Haʼapiʼihia nā te Vārua Maitaʼi
ʼUa faʼaineinehia teie mau feiā ʼāpī ’ia haʼapiʼihia nā te Vārua hou te ʼāmuiraʼa rahi. Teie tā rātou i ha’api’i mai i roto i te hōʼē ʼāmuiraʼa i ma’iri a’e nei ʼe te tauira’a tā rātou e rave nei maoti te ʼāmuiraʼa rahi.
Haʼapiʼiraʼa faʼauruhia
ʼUa faʼauruhia vau nā te ʼāmuiraʼa rahi. ʼA faʼaroʼo noa ai au i te haʼapiʼiraʼa a tō tātou feiā faʼatere ʼia tāvini ia vetahi ʼē, ʼia tiʼaturi i te Mesia, ʼe ia tāpeʼa māite i te ʼāuri, ʼua ʼite au i te Vārua Maitaʼi i te faʼaʼite-pāpū-raʼa mai ē e parau mau te ʼevanelia ʼe e nehenehe e noaʼa ia tātou te ora mure ʼore nā roto i te haʼapaʼoraʼa i te mau faʼaueraʼa ʼe te peʼeraʼa i te parau a te Atua. ʼUa haʼamau vau i te mau fā ’ia tāvini atu ā i tōʼu nei nūnaʼa taʼata ʼe ʼia haʼapūaʼi i tōʼu ʼiteraʼa pāpū nā roto i te pure ʼe te taiʼoraʼa i te mau pāpaʼiraʼa moʼa i te mau mahana atoʼa. ʼUa ʼite au ē e tamahine au nā te Metua i te Ao ra. Tē ʼora nei ʼe tē here nei ʼoia iāʼu ē a muri noa atu.
Madelyn B., 16 matahiti, Delaware, Fenua Marite
Mau pāhonoraʼa i te mau uiraʼa
Hou te ʼāmuiraʼa rahi tē vai ra tāʼu e piti uiraʼa : (1) Nāhea vau e tāpeʼa ai i te hōʼē huru maitaʼi ʼe e tauturu ai i tōʼu mau hoa ’ia rave anaʼe rātou i te mau faʼaotiraʼa ʼino ? ʼe (2) Nāhea e nehenehe ai iāʼu ’ia faʼaʼite pāpū nō niʼa i te ʼĒkālesia ’ia ʼore rātou e tāhitohito iāʼu. I roto i te ʼamuiraʼa, ʼua faʼaʼite pāpū mai te Vārua iāʼu ē ʼaita vau i pārahi o vau anaʼe. ʼUa ʼite au i teie nei ē nā roto i te taiʼoraʼa i te mau pāpaʼiraʼa moʼa ma tō ʼāʼau atoʼa, e fāriʼi au i te mau pāhonoraʼa i tāʼu mau uiraʼa nō niʼa i tōʼu mau hoa. ʼUa ʼite au ē tē faʼaroʼo nei tōʼu Metua i tāʼu mau pure, ʼe e tūtava vau ’ia riro ʼei mea maitaʼi aʼe i te mau mahana atoʼa.
Isaak R., 13 matahiti, Pichincha, Ecuador
Fa’aineinehia nō te haʼapiʼi mai
ʼUa ʼite pūai au i te Vārua i te ʼāmuiraʼa rahi ra. Mai te taime i haʼamata ai au i te faʼaineine i te mau uiraʼa ʼe te faʼaineine-vārua-raʼa iāʼu iho nō te ʼāmuiraʼa, ʼua riro te reira ʼei tauiraʼa rahi i roto i tōʼu nei oraraʼa, ʼe ʼua nehenehe iāʼu ’ia ʼapo rahi mai nā roto i te aʼoraʼa tātaʼitahi. Tē māuruuru nei au nō te peropheta ʼe te mau ʼāpōsetolo, ʼe ʼua ʼite au ē ʼua tonohia mai rātou e te Metua i te ao ra nō te arataʼi ia tātou i roto i tō tātou oraraʼa !
Ben H., 17 matahiti, Kentucky, Fenua Marite
ʼAnihia ’ia tupu i te paʼari
ʼUa haʼapūai te ʼāmuiraʼa rahi iāʼu ʼe te hōʼē hinaʼaro ʼia peʼe i te ʼēʼa ʼevānelia a Iesu Mesia. ʼUa tauturu te reira iāʼu ’ia ʼite ʼe ʼia taʼa ē teie te ʼĒkālesia mau, ʼo te ’āfaʼi mai ia tātou i te māramarama ʼe te ʼoaʼoa. ʼUa ʼite au i te Vārua i te aniraʼa mai iāʼu ’ia tupu i te paʼari i te mau mahana atoʼa ʼe ʼia taiʼo i te Buka a Moromona ʼia noaʼa te hōʼē ʼiteraʼa pāpū pūai nō te ʼevanelia. Tē tiʼaturi nei au ē ʼua hinaʼaro tōʼu Metua i te Ao ra ʼia faʼaroʼo vau i teie mau poroʼi faʼauruhia.
Vicente A., 16 matahiti, Metropolitan Region, Chili.
ʼImiraʼa i te māramarama
E mea fifi roa nōʼu te matahiti nā mua atu i te matahiti i maʼiri aʼenei. Tē ’aro ra tōʼu pāpā i te maʼi māriri ʼai taʼata, ʼe tē vai ra te mau tōtōāraʼa ʼino i roto i tōʼu nei ʼoire. ʼUa aro vau i te hepohepo, ma te ui e nāhea e nehenehe ai iāʼu ’ia ʼite i te hau ’a mataʼu ai au i tōʼu oraraʼa vārua ʼe te pae tino pāruru-ʼore-hia ʼUa haʼapiʼi mai au i roto i te ʼāmuiraʼa rahi ē e nehenehe tātou ʼia ʼite i te hau, ’ia ora viʼiviʼi ʼore, ’ia faʼa’ī tātou i tō tātou ʼāʼau i te faʼaroʼo, ʼe ’ia tāpeʼa i te hōʼē hiʼoraʼa mure ʼore. ʼUa faʼauruhia vau ’ia fāriu atu i te Mesia ra i te mau tau fifi ʼeiaha rā e tiʼaturi noa i niʼa iho i tōʼu iho paʼari. ʼUa ʼite au ē e nehenehe iāʼu ʼia haʼavī i te mau mana nō te pōuri nā roto i te ʼimiraʼa i te ʼanaʼana o te māramarama o te Mesia.
Olivia H., 17 matahiti, Belezita