia i tō rātou mau ta’a-’ē-ra’a (hi’o Mataio 9:10) ’e ’ua ’ite i tō rātou mau ’aravihi (hi’o Ioane 17:23). ’Ua tāvini ’oia i te mau ta’ata ato’a, noa atu ē ’o ’oia te Fatu nō te tā’āto’a, ma te parau ē ’ua haere mai ’oia nō te tāvini ’eiaha ra ’ia tāvinihia (hi’o Mareko 10:42–45).

E aha tā ’oe e rave nō te fa’atupu i te mau aura’a pāpū maita’i ’e te feiā tei pi’ihia ’oe e tāvini ?

© 2018 nā Intellectual Reserve, Inc. Fatura’a pāruruhia. Nene’ihia i Marite. Parau fa’ati’a nō te reo peretāne : 6/17. Parau fa’ati’a nō te ’īritira’a : 6/17. ’Īritira’a nō Ministering Principles, August 2018. Tahitian. 15051 895

Fa’ata’ara’a

  1. Sharon Eubank, i roto « Humanitarian Acts Must Be Rooted in Relationship, Sharon Eubank Says », mormonnewsroom.org.

  2. Hi’o « Parau tumu nō te aupurura’a : Toro i te rima i te ta’ata ma te aumihi », Liahona, Tiurai 2018, 6–9.

  3. Dieter F. Uchtdorf, « Te mau mea faufa’a a’e », Liahona, Novema 2010, 22.

  4. Hi’o Dieter F. Uchtdorf, « Te mau mea faufa’a a’e », 22.

  5. Hi’o Ezra Taft Benson, « To the Home Teachers of the Church », Ensign, Me 1987, 50.

  6. Hi’o Charles A. Wilkinson and Lauren H. Grill, « Expressing Affection: A Vocabulary of Loving Messages », i roto Making Connections: Readings in Relational Communication, nene’ira’a a Kathleen M. Galvin, nene’ira’a 5 (2011), 164–73.

  7. Richard G. Scott, « Te mau ha’amaita’ira’a mure ore o te Fa’aipoipora’a », Liahona, Me 2011, 94.

  8. Hi’o « Parau tumu nō te aupurura’a : E pae ’ohipa e rave te hō’ē ta’ata e fa’aro’o mai ra i tā ’oe parau », Liahona, Tiunu 2018, 6–9.

  9. Dieter F. Uchtdorf, « Tāmau noa i te fa’a’oroma’i », Liahona, Mē 2013, 59.

  10. Thomas S. Monson, « Hi’o ia vetahi ’ē ei ta’ata tā rātou e nehenehe e riro mai », Liahona, Novema 2012, 69.

  11. Hi’o Terence R. Mitchell and Denise Daniels, « Motivation », i roto Handbook of Psychology, vol. 12, ed. Walter C. Borman and others (2003), 229.

  12. Hi’o Edward J. Lawler, Rebecca Ford, and Michael D. Large, « Unilateral Initiatives as a Conflict Resolution Strategy », Social Psychology Quarterly, vol. 62, no. 3 (Sept. 1999), 240–56.