Na Ka e Vinakata na Bisopi Kecega Me Ra Kila o Ira na Lewe ni Tabana Levu
E vakaitikotiko mai Utah, Amerika, o koya e vola.
Oqo e walu na dina au vulica ena gauna ni noqu veiqaravi vaka bisopi.
E noqu na madigi talei meu veiqaravi vaka bisopi. Ena veiyabaki oqori, au vulica e levu na lesoni ena rawa ni tukuni. Ia, au vulica e walu na dina au vakabauta e dina raraba. E dina ni sega ni veiokati kece kina na ituvatuva oqo, ia e noqu sasaga meu wasea na veika e nuitaka tu na bisopi kecega me ra kila nona tabana levu.
1. E lomana na bisopi na lewe kece ni nona tabana levu ena dua na sala e dina sara.
Na loloma e tiko vua e dua na bisopi me baleta na nona tabana levu e veisemati kina loloma nei Tamada Vakalomalagi kei Jisu Karisito vei keda yadua. Ni raici ira yani na lewenilotu ena soqoni ni sakaramede, e sobuti koya na loloma dina kei na kila e sega ni vakatale e dua na ka se gauna e se bau sotavi. Ena gauna e tucake kina na bisopi ka wasea na nona loloma vei ira na lewe ni tabana levu, na veika e wasea ni vakila e lako mai lomana ka dina. Mo kila ni lomani iko na nomu bisopi, e leqataki iko, ka kauwaitaki iko vakalevu cake mai na nomu kila.
2. Na bisopi e tokoni vakayago, vakayalo, vakavakasama ena nodra vakabauta kei na masu na lewenilotu.
E sega ni wili rawa na levu ni gauna vakayagataka tu e dua na bisopi ena veiqaravi. Ena levu na gauna ena vakayagataka tu e valenilotu ena Sigatabu kei na veibogi ena loma ni macawa ni suka mai na cakacaka ena veisiko, veivakatarogi, kei na kauwaitaki ira tiko na lewenilotu ena tabana levu.
E rawa ni vakayacora oqo na bisopi ena veimacawa baleta na nodra vakabauta kei na masu na lewe ni tabana levu. Me vaka e dua na bisopi kacivi vou, e drodro vakayauyau na wai ni mataqu ena veigauna kece au dau rogoca ni “masulaki bisopi” e dua na lewenilotu. Na nomu masu ni vakabauta ena saumi vakaidina, ka ciqoma ka vakila na bisopi na veitokoni ni masu oqori. E sauma na Turaga na masu vakasinaiti ena vakabauta ena uludra na bisopi ena Lotu.
3. Vakavuqa e vakila tu o bisopi ni sega ni veiganiti me baleta na veikacivi (ni oti sara madaga e tolu se va na yabaki).
Au kila e vica walega na bisopi era vakila nira sa “vakarau” vinaka tu me baleta na veikacivi. Au kila, sara, ni “o koya sa kaciva na Turaga, e sa vakadonuya o Koya.”1 E dina ni kila e dua na bisopi ni sa vakadonui, e vakila talega o koya ni na sega ni rawata vakavinaka o koya na veikacivi. Ena tovolea ena nona vinaka kece me solia na ivakasala vinaka e gadrevi, ka me kua ni vakacudruya na tamata, ka me vakataudonutaki tu ena Yalo, ia ena rawa ni vakilakila tiko o koya ena so na gauna kevaka e sa vakayacora tiko na nona ilesilesi vakavinaka.
4. E rawa ni cakacaka kei bisopi na Yalo ni Kalou ena gauna e veivakasalataki tiko kina vei ira na lewe ni tabana levu.
Niu dau tarogi na cava au malele vakalevu kina ena noqu veiqaravi vaka bisopi, au dau kaya vei ira na tamata niu maleleta na veivakayarayarataki ni Yalo e sala vata mai kei na ilesilesi vaka bisopi. Ena gauna ni veivakasalataki kei ira era vakaleqai na nodra daulomani, vosa tiko kei ira era sotava tiko na dredre baleta ni lasa tiko na watina, se vakaroti ira tiko na tamata me ra veivutuni, na Yalo e tiko vua e dua na bisopi yalodina e Yalo ni Kalou ka yalo ni ivakatakila.
E kerei au e dua na lewenilotu ni noqu tabana levu e liu e kerei au meu vukei koya me baleta eso na dredre e sotava tiko. Se qai toki vou ki na nona tabana levu ka sega ni kila kevaka e via lako vua na nona bisopi vou me rawa ni dusimaki. Au wasea kei koya e dua na ka au sa wasea vakavuqa me tekivu mai na gauna au vagalalataki kina, sai koya ni dina ga au na marau meu veivuke, e sa sega ni tiko vei au na idola e tiko vua e dua na bisopi ka na rawa ni tiki bibi sara na idola eso oqori ki na vakarautaki ni veitokoni ena gadreva o koya. Au vakatura me veitalanoa kei nona bisopi. Au lako meu raici koya ena macawa rua sa oti, ka kaya o koya ni rau sa sota kei bisopi ka vaka ga sa kila oti tu o koya na leqa e sotava tiko na goneyalewa oqo kei na sala ena rawa ni vukei koya vinaka kina. E dina ga ni tamata cala o bisopi, e vakauqeti koya na Turaga, dusimaki koya, ka vakalougatataka nona bula ena nona vosa.
5. E tamata talega na bisopi, ena so na gauna ena cakava na ka cala o koya.
Era tamata talega na bisopi. E tu na nodra malumalumu, cala, veitovaki, kei na nodra leqa vakataki ira. Na Yalo ena vakadonuya na tamata ena itutu vaka bisopi, ia o bisopi e tamata ga ka sotava talega na vei leqa kei na malumalumu eda dui sotava kece.
Na kilai ni veika oqo ena sega ni dodonu me vakalailaitaka na vakarokoroko eda vakaraitaka ki na nona veikacivi se na kena vakamuri na nona ivakasala. E kila e dua na bisopi na nona malumalumu ka sasagataka me vorata se me kua ni curu mai ena nona veiqaravi vaka bisopi. Ena sasaga vakaukauwa o koya, ia ena sega ga ni taucoko.
6. E vakila tu ga o bisopi ni na sega ni rawa ni veirauti na nona raici ira tiko na lewe ni tabana levu se na caka vinaka ena vakayacora tiko baleti ira.
Ena veisiga ena vakanananutaka e dua na bisopi se ocei tale e dodonu se ena rawa ni vukea ena siga oya. Au na taleitaka sara meu veisiko vakawasoma vei ira na lewenilotu, ia e tiko na noqu cakacaka tudei, matavuvale, na parokaramu ni tabagone, kei na so na lewe ni tabana levu e vuqa tu na nodra gagadre. E sega sara ga ni veirauti na gauna me rawa niu raici ira vakawaosma kina na lewenilotu.
Ia, me vaka e dua na bisopi, ena so na gauna e vakauqeti au na Yalo meu sikova e dua na lewenilotu e sotava tiko na dredre. Ena vuqa na gauna na veisiko vakaoqori e dau tekivu tu ena nodra tukuna mai, “Au kila saraga ni o na lako mai.” Na Yalo keitou vakila e veivakasinaiti ena neirau kila vata mai ni veisiko oya e ivakadinadina ni sauma tiko na masu na Kalou.
Au dau taleitaka talega na veikidavaki au ciqoma ena nodra katuba o ira na lewenilotu bulabula, “sega ni sotava na leqa”. Era lako ki lotu na veimacawa o ira na tamata vinaka oqo, veiqaravi ena yalodina ena nodra veikacivi, e sega ni dua na bolebole laurai levu, ka sega ni dau sikovi wasoma mai vei ira na iliuliu vakamatabete. Era vakavinavinaka ni rawa nira mai dabe kei na bisopi. Kivei kemuni kece au via kaya, “Vinaka vakalevu! Gu ki liu! Mo kila tiko ni lomani iko na nomu bisopi ka na sikovi iko kevaka e rawa.”
7. E gadreva sara vakaidina, na nomu bisopi mo ni veiqaravi vakataki kemuni.
Me vaka e dua na bisopi, ena veigauna kece e tukuni kina vei au ni sotava tiko na dredre dua na lewenilotu, au na dau taroga, “Ocei beka na dauveituberi vuvale se dauniveisiko?” Oqo e dua na sala ena rawa ni laurai kina ni sa sotavi na gagadre ni gauna lekaleka kei na gauna balavu ni lewenilotu. Na bisopi, ni cakacaka tiko ka ra sega ni veivuke na leweniltou ena tabana levu se iteki, e vakayalayala na ivurevure e tiko vua. Ena lako yani vakaidina o koya—vei ira era vakaleqai tu. Ia, ni tiko na ivurevure ni matabete kei na Soqosoqo ni Veivukei me vukei koya, ena rawa ni rabailevu sara na vanua e dolele yani kina o koya.
Sai koya oqo na veiqaravi. Eso na gauna eso vei keda eda guilecava na inaki ni noda veiqaravi vakataki keda: Sa vakaroti keda na Turaga meda “dau veilomani” (Joni 13:34). Mo kila tiko ni vakayagataka na bisopi na veiqaravi ena dua na sala e vakauqeti me rawa ni “tikoga” ena nodra bula na lewe ni tabana levu.
8. E tetewaitaka tu o bisopi me rawa ni cakava na veika kecega me baleti ira na nona qelenisipi.
Ena gauna cava ga, siga se bogi, kevaka e veivakalougatataki vakamatabete, veivakasalataki kina dua na gone lako sese, se vakatotolo tiko ki na dua na vanua e vakayacori tu kina na coqa, ena via cakava o koya na veika kecega e gadreva e dua na lewenilotu. Ena sega ni rawata kece o koya, ena sega tale beka ga ni tamata donu ena veituvaki kece, ia kakua ni rere mo kerea na veivuke ena gauna o gadreva kina. Mo kila ni tiko o bisopi me veiqaravi ena veigauna oqori ka o ni sa kalougata tiko baleta na nomuni cakacaka vata.
Au yalomalumalumu ena madigi tabu e soli vei au meu veiqaravi ena ilesilesi tabu oqo. Ena noqu veiqaravi, au lako mai ena vakabauta kina kila. Au sa sega walega ni vakabauta ni dina na kosipeli, au kila ni dina. Au sega walega ni vakabauta ni kilai au na Kalou, au sa kila ni kilai keda vinaka tu ka tawavakaiyalayala nona kilai keda yadua, me baleta na noda bula yadua kei na noda veileqa talega. Me kena ikuri, au kila ni cakacaka o Koya mai vei ira na Nona italai, vakabibi vei ira era taura tu na idola vakamatabete. Au kila ni sega ni rawa ni veiqaravi vakabisopi kevaka a sega ni qarauna tiko na Kalou na cakacaka oqo. Sai koya na dina taucoko ni kosipeli kei na loloma ni Kalou vei ira na luvena e rawa kina vei ira na bisopi me ra veiqaravi.