មេរៀនទី ៨ ៖ ថ្ងៃទី ២
គោលលទ្ធិ និង សេចក្តីសញ្ញា ៣០-៣២
សេចក្តីផ្តើម
ក្នុងវិវរណៈដែលមានកត់ត្រានៅក្នុង គោលលទ្ធិ និង សេចក្តីសញ្ញា ៣០ ព្រះអម្ចាស់បានប្រទានការណែនាំដល់ ដាវីឌ វិតមើរ ពេត្រុស វីតមើរ ជុញ្ញ័រ និង យ៉ូហាន វិតមើរ ។ ថូម៉ាស ប៊ី ម៉ាស ទទួលបានការហៅឲ្យផ្សាយដំណឹងល្អ ដូចបានកត់ត្រានៅក្នុង គោលលទ្ធិ និង សេចក្តីសញ្ញា ៣១ ។ ក្នុងវិវរណៈដែលមានកត់ត្រានៅក្នុង គោលលទ្ធិ និង សេចក្តីសញ្ញា ៣២ ព្រះអម្ចាស់បានហៅ ប៉ាលី ភី ប្រាត្ត និង សៃបា ភីតើសុន ឲ្យចេញបេសកកម្មផ្សាយដំណឹងល្អទៅកាន់ពួកសាសន៍លេមិន ។ នៅពេលអ្នកសិក្សាកណ្ឌទាំងនេះ សូមកត់ចំណាំអំពីឱវាទ និង ការសន្យាទាំងឡាយ ដែលព្រះអម្ចាស់បានប្រទានដល់អ្នកផ្សព្វផ្សាយសាសនាទាំងនេះ ។
គោលលទ្ធិ និង សេចក្តីសញ្ញា ៣០
ព្រះអម្ចាស់ត្រាស់ហៅ ដាវីឌ វិតមើរ ពេត្រុស វីតមើរ ជុញ្ញ័រ និង យ៉ូហាន វិតមើរ ឲ្យផ្សាយដំណឹងល្អ ។
សូមគិតស្រមៃ ថាតើការទទួលបានការហៅបម្រើព្រះអម្ចាស់ ជាអ្នកផ្សព្វផ្សាយសាសនាពេញម៉ោង មានសភាពបែបណា ? សូមសរសេរអារម្មណ៍ ដែលអ្នកគិតថាអាចមាន នៅពេលទទួលបានការហៅដូចនោះ ៖
ព្រះអម្ចាស់បានត្រាស់ហៅពួកបងប្អូនប្រុស វិតមើរ ទាំងបីនាក់គឺ ដាវីឌ ពេត្រុស ជុញ្ញ័រ និង យ៉ូហាន ឲ្យផ្សាយដំណឹងល្អ ហើយបានប្រទានឱវាទជាក់លាក់ទៅដល់ពួកគាត់រៀងៗខ្លួន ។
សូមអានខគម្ពីរចេញពី គោលលទ្ធិ និង សេចក្តីសញ្ញា ៣០ នៅក្នុងប្រអប់ទីមួយក្នុងតារាងខាងក្រោម រួចស្វែងរកគោលការណ៍នៅក្នុងប្រអប់ទីពីរ ដែលត្រូវបានបង្រៀននៅក្នុងខគម្ពីរទាំងនោះ ។ សូមសរសេរលិខិតនៃសេចក្ដីថ្លែងការណ៍នៅលើបន្ទាត់ក្បែរឈ្មោះ និង សេចក្ដីយោងបទគម្ពីរ ។ ចម្លើយដែលត្រឹមត្រូវគឺមាននៅខាងចុងនៃមេរៀននេះ ។
|
-
សូមជ្រើសរើសគោលការណ៍អក្សរដិតមួយនៅក្នុងតារាងមុននេះ ។ សូមសរសេរនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នកអំពីស្ថានភាពមួយ ដែលអ្នកអាចនឹងជួបប្រទះ ដែលគោលការណ៍នេះអាចមានអត្ថប្រយោជន៍ជាពិសេសសម្រាប់អ្នក ។
គោលលទ្ធិ និង សេចក្ដីសញ្ញា ៣១:១-៨
ព្រះអម្ចាស់បានហៅ ថូម៉ាស ប៊ី ម៉ាស ឲ្យផ្សាយដំណឹងល្អ ហើយជួយស្ថាបនាសាសនាចក្រ
សូមគិតអំពីក្រុមគ្រួសាររបស់អ្នក និង អារម្មណ៍ដែលអ្នកមានចំពោះពួកគេ ។ តើមាននរណាម្នាក់ក្នុងគ្រួសារអ្នក ដែលពុំមែនជាសមាជិកនៃសាសនាចក្រ ឬ បច្ចុប្បន្ននេះពុំបានរស់នៅតាមសេចក្ដីសញ្ញា ដែលពួកគាត់បានធ្វើជាមួយនឹងព្រះអម្ចាស់ដែរឬទេ ? បើអ្នកមាន តើសេចក្ដីសង្ឃឹមអ្វីខ្លះ ដែលអ្នកមានសម្រាប់គាត់ ? នៅក្នុង គោលលទ្ធិ និង សេចក្តីសញ្ញា ៣១ យើងអានអំពីវិវរណៈ ដែលបានណែនាំដល់អ្នកប្រែចិត្តជឿថ្មីគឺ ថូម៉ាស ប៊ី ម៉ាស ។ ផ្នែកមួយចំនួន ប្រាប់អំពីក្រុមគ្រួសាររបស់គាត់ ។ ថូម៉ាស បានរៀបការ ហើយមានកូនតូចៗបីនាក់ កាលវិវរណៈនេះត្រូវបានប្រទានឲ្យ ។ សូមអាន គោលលទ្ធិ និង សេចក្តីសញ្ញា ៣១:១-២ ដោយស្វែងរកការសន្យាទាំងឡាយ ដែលព្រះអម្ចាស់បានប្រទានដល់ ថូម៉ាស អំពីក្រុមគ្រួសាររបស់គាត់ ។
យើងរៀនចេញពីខគម្ពីរទាំងនេះថា តាមរយៈសេចក្ដីស្មោះត្រង់របស់យើង នោះគ្រួសារយើង អាចនឹងត្រូវបានប្រទានពរឲ្យជឿ ហើយស្គាល់សេចក្ដីពិត ។ សូមពិចារណាអំពីរបៀប ដែលគោលការណ៍នេះ អាចមានអត្ថប្រយោជន៍សម្រាប់អ្នក បើអ្នកមានសមាជិកគ្រួសារ ដែលមិនមែនជាសមាជិកសាសនាចក្រ ឬ មិនបន្តរស់នៅតាមសេចក្ដីសញ្ញារបស់ខ្លួន ។
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមឆ្លើយសំណួរខាងក្រោមនេះ ៖
-
តើបុគ្គលម្នាក់ៗអាចត្រូវបានប្រទានពរតាមរយៈសេចក្ដីស្មោះត្រង់នៃសមាជិកគ្រួសារគេ តាមវិធីណាខ្លះ ?
-
តើអ្នកធ្លាប់បានឃើញគំរូដូចម្ដេចខ្លះ ?
-
សូមអាន គោលលទ្ធិ និង សេចក្តីសញ្ញា ៣១:៣–៤ រួចស្វែងរកអ្វីដែលព្រះអម្ចាស់បានត្រាស់ហៅឲ្យ ថូម៉ាស ប៊ី ម៉ាស ធ្វើ ។
វាអាចពុំមែនជាការងាយស្រួលនោះទេចំពោះ ថូម៉ាស ដើម្បីចាកចេញពីក្រុមគ្រួសារគាត់ទៅផ្សាយដំណឹងល្អ ក៏ពុំមែនជាការងាយស្រួលនោះទេ ចំពោះអ្នកផ្សព្វផ្សាយសាសនានាពេលបច្ចុប្បន្ននេះដែរ ។ សូមអានសេចក្ដីថ្លែងការណ៍ខាងក្រោមនេះ រួចគូសចំណាំការសន្យា ដែលប្រធាន ហ្គរដុន ប៊ី ហ៊ិងគ្លី បានធ្វើជាមួយអ្នកទាំងឡាយណាដែលបម្រើព្រះអម្ចាស់ក្នុងនាមជាអ្នកផ្សព្វផ្សាយសាសនា ៖ « អ្នកនឹងផ្ដល់ពរដល់ជីវិតមនុស្សដែលអ្នកបង្រៀន ថែមទាំងសណ្ដានក្រោយពួកគេទៀតផង ។ អ្នកនឹងផ្ដល់ពរដល់ជីវិតផ្ទាល់ខ្លួនរបស់អ្នក ។ អ្នកនឹងប្រទានពរដល់ជីវិតនៃគ្រួសារអ្នក ដែលនឹងគាំទ្រអ្នក ហើយអធិស្ឋានសម្រាប់អ្នក » (Of Missions, Temples, and Stewardship, » Ensignខែ វិច្ឆិកា ឆ្នាំ ១៩៩៥, ៥២ ) ។
សូមអាន គោលលទ្ធិ និង សេចក្តីសញ្ញា ៣១:៥–៨ រួចស្វែងរកពរជ័យទាំងឡាយ ដែលនឹងកើតមានដល់មនុស្សដែល ថូម៉ាស ប៊ី ម៉ាស នឹងបង្រៀនក្នុងនាមជាអ្នកផ្សព្វផ្សាយសាសនា ។ សូមស្វែងរកផងដែរនូវ ពរជ័យទាំងឡាយ ដែលនឹងកើតមានចំពោះ ថូម៉ាស និង ក្រុមគ្រួសាររបស់គាត់ ។ អ្នកអាចនឹងចង់គូសចំណាំនូវអ្វីដែលអ្នករកឃើញ ។
គោលលទ្ធិ និង សេចក្ដីសញ្ញា ៣១:៩-១៣
ព្រះយេស៊ូវគ្រីស្ទ ប្រទានឱវាទដោយផ្ទាល់ទៅដល់ ថូម៉ាស ប៊ី ម៉ាស
នៅក្នុង គោលលទ្ធិ និង សេចក្ដីសញ្ញា ៣១:៩-១៣ មាននូវឱវាទ ដើម្បីជួយដល់ ថូម៉ាស ប៊ី ម៉ាស នៅក្នុងបេសកកម្ម និង ជីវិតផ្ទាល់ខ្លួនរបស់គាត់ ។
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមស្វែងរកចំណុចមួយនៃឱវាទ ដែលព្រះអម្ចាស់បានប្រទានដល់ ថូម៉ាស ប៊ី ម៉ាស ដែលអ្នកគិតថាមានសារៈសំខាន់ចំពោះអ្នក ដើម្បីធ្វើតាមនៅក្នុងជីវិត រួចសូមឆ្លើយសំណួរដូចតទៅនេះ ៖ តើអ្នកគិតថា ហេតុអ្វីបានជាឱវាទនេះមានសារៈសំខាន់ចំពោះអ្នក ហើយតើអ្នកអាចទទួលបានផលប្រយោជន៍ពីការធ្វើតាមឱវាទនោះយ៉ាងដូចម្ដេច ?
សូមអាន គោលលទ្ធិ និង សេចក្តីសញ្ញា ៣១:១៣ ម្ដងទៀត រួចស្វែងរកការសន្យាដែលបានប្រទានដល់ ថូម៉ាស ប៊ី ម៉ាស បើគាត់ស្មោះត្រង់ក្នុងការគោរពប្រតិបត្តិតាមឱវាទ ដែលព្រះអម្ចាស់បានប្រទានដល់គាត់ ។
ដោយប្រើពាក្យ បើ និង នោះ សូមសរសេរការសន្យានោះក្នុងទម្រង់ជាសេចក្ដីថ្លែងការណ៍នៃគោលលទ្ធិមួយ ។
បើ នោះ ។
-
សូមគូសប្រអប់ពីរនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ។ សូមសរសេរនៅក្នុងប្រអប់ទីមួយថា ទម្លាប់ដ៏សុចរិត និង ក្នុងប្រអប់មួយទៀតថា ជម្រើសដ៏សុចរិត ។ សូមរាយជាបញ្ជីអនុវត្តន៍ទាំងឡាយ ដែលអ្នកបានអនុវត្តតាម ឬ ត្រូវអនុវត្តតាម និង ជម្រើសនានា ដែលអ្នកបានធ្វើ ឬ ត្រូវធ្វើនាពេលឥឡូវនេះ និង ក្នុងពេលអនាគត ដែលនឹងជួយអ្នកឲ្យ « មានចិត្តស្មោះត្រង់រហូតដល់ទីបំផុត » ( គ. និង ស. ៣១:១៣ ) ។
គោលលទ្ធិ និង សេចក្តីសញ្ញា ៣២
ព្រះអម្ចាស់ត្រាស់ហៅ ប៉ាលី ភី ប្រាត្ត និង សៃបា ភីតើសុន ឲ្យចេញបេសកកម្មផ្សាយដំណឹងល្អទៅកាន់ពួកសាសន៍លេមិន
វិវរណៈដែលអ្នកបានសិក្សានៅក្នុង គោលលទ្ធិ និង សេចក្តីសញ្ញា ៣០–៣១ និង វិវរណៈទាំងឡាយដែលអ្នកនឹងសិក្សានៅក្នុង គោលលទ្ធិ និង សេចក្ដីសញ្ញា ៣២–៣៤ គឺអំពីការហៅបម្រើបេសកកម្ម កិច្ចការផ្សព្វផ្សាយសាសនា និង ការត្រៀមខ្លួនបង្រៀនដំណឹងល្អនៃព្រះយេស៊ូវគ្រីស្ទដែលបានស្ដារឡើងវិញ ។ ក្នុងខែ តុលា ឆ្នាំ ២០១២ ប្រធាន ថូម៉ាស អេស ម៉នសុន បានចេញសេចក្ដីប្រកាសស្ដីពី អាយុចេញបម្រើផ្សព្វផ្សាយសាសនាដោយផ្អែកទៅលើ ការគោរពប្រតិបត្តិ សេចក្ដីស្មោះត្រង់ និង ភាពចាស់ចិត្តចាស់គំនិតនៃជំនាន់ដែលកំពុងពេញវ័យ ។
« ខ្ញុំរីករាយដើម្បីប្រកាសពីប្រសិទ្ធិភាពនោះភ្លាមៗថា យុវជនដែលស័ក្ដិសម និង មានសមត្ថភាពទាំងអស់ដែលបានរៀនចប់វិទ្យាល័យ ឬ សាលាប្រហាក់ប្រហែលគ្នា ដោយមិនគិតពីទីកន្លែងដែលពួកគេរស់នៅ នឹងមានជម្រើសឲ្យបម្រើបេសកកម្មចាប់តាំងពីអាយុ ១៨ ជំនួសឲ្យអាយុ ១៩ ឆ្នាំវិញ ។ ខ្ញុំមិនមែនណែនាំឲ្យ យុវជនទាំងអស់នឹង—ឬ គួរតែ—បម្រើនៅអាយុក្មេងបែបនេះនោះទេ ។ ប៉ុន្ដែ ដោយផ្អែកលើកាលៈទេសៈរបស់បុគ្គលម្នាក់ៗ ក៏ដូចជាការសម្រេចចិត្តដោយថ្នាក់ដឹកនាំបព្វជិតភាពនានា ជម្រើសនេះបានអនុវត្តហើយ ។
« នៅពេលយើងបានសញ្ជឹងគិតដោយការអធិស្ឋានពីអាយុ ដែលយុវជនអាចចាប់ផ្ដើមការបម្រើបេសកកម្មរបស់ពួកគេ នោះយើងក៏បានពិចារណាពីអាយុ ដែលយុវនារីអាចបម្រើផងដែរ ។ ថ្ងៃនេះ ខ្ញុំរីករាយដើម្បីប្រកាសថា យុវនារីដែលមានសមត្ថភាព មានភាពស័ក្ដិសម ដែលមានបំណងចង់បម្រើ អាចលើកទឹកចិត្តឲ្យបម្រើបេសកកម្មចាប់ពីអាយុ ១៩ ជំនួសឲ្យអាយុ ២១ ឆ្នាំវិញ ។
« យើងសូមបញ្ជាក់ថា កិច្ចការផ្សព្វផ្សាយសាសនា គឺជាករណីយកិច្ចបព្វជិតភាពមួយ—ហើយយើងសូមលើកទឹកចិត្តដល់យុវជនទាំងអស់ ដែលមានភាពស័ក្ដិសម និង ដែលមានសមត្ថភាពខាងរាងកាយ និង ខាងស្មារតី ឲ្យឆ្លើយតបទៅនឹងការហៅបម្រើនេះ ។ យុវនារីជាច្រើនក៏បម្រើដែរ ប៉ុន្ដែពួកគេមិននៅក្រោមការបញ្ជាឲ្យបម្រើដូចគ្នានឹងយុវជននោះទេ ។ ទោះយ៉ាងណា យើងសូមអះអាងនឹងយុវនារីទាំងឡាយក្នុងសាសនាចក្រថា ពួកគេនឹងចូលរួមចំណែកយ៉ាងមានតម្លៃក្នុងនាមជាអ្នកផ្សព្វផ្សាយសាសនា ហើយយើងសូមស្វាគមន៍ចំពោះការបម្រើរបស់ពួកគេ ។ ( Welcome to Conference,” Ensignឬ លីអាហូណាខែ វិច្ឆិកា ឆ្នាំ ២០១២ ទំព័រ ៤–៥ ) ។
នៅពេលអ្នកបន្តសិក្សាវិវរណៈទាំងនេះអំពីកិច្ចការផ្សព្វផ្សាយសាសនា សូមគិតអំពីភាពស្រដៀងគ្នា និង ភាពខុសគ្នាក្នុងការរៀបចំខ្លួន និង កិច្ចការនៃពួកអ្នកផ្សព្វផ្សាយសាសនាពីជំនាន់ដំបូង និង ពួកអ្នកផ្សព្វផ្សាយសាសនាទូទាំងពិភពលោក ។
ទីតាំង ភូមិហ្វាយែត រដ្ឋនូវ យ៉ោក និង អ៊ិនឌីប៉ែនដែនស៍ រដ្ឋ មិសសួរី នៅលើផែនទីដែលភ្ជាប់មកជាមួយ ( សូមមើលផងដែរ Church history map ៦, “The Westward Movement of the Church,” នៅក្នុងព្រះគម្ពីររបស់អ្នក ឬ LDS.org ) ។ តើអ្នកគិតថា ទីតាំងទាំងនេះមានចម្ងាយឆ្ងាយពីគ្នាប៉ុន្មាន ?
ព្រះអម្ចាស់បានត្រាស់ហៅ អូលីវើរ ខៅឌើរី និង ពេត្រុស វីតមើរ ជុញ្ញ័រ ឲ្យធ្វើដំណើរពី រដ្ឋ នូវ យ៉ោក ទៅ រដ្ឋ មិសសួរី ដើម្បីផ្សាយដំណឹងល្អទៅកាន់ពួកសាសន៍លេមិន នៅព្រំដែនប៉ែកខាងលិច រដ្ឋ មិសសួរី ( សូមមើល គ. និង ស. ២៨:៨; ៣០:៥ ) ។ បេសកកម្មទៅកាន់ពួកសាសន៍លេមិននេះ បានធ្វើឲ្យមានការរំភើបដ៏ធំក្នុងចំណោមពួកអែលឌើរនៃសាសនាចក្រ ហើយមនុស្សមួយចំនួនបានប្រាថ្នាចង់ដឹង ថាតើមានពួកអែលឌើរណាទៀត ដែលអាចនឹងត្រូវបានបញ្ជូនឲ្យចេញបេសកកម្មជាមួយ អូលីវើរ និង ពេត្រុស ។ វិវរណៈនៅក្នុង គោលលទ្ធិ និង សេចក្តីសញ្ញា ៣២ គឺជាចម្លើយរបស់ព្រះអម្ចាស់ ។
ប៉ាលី ភី ប្រាត្ត បានទទួលពិធីបុណ្យជ្រមុជទឹកក្នុងខែ កញ្ញា ឆ្នាំ ១៨៣០ គឺមួយខែគត់ ពីមុនវិវរណៈនេះត្រូវបានប្រទានឲ្យ ។ គាត់បានស្វែងយល់អំពីព្រះគម្ពីរមរមន កាលកំពុងធ្វើដំណើរទៅកាន់រដ្ឋ នូវ យ៉ោក អំឡុងពេលរដូវក្ដៅឆ្នាំ ១៨៣០ ។ ក្រោយមក គាត់បានសរសេរលិខិតឆ្លើយតបរបស់គាត់ បន្ទាប់ពីគាត់ទទួលបានព្រះគម្ពីរមរមនមួយក្បាលថា ៖
« ខ្ញុំបានបើកមើលវាដោយមានចិត្តចង់ដឹងជាខ្លាំង ហើយបានអានទំព័រចំណងជើងនៃសៀវភៅនេះ ។ ក្រោយមក ខ្ញុំបានអានទីបន្ទាល់របស់សាក្សីមួយចំនួនដែលទាក់ទងទៅនឹងរបៀបដែលវាត្រូវបានចងក្រងឡើង និង បកប្រែ ។ បន្ទាប់មក ខ្ញុំបានចាប់ផ្ដើមអានមាតិកាមួយវគ្គម្ដងៗ ។ ខ្ញុំបានអានពេញមួយថ្ងៃ ដែលការទទួលទានអាហាររបស់ខ្ញុំពុំសូវសំខាន់ទៀតឡើយ ខ្ញុំពុំចង់បរិភោគអាហារទេ កាលរាត្រីចូលមកដល់ ការសម្រាន្តពុំសូវសំខាន់ទេ ដ្បិតខ្ញុំចង់អានជាងការសម្រាន្តទៅទៀត ។
« នៅពេលខ្ញុំអាន ព្រះវិញ្ញាណនៃព្រះអម្ចាស់សណ្ឋិតនៅលើខ្ញុំ ហើយខ្ញុំដឹង ហើយបានយល់ថា ព្រះគម្ពីរនេះគឺជាការពិត ដែលច្បាស់ ហើយជាក់ស្ដែង ដូចជាមនុស្សម្នាក់ដែលយល់ ហើយដឹងថា គាត់ពិតជាមានជីវិតដូច្នោះដែរ » ( Autobiography of Parley P. Pratt, បានបោះពុម្ពដោយ ប៉ាលី ភី ប្រាត្ត [ ១៩៣៨ ] ទំព័រ ៣៧ ) ។
ប៉ាលី បានធ្វើដំណើរទៅកាន់ ភូមិប៉ាលម៉ៃរ៉ា រដ្ឋនូវយ៉ោក ជាកន្លែងដែលគាត់បានរៀនបន្ថែមអំពី ការស្ដារឡើងវិញនៃដំណឹងល្អពី ហៃរុម ស៊្មីធ ។ មិនយូរប៉ុន្មាន ហៃរុម និង ប៉ាលី បានធ្វើដំណើរទៅកាន់ ភូមិហ្វាយែត ជាកន្លែងដែល ប៉ាលី បានចូលសាសនាចក្រ ហើយត្រូវបានតែងតាំងជាអែលឌើរមួយរូបដោយ អូលីវើរ ខៅឌើរី ។
យើងពុំសូវដឹងច្រើនអំពីការប្រែចិត្តជឿរបស់ សៃបា ភីតើសុន នោះទេ ក្រៅពីគាត់បានទទួលពិធីបុណ្យជ្រមុជទឹកដោយ អូលីវើរ ខៅឌើរី ក្នុងខែ មេសា ឆ្នាំ ១៨៣០ ហើយបានតែងតាំងជាអែលឌើរមួយរូបក្នុងខែ មិថុនា ។
សូមអាន គោលលទ្ធិ និង សេចក្តីសញ្ញា ៣២:១–៥ ដើម្បីស្វែងយល់អំពីការណ៍ ដែលព្រះអម្ចាស់បានត្រាស់ហៅ ប៉ាលី និង សៃបា ឲ្យធ្វើ ក៏ដូចជាការណ៍ដែលព្រះអម្ចាស់បានសន្យាដល់ពួកគាត់ ។
-
សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
-
តើការសន្យានេះដែលមាននៅក្នុង គោលលទ្ធិ និង សេចក្តីសញ្ញា ៣២:៣ មានភាពស្រដៀងគ្នាទៅនឹងការសន្យា ដែលព្រះអម្ចាស់បានប្រទានដល់ យ៉ូហាន វិតមើរ នៅក្នុង គោលលទ្ធិ និង សេចក្ដីសញ្ញា ៣០:១១ និង ដល់ ថូម៉ាស ប៊ី ម៉ាស នៅក្នុង គោលលទ្ធិ និង សេចក្តីសញ្ញា ៣១:១៣ យ៉ាងដូចម្ដេច ?
-
តើការសន្យាទាំងនេះ បង្រៀនអ្នកអំពីអារម្មណ៍របស់ព្រះអម្ចាស់ ចំពោះអ្នកដែលបម្រើទ្រង់ ក្នុងនាមជាអ្នកផ្សព្វផ្សាយសាសនាយ៉ាងដូចម្ដេច ?
-
អំឡុងពេលក្នុងរដូវរងានាឆ្នាំ ១៨៣០–៣១ អូលីវើរ ខៅឌើរី ពេត្រុស វីតមើរ ជុញ្ញ័រ ប៉ាលី ភី ប្រាត្ត និង សៃបា ភីតើសុន បានធ្វើដំណើរពីភូមិហ្វាយែត រដ្ឋនូវ យ៉ោក ទៅកាន់ ភូមិអ៊ិនឌីប៉ែនដែនស៍ រដ្ឋមិសសួរី ក្នុងចម្ងាយប្រមាណ ២,៤០០ គីឡូម៉ែត ដែលភាគច្រើនធ្វើដំណើរដោយថ្មើរជើង ។ ពួកគាត់បានតស៊ូដើរកាត់ព្រិលកម្រាស់ក្រាស់ៗ ភាពត្រជាក់ខ្លាំង ខ្យល់បោកបក់ និង ការនឿយហត់ ដែលការរស់នៅដោយបរិភោគនំប៉័ងកកធ្វើពីពោត និងសាច់ជ្រូកឆៅជាចម្បង ។
ទោះជាមានភាពលំបាកទាំងនេះក្ដី ក៏ពួកអ្នកផ្សព្វផ្សាយសាសនាទាំងនេះ បានទទួលជោគជ័យក្នុងការណែនាំដំណឹងល្អទៅកាន់ពួកកុលសម្ព័ន្ធអាមេរិកាំងជនជាតិដើមនៅ នូវ យ៉ោក អូហៃអូ និង មិសសួរី ដែរ ។ ពួកគាត់ក៏បានផ្សាយដំណឹងល្អនៅ ខឺតឡង់ រដ្ឋអូហៃអូ ទៅដល់ក្រុមជំនុំនៃប្រជាជន ដែលកំពុងស្វែងរកការស្ដារឡើងវិញនៃគ្រីស្ទចក្រសញ្ញាថ្មី ។ ប្រជាជនទាំងនោះភាគច្រើន បានចូលសាសនាចក្រ ។ ម្នាក់ក្នុងចំណោមអ្នកប្រែចិត្តជឿទាំងនោះមកពី អូហៃអូ ឈ្មោះ ហ្វ្រែឌើរិក ជី វិលលាម្ស បានរួមដំណើរជាមួយពួកអ្នកផ្សព្វផ្សាយសាសនាក្នុងការធ្វើដំណើររបស់ពួកគាត់ទៅកាន់ រដ្ឋមិសសួរី ។ ព្រះអម្ចាស់បានបំពេញការសន្យារបស់ទ្រង់ថា ទ្រង់នឹងគង់នៅជាមួយអ្នកផ្សព្វផ្សាយសាសនាទាំងនេះ ហើយថាគ្មានអ្វី ដែលនឹងយកឈ្នះលើពួកគាត់នោះទេ ។
-
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា គោលលទ្ធិ និង សេចក្តីសញ្ញា ៣០-៣២ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែម ដែលខ្ញុំចង់ចែកចាយជាមួយគ្រូរបស់ខ្ញុំ ៖