១. ក្រុមព្រះ ឯកសារគោលនៃចំណេះចំណានខាងគោលលទ្ធិ ( ឆ្នាំ២០១៨ )
១. ក្រុមព្រះ
១.១. មានតួអង្គបីអង្គ ដែលមានរូបអង្គដាច់ដោយឡែកពីគ្នានៅក្នុងក្រុមព្រះ ៖ ព្រះជាព្រះវរបិតាដ៏អស់កល្ប ព្រះរាជបុត្រារបស់ទ្រង់ គឺព្រះយេស៊ូវគ្រីស្ទ និង ព្រះវិញ្ញាណបរិសុទ្ធ ។ ព្រះវរបិតា និង ព្រះរាជបុត្រាមាននូវរូបកាយជាសាច់ និង ឆ្អឹងដ៏រុងរឿង ហើយរូបិយ ហើយឯព្រះវិញ្ញាណបរិសុទ្ធគឺជាតួអង្គនៃវិញ្ញាណ ( សូមមើល គ. និង ស. ១៣០:២២–២៣ ) ។ ពួកទ្រង់មានព្រះទ័យតែមួយ ហើយរួមសាមគ្គីគ្នាដ៏ឥតខ្ចោះក្នុងការនាំមកនូវផែនការនៃសេចក្តីសង្រ្គោះរបស់ព្រះវរបិតា ។
សេចក្ដីយោងដែលទាក់ទង ៖ លោកុប្បត្តិ ១:២៦–២៧, លូកា ២៤:៣៦–៣៩,យ៉ូសែប ស្ម៊ីធ—ប្រវត្តិ ១:១៥–២០
ព្រះជាព្រះវរបិតា
១.២. ព្រះជាព្រះវរបិតាគឺជាព្រះដ៏ខ្ពស់បំផុតដែលយើងថ្វាយបង្គំ ។ ទ្រង់គឺជាបិតានៃវិញ្ញាណរបស់យើង ( សូមមើល ហេព្រើរ ១២:៩) ។ ទ្រង់ល្អឥតខ្ចោះមានគ្រប់ទាំងព្រះចេស្តា និងជ្រាបនូវគ្រប់ការណ៍ទាំងអស់ ។ ទ្រង់មានយុត្តិធម៌ ប្រកបដោយក្ដីមេត្តាករុណា និងមានព្រះទ័យល្អផងដែរ ។ ព្រះស្រឡាញ់កូនចៅរបស់ទ្រង់ម្នាក់ៗយ៉ាងឥតខ្ចោះ ហើយមនុស្សទាំងអស់គឺស្មើគ្នាចំពោះទ្រង់ ( សូមមើលនីហ្វៃទី ២ ២៦:៣៣ ) ។ កិច្ចការ និងសិរីល្អរបស់ទ្រង់គឺដើម្បីនាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស ។
សេចក្ដីយោងដែលទាក់ទង ៖ យ៉ូហាន ១៧:៣,ម៉ូសាយ ៤:៩,ម៉ូសេ ១:៣៩
ព្រះយេស៊ូវគ្រីស្ទ
១.៣. ព្រះយេស៊ូវគ្រីស្ទគឺជាបុត្រច្បងខាងវិញ្ញាណរបស់ព្រះវរបិតា ហើយជាបុត្រាបង្កើតតែមួយគត់របស់ព្រះវរបិតាខាងសាច់ឈាម ។ នៅក្រោមការដឹកនាំរបស់ព្រះបិតា ព្រះយេស៊ូវគ្រីស្ទបានបង្កើតស្ថានសួគ៌ និងផែនដី ។ ទ្រង់គឺជាព្រះយេហូវ៉ានៃព្រះគម្ពីរសញ្ញាចាស់ និង ជាព្រះមែស៊ីនៃគម្ពីរសញ្ញាថ្មី ។
១.៤. ព្រះយេស៊ូវគ្រីស្ទធ្វើតាមព្រះទ័យរបស់ព្រះបិតាគ្រប់ការណ៍ទាំងអស់ ។ ទ្រង់បានរស់នៅក្នុងជីវិតដែលគ្មានអំពើបាប ហើយបានធ្វើដង្វាយធួនជំនួសអំពើបាបរបស់មនុស្សគ្រប់គ្នា ( សូមមើលនីហ្វៃទី ៣ ១១:១០-១១ ) ។ ព្រះជន្មរបស់ទ្រង់គឺជាគំរូដ៏ឥតខ្ចោះអំពីរបៀបដែលយើងត្រូវរស់នៅ ( សូមមើលនីហ្វៃទី ៣ ១២:៤៨ ) ។ ទ្រង់គឺជាបុត្រាច្បងរបស់ព្រះវរបិតាសួគ៌ដែលបានរស់ឡើងវិញ ។ នៅជំនាន់របស់យើង ក៏ដូចជានៅជំនាន់បុរាណដែរ ទ្រង់គង់នៅជាសិរិសារនៃសាសនាចក្ររបស់ទ្រង់ ។ ទ្រង់នឹងយាងមកម្តងទៀតដោយព្រះចេស្តា និង ភាពរុងរឿង ហើយនឹងគ្រងលើផែនដីនេះក្នុងអំឡុងពេលសហស្សវត្សរ៍ ( សូមមើល គ. និង ស. ២៩:១០–១១ ) ។ ទ្រង់នឹងជំនុំជម្រះមនុស្សលោកទាំងអស់ ។
១.៥. ដោយសារតែព្រះយេស៊ូវគ្រីស្ទគឺជាព្រះអង្គសង្គ្រោះ និងជាអង្គសង្រួបសង្រួមរបស់យើងជាមួយនឹងព្រះបិតា នោះរាល់ការអធិស្ឋាន ការប្រសិទ្ធពរ និងពិធីបរិសុទ្ធនៃបព្វជិតភាព គួរតែត្រូវបានធ្វើឡើងនៅក្នុងព្រះនាមរបស់ទ្រង់ ( សូមមើលនីហ្វៃទី ៣ ១៨:១៥, ២០-២១ ) ។
សេចក្ដីយោងដែលទាក់ទង ៖ អេសាយ ៥៣:៣–៥, លូកា ២៤:៣៦–៣៩, កូរិនថូសទី ១ ១៥:២០–២២, វិវរណៈ ២០:១២, អាលម៉ា ៧:១១–១៣, អាលម៉ា ៣៤:៩–១០, ហេលេមិន ៥:១២, មរ៉ូណៃ ៧:៤៥, ៤៧–៤៨, គ. និងស. ១:៣០, គ. និងស. ៦:៣៦, គ. និងស. ១៨:១០–១១, គ. និងស. ១៩:១៦–១៩, គ. និង ស. ៧៦:២២–២៤
ប្រធានបទដែលទាក់ទង ៖ ដង្វាយធួននៃព្រះយេស៊ូវគ្រីស្ទ
ព្រះវិញ្ញាណបរិសុទ្ធ
១.៦. ព្រះវិញ្ញាណបរិសុទ្ធគឺជាសមាជិកទីបីនៃក្រុមព្រះ ។ ទ្រង់គឺជាតួអង្គនៃវិញ្ញាណ ហើយគ្មានរូបកាយជាសាច់ និង ឆ្អឹងនោះទេ ។ ជាញឹកញាប់ ទ្រង់ត្រូវបានគេស្គាល់ថាជាវិញ្ញាណ ជាព្រះវិញ្ញាណបរិសុទ្ធ ជាព្រះវិញ្ញាណនៃព្រះ ជាព្រះវិញ្ញាណនៃព្រះអម្ចាស់ និង ជាអង្គលួងលោម ។
១.៧. ព្រះវិញ្ញាណបរិសុទ្ធថ្លែងសាក្សីអំពីព្រះវរបិតា និង ព្រះរាជបុត្រា បើកសម្តែងសេចក្តីពិតនៃការណ៍គ្រប់យ៉ាង និង ញែកអ្នកទាំងឡាយណាដែលបានប្រែចិត្ត និង ទទួលបុណ្យជ្រមុជទឹកឲ្យបានបរិសុទ្ធ ។ តាមរយៈព្រះចេស្ដានៃព្រះវិញ្ញាណបរិសុទ្ធ នោះយើងអាចទទួលបានអំណោយទានខាងវិញ្ញាណ ដែលជាពរជ័យ ឬជាសមត្ថភាពដែលបានប្រទានឲ្យដោយព្រះអម្ចាស់ដើម្បីជាប្រយោជន៍របស់យើង និងដើម្បីជួយយើងឲ្យបម្រើ ហើយប្រទានពរដល់អ្នកដទៃទៀត ។
សេចក្ដីយោងដែលទាក់ទង ៖ យ៉ូហាន ៣:៥, កូរិនថូសទី ១ ២:៥, ៩–១១, នីហ្វៃទី ២ ៣២:៣, នីហ្វៃទី ២ ៣២:៨–៩, ម៉ូសាយ ៣:១៩, ម៉ូសាយ ១៨:៨–១០, នីហ្វៃទី ៣ ២៧:២០, មរ៉ូណៃ ៧:៤៥, ៤៧–៤៨, មរ៉ូណៃ ១០:៤–៥, គ. និង ស. ៨:២–៣, គ. និង ស. ១៣០:២២–២៣
ប្រធានបទដែលទាក់ទង ៖ ការទទួលបានចំណេះដឹងខាងវិញ្ញាណ ពិធីបរិសុទ្ធ និងសេចក្ដីសញ្ញាទាំងឡាយ