E 5 rāveʼa e nehenehe ia ʼoutou e tauturu i tō ʼoutou ʼepisekōpo ’ia tauturu ia ʼoutou

Hōho’a

young adult talking with bishop

E fāriʼi ʼoia ia ʼoutou ma te aroha rima pāpū i te mau taime atoʼa e fārerei ʼoutou, e parahi ʼoia i niʼa i tōna pārahiraʼa tei faʼataʼahia i mua i te purupiti i roto i te pureraʼa ʼōroʼa, ʼe tē faʼatusia rahi nei ʼoia i tōna taime nō te tāvini ia ʼoutou ʼe te Fatu.

ʼO ʼoia tō ʼoutou ʼepisekōpo, te hōʼē faʼatere ʼautahuʼaraʼa tei piʼihia e te Atua nō te peresideni i tā ʼoutou pāroita. E ʼore roa atu tāna tāpura nō te mau mea e tiʼa ʼia rave e hope, e aʼo ʼoia i te mau melo i roto i tāna piha ʼohiparaʼa, noa atu ʼua rave ʼoia i te ʼohipa i te roaraʼa o te mahana, ʼe e faʼaea mai ʼoia i te fare pureraʼa e rave rahi mau hora i muri aʼe i te mau pureraʼa nō te faʼaoti i tāna mau ʼohipa.

E au ra e itoito hopeʼa ʼore tō tō ʼoutou ʼepisekōpo, tera rā e mea rohirohi roa i te arataʼiraʼa i te hōʼē pāroita tāʼātoʼa. Tē rāve nei ʼoia i tōna tiʼaraʼa ma tōna ʼaravihi atoʼa, tē hinaʼaro nei rā ʼoia i te tahi taime i te hōʼē rima tauturu. E 5 rāveʼa e nehenehe ia ʼoutou e tauturu i tō ʼoutou ʼepisekōpo ’ia tauturu ia ʼoutou :

1. E pure nōna. E nehenehe te piʼiraʼa o te ʼepisekōpo e tāmata i te mau ʼotiʼa o tōna itoito i te pae feruriraʼa, te pae vārua ʼe te pae tino. Tē hinaʼaro nei ʼoia i te pūai tā te Atua anaʼe e nehenehe e hōroʼa, e nehenehe rā e tae mai nō tō ʼoutou faʼaroʼo ʼe tā ʼoutou mau pure (hiʼo Iakobo 5:16).

2. E ti’aturi i te tiʼaraʼa. ʼUa pāturu ʼoutou iāna ʼei ʼepisekōpo nō ʼoutou, e ʼere rā tō ʼoutou faʼaroʼo tei roto i te taʼata ; tei roto rā i te tiʼaraʼa ʼaore rā te piʼiraʼa o te ʼepisekōpo ʼe i te Atua tei piʼi ʼe tei pāturu iāna. Nāhea e nehenehe ai ia ʼoutou ʼia faʼaʼite i tō ʼoutou faʼaroʼo ? ʼIa hinaʼaro i te faʼaoti i te mau piʼiraʼa ʼe te mau ʼohipa. ʼIa fārerei anaʼe ʼoutou i tō ʼoutou ʼepisekōpo, e haere ineine--ma te pure, ma te haʼapaeraʼa i te māʼa mai te mea e tītauhia, ʼe ’ia ʼahu maitaʼi nō te faʼaʼite i tō ʼoutou faʼatura nō te Fatu. E feruri māite i tāna aʼo. Tē tiʼa nei ’oia nō te Fatu.

3. E ha’amātau iāna. E faʼaitoito i te ha’amātauraʼa iāna. E ani iāna nō niʼa i tōna oraraʼa, tōna huru ʼe tōna ʼite. E faʼaʼite iāna ē tē māuruuru nei ʼoutou nō tāna tāviniraʼa ʼe e faʼaroʼo tō ʼoutou i roto i tōna ʼaravihi i te fa’aotira’a i tōna piʼiraʼa. (Hiʼo 1 Tesalonia 5:12–13.)

4. ʼEiaha e faʼarohirohi iāna. Tē hinaʼaro nei tō ʼoutou ʼepisekōpo e tauturu ia ʼoutou, e mai te mea tē vai ra tō ’outou hōʼē fifi ’o te nehenehe e tātarahia e tō ʼoutou mau taeaʼe hāhaere, te hōʼē o tōna nā tauturu, ʼaore rā tō ʼoutou peresideni Sōtaiete Tauturu ʼaore rā te peresideni nō te pupu peresibutero, e haere atu ia rātou ra nā mua. Tē vai nei tō rātou mau tiʼaraʼa nō te hōʼē tumu ! Tei ’ōnei rātou nō te tauturu ia ʼoutou ʼe nō te faʼatiʼa atoʼa i tō ʼoutou ʼepisekōpo ʼia tūtonu i niʼa i te mau mea ʼo ʼoia anaʼe ʼo te nehenehe e rave.

5. E vaiiho iāna i tōna tiʼaraʼa taʼata. E mai te mea e au ra ʼua faʼataʼahia tō ʼoutou ʼepisekōpo nō teie piʼiraʼa, tē vai nei tōna mau paruparu taʼata. Tē fēʼaʼa nei ʼoia iāna iho, ʼe tē rave nei ʼoia i te mau hape. Tē here mau nei rā ʼoia ia ʼoutou ʼe e hōroʼa ʼoia i tāna mau mea atoʼa nō tōna piʼiraʼa. E faʼaʼite i tō ʼoutou manaʼo iāna. ’Ia rahi tōna ʼite nō niʼa ia ʼoutou ʼe tō ʼoutou huru oraraʼa, e rahi atu ā ïa tōna ʼite nō te tauturu ia ʼoutou.