មេរៀនទី ១៤២
គោលលទ្ធិ និង សេចក្ដីសញ្ញា ១៣៣:៣៦-៧៤
បុព្វកថា
មេរៀននេះពិភាក្សានូវផ្នែកទីពីរនៃវិវរណៈដែលបានកត់ត្រានៅក្នុងគោលលទ្ធិ និង សេចក្ដីសញ្ញា ១៣៣។ យ៉ូសែប ស៊្មីធ បានទទួលវិវរណៈនេះ នៅថ្ងៃទី ៣ ខែ វិច្ឆិកា ឆ្នាំ ១៨៣១ ។ វាឆ្លើយតបទៅនឹងសំណួរដែលពួកអ្នកផ្សព្វផ្សាយសាសនាបានមានអំពីការផ្សាយដំណឹងល្អ និងការប្រមូលផ្ដុំវង្សអ៊ីស្រាអែល ។ វាក៏ពិពណ៌នាអំពីការយាងមកជាលើកទីពីររបស់ព្រះអម្ចាស់ ហើយពន្យល់នូវអ្វីដែលយើងចាំបាច់ត្រូវធ្វើ ដើម្បីបានរៀបចំសម្រាប់ការយាងមកជាលើកទីពីរផងដែរ ។
យោបល់សម្រាប់ការបង្រៀន
គោលលទ្ធិ និង សេចក្ដីសញ្ញា ១៣៣:៣៦-៤០
ព្រះអម្ចាស់ប្រកាសថា ដំណឹងល្អដែលបានស្ដារឡើងវិញ នឹងត្រូវផ្សាយចេញទៅគ្រប់កន្លែងក្នុងពិភពលោក
សូមចាប់ផ្ដើមមេរៀនដោយការសួរសិស្សនូវសំណួរខាងក្រោមនេះ ៖
-
តើពេលណា ដែលអ្នកធ្លាប់បានមានចិត្តរំភើបយ៉ាងខ្លាំង ដើម្បីជួបនឹងនរណាម្នាក់ ? (សូមអញ្ជើញសិស្សពីរបីនាក់ឲ្យរៀបរាប់អំពីបទពិសោធន៍របស់ពួកគេ ។ អ្នកក៏អាចចែកចាយបទពិសោធន៍មួយផងដែរ) ។
សូមដាក់បង្ហាញរូបភាពការយាងមកជាលើកទីពីរសៀវភៅសិល្បៈដំណឹងល្អ២០០៩ ] ទំព័រ ៦៦, សូមមើលផងដែរLDS.org
-
តើអ្នកមានចិត្តរំភើប ដើម្បីជួបនឹងព្រះអង្គសង្គ្រោះនៅការយាងមកជាលើកទីពីររបស់ទ្រង់ដែរឬទេ ? ហេតុអ្វី ?
សូមពន្យល់ថា ការយាងមកជាលើកទីពីររបស់ព្រះយេស៊ូវគ្រីស្ទ នឹងជាបទពិសោធន៍ដ៏ផ្អែមល្ហែម ហើយអស្ចារ្យមួយសម្រាប់មនុស្សមួយចំនួន ហើយវាក៏ជាបទពិសោធន៍ដ៏ភ័យខ្លាចសម្រាប់មនុស្សផ្សេងទៀតផងដែរ ។ សូមថ្លែងទីបន្ទាល់ថា ព្រះអង្គសង្គ្រោះមានព្រះទ័យចង់ឲ្យមនុស្សគ្រប់រូបត្រៀមខ្លួនសម្រាប់ការយាងមករបស់ទ្រង់ ។
សូមអញ្ជើញសិស្សម្នាក់ឲ្យអានគោលលទ្ធិ និង សេចក្ដីសញ្ញា ១៣៣:៣៦-៣៩ឲ្យឮ ។ សូមឲ្យសិស្សក្នុងថ្នាក់ផ្ទៀងតាម រកមើលភស្ដុតាងដែលថាព្រះអង្គសង្គ្រោះសព្វព្រះទ័យឲ្យមនុស្សទាំងអស់ត្រៀមខ្លួនសម្រាប់ការយាងមកជាលើកទីពីររបស់ទ្រង់ ។
-
តើមានភស្ដុតាងអ្វីខ្លះ ដែលអ្នកបានឃើញនៅក្នុងខគម្ពីរទាំនេះ ដែលថាព្រះអង្គសង្គ្រោះសព្វព្រះទ័យឲ្យមនុស្សទាំងអស់ត្រៀមខ្លួនសម្រាប់ការយាងមកជាលើកទីពីររបស់ទ្រង់ ? ( ទ្រង់បានបញ្ជូនទេវតាមួយអង្គ [ឬពួកទេវតា] ឲ្យស្ដារដំណឹងល្អនៅលើផែនដី ។ ទ្រង់កំពុងបញ្ជូនពួកអ្នកបម្រើរបស់ទ្រង់ឲ្យផ្សាយដំណឹងល្អដល់មនុស្សគ្រប់រូបផងដែរ ។
-
តើនរណាជាពួកអ្នកបម្រើរបស់ព្រះ ដែលនឹងផ្សាយសារនៃដំណឹងល្អដែលបានស្ដារឡើងវិញ ? ( សមាជិកគ្រប់រូបនៃសាសនាចក្រ គឺជាពួកអ្នកបម្រើនៃព្រះ ដែលមានទំនួលខុសត្រូវដើម្បីចែកចាយដំណឹងល្អជាមួយអ្នកដទៃ ។ អ្នកអាចនឹងប្រាប់ឲ្យសិស្សសរសេរគោលការណ៍ដូចខាងក្រោមនៅក្នុងគម្ពីររបស់ពួកគេ ៖ក្នុងនាមជាពួកអ្នកបម្រើរបស់ព្រះ យើងអាចជួយអ្នកដទៃឲ្យត្រៀមខ្លួនសម្រាប់ការយាងមកជាលើកទីពីរ ដោយការចែកចាយដំណឹងល្អជាមួយពួកគេ )។
-
ស្របតាមខ ៣៨តើយើងប្រកាសដំណឹងល្អយ៉ាងដូចម្ដេច ? តើអ្នកគិតថាវាអាចមានន័យដូចម្តេច ដើម្បីចែកចាយដំណឹងល្អ « ដោយបន្លឺសំឡេងយ៉ាងខ្លាំង » ? ( ចម្លើយអាចរួមមានដូចជា យើងគប្បីចែកចាយដំណឹងល្អដោយចិត្តក្លាហាន និងដោយជំនឿស៊ប់ ) ។
សូមអញ្ជើញសិស្សឲ្យអានគោលលទ្ធិ និង សេចក្ដីសញ្ញា ១៣៣:៤០ដោយស្ងាត់ស្ងៀម ហើយរកមើលអ្វីមួយផ្សេងទៀត ដែលពួកអ្នកបម្រើនៃព្រះនឹងធ្វើ ពីមុនការយាងមកជាលើកទីពីររបស់ព្រះយេស៊ូវគ្រីស្ទ ។
-
ស្របតាមខ ៤០តើអ្នកបម្រើរបស់ព្រះនឹងធ្វើអ្វីខ្លះ ពីមុនការយាងមកជាលើកទីពីរ ? ( ពួកគេនឹងអធិស្ឋានសុំសម្រាប់ការយាងត្រឡប់មកវិញរបស់ព្រះអង្គសង្គ្រោះ ) ។
គោលលទ្ធិ និង សេចក្ដីសញ្ញា ១៣៣:៤១-៥៦
ព្រះយេស៊ូវគ្រីស្ទពិពណ៌នាអំពីការយាងមកជាលើកទីពីររបស់ទ្រង់
សូមអញ្ជើញសិស្សម្នាក់ឲ្យអានគោលលទ្ធិ និង សេចក្ដីសញ្ញា ១៣៣:៤១-៤៥ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម រកមើលនូវពរជ័យទាំងឡាយដែលនឹងកើតមានចំពោះអ្នកទាំងឡាយណាដែលអធិស្ឋាន ហើយរង់ចាំការយាងមកជាលើកទីពីររបស់ព្រះយេស៊ូវគ្រីស្ទ ។
-
ស្របតាមខ ៤៥តើព្រះអម្ចាស់សន្យាអ្វីខ្លះ ដល់អ្នកទាំងឡាយដែលនឹងរង់ចាំទ្រង់នោះ ? ( បន្ទាប់ពីសិស្សឆ្លើយតប សូមសរសេរនូវសេចក្ដីពិតដូចខាងក្រោមនៅលើក្ដារខៀន ៖ព្រះអម្ចាស់បានត្រៀមពរជ័យដ៏មហិមាទាំងឡាយសម្រាប់អ្នកទាំងឡាយដែលរង់ចាំទ្រង់ ) ។
-
តើអ្នកគិតថា ការរង់ចាំព្រះអម្ចាស់មានន័យយ៉ាងណា ? ( សូមជួយសិស្សយល់ថា ឃ្លា « រង់ចាំព្រះអម្ចាស់ » មានន័យច្រើនជាងហួសពីការគ្រាន់តែរង់ចាំឲ្យពេលវេលាកន្លងផុតទៅរហូតដល់ទ្រង់យាងមកនោះទេ ។ វាមានន័យថា ឃ្លាំចាំមើល ហើយត្រៀមខ្លួន និងចូលរួមនៅក្នុងកិច្ចការរបស់ទ្រង់ ) ។
ដើម្បីជួយសិស្សយល់កាន់តែល្អប្រសើរអំពីរបៀបដែលពួកគេអាចរង់ចាំព្រះអម្ចាស់ និងការយាងមកជាលើកទីពីររបស់ទ្រង់ សូមអញ្ជើញសិស្សម្នាក់ឲ្យអានឮៗនូវសេចក្ដីថ្លែងការណ៍ដូចខាងក្រោមដោយ អែលឌើរ ជែហ្វ្រី អរ ហូឡិន នៃកូរ៉ុមនៃពួកសាវកដប់ពីរនាក់ ។ សូមឲ្យសិស្សស្ដាប់រកមើលសកម្មភាពនានា ដែលយើងគួរធ្វើ នៅពេលយើងរង់ចាំការយាងមកជាលើកទីពីរ ។
« ចំពោះអ្នករាល់គ្នាណា ដែលបានខ្វល់ខ្វាយអំពីអនាគត…
« ព្រះមានព្រះទ័យរំពឹងឲ្យអ្នកមានសេចក្ដីជំនឿគ្រប់គ្រាន់ និង ការប្ដេជ្ញាចិត្ត ហើយទុកចិត្តលើទ្រង់ ដើម្បីបន្តទៅមុខ បន្តរស់នៅ និងបន្តមានចិត្តរីករាយ ។ ប្រាកដណាស់ ទ្រង់មិនមានព្រះទ័យរំពឹងឲ្យអ្នក ប្រឈមមុខ នឹងអនាគតកាលដោយធម្មតា ( ដែលហាក់ដូចជាក្រៀមក្រំ និង បណ្ដោយតាមវាសនា ) នោះទេ ដ្បិតទ្រង់មានព្រះទ័យរំពឹងឲ្យអ្នកឱបក្រសោបយក ហើយ រៀបចំ អនាគតកាល—ដើម្បីចេះស្រឡាញ់ ហើយអរសប្បាយនឹងអនាគតកាល ហើយធ្វើឲ្យរីករាយឡើងនៅក្នុងជីវិតរបស់អ្នក ។
« ព្រះទ្រង់ទន្ទឹងរង់ចាំដោយអន្ទះសា ចំពោះឱកាសដើម្បីឆ្លើយតបការអធិស្ឋានរបស់អ្នក ហើយបំពេញតាមសេចក្ដីប្រាថ្នាដែលអ្នកមាន ដូចដែលទ្រង់ធ្លាប់បានធ្វើរួចមកហើយ ។ ប៉ុន្ដែទ្រង់ពុំអាចធ្វើបានទេ បើអ្នកមិនអធិស្ឋាន ហើយទ្រង់ពុំអាចធ្វើបានទេ បើអ្នកពុំសុបិនចង់បាននោះ ។ សរុបឲ្យខ្លី ទ្រង់ពុំអាចធ្វើបានទេ បើអ្នកពុំជឿនោះ » ( « Terror, Triumph, and a Wedding Feast » [Church Educational System devotional, ថ្ងៃទី ១២ ខែកញ្ញា ឆ្នាំ ២០០៤], ទំព័រ ៣,speeches.byu.edu) ។
-
តើអែលឌើរ ហូឡិន បានមានប្រសាសន៍ថា យើងគប្បីធ្វើអ្វីខ្លះ នៅពេលយើងរង់ចាំការយាងមកជាលើកទីពីររបស់ព្រះអង្គសង្គ្រោះ ?
សូមអញ្ជើញសិស្សឲ្យអានគោលលទ្ធិ និង សេចក្ដីសញ្ញា ១៣៣:៤៦-៤៧ដោយស្ងាត់ស្ងៀម ហើយរៀបរាប់នូវអ្វីដែលពួកគេបានរៀនអំពីមនុស្សមួយចំនួនដែលនឹងនៅលើផែនដីក្នុងគ្រានៃការយាងមកជាលើកទីពីរ ។ សិស្សគប្បីទទួលស្គាល់ថា ពុំមែនមនុស្សទាំងអស់នឹងស្គាល់ថាព្រះយេស៊ូវគ្រីស្ទគឺជានរណាទេ នៅពេលនៃការយាងមកជាលើកទីពីររបស់ទ្រង់នោះ ។
សូមអញ្ជើញសិស្សម្នាក់ឲ្យអានគោលលទ្ធិ និង សេចក្ដីសញ្ញា ១៣៣:៤៨-៤៩ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម រកមើលនូវការពិពណ៌នាមួយអំពីព្រះយេស៊ូវគ្រីស្ទមានរូបរាងយ៉ាងម៉េច នៅពេលនៃការយាងមកជាលើកទីពីររបស់ទ្រង់ ។
-
តើនឹងមានសភាពជាក់លាក់បែបណាខ្លះ អំពីរូបរាងរបស់ព្រះអង្គសង្គ្រោះនៅគ្រានៃការយាងមកជាលើកទីពីររបស់ទ្រង់ ? ( ទ្រង់នឹងយាងមកក្នុងព្រះពស្ត្រពណ៌ក្រហម ហើយទ្រង់នឹងលេចមកនៅក្នុងសិរីល្អដ៏មហិមា ) ។
ដើម្បីជួយសិស្សយល់អំពីនិមិត្តរូបនៃព្រះពស្ត្រពណ៌ក្រហមរបស់ព្រះអង្គសង្គ្រោះ សូមចង្អុលបង្ហាញពាក្យធុងទំពាំងបាយជូរនៅក្នុងខ ៤៨។ សូមដាក់តាំងរូបភាពដែលមានអមមកជាមួយនៃធុងទំពាំងបាយជួរ (ក៏ត្រូវបានហៅថា ធុងស្រាផងដែរនោះ) ឬគូរូបមួយនៅលើក្ដារខៀន ។ សូមពន្យល់ថា នៅក្នុងជំនាន់បុរាណ ធុងស្រាគឺជាបាសាំងធំមួយ ដែលប្រើដើម្បីជាន់យកទឹកទំពាំងបាយជួរចេញពីផ្លែ ។ បាសាំងនឹងត្រូវដាក់បំពេញដោយផ្លែទំពាំងបាយជូរ ហើយមនុស្សមួយចំនួននឹងចូលទៅក្នុងបាសាំងនោះ ហើយជាន់ទន្ទ្រាំពីលើផ្លែទំពាំងបាយជូរ ដើម្បីឲ្យទឹកវាចេញមក ។ នៅពេលមនុស្សជាន់លើទំពាំងបាយជូរពណ៌ក្រហម ឬពណ៌ស្វាយ នោះទឹកទំពាំងបាយជូរនឹងប្រឡាក់ជាប់ជើង និងសម្លៀកបំពាក់របស់ពួកគេដោយពណ៌ក្រហមជាំ ។
សូមអញ្ជើញសិស្សម្នាក់ឲ្យអានគោលលទ្ធិ និង សេចក្ដីសញ្ញា ១៣៣:៥០-៥១ឲ្យឮៗ ។
-
តើខគម្ពីរទាំងនេះជួយយើងឲ្យយល់អំពីសេចក្ដីយុត្តិធម៌របស់ព្រះអម្ចាស់យ៉ាងដូចម្ដេច ? (អ្នកអាចនឹងរំឭកសិស្សថា ពួកទុច្ចរិតដែលពុំព្រមប្រែចិត្តត្រូវតែរងទុក្ខទៅតាមតម្រូវការនៃសេចក្ដីយុត្តិធម៌ ហើយនឹងមិនអាចធន់នៅក្នុងថ្ងៃនៃការយាងមកជាលើកទីពីរនោះទេ [សូមមើលគ. និង ស. ៣៨:៨] ។ ព្រះពស្រ្តពណ៌ក្រហមរបស់ព្រះអម្ចាស់ ជាតំណាងឲ្យលោហិតនៃពួកទុច្ចរិតដែលនឹងត្រូវបានបំផ្លាញចោល នៅពេលសេចក្ដីយុត្តិធម៌ចាក់មកលើពួកគេនៅការយាងមកជាលើកទីពីរ ) ។
សូមអញ្ជើញសិស្សម្នាក់ឲ្យអានគោលលទ្ធិ និង សេចក្ដីសញ្ញា ១៣៣:៥២-៥៣ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម ហើយរកមើលនូវអ្វីដែលពួកសុចរិត នឹងចងចាំ ហើយថ្លែងនៅគ្រានៃការយាងមកជាលើកទីពីរ ។ សូមអញ្ជើញសិស្សឲ្យរៀបរាប់អំពីអ្វីដែលពួកគេរកឃើញ ។
-
តើខគម្ពីរទាំងនេះបង្រៀនអ្វីខ្លះអំពីសេចក្ដីមេត្តាករុណារបស់ព្រះអម្ចាស់ ?
សូមអញ្ជើញសិស្សម្នាក់ឲ្យអានគោលលទ្ធិ និង សេចក្ដីសញ្ញា ១៣៣:៥៤-៥៦ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម ហើយប្រាប់ថានរណានឹងលេចចេញមកជាមួយនឹងព្រះអង្គសង្គ្រោះនៅការយាងមកជាលើកទីពីរ ។
-
តើនរណានឹងលេចចេញមកជាមួយព្រះអង្គសង្គ្រោះនៅការយាងមកជាលើកទីពីរ ? ( ពួកសុចរិតដែលបានរស់នៅពីមុនព្រះយេស៊ូវគ្រីស្ទ និងដែលបានរស់ឡើងវិញហើយនោះ នឹងមកជាមួយទ្រង់នៅក្នុងសិរីល្អរបស់ទ្រង់ ។ បន្ថែមពីលើនោះ ពួកសុចរិតដែលរស់នៅ និងបានស្លាប់ទៅ បន្ទាប់ពីព្រះយេស៊ូវគ្រីស្ទ នឹងត្រូវបានរស់ឡើងវិញ ហើយចេញមកចូលរួមនឹងព្រះអង្គសង្គ្រោះ និងអ្នកទាំងឡាយណាដែលនៅជាមួយទ្រង់ ។ អ្នកអាចនឹងថ្លែងថា ការណ៍នេះរួមមានទាំងសមាជិកគ្រួសារសុចរិតរបស់យើង ដែលបានស្លាប់ទៅផងដែរ ។ ពួកសុចរិត ដែលនៅរស់នៅលើផែនដី នឹង « ត្រូវបានលើកឡើង » ទៅជួបនឹងព្រះអង្គសង្គ្រោះ [សូមមើលថែស្សាឡូនិចទី ១ ៤:១៧,គ. និង ស. ១០៩:៧៥]) ។
គោលលទ្ធិ និង សេចក្ដីសញ្ញា ១៣៣:៥៧-៧៤
ដំណឹងល្អត្រូវបានបញ្ជូនចេញទៅ ដើម្បីរៀបចំផែនដីសម្រាប់ការយាងមកជាលើកទីពីររបស់ព្រះយេស៊ូវគ្រីស្ទ
សូមបែងចែកសិស្សជាដៃគូៗ ។ សូមអញ្ជើញពួកគេឲ្យពិភាក្សាសំណួរខាងក្រោមជាមួយនឹងដៃគូពួកគេ ៖
-
តើអ្នកបានរៀនអ្វីខ្លះចេញមកពីគោលលទ្ធិ និង សេចក្ដីសញ្ញា ១៣៣អំពីការយាងមកជាលើកទីពីររបស់ព្រះអង្គសង្គ្រោះ ? តើអ្នកមានអារម្មណ៍យ៉ាងណា នៅពេលអ្នកគិតអំពីព្រឹត្តការណ៍ទាំងនេះ ?
បន្ទាប់ពីសិស្សបានពិភាក្សាសំណួរទាំងនេះ សូមអញ្ជើញពួកគេឲ្យស្រាវជ្រាវគោលលទ្ធិ និង សេចក្ដីសញ្ញា ១៣៣:៥៧-៦២ជាមួយនឹងដៃគូរបស់ពួកគេ ហើយរកមើលសេចក្ដីពិតទាំងឡាយអំពីមូលហេតុដែលដំណឹងល្អនឹងចេញទៅពីមុនការយាងមកជាលើកទីពីររបស់ព្រះអម្ចាស់ ។ ក្រោយពីមានពេលគ្រប់គ្រាន់ហើយ សូមអញ្ជើញសិស្សពីរបីនាក់ឲ្យរៀបរាប់ពីអ្វីដែលពួកគេបានរៀន ។
សូមថ្លែងទីបន្ទាល់ថា នៅពេលយើងរៀនដំណឹងល្អ ហើយរស់នៅតាម នោះយើងនឹងត្រៀមខ្លួនសម្រាប់ការយាងមកជាលើកទីពីរ ។
-
ស្របតាមខ ៦២តើពរជ័យដ៏ធំបំផុតដែលយើងនឹងទទួលមានអ្វីខ្លះ ? ( បន្ទាប់ពីសិស្សឆ្លើយតប សូមសរសេរសេចក្ដីពិតដូចខាងក្រោមនៅលើក្ដារខៀន ៖អ្នកទាំងឡាយណាដែលប្រែចិត្ត ហើយញែកខ្លួនពួកគេចេញជាបរិសុទ្ធ នឹងទទួលជីវិតដ៏អស់កល្បជានិច្ច ) ។
ដើម្បីជួយសិស្សភ្ជាប់គោលការណ៍នេះជាមួយនឹងគោលការណ៍មួយដែលពួកគេបានប្រាប់ពីមុននេះ សូមសួរសំណួរដូចខាងក្រោម ៖
-
តើគោលការណ៍នៅក្នុងខ ៦២ទាក់ទងទៅនឹងគោលការណ៍ដែលយើងប្រាប់នៅក្នុងគោលលទ្ធិ និង សេចក្ដីសញ្ញា ១៣៣:៤៥ ដែលបានថ្លែងថា « ព្រះអម្ចាស់បានរៀបចំពរជ័យដ៏មហិមាទាំងឡាយសម្រាប់អ្នកទាំងឡាយដែលរង់ចាំទ្រង់យ៉ាងដូចម្ដេច » ?
សូមសង្ខេបគោលលទ្ធិ និង សេចក្ដីសញ្ញា ១៣៣:៦៣-៧៤ដោយពន្យល់ថា នៅក្នុងខគម្ពីរទាំងនេះ ព្រះអម្ចាស់បានប្រាប់អំពីផលវិបាកមួយចំនួនដល់អ្នកទាំងឡាយដែលនឹងពុំប្រែចិត្ត ហើយពុំត្រៀមខ្លួនសម្រាប់ការយាងមកជាលើកទីពីរ ។ ផលវិបាកមួយចំនួនទាំងនេះ រួមមានទាំងការកាត់ចេញពីព្រះអម្ចាស់ និងរាស្ត្រសុចរិតរបស់ទ្រង់ ( សូមមើលគ. និង ស. ១៣៣:៦៣) ហើយ « ត្រូវបានប្រគល់ទៅឯសេចក្ដីងងឹត » ( គ. និង ស. ១៣៣:៧២) មានន័យថា ជាមនុស្សទុច្ចរិតដែលបានស្លាប់នៅក្នុងការយាងមកជាលើកទីពីរ នឹងត្រូវចូលទៅកន្លែងមួយដែលហៅថា ស្ថានឃុំវិញ្ញាណ ឬស្ថាននរក ( សូមមើល សេចក្ដីណែនាំដល់បទគម្ពីរ« ស្ថាននរក »scriptures.lds.org) ។
ដើម្បីបញ្ចប់មេរៀននេះ សូមអញ្ជើញសិស្សឲ្យសរសេរនៅក្នុងសៀវភៅកំណត់ចំណាំក្នុងថ្នាក់ ឬសៀវភៅកំណត់ត្រាការសិក្សាព្រះគម្ពីររបស់ពួកគេ នូវអ្វីដែលពួកគេបានរៀននៅក្នុងគោលលទ្ធិ និង សេចក្ដីសញ្ញា ១៣៣ដែលបានពង្រឹងដល់ការយល់ដឹង និងទីបន្ទាល់របស់ពួកគេ អំពីការយាងមកជាលើកទីពីររបស់ព្រះយេស៊ូវគ្រីស្ទ ។ សូមគិតអំពីការអញ្ជើញសិស្សពីរបីនាក់ឲ្យចែកចាយគំនិតទាំងនេះជាមួយនឹងសិស្សក្នុងថ្នាក់ ។ សូមថ្លែងទីបន្ទាល់អំពីសេចក្ដីពិតដែលអ្នកបានពិភាក្សា ។