2018
Te ʼōpere-haere-raʼa i te here o te Atua
’Ātopa 2018


Te ʼopere-haere-raʼa i te here o te Atua

Hōho’a
Passing Along Gods Love

ʼAita i maoro aʼenei ʼua haere atu tōʼu ʼutuāfare ʼe ʼo vau nei e faʼaea i Kentucky. ʼUa riri roa vau nō te mea tē vaiiho nei au i muri tōʼu mau hoa atoʼa ʼe te mau fetiʼi. E mea taʼa ʼē roa Kentucky i te Kentucky tāʼu i mātau. Te taime mātāmua tō mātou haereraʼa atu i te pureraʼa, ʼua ʼite au ē ʼaita rea taʼata i reira. I tōʼu ra ʼiteraʼa i te huru naʼinaʼi o tōʼu ʼāmaʼa, ʼua faʼaoti a’era vau ʼeiaha ’ia manaʼo ʼino e rave rā vau i te tahi mea nō te haʼamaitaʼi i te reira.

I te mahana i muri mai, ʼua haere atu māua ʼe tōʼu māmā i te fare toa. Hou māua e faʼaruʼe ai i te fare, ʼua ʼohi mai au i te tahi mau tāreta nō te ʼōpere haere atu. I tō māua taeraʼa i te fare toa, ʼua rave au i te hōʼē monamona ʼe ʼua haere atu e ʼaufau. ʼUa hiʼo te taʼata hoʼo i te moni o te monamona, ʼe ʼua hōroʼa mai i te reira iāʼu. ʼUa faʼahoʼi atu vau i te reira. ʼUa huru māere ʼoia e ʼua parau mai, « ’ua ʼaufau iho nei ʼoe i te reira, e madame ».

ʼUa parau atu vau, « ʼua ʼite au, tē hōroʼa nei rā vau i te reira ʼei taoʼa aroha nā ʼoe ». I reira ʼua tuʼu atu vau i te hōʼē tāreta ʼōpere haere ʼe te monamona. ʼUa ʼata mai ʼoia ʼe ʼua haʼamāuruuru mai iāʼu. ʼUa hiʼo atu ʼoia i muri i te tāreta, i reira tōʼu pāpaʼiraʼa, « e tamariʼi te taʼata atoʼa na te Atua ». ʼUa haere ʼē atu vau ma te ʼoaʼoa, ma te ʼite e noa atu ʼaita ʼoia e tomo mai i roto i te ʼĒkālesia, ʼua rave rā vau i te tahi ʼohipa maitaʼi.

I muri mai i taua mahana ra, ʼua haʼamanaʼo aʼera vau ē ʼua vaiiho vau i te toeʼa o te mau tāreta ʼōpere i te vāhi ʼaufauraʼa ! Te taime ʼua hoʼi atu māua i te fare toa, ʼua haere atu vau e ani mai te mea tē vai noa ra ā te mau tāreta. I reira tōʼu ʼite-mata-raʼa i te tahi mea, ʼe ʼua faʼaea vau i te haere. Tē vai nei i nā vāhi ʼaufauraʼa e pae te mau tāreta ʼo tē parau ra, « e tamariʼi te taʼata atoʼa nā te Atua ». ʼUa ʼōpere haere te taʼata hoʼo i te mau tāreta ! ʼUa ʼoaʼoa roa vau nō te mea ʼua rave au i te reira ʼohipa.