Ediomo kabanga Unana Mmo

Inaha nte mbufo enam emi ikpong. Ndidodiomo ekeme ndino unwam emi mbufo eyomde man enwam mbon efen.

Abasi okokot mbufo ete edisin unwam eno owo kiet mme emana kiet ke ward mm eke branch mbufo nte ekemde ye unana mmo. Mbufo edi inam didie ekut se mme unana oro edide? Ukpebnkpo edidiomo, emi ekedide akpan utom ke Ufok Abasi, edi usung ke nte edinamde.

Ke ima ikeneme se nnyin ikpekerede ndidiomo mbanga ikure, nnyin iyedungore:

Ebong akam eno Ete ke Enyong
Ndineme ye Ete ke Enyong.
Ndidiomo ye owo ye ufokemana emi enode ibiong-utom.
Ndien ndidiomo ye mbon efen emi enode ibiong-utom esok ukem owo mme ufokemana oro.

Nko edi akpan-nkpo ke ndidiomo ye mme adausung nnyin. Nwed Ukpebnkpo Ukworo-iko Abasi eke ini iso ke Liahona eyedungore ndidiomo ye mme adausung nko ye utom eke ndineme mbanga uwem ke usung oro.

Se Nnyin isidiomode ibanga

Ndifiok mme unana edi akpan-nkpo ono ndisin unwam nno kiet eken. Edi ewe usung ke edida iyo mme unana oro, nko nte odu nkpo efen emi akande unana eke nnyin ikpedungore iyom?

Unana ekeme ndidi ke ediwak usung. Mbon emi nnyin inwamde ekeme ndinyene ediwak mfina emi edide ekikere esit-idem, unana-okuk, mfina ikpokidem, ufoknwed ye ediwak mfina eken. Ubak unana okpon akan mme unana efen. Nnyin iyenyene ukeme ndinwam ke ubak unana mmo; unana eken eyeyom nnyin ndikot mbon efen ke idem nnyin ete edidiana enwam. Man nnyin ikeme ndinwam mbon efen ke unana ikpokidem mmo, ekufre ete ke esine ke ikoot nnyin ndinwam nam mbon efen enyene nkori ke usung ediomo, ndibenge idem nno, nnyung mbo mme edinam itie oku eke edinamde mmo enyene oyoho-ubong.

Ke ndidian ke ndidiomo mbanga unana owo kiet mme eke ufokemana kiet, ana nnyin idungore idiongo ukeme mmo. Ewe nkpo ke mmo ekpekeme ndinam ke idem mmo? Ewe ukeme ye eno ke mmo enyene emi ekpekemede ndinwam mbon efen? Didie ke mmo enehede edot ke ndinwam mbop obio ubong Abasi? Ukeme owo kiet ekeme ndidi akpan-nkpo ke ndifiok se unana esie edide.

Ndineme ye Ete ke Enyong

Ata akpan-nkpo kiet emi nnyin inimde ke akpaniko edi ke Ete ke Enyong osuk eteting iko ono ndito Esie (se ke Articles of Faith 1:9). Ini emi nnyin ibode obufa ibiongutom ke ndikworo-iko nno owo kiet, ana nnyin ineme ye Ete ke Enyong ke akam, iyom usung ye ifiok man idiongo unana ye ukeme mmo. Akpana usung ndidiomo ntre ke akam aka iso ke ofuri ubiong utom ukworo-iko nnyin.

Ndidiomo ye mme Owo ye Ufokemana kiet-kiet

Didie ye ewe ini emi nnyin ikade ibine mme owo ye ufokemana emi ekotde nnyin ete ikanwam ekeme ndikpuhore kabanga ndaha, edi ndineme iso-ye-iso ye owo mme ufokemana kiet edi akpan-nkpo ke ndibop ebuana ye ndifiok unana mmo, ke esit edide nte mmo eyomde ndibo unwam. Ana nte ubak mbume ebet tutu ata ebuana otongo. Sia ata eti usung ke ndinam oro miduhe, ekere ebanga mme usung emi:

Eyom ediongo adanga ye ini emi mmo ekpemade mme owo esobo ye mmo.
Ekpeb ebanga se mmo emade ye ndaha ini mmo emi ekebede.
Enam ekikere kabanga nte mbufo ekpekemede ndinwam, ndien ebup eyom ekikere mmo.

Nte nnyin inamde ufan, ekere ndineme mbanga mme unana owo mme eke ufokemana kiet-kiet. Ebup mbume ke nte Edisana Spirit etemede.¹ Nte uwutnkpo:

Ewe mfina ke mmo enyene?
Nso idi uduak mmo mme eke ufokemana mmo? Nte uwutnkpo, nte okpofon mmo ndinyene family home evening kini-kini, ye ke ndinehede nda-ke-idem mmo?
Didie ke nnyin ikeme ndinwam mmo ke uduak ye ke mfina mmo?
Ewe edinam iko Abasi ke ana nte mmo ebo ke uwem mmo? Didie ke nnyin ikeme ndinwam man mmo enyene mbengeidem?

Eti ndino ata akpan unwam, emi edide, “Ewe okoneyo ke nnyin ikpeda udia isok mbufo ke udua emi? Ikpikpu eno, nte, “Enam nnyin idiongo mme odu nkpo emi nnyin ikpekemede ndinam,” iditimke inwam.

Ndidiomo ye Nsanga Nnyin

Koro mbufo ye nsanga mbufo ididuhe ofuri ini otokiet kini mbufo edisobode ye owo ye ufokemana kiet, ofon nditum nnyung ndiomo otokiet ke nte mbufo eyomde ifiok-Abasi nte nsanga. Ese mme ubak mbume se ekpekere ebanga mi:

Didie ndien ke esiwak ini emi mbufo esinemede nneme ye kiet eken nte nsanga?
Didie ke mbufo owo kiet-kiet edida nsongonda mbufo esin unwam ke mme unana ufokemana ye eke owo kiet-kiet?
Ewe nkpo ke mbufo ekpeb, ewe ifiok-ukpeb ke mbufo enyene, ndien ewe ntuuk ke mbufo ebo otongode ke akpatre ini emi mbufo ekenemede ebanga owo mme ufokemana kiet?

Ndidiomo ye Mbon efen emi ekenode Ubiong-utom

Okpofon ndineme kini-kini ye mbon efen emi enode ubiong-utom ke ndisin unwam nno ukem owo mme ufokemana emi enode nnyin nko.

Eneme-nneme man Eyo mme Mfina

Elder Chi Hong (Sam) Wong eke Seventy ada mbuk eketode Mark 2 ono ke eyo nnyin emi man owut danga ndidiomo otokiet anam edi mmem-mmem nkpo ono owo inang ndifiok usung man eda owo emi okodongode akpa-ubeng edisim iso Jesus.

Elder Wong odoho ete, “Ebiet eketibe ntem.” “Owo inang ekenam ubiong-utom otode bishop mmo ete eka ekese owo, ke ufok esie, eren owo emi okodongode akpaubeng. … Mmi-mmi emi ke ward council, ke ekediomo otokiet ebanga se idide mme unana eke ward oro, bishop ama ono uyo ete eka ekenam ubiongutom ‘ndinyanga owo.’ Ekeno owo inang emi ete ekenwam erenowo emi. …

“[Kini emi mmo ekesimde ufok emi Jesus okodude,] ubet ufok oro okoyoho ye ediwak owo. Mmo ikekemeke ndibe nduk ke enyin-usung. Ami mmenim ke mmo ema edomo ofuri nkpo se mmo ekpekemede ndikere, edi mmo ikekekeme ndibe nduk. … Ndien mmo edidiomo otokiet ebanga nkpo efen emi mmo ekpenamde—nte mmo ekpekemede ndida erenowo emi nsok Jesus Christ man ekok udongo esie. … Mmo ndien enam uduak kiet—idige mmem mmem uduak, edi mmo ema enam uduak oro.

“… ‘Mmo ekibore okom ufok ke ebiet eke Enye etiede: ndien ke mmo ema esiak okom, mmo esuhore mbri odongo-akpa-ubeng anade ke esit’ (Mark 2:4). …

“… ‘Ndien kini Jesus okutde mbuotidem mmo, Enye odoho odongo-akpa-ubeng, ete, Eyen Mi, emefen mme idioknkpo fo’ (Mark 2:5).”²

Ikoot man Anam-nkpo

Elder Dieter F. Uchtdorf eke Eboho mme Apostle Duopeba eketeme ete, Ediomo otokiet, eda ofuri nkpo utom eke odude, eyom ifiok Edisana Spirit, ebup Abasi eyom unyime Esie, ndien eworo eka enyung ekenam utom.

“Ami nno mbufo enwongo kiet nte: edieke mbufo editienede usung emi, mbufo eyebo ata ndausung ekesim owo, ewe, ini, ye ebiet nte edinode unwam ke usung Abasi.”³

© 2018 otode Intellectual Reserve, Inc. Ekpan kpukpru unen ndiming. Ekeming ke USA. Enyime edikabare ke Iko Mbakara: 6/17. Enyimme Ndikabare: 6/17 Edikabare eke Ukpepnkpo Ukworo-iko Abasi, Ofiong Itiokiet ke isua 2018. Efik 15052 553