Re Fan nira Thilyeg e Rogdaed ko Pigpig

Bay yo’or e fan ko pigpig, e rayog rodad ko pigpig ngan powiy’ ko e laniyaen’daed ningad ayuweged reb e gidii’ ningar thapeged e thilthil ko mich mar manged woed rogon en Tathapeg

Nap’an ngad t’ufeged reb e gidii’ woed rogon en Tathapeg, gadadba’adag ningad ayuwegraed woed rogon Ke rrin’. I’ir fare Tachugol nib Fel’, I’ir e bin thabi gaa’ e sasun ko pigpig nib gaa’fan.

Nap’an ngad folgaed ko pigpig Ngak, nib t’uf ningad ta’ermedliyed e ngongol Rok ko t’ufeg, chibiyraed ngalang, pigpig, ma taw’athnog ba yaen ko reb fan. Arragon Irma nang e tin t’uf roraed ko urgnin e rran make kirebaen’ ko gafgow roraed chiney. Aramfan Ke golnog, duruwiy, n’agfan, ma fil. Machane Irba’adag ninge rrin’ reb e ban’en ko fel’rogon e balel ko daba’. (mu guy John 4:13–14). Ma Irba’adag e gidii ningar golgaed Ngak (mu guy’ Luke 18:22; John 21:22), nanged Marunga’gaen (mu guyJohn 10:14; Doctrine nge Covenants 132:22–24), mar thapeged e tin rayog roraed ko tharmiy (mu guy Matthew 5:48). Ta’abrogon e ban’en e ba riyul’ daba’ (mu guyDoctrine nge Covenants 67:13).

Bay bo’or e rogon ningad taw’athnoged reb e gidii, machane nap’an e fan u tomur ko muruwel rodad ningad ayuweg reb e gidii’ ningar nanged en Tathapeg mar manged Ta’abrogon, gadadra muruwel mada’ ko fare rran nap’an dabi t’uf ningad filed e gidii’ nib yoror rodad marunga’agen Somoel bachan gadad gubin ra nang Ngak. (mu guy Jeremiah 31:34).

Puluw ko Tathapeg Nib Gaa’ Ko Tin T’uf u Chingyal’.

Bo’or e gidii’ kar rrin’ed e ngongol nib gaa’ ningar feked pi fagar roraed ere Yesus ninge golnograed ko m’ar. U tomuren Tathapeg ke golnag fare mo’on, machane Irba’adag ninge n’agfan ngak ko pi denen rok. (mu guy Luke 5:18–26).
Nap’an ulungi gidii’ kar feked e ppin ke galong ngak en Tathapeg, Dabke non e pufthin ma ke thap e yafas rok. Machane Irba’adag ninge thapeg e ya’al rok, me non ngak, “mwaen, ma damu denen bayay” (mu guy John 8:2–11).
Mary nge Martha kar pinning Yesus Ninge yib ma golnag e fagar Rok, Lazarus. Yesus, ma ke golnag bo’or e gidii’, Ke soen ninge taw tomuren Lazarus ke yim’. Yesus ma nang e tin ni ba’adag fare tabinaew, machane udakaen e fas ko yam’ ko Lazarus, Ke gelnag e mich roraed ko e tin tharmiy Rok (mu guy John 11:21–27).

Bay reb e sasun ningam yoeg?

Mang e Rayog ni Ngad Rin’ed?

Fa’an e fan rodad ningad ayuweged reb e gidii’ ningar manged woed en Tathapeg, nira thilyeg e yalen ko pigpig rodad. Ba’aray boech e rogon e nang fan nem ra powiy’ e rayog rodad ko pigpig.

Laem 1: Mu peth e Pigpig ko e Tathapeg

Urngin e rayog rodad ningad rrin’ed e tin nib ba gaa’fan, machane rayog ningad piry’eged reb e rogon ningad gelnag e pigpig rodad nap’an ngad peth riy’ ko en Tathapeg. Woed rogon, fa’an e tabinaew ni gama pigpig ngak e yaedba m’ar, e gaan ra ayuweg, machane e thin rom ko t’ufeg ra ayuweg e mich roraed ni ba’adag en Tathapeg ngoraed. E ayuw rom ko milay’ nib fel’, machane sana nib fel’ ningam pii’ e taw’ath ko priesthood.

Elder Neil L. Andersen ko fare Ulungi Ragag nge La’agruwi Apostle ke fil: “E bee’ nibay fel’ gum’ircha’en ra ayuweg e bee’ ko kireb e tire, fek e yoror nga togta, abich ko e bee’ nib kirebaen’, fa sminmin mar oeged e ke urogom boech.

Machane e gachalpen ko fare bin somm’on e motochiyel ra un reb e ban’en ko ngongol nib gaa’fan ney ko pigpig.”¹

Laem 2: Puluw ko fare Kanawo’ ko Michmicheg

Nap’an ke non ngak boech e chongin ko bin somm’om e yay ni’ir fare President ko fare Galasia, President Russell M. Nelson ke yoeg, “Mu koel ko fare kanawo’ ko michmicheg.” Mu fi’leg mu fol fapi michmicheg “nira bing e maab ninge yib urngin e taw’ath ko ya’el nge tin fla’ab.”²

Gadad e Gidii’en Got rok ko Tin Tomur e Rran, kan tawfenogdaed, yibliynogdaed, mag thapeged fare taw’ath ko fare Kan Thothup. Pi mo’on nib mat’aw ra thapeg fare priesthood. Gadadma yaen nga temple ni fan e endowment ningad mag paa’daed uta’abang ko manemus. Fapi gam’ing ko thapeg ney nge pi michmicheg nib gaa’fan ninge manged woedrogon Ngak ninge yoeg ningaed paered Ngak.

Bay e muruwel rodad nib gaa’fan ningad ayuweg reb e gidii’ ko kanawo’ nem nap’an ngar folgaed ko pimichmicheg mar taermedliyed ko pi gaming ni bay yib.³ Urrogon ningad ayuweg e gidii’ fa pi tabinaew nib t’uf romed ningar thapeged bin magid e gam’ing? Bay yip fan ningam taermedliy e chitamangiy ninge tawfe nag e bitir nib ppin rok, fa weliy’ fatin taw’ath ko bin magid e michmicheg ningan fil’eg, fa weliy’ boech e rogon ningar feked fare sacrament nib fel’ rogon.

Laem 3: Pinning ma Gay Fel’ Laniyaen’

Nap’an nib fel’ rogon, pii’ e fanow ngak e gidii’ nib t’uf rom marungagen e thilyeg raed nge rayog rorade ningar ta’abrogon ko Kristus. Muweliy’ e tin fel’ roraed. Nang fan boech e rogon ningar fel’ ma weliy’ urrogon ningam ayuweg. (Ko reb e fanow ko pigpig. Mu guy “Counsel about Their Needs,” Liahona, Sept. 2018, 6–9.)

Damu tamra’ ningam piry’egraed ningar folgaed ngak Tathapeg ma pii’ Matawaen ningar thapeged e tin tharmiy roraed. E pinning ney rayog ni nge thilyeg e yafas, nap’an ngan peth ko e thin nib fel’ ngodaed.

Nel’ E Rogon Rayog Ningad Ayuweg Reb E Gidii’ Ngak Kristus

Ba’aray boech e rogon ningam ayuweg reb e gidii’ ningar fel’ rogon e yafas roraaed mar ranoed ko e kanawo’ ko michmicheg. (Mu guy Preach My Gospel, chapter 11, ko boech e laem.)

Pii’. Ngam maen e ya’en nib riyul’ nap’an ngam weliy’ urrogon e Tathapeg ke ayuwegem nap’an kam baed Ngak udakaen e paer ko kenginn e gospel dariy’ fan e dibchay.
Mmicheg e taw’ath. E gidii’ ba t’uf e fan ningar thilyeg nib gaa’ fan ko dar thilyeg. Mu weliy’ marunga’gen e taw’ath nira yib udakaen e ngongol ra pii’ e fel laniyaen’ ko thilyeg (mu guy Doctrine and Covenants 130:20–21).
Pinning. Paer ko e kenginn e gospel rayoeg e mich ko tin riyul’ (muguy John 7:17) nira powiy’ e thilyeg nib gaa’.⁴ Urngin e sabethin ninge yoeg e pinning ninge rrin’ e ban’en nib fel’.
Liyeb uta’abang. Mang e boech e ban’en nib t’uf ningar folgaed e pinning ningar thilyeg? Urrogon ningam ayuweg? Bay boech e ningyal’?
Mu ayuweg. Nap’an nib fel’, mu yarmiy’ e ulungi gidii’ ningar ayuweg e bee’ ningar thamgily ma gelnog. Gadad gubin ba t’uf e cheerleader.
Sul ngadakaen. Mu non marunga’agen e ul’ul’ rom boech e yay. Mu puluw ko kanawo’ machane ragam thilyeg fa’an nib t’uf. Mu gumaen’, mu athamgil, ngam gay fel’laniyaen’. Thilyeg ra t’uf boech e ningyal’.

Pinning ningar Thilyeg.

Mu lemnog boech e rogon ningam pigpig—arragon nib gaa’ nge chigchig—ngak reb e gidii’ ningar gelong e conversion roraed ningar manged woed rogon en Tathapeg.