ʼUa riro Mau tōʼu faʼataʼa-ʼē-roa-raʼa ’ei hōʼē o tōʼu mau haʼamaitaʼiraʼa rahi roa aʼe

Hōho’a

young woman looking out at the ocean

ʼUa faʼaruʼe au i tōʼu hoa tāne mātāmua i te hōʼē pō ateate i te tau māhanahana.

Nā mua atu i taua mahana ra, ʼua tātamaʼi nā māua o Carter (ʼua tauihia te iʼoa)--e ʼere hoʼi i te mea māere i roto i tō māua auhoaraʼa e toru matahiti te maoro. ʼUa tātamaʼi māua nō niʼa i te mau mea atoʼa--mai te māʼa e tae atu i te mau ʼōpuaraʼa nō ʼananahi. I te haʼamataraʼa, ʼua tuʼu vau i te hiti i tō māua mau mea taʼa ʼē ’ia au i te parau paʼari ē « e haru te mau mea taʼa ʼē ». ʼUa riro rā tā māua tātamaʼiraʼa haʼuti ʼei mau auraʼa ʼore hopeʼa ʼore ʼe te rohirohi.

I taua pō ra, ʼua rave māua i te hōʼē hiʼo ātea i roto i te medebara nō te hiʼo atu i te mau paraneta. ʼUa ʼite rā māua ē ʼua haʼapōuri te ʼanaʼana o te ʼāvaʼe i niʼa i te raʼi pōuri i tō māua hiʼoraʼa. ʼUa haʼamata māua i te mārō-- faʼahou ā nō tō māua māuruuru ʼore.

ʼUa faʼatea ʼē atu vau nō te tāmarū iāʼu. « E ʼere ʼo vau tera », mana’o a’era vau. ʼUa mātauhia vau mai te taʼata faʼatupu hau i rotopū i tōʼu mau taeaʼe ʼe mau tuahine, ʼe ʼua parau mārū noa vau ma te maitaʼi i te tahi atu mau hoa tōʼu. Nō reira nō te aha ïa vau e tuō ai i niʼa i te tamāroa tāʼu e parau nei ē ʼua here au iāna ?

ʼUa hiʼo atu vau i niʼa i te raʼi pōuri ʼe ʼua pure nō te ʼite e nāhea vau e haʼamaitaʼi ai i tōʼu auraʼa ’e o Carter. ʼAita i maoro roa, ’ua mono te manaʼo hau pūai i tōʼu riri, ʼe ua ʼite au i te mea maitaʼi roa aʼe e nehenehe iāʼu ’ia rave nō māua toʼopiti ʼo te faʼahoperaʼa ïa i tō māua auraʼa.

Mea roa te tau fa’aorara’a. Tē vai ra te mau taime ʼua faʼahemahia vau ʼia ʼore e faʼaroʼo i te muhumuhu ’ia faʼata’a ia Carter nō te mea ʼua mihi au i te huru au o tō māua auraʼa. I te tahi mau taime ʼua riririʼi au i te Atua, nō tōʼu tiʼaturiraʼa ē ʼua tāpiri ʼoia i te hōʼē ʼūputa ma te ʼore e ʼīriti i te tahi atu ʼūputa. Nō reira vau i tāpeʼa ai i te aʼo a Elder Jeffrey R. Holland nō te Pupu nō te Tino ʼAhuru ma Piti ʼÂpōsetolo : « I te mau taime no te taiā ’e ’aore rā te fē’a’a ’e ’aore rā te taime fifi rahi … ’a tāpe‘a noa i te mea tā ʼoutou i ʼite aʼena ʼe ʼa tiʼa pāpū e tae noa atu e tae mai te tahi atu ā ʼite » (« E te Fatu ʼua faʼaroʼo vau », Liahona, Mē 2013, 93–94).

ʼAita vau i fāriʼi i te « tahi atu ā ʼite » e rave rahi mau ʼāvaʼe te maoro, ʼe ʼua haʼamata vau i te uiui e fāriʼi ānei au i te reira. I muri aʼe i te hōʼē pure nō roto mai i te ʼāʼau nō niʼa i te faʼataʼaraʼa, ʼua haʼapāpū mai te Vārua i tōʼu nei ʼāʼau, ma te parau mai iāʼu ē te mau muhumuhu a te Metua i te Ao ra nō te maitaʼi ïa o tāna ra mau tamariʼi. E ʼere te mau tumu nō tāna aʼo i te mea pūai roa mai tōʼu faʼaroʼo iāna.

Nā te ʼiteraʼa ē e ʼōpuaraʼa tā te Metua i te Ao ra nōʼu i hōroʼa mai iāʼu te tiʼaturiraʼa nō tōʼu ʼananahi ʼe i tauturu iāʼu ’ia haʼamata i te faʼahoa faʼahou i te tahi atu tamāroa. I te hōʼē poʼipoʼi, ʼua taiʼo vau i Te Parau Haʼapiʼiraʼa ʼe te mau Parau Fafau 88:40, i reira tō te Fatu haʼapiʼiraʼa ē « tē ati atu nei hoʼi te māramarama i te māramarama ». ʼUa ʼite tāʼue aʼera vau e nehenehe teie tumu parau e faʼaauhia i te faʼahoaraʼa. ʼUa ʼite au ē e mea ʼoaʼoa aʼe au nā muri i te tahi taʼata e hōʼē ā tō māua mau hiʼoraʼa ʼe māramarama.

ʼUa fārerei au i muri mai ia Austin. ʼUa tūʼati ʼoiʼoi māua, mai tō māua here i te mau tacos e tae noa atu i tā māua misiōni. E au ra ʼua mātau vau i tōna vārua mārū ʼe ʼua tano i tōʼu nei, ʼe ua faʼaipoipo vau iāna i muri iho. E ʼere tō māua e auraʼa pūai mai tā ʼoutou e ʼite i roto i te hōʼē hōhoʼa teata nō niʼa i te here. E mea mārū rā ʼe te pāpū-- te tahi mea tāʼu e tiʼaturi ʼo te vai noa ē a muri noa atu.

E rave rahi o tātou e hiaʼai nei i te hōʼē haʼamāraramaramaraʼa ʼia fāriʼi anaʼe tātou i te mau muhumuhu huru fifi. Mai roto mai i te mea tei tupu iāʼu, ʼua haʼapiʼi mai au ē e nehenehe te faʼaroʼo i te Fatu e tauturu ia tātou ʼia vai haʼapaʼo noa ma te ʼore ʼe ʼite i te tumu. ’Ia tiʼaturi anaʼe tātou i te hōʼē Atua tei ʼite i te mau mea atoʼa, e nehenehe ia tātou ʼia ʼite i te hau i roto i tā tātou mau faʼaotiraʼa, ’ia rave mai te au i te mau muhumuhu e tae noa atu e fāriʼi tātou i te « tahi atu ā ʼite » tāna i fafau i te feiā haʼapaʼo.