៦. បព្វជិតភាព និង កូនសោទាំងឡាយនៃបព្វជិតភាព ឯកសារគោលនៃចំណេះចំណានខាងគោលលទ្ធិ ( ឆ្នាំ២០១៨ )
៦. បព្វជិតភាព និង កូនសោទាំងឡាយនៃបព្វជិតភាព
៦.១. បព្វជិតភាពគឺជាអំណាច និង ជាសិទ្ធិអំណាចដ៏អស់កល្បរបស់ព្រះ ។ តាមរយៈបព្វជិតភាព ព្រះបានបង្កើត និងគ្រប់គ្រងស្ថានសួគ៌ ព្រមទាំងផែនដីផងដែរ ។ តាមរយៈអំណាចនេះ ទ្រង់ប្រោសលោះ និងលើកតម្កើងកូនចៅរបស់ ទ្រង់ ។ បព្វជិតភាពត្រូវបានប្រគល់ដល់សមាជិកបុរស ដែលមានភាពសក្តិសមក្នុងសាសនាចក្រ ។ ពរជ័យនៃបព្វជិតភាពមានសម្រាប់កូនចៅទាំងអស់របស់ព្រះតាមរយៈពិធីបរិសុទ្ធ និងសេចក្តីសញ្ញាទំាងឡាយនៃដំណឹងល្អ ។
៦.២. កូនសោនៃបព្វជិតភាពគឺជាសិទ្ធិនៃគណៈប្រធាន ឬ ជាអំណាចដែលព្រះបានប្រទានដល់បុរសដើម្បីគ្រប់គ្រង ហើយដឹកនាំនគររបស់ព្រះនៅលើផែនដី ( សូមមើល ម៉ាថាយ ១៦:១៥–១៩ ) ។ កូនសោបព្វជិតភាពគឺចាំបាច់ដើម្បីដឹកនាំការផ្សាយដំណឹងល្អ និងការគ្រប់គ្រងនៃពិធីបរិសុទ្ធនៃសេចក្ដីសង្គ្រោះ ។
៦.៣. ព្រះយេស៊ូវគ្រីស្ទកាន់កូនសោបព្វជិតភាពទាំងអស់សម្រាប់សាសនាចក្ររបស់ទ្រង់ ។ ទ្រង់បានប្រទានឲ្យពួកសាវករបស់ទ្រង់ម្នាក់ៗនូវរាល់កូនសោ ដែលមានសម្រាប់នគរព្រះនៅលើផែនដី ។ ប្រធាននៃសាសនាចក្រគឺជាមនុស្សតែម្នាក់គត់ ដែលមានសិទ្ធិអំណាចដើម្បីអនុវត្តគ្រប់កូនសោបព្វជិតភាពទាំងអស់ ។ ប្រធានព្រះវិហារបរិសុទ្ធ ប្រធានបេសកកម្ម ប្រធានស្ដេក ប៊ីស្សព និងប្រធានកូរ៉ុមក៏មានកាន់កូនសោបព្វជិតភាពផងដែរ ដែលវាអនុញ្ញាតឲ្យពួកគាត់ធ្វើជាអធិបតី និងដឹកនាំកិច្ចការដែលពួកគាត់ត្រូវបានចាត់តាំងឲ្យធ្វើ ។
៦.៤. ចំពោះអស់អ្នកទាំងឡាយណាដែលបម្រើនៅក្នុងសាសនាចក្រ—ទាំងបុរស និងស្ត្រី—គឺត្រូវបានហៅក្រោមការដឹកនាំនៃបុគ្គលម្នាក់ ដែលកាន់កូនសោទាំងឡាយនៃបព្វជិតភាព( សូមមើល គ. និង ស. ៤២:១១ ) ។ អែលឌើរ ដាល្លិន អេក អូក ក្នុងកូរ៉ុមនៃពួកសាវកដប់ពីរនាក់បានបង្រៀនថា « នរណាក៏ដោយដែលធ្វើកិច្ចការនៅក្នុងមុខតំណែង ឬការហៅបម្រើមួយដែលបានទទួលពីបុគ្គលម្នាក់ដែលកាន់កូនសោបព្វជិភាព អនុវត្តសិទ្ធិអំណាចបព្វជិតភាពពេលបំពេញកាតព្វកិច្ចចាត់តាំងរបស់គេ » ( « The Keys and Authority of the Priesthood »Ensignឬ Liahonaខែ ឧសភា ឆ្នាំ ២០១៤ ទំព័រ ៥១ ) ។ សិទ្ធិអំណាចបព្វជិតភាពអាចអនុវត្តបានតែនៅក្នុងសេចក្ដីសុចរិតប៉ុណ្ណោះ( សូមមើល គ. និង ស. ១២១:៣៦, ៤១–៤២ ) ។
៦.៥. អ្នកទាំងឡាយដែលត្រូវបានតែងតាំងឲ្យមានបព្វជិតភាពមិលគីស្សាដែក គឺបានចូលក្នុងសម្បថ និងសេចក្ដីសញ្ញានៃបព្វជិតភាព ។ ប្រសិនបើពួកគេតម្កើងការហៅ និងទទួលព្រះអម្ចាស់ និងពួកអ្នកបម្រើរបស់ទ្រង់ដោយស្មោះត្រង់ នោះពួកគេនឹងទទួលបានពរជ័យនៃការលើកតម្កើង ។ ស្ត្រីក៏ត្រូវបានសន្យាដូចគ្នានូវពរជ័យនៃការលើកតម្កើង នៅពេលពួកគេស្មោះត្រង់ចំពោះសេចក្ដីសញ្ញាដែលពួកគេបានធ្វើជាមួយនឹងព្រះអម្ចាស់ ។
សេចក្ដីយោងដែលទាក់ទង ៖ យ៉ូហាន ១៥:១៦,អេភេសូរ ២:១៩–២០
ប្រធានបទដែលទាក់ទង ៖ ការស្ដារឡើងវិញ ពួកព្យាការី និង វិវរណៈ ពិធីបរិសុទ្ធ និងសេចក្ដីសញ្ញាទាំងឡាយ
បព្វជិតភាពអើរ៉ុន
៦.៦. ជាទូទៅបព្វជិតភាពអើរ៉ុនត្រូវបានហៅថាជាបព្វជិតភាពបម្រុង ។ បព្វជិតភាពអើរ៉ុន « កាន់ នូវ កូនសោ នៃ ការបម្រើនៃពួកទេវតា និង នៃ ដំណឹងល្អ នៃ ការប្រែចិត្ត និង បុណ្យជ្រមុជទឹក »( គ. និង ស. ១៣:១ ) ។ តាមរយៈការអនុវត្តបព្វជិតភាពនេះ ពិធីសាក្រាម៉ង់ត្រូវបានរៀបចំឡើង ប្រសិទ្ធពរ និងបម្រើ ។ មុខតំណែងនៃបព្វជិតភាពអើរ៉ុនរួមមាន ឌីកុន គ្រូ សង្ឃ និង ប៊ីស្សព ។
បព្វជិតភាពមិលគីស្សាដែក
៦.៧. បព្វជិតភាពមិលគីស្សាដែកគឺជាបព្វជិតភាពខ្ពស់ជាង ឬធំជាង ហើយ « មានសិទ្ធិខាងគណៈប្រធាន ហើយមានអំណាច និងសិទ្ធិអំណាចលើអស់ទាំងតំណែងនៅក្នុងសាសនាចក្រ នៅគ្រប់សម័យនានាក្នុងពិភពលោក និងមានអំណាចដើម្បីចាត់ចែងការណ៍ទាំងឡាយខាងវិញ្ញាណ » ( គ. និង ស. ១០៧:៨ ) ។ គ្រប់ពរជ័យ ពិធីបរិសុទ្ធ សេចក្ដីសញ្ញា និងការរៀបចំទាំងអស់របស់សាសនាចក្រ គឺត្រូវបានគ្រប់គ្រងនៅក្រោមសិទ្ធិអំណាចនៃប្រធានសាសនាចក្រ ដែលជាប្រធាននៃបព្វជិតភាពមិលគីស្សាដែក ។ បព្វជិតភាពត្រូវបានផ្តល់ឲ្យដល់អ័ដាម ហើយមាននៅលើផែនដី នៅពេលណាដែលព្រះអម្ចាស់បានបើកសម្តែងដំណឹងល្អរបស់ទ្រង់ ។ នៅក្នុងបព្វជិតភាពម៉ិលគីស្សាដែកមាននូវមុខតំណែងដូចជា អែលឌើរ សង្ឃជាន់ខ្ពស់លោកអយ្យកោ ពួកចិតសិបនាក់ និងពួកសាវក ។
ខគម្ពីរយោងដែលទាក់ទង ៖ អេភេសូរ ៤:១១–១៤