Kapilōk kōn Aikuj ko Aer

Meļeļe aikuj ko ej menin aorōk n̄an jerbal in karejar n̄an doon. Ak kain jekjek rot ko maron̄ būki, im ebar wōr ke juon men eļapļo̧k jān aikuj ko me jej aikuji pukoti?

Aikuj ko remaron̄ in waļo̧k ilo elōn̄ jekjek ko. Ro jej jerbal n̄an er remaron̄ ioon apan̄ ko me rej ilo en̄jake, jāān, ānbwiin, jeļāļo̧kjeņ, im ebar lon̄. Jet aikuj ko reļļapļo̧k jān ko jet. Jet aikuj ko jenaaj pojak n̄ani kōn jipan̄; aikuj ko jet maron̄ kōm̧m̧an bwe jān aikuj jipan̄ an ro jet. Ilo kijejeto ko ad n̄an jipan̄ tōpar aikuj ko ilo kanniōk, jab meļo̧kļo̧k bwe kūr eo ad n̄an karejar ekoba jipan̄ ro jet n̄an kōm̧m̧an im kōjparok bujen ko, m̧aanjappopo n̄an im bōk kain̄i ko an priesthood remenin aikuj n̄an mour ilo aiboojoj eo ilōn̄tata.

Ilo kakkobaba n̄an kapilōk eo kōn aikuj ko an kajjojo armej im baam̧le, jej aikuj kappukōt n̄an jeļā kajoor ko aer. Ta eo rejjab aikuj jipan̄ kake? Ta maron̄ ko im menin letok ko ewōr ippāer me emaron̄ kōjeraam̧m̧an ro jet? Elmen aer karbab n̄an jipan̄ kalōk aelōn̄ in kiin̄ eo an Anij? Kajoor eo an kajjojo armej emaron̄ in aorōk in wōt n̄an meļeļe āinwōt aikuj ko an ļeo ak lio.

Juon iaan pedped ko raorōk an tōmak eo ad ej bwe Jemedwōj Ilan̄ ej kōnono n̄an ro Nejin. (lale Laajrak in Tōmak ko 1:9). N̄e jej bōk juon ijjitōn̄ ekāāl n̄an karejar n̄an jabdewōt, jej aikuj kapilōk ippān Jemedwōj Ilan̄ ilo jar, kappukōt jeļā im meļeļe eo n̄an aikuj ko aer im kajoor ko aer. Jekjek jab in an kapilōk kōn jar aikuj wōnm̧aanļo̧k wōt ilo ijjitōn̄ in jerbal in karejar eo ad.

Elmen im n̄āāt jej loļo̧k kajjojo armej ro im baam̧le ko jaar kūr n̄an jerbal n̄an er emaron̄ in okoktak pedped ioon jekjek ko, ak kajju kapilōk ippān kajjojo armej ak baam̧le ej menin aikuj n̄an kalōk jem̧jerā ko im meļeļe aikuj ko aer, ekoba elmen kilen jipan̄. Kwoj aikuj in bōlen karum̧wijļo̧k jet kajjitōk ko m̧ae juon iien juon jem̧jerā eļap meļeļe in ej ejaak. Ilo an ejjeļo̧k juon wāween em̧m̧an n̄an kōm̧m̧ane, ļōmņak kōn men kein:

Ilo ad kwaļo̧k lōke, ļōmņak in ekōnono kōn aikuj ko an kajjojo armej im baam̧le. Kajjitōk kajjitōk ko āinwōt kar im̧we jān Jetōb Kwojarjar eo.¹ N̄ān waanjon̄ok:

Keememej in leļo̧k jipan̄ eo ekkar, āinwōt, “Bon̄ōn ta eo jemaron̄ bōkwaj m̧ōn̄ā n̄an eok ilo wiik in?” Juon kajjitōk ejjab alikkar, āinwōt, “Ba n̄an kōm n̄e elōn̄ jabdewōt kōm maron̄ kōm̧m̧ane,” ejjab lukkkuun jipan̄.

Kōnke kwe im kōmpānien eo m̧ōttam̧ maron̄ jab aolep iien ippān doon ilo ami loļo̧k kajjojo armej ak baam̧le, ej aorōk n̄an karōke im kapilōk ippān doon ilo ami pukot im̧we āinwōt juon kōmpānien. Er kein jet kajjitōk ko n̄an ļōmņak kaki:

Emaron̄ in em̧m̧an jen iien n̄an iien n̄an kōnono ippān ro kar jitōn̄ er n̄an karejar n̄an ejja kajjojo armej ak baam̧le kein me kwoj jerbal ippāer.

Elder Chi Hong (Sam) Wong jān Jiljilimjuonn̄oul eo eaar keidi bwebwenato in jān Mark 2 n̄an tōre in ad n̄an kwaļo̧k kilen kapilōk ippān doon ekar kōm̧m̧an bwe pidodo an armej ro emen n̄an pukot kilen bwe em̧m̧aan eo enan̄inmej in akā en pād im̧aan Jisōs.

“Emaron̄ waļo̧k āindein” Elder Wong ekar ba. “Emen armej ro raar kakūrm̧ool juon ijjitōn̄ jān bisop eo aer n̄an loļo̧k, ilo m̧weo im̧ōn, juon em̧m̧aan eo eaar nan̄inmej kōn akā. … Ilo juon ward ko̧o̧njeļ eo ej kab dedeļo̧k, ālkin ko̧o̧njeļ ippān doon kōn aikuj ko ilo ward eo, bisop eo eaar leļo̧k ijjitōn̄ ko n̄an ‘lo̧mo̧o̧r. Er kein kar ijjitōn̄ ko emen n̄an jipan̄ em̧m̧aan in. …

“[Ke rej tōkeāākļo̧k ilo m̧weeo ijo Jisōs eaar pād ie,] ruum̧ eo eaar kanooj obrak. Raar jab maron̄ deļo̧n̄ļo̧k ilo kōjām eo. Ij m̧ool raar kajieon̄ jabdewōt men remaron̄ kar ļōmņak kake, bōtaab raar jab maron̄ deļo̧n̄ļo̧k. … Raar kapilōk ippān doon n̄an ta eo rej kōm̧m̧ane tok juon—ekōjkan aer maron̄ bōktok em̧m̧aan eo n̄an Jisōs Kraist n̄an kōmouri. Raar itok kōn juon karōk—ejjab juon eo epidodo, ak raar jerbale.

“… ‘Rej kapeļļo̧k m̧ōttan kejenwan ikijjien ijo Ej pād ie: im ke em̧ōj aer rupe, rej katolaļtak kinien ļeo e akā ej babu ioon’ (Mark 2:4). …

“… ‘Ke Jisōs ej lo aer tōmak, E ba nan leo e akā, Nejū, e jako jero̧wiwi ko am.’ (Mark 2:5).”²

Elder Dieter F. Uchtdorf jān Doulul eo an Jon̄oulruo Rijilōk ro eaar ba, “Kapilōk ippān doon, kōjerbal aolep kein jipan̄ ko repād, pukōt im̧we eo an Jetōb Kwojarjar, kajjitōk ippān Irooj kōn kapen eo An, innām lim pein jōōt eo am̧ im ilen jerbal.

“Ij lewaj n̄an kom̧ juon kallim̧ur: eļan̄n̄e kom̧ naaj ļoor jon̄ak in, kom̧ naaj bōk tōl eo ejeno̧lo̧k āinwōt n̄an wōn, ta, n̄āāt, im ia n̄an kakke ilo wāween eo an Irooj.”³