2018
Vakoroi Cecere E Dua na Marama ni Viti
2018 ni Okotova


Bulago ena Noda Vanua

Vakoroi Cecere E Dua na Marama ni Viti

E gone duadua vei iratou na 12 na veitacini o Patricia (Pat) Loga yabaki 27, ka sa mai taura oqo na nona diqiri cecere ena Commerce ni Veiliutaki kei na Veiqaravi Vakailiuliu mai na Univesiti ni Sauca Pasifika.

Ena nona a vola vagumatua na nona ivola, The Introduction of Performance Appraisal Systems in the Fiji Ministry of Health, a ciqoma kina o Pat e dua na “metali koula” mai na Koronivuli ni Commerce. A solia vua na metali oqo na Turaga Dokai, Jioji Konrote, na Peresitedi kei Viti, ena soqo ni soli icocovi ena Univesiti.

“Au a sotava e vuqa na bolebole niu a vola tiko na noqu ivola, ka rairai a bibi sara kina—na bula vakaivakarau a gadrevi ena mataqali cakacaka vakaoqo,” a kaya o Pat.“ Na gugumatua ni noqu vakasama kei na lomaqu a mai osooso vakabibi sara kau a sega ni veitaratara rawa kei ira e vuqa na noqu itokani voleka. Sa noqu gauna ga vei luvequ yalewa yabaki ono, noqu matavuvale kei na noqu vuli.”

“Sa ka kece na matavuvale,” a kaya o Loga. “Au tina itubutubu duadua kau kalougata niu tokoni ka vukei maivei iratou na noqu matavuvale.”

A kaya o Pat ni o tinana ka sa yabaki 70 ena gauna oqo, “a dolava vei au na katuba ena gauna cava ga au dau lesu kina mai vale. Ena gauna veicalati mada ga, sa dau vakasaqari tu na kequ ka dau taroga mai e dua na lewe ni matavuvale a vakacava na noqu siga o ya.”

Ena gauna dredre ni kena volai e dua na ivola, veivakavulici ena vuli ni qeretueti e ra ka itubutubu duadua, a ciqoma o Pat e dua na veikacivi maivei nona Bisopi me qasenivuli ena mataisoqosoqo ni Lalai. E muri a qai kacivi me Sekeriteri ni iSoqosoqo ni Veivukei ena iTeki. A lewena talega o Pat na kalasi ni inisitute me vakadua ena veimacawa me vulica kina na lotu.

“E dina ni a rawa meu vakaogai sara kina, a yaco na noqu veikacivi ena Lalai kei na iSoqosoqo ni Veivukei kei na vuli ena inisitute, me vakatudonutaka na ituvaki ni lomaqu kei na noqu vakasama ki na osooso ni noqu bula,” a kaya o Pat.

“Au sa vulica ni noqu gauna sa Nona na Tamada Vakalomalagi ka segai koi au. Tekivu mai na gauna o ya niu sa alamutaka na noqu kaloko ki na mataka lailai ni oti na bibi ni cakacaka ena siga o ya, sa na dau tukuna tiko na kaloko vei au ni sa vo e walu na auwa me qai taqiri tale na noqu alamu.”

“Na dua na auwa au a vakayagataka ena kalasi ni inisitute vakadua ena veimacawa a yaco me veivakasinaiti vakayalo, a kaya o Pat. “Sa dau ruru sobu na itagede ni noqu lomaocaoca, kau sa dau yalo vakacegu niu sa vakani vakayalo”.

“Na bula a sega ni kena inaki me uasivi sara se rawarawa,” a kaya o Pat. “Ia au sa vulica e dua na lesoni bibi baleta na bula—o ya ni kevaka au vakayalia na noqu bula; au na kunea.”