Ngan Thapeg e Ayuw ni ngan Ayuweg Boech e Gidii’

Pi interview ney ni yima tay ni gubin aningeg e pul u thlin e pi’in nib bpin nibe machib nge fare Relief Society presidency fa pi’in nib mo’on nibe machib nge fapi elders quorum presidency e kemus ni iraray e report nibe dag e pi cha’en ni gadad be machibnag. Interview ney ni yima tay ni gubin aningeg e pul e rayag ni nge ayuwegdad (1) ngad puruy’niged pi gelngindad, nge tin nibay nib tu’uf, nge tin ni yibe gafgow riy ko tin tabinaew nge pi cha’ ni kan dugliy ngom; to (2) min dugliy ko mang ba tu’uf nrayag ni nge pi’ fapi quorum, Relief Society, fa ward e ayuw riy; mukun (3) fil rok fapi toyugang’ nge rogon nrayag ngan mon’ognag e tamachib.

Fare elders quorum president nge fare Relief Society president e ma thil e thin u thilrow miyow yog ngak e bisof ko tin nib tu’ub miyow thapeg e tib nib tu’uf ningar rin’ew rok.

Rayag ni ngam peri’eg boech mornga’agen e interview ko machib u ministering.lds.org.

Ni kiybe ul’ul’ ko n’en ni yog President Russell M. Nelson ni fare program ko machib era mang fare n’en nra mon’og nag fare Galasia, Elder Gary E. Stevenson ko fare Quorum ko fare Ragag nge L’agruw i Apostles ke fil, “Fare thogthog nike yib ngak … e be yan u rogon nikan fanow nag fapi mo’on nge bpin nge rogon niyad be un ko fapi interview ko machib.” ²

Laal i n’en nra ayuweg fapi mo’on nge bpin niyad be machib:

• Mman ko fapi interview ni gabe gay rogon e fanow. Mag fal’ag rogom ni ngam fil.

• Mag fal’ag rogom ngam weliy e tin nib tu’uf rom ni ngan ayuwegnem riy ni ngam thapeg.

• Mag sap ko fal’ngin facha’ nge tin nib mom ngak, gathi kemus ni tin nib tu’uf rok.

• Puruy’nag e tin nra buch ni pow riy nira fare machib ni kam tay ba mon’og rogon.

• Mnon ngak e presidency ngan puruy’nang fapi intervew ni yima tay ni aningeg e pul.

Laal i n’en nra ayuweg e toyugang’:

• Dani t’uf ni nge n’uw fapi interview, machane mu dugliy e ngiyal’ nge bang nrayag ni ngam nonow facha’ nib pufpuf rogon.

• Mag gay rogon ngam machib ngak facha’ ni’ir reb fapi mo’on fa bpin nibe machib.

• Dam fith e duwer nrayag ni nge sap be’ ngay ma woed ni gabe interview ni bachan ni nge chuw e thin riy (“Kam mu’nag fapi machib rom”?). Ngam fith ko mang e kar rin’ed (“Mang e kam thamiy u nap’an ni kam meybil nifen fare tabinaew? Mang ke buch u nap’an ni kam rin’ e pi n’en nikan thogthog nag ngom?”).

• Motoyil nib fal’rogon mag yoloy nga but’.

• Puruy’gow u ta’abang. L’agruw ni’ nibe machib u ta’abang e kan pi’ ngorow fare yi’iy nifen ngak fapi cha’ niyad be machib ngorad.

Mang e interview ko machib?

Biney ba puruy’ u thlin fapi mo’on niyad be machib nge memba’ ko fare elders quorum presidency fa thlin e pi’in nib bpin nibe machib nge memba’ ko fare Relief Society presiency u bang nrayag ni ngar thamiyew fare thogthog nibe yib rok fare Kan ni Thothup. N’en nra buch, e fapi mo’on nge bpin nima machib e yadra thamiy ni ngar gafaliyed, miyad tu’ufeg, min fil, min dag e runguy u wo’en fare Tathapeg.

Pi mu’ulung ney ni yima tay ni gubin aningeg e pul ba tu’uf ni ngan mada’ riy?

Baga’ ni yima mada’ riy, machane rayag ni ngan use nag e fon fa online ni fa’an ndabiyag ni ngam mada’ gow facha’. Susun, ni gamew facha’ ni gamew ma machib u ta’abang e gamew ra yan ko fare interview u ta’abang.

Mang fal’ngin e interview ko machib?

Interview ko machib e rayag ni nge ayuweg fapi mo’on nge bpin nima machib ni nge guy e tin nibe buch e chiney, ma fal’agin boech ban’en nga m’on, miyad ayuw facha’ fa fare tabinaew niyad be machibnag. Iraray e ngiyal’ nrayag ni ngan guy ko miti mang ayuw e rayag ni nge pi’ e quorum nge Relief Society.

Uw rogon ni gura mruwliy e tin ba’aray ban’en nib mith fa ban’en nib momaw’ i weliy?

Fapi mo’on nge bpin ni yad be machib e rayag ni ngar weliyed salpen facha’ ni yad be machibnag ngak e elders quorum fa Releif Society president—fa ngak e bisof ma kemus aram. Tin nib mith fa tin nib momaw’ i weliy e dabni weliy mornga’agen ko mu’ulung ni yima tay ko fare bin somm’on e Madnom.

Bang nifan e interview ko machib, mu’ulung ko council nifan e bin somm’on e madnom e reb i kanawo’en ni ngan uneg boech e gidii’ ko fare machib. Ulan fare mu’ulung ko Relief Society nge fapi elder quorum, thogthog e rayag ni nge yib ngak fapi cha’ nibe un ko fare mu’ulung u dakan fare Thothup nge ku fapi gidii’ nibay ko fare ulung.

Mu’ulung ko council e gathi kemus ni mornga’agen e mnon: pi mu’ulung ney e ir e ma gagiyeg nagdad ni ngad gachgachgad u ta’abang fa kemus ni yugugur nibe yan u rogon nike thogthog nag fare Thothup. Fapi chongin e Galasia e yad ra thamiy ni yad ba’adag ni ngar rin’ed e murwel rok Somoel ni’ir raray fan e pi mu’ulung ney ni yima tay.

“Meybil romad e daba’,” ke yoeg Elder Jeffrey R. Holland ko fare Ulungi ko fare Ragag nge La’agruw e Apostles, “ni gubin e mo’on nge bpin—nge tin nib ilal e pagal nge bpib —e [ngar] tu’ufegned yad ni gubin, nibe pi’ gelnginrad fare tu’ufeg rok Kristus ni ngar rin’ed ni aray rogon.” ⁴