E Dua na Caka Mana ena Vale ni Turaga mai Kyiv

iVakatakilakila

President Monson greeting members in the temple

Droini mai vei Allen Garns

Keitou marau vakalevu vakavuvale ni keitou na lako ki Romania ki Kyiv, Ukraine ena motoka, me tiko ena vakatabui ni valetabu ena Okosita 2010. Ena kila ni oqo na nodra valetabau na Yalododonu ena Tabana ni Kaulotu na Romania/Moldova, keitou draiva yani ena 14 na auwa me keitou tiko ekea. Ni keitou sa yaco yani, keitou sotava e dua tale na ilawalawa ka gole talega mai Romania. Keitou marautaka sara me keitou tiko e Kyiv ena soqoni tabu oqo.

Ena siga ni vakatabui ni valetabau, e lesi na neitou lawalawa mai Romania me keitou sarava na veivakatabui ena kakaburaki ena dua na rumu ena tabavale sara e ra ni valetabu. Era sa tekivu vakaraitaka eso na nodra rarawa. Era a namaka me ra vakaitavi ena veivakatabui kei na parofita ena rumu vakasilesitieli. Eso era kaya ni a rawa sara madaga ni ra tikoga e vale ka sarava na kakaburaki mai na nodra valenilotu e Romania.

Sa tekivu meu masu e lomaqu, “Tamaqu mai Lomalagi, ena rawa vakacava ni ra vukei na lewenilotu mai Romania me ra sotava na veika guiguilecavi dredre ena Nomuni vale?

E sega tikoga niu se ciqoma e dua na isau ni masu ni sa tekivu na soqoni ni veivakatabui. Sega ni dede sa tukuni mai vei keimami, ni na lako sobu mai o Peresitedi Thomas S. Monson (1927–2018), me mai vakadabera na ivatu vakadei ena kena vanua donu. De o koya oqo na isau ni masu! Au masulaka e dua na sala me rawa ni lako mai na parofita me mai sotavi ira na Yalododonu mai Romania.

“Au sega ni kerea na veika oqo me baleti au,” “ia me baleti ira na taciqu kei na ganequ.”

Ni oti na soqoni ni vakatikori ni vatu vakadei, e lako sivita mai o Peresitedi Monson na neitou rumu ena nona lesu tiko kina rumu vakasilesitieli. Vakasauri, au sa vakila mai yaloqu ni dodonu meu tucake ka sureti koya mai ki na neitou rumu.

Au tucake ka kaya, “Neimami parofita! Lako Mai ka raici keimami. Keimami lako mai Romania.”

E sega beka ni rogoci au. Ia, ena dua ga na gauna lekaleka, sa lako lesu mai o koya. “Romania!” e kaya mai o koya ni curu mai kina rumu.

E sotavi keimami kece ka vakaraitaka na nona lomani keimami vakalevu. E vakasinaiti na yaloqu niu sa sarava na matadra mamarau na neimami lewenilotu lomani. “Vinaka vakalevu, Tamaqu lomani,” au masuta tale, “ena cakamana e Nomuni vale.”

Ni sa lako yani na parofita, sa sega ni dua tale e rarawa. Au vakila ni keimami sa tiko ena rumu kalougata duadua e valetabu. Oqo e dua na ka au sotava au na sega ni guilecava.