មេរៀនទី ២៤ ៖ ថ្ងៃទី ២
គោលលទ្ធិ និង សេចក្តីសញ្ញា ១១០
បុព្វកថា
នៅថ្ងៃអាទិត្យ ទី ៣ ខែ មេសា ឆ្នាំ ១៨៣៦ ការប្រជុំសាក្រាម៉ង់មួយត្រូវបានប្រារព្ធធ្វើនៅក្នុងព្រះវិហារបរិសុទ្ធទីក្រុង ខឺតឡង់ ។ នៅពេលកំពុងប្រជុំនោះព្យាការី យ៉ូសែប ស៊្មីធ និង អូលីវើរ ខៅឌើរី បានដកខ្លួនចេញពីក្រុមជំនុំដើម្បីទៅអធិស្ឋាន ។ ក្រោយពីបានក្រោកឈរឡើងពីអធិស្ឋាន ព្រះយេស៊ូវគ្រីស្ទបានបង្ហាញអង្គទ្រង់ទៅដល់ពួកលោក ហើយបានទទួលយកព្រះវិហារបរិសុទ្ធដែលបានឧទ្ទិសឆ្លងថ្មីនោះ ។ បន្ទាប់មក ម៉ូសេ អេលីយ៉ាស់ និង អេលីយ៉ា បានបង្ហាញខ្លួនដល់ពួកលោក ហើយកូនសោបព្វជិតភាពត្រូវបានស្ដារឡើងវិញ. គោលលទ្ធិ និង សេចក្តីសញ្ញា ១១០ គឺជាដំណើររឿងនៃការនិមិត្តទាំងនេះ ។
គោលលទ្ធិ និង សេចក្តីសញ្ញា ១១០:១-១០
ព្រះអម្ចាស់បង្ហាញអង្គទ្រង់ ហើយទទួលយកព្រះវិហារបរិសុទ្ធទីក្រុង ខឺតឡង់
តើអ្នកធ្លាប់កត់ចំណាំឃ្លា ដែលបានឆ្លាក់នៅផ្នែកខាងក្រៅនៃគ្រប់ព្រះវិហារបរិសុទ្ធដែរឬទេ ? វាឆ្លាក់ថា « បរិសុទ្ធដល់ព្រះអម្ចាស់—ព្រះដំណាក់របស់ព្រះអម្ចាស់ » ។
ដោយសារតែព្រះវិហារបរិសុទ្ធគឺជាព្រះដំណាក់របស់ព្រះអម្ចាស់ តើអ្នកអាចគិតអំពីគ្រាមួយដែលព្រះអម្ចាស់បានយាងមកម្ដងនោះដែរឬទេ ?
ការយាងមកម្ដងនោះបានកើតឡើង នៅមិនយូរប៉ុន្មានបន្ទាប់ពី ការឧទ្ទិសឆ្លងព្រះវិហារបរិសុទ្ធទីក្រុង ខឺតឡង់ ។ សូមអានសេចក្ដីណែនាំអំពីកណ្ឌនៃ គោលលទ្ធិ និង សេចក្តីសញ្ញា ១១០ដោយស្វែងរកថាតើនរណាខ្លះ ដែលមានវត្តមាននៅទីនោះ និង អ្វីខ្លះដែលពួកលោកបានធ្វើពីមុនឆ្លងកាត់បទពិសោធន៍បែបនេះ ។
សូមអានដំណើររឿងរបស់ព្យាការី យ៉ូសែប ស៊្មីធ អំពីការនិមិត្តនេះនៅក្នុង គោលលទ្ធិ និង សេចក្តីសញ្ញា ១១០:១–៣ ។ សូមសាកល្បងគិតស្រមៃអំពីអ្វីដែលបានកើតឡើង និង ស្រមៃថាតើអ្នកអាចនឹងមានអារម្មណ៍ដូចម្ដេចបើសិនជាអ្នកមានវត្តមាននៅទីនោះ ។ បន្ទាប់មក សូមអាន គោលលទ្ធិ និង សេចក្តីសញ្ញា ១១០:៤–៥រួចស្វែងរកអ្វីដែលព្រះអង្គសង្គ្រោះ បានមានព្រះបន្ទូលទៅកាន់ យ៉ូសែប ស៊្មីធ និង អូលីវើរ ខៅឌើរី ។ អ្នកអាចនឹងចង់គូសចំណាំឃ្លាទាំងឡាយ ដែលមានអត្ថន័យចំពោះអ្នក ។
-
សូមសរសេរនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នកអំពីអ្វីដែលមានអត្ថន័យចំពោះអ្នកនៅក្នុង គោលលទ្ធិ និង សេចក្តីសញ្ញា ១១០:៤–៥ រួចពន្យល់អំពីមូលហេតុ ។
គោលលទ្ធិ និង សេចក្តីសញ្ញា ១១០:៥ មាននូវសេចក្ដីណែនាំពីព្រះអម្ចាស់ចំពោះ យ៉ូសែប និង អូលីវើរ ដើម្បីឲ្យពួកលោកងើបមុខឡើង ហើយអរសប្បាយរីករាយចុះ ។ សូមអាន គោលលទ្ធិ និង សេចក្តីសញ្ញា ១១០:៦–១០រួចស្វែងរកមូលហេតុដែល យ៉ូសែប និង អូលីវើរ ថែមទាំងពួកបរិសុទ្ធ ត្រូវអរសប្បាយរីករាយ ។ សូមគិតពីការគូសចំណាំអ្វីដែលអ្នករកឃើញ ។
មូលហេតុមួយដែលពួកបរិសុទ្ធត្រូវអរសប្បាយរីករាយ មាននៅក្នុង ខទី ៧–៨ ។ ខគម្ពីរទាំងនេះបង្រៀនអំពីគោលការណ៍ដូចតទៅ ៖ បើសិនជាយើងគោរពប្រតិបត្តិតាមព្រះបញ្ញត្តិ ហើយរក្សាព្រះដំណាក់ទ្រង់ឲ្យបានបរិសុទ្ធ នោះទ្រង់នឹងសម្ដែងអង្គទ្រង់ឲ្យយើងឃើញនៅក្នុងព្រះវិហារបរិសុទ្ធរបស់ទ្រង់ ។
-
បើសិនជាអ្នកជាធ្លាប់មានឱកាសទៅ ឬ ចូលក្នុងព្រះវិហារបរិសុទ្ធ សូមសរសេរនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នកអំពីគ្រាដែលអ្នកបានមានអារម្មណ៍ថានៅក្បែរព្រះអម្ចាស់នៅទីនោះ ។ បើសិនជាអ្នកពុំទាន់មានឱកាសទេនោះ សូមសរសេរអំពីអារម្មណ៍ដែលអ្នកអាចនឹងមាននៅទីនោះ ។ បន្ទាប់មកសូមឆ្លើយសំណួរខាងក្រោមនេះ ៖
-
តើព្រះអម្ចាស់អាចសម្ដែងអង្គទ្រង់ ទៅកាន់មនុស្សនៅក្នុងព្រះវិហារបរិសុទ្ធបានយ៉ាងដូចម្ដេច ? ( ពាក្យ សម្ដែង មានន័យថា បង្ហាញ ឬ ធ្វើឲ្យគេដឹង ដូចបានពិភាក្សានៅក្នុងមេរៀននៃ គោលលទ្ធិ និង សេចក្តីសញ្ញា ១០៩ ) ។
-
តើយើងអាចរក្សាព្រះដំណាក់របស់ព្រះអម្ចាស់ ឲ្យមានភាពបរិសុទ្ធ និង ស្អាតស្អំបានយ៉ាងដូចម្ដេច ?
-
តើអ្នកគិតថា ហេតុអ្វីបានជាព្រះអម្ចាស់មានព្រះទ័យតម្រូវឲ្យយើងគោរពប្រតិបត្តិ និង ស្អាតស្អំ ពីមុនទ្រង់នឹងសម្ដែងអង្គទ្រង់ឲ្យយើងឃើញនៅក្នុងព្រះវិហារបរិសុទ្ធ ?
-
សូមរំឭក គោលលទ្ធិ និង សេចក្តីសញ្ញា ១១០:៩–១០រួចស្វែងរកថាតើនរណាដែលនឹងមានពរ តាមរយៈការស្ដារពរជ័យនៃព្រះវិហារបរិសុទ្ធឡើងវិញ ។
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមឆ្លើយសំណួរខាងក្រោមនេះ ៖
-
តើពិភពលោកមានពរតាមរយៈព្រះវិហារបរិសុទ្ធ និង កិច្ចការនៃសេចក្ដីសង្គ្រោះសម្រាប់មនុស្សរស់ផង និង មនុស្សដែលបានអស់ជីវិតទៅហើយផងយ៉ាងដូចម្ដេច ?
-
តើព្រះវិហារបរិសុទ្ធ បានប្រទានពរជ័យដល់ជីវិតអ្នកយ៉ាងដូចម្ដេចខ្លះ ?
-
គោលលទ្ធិ និង សេចក្តីសញ្ញា ១១០:១១-១៦
ម៉ូសេ អេលីយ៉ាស និង អេលីយ៉ា បង្ហាញខ្លួន ហើយកូនសោបព្វជិតភាពត្រូវបានស្ដារឡើងវិញដល់ យ៉ូសែប ស៊្មីធ និង អូលីវើរ ខៅឌើរី
សូមមើលនៅក្នុង គោលលទ្ធិ និង សេចក្តីសញ្ញា ១១០:១១–១៣ ស្វែងរកថាតើនរណាដែលបានបង្ហាញខ្លួនដល់ព្យាការី យ៉ូសែប ស៊្មីធ និង អូលីវើរ ខៅឌើរី បន្ទាប់ពីបានឃើញការនិមិត្តនៃព្រះអម្ចាស់ ។ អ្នកអាចចង់គូសចំណាំ ឈ្មោះទាំងនេះ ។
ម៉ូសេ
អេលីយ៉ា
តើអ្នកស្គាល់ថាម៉ូសេ និង អេលីយ៉ាគឺជានរណា និង កិច្ចការដ៏អស្ចារ្យៗមួយចំនួន ដែលពួកលោកបានធ្វើ កាលពួកលោកបានរស់នៅលើផែនដីនេះដែរឬទេ ? ដើម្បីរៀនបន្ថែមអំពីព្យាការីព្រះគម្ពីរសញ្ញាចាស់ទាំងពីររូបនេះ សូមស្វែងរកឈ្មោះរបស់ពួកលោកនៅក្នុង Bible Dictionary ឬ សេចក្ដីណែនាំដល់បទគម្ពីរទាំងឡាយ ។
អេលីយ៉ាសអាចជាព្យាការីមួយរូប ដែលបានរស់នៅជំនាន់របស់អ័ប្រាហាំ ។ លើសពីឈ្មោះទៅទៀត អេលីយ៉ាស គឺជាងារមួយដែលមានន័យថា អ្នកនាំមុខ ឬ អ្នកស្ដារឡើងវិញ ។ ( សូមមើល សេចក្ដីណែនាំដល់បទគម្ពីរទាំងឡាយ អេលីយ៉ាស »scriptures.lds.org; Bible Dictionary, “Elias” » ) ។
សារទូតទាំងបីរូបដែលបានបង្ហាញខ្លួននៅក្នុងព្រះវិហារបរិសុទ្ធទីក្រុង ខឺតឡង់ បានប្រទានកូនសោបព្វជិតភាពទៅដល់ យ៉ូសែប ស៊្មីធ និង អូលីវើរ ខៅឌើរី ។
-
សូមចម្លងតារាងខាងក្រោមនេះ ចូលទៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ។ បន្ទាប់មក សូមសិក្សាវគ្គបទគម្ពីរដែលមានសរសេរពីក្រោមឈ្មោះព្យាការីម្នាក់ៗ រួចសរសេរអំពីអ្វីដែលពួកលោកម្នាក់ៗបានស្ដារឡើងវិញ ។
|
ម៉ូសេ ( គ. និង ស. ១១០:១១ ) |
អេលីយ៉ាស ( គ. និង ស. ១១០:១២ ) |
អេលីយ៉ា |
|---|---|---|
ព័ត៌មានខាងក្រោមនេះ អាចជួយអ្នកយល់អំពីកូនសោ ឬ សិទ្ធិអំណាចដែលអ្នកឃើញមាននៅក្នុង គោលលទ្ធិ និង សេចក្តីសញ្ញា ១១០:១១–១៦ ។
« កូនសោនៃការប្រមូលរាស្ត្រអ៊ីស្រាអែល »
ព្រះអម្ចាស់បានប្រទានឈ្មោះ អ៊ីស្រាអែល ទៅដល់ យ៉ាកុប ដែលជាកូនប្រុសរបស់ អ៊ីសាក និង ជាចៅប្រុសរបស់ អ័ប្រាហាំ ( សូមមើល លោកុប្បត្តិ ៣២:២៨ ) ។ ពូជអំបូររបស់យ៉ាកុប ដែលត្រូវបានស្គាល់ថាជា អាណាចក្រអ៊ីស្រាអែលនោះ គឺជារាស្ត្រនៃសេចក្ដីសញ្ញារបស់ព្រះ ។ អស់រយៈពេលជាយូរយារក្រោយមក រាស្ត្រអ៊ីស្រាអែល និង ពូជអំបូររបស់ពួកគេបានខ្ចាត់ខ្ចាយពាសពេញផែនដី ដោយសារតែភាពទុច្ចរិតរបស់ខ្លួន ។ ព្រះអម្ចាស់បានសន្យាថា នឹងប្រមូលរាស្ត្រនៃសេចក្ដីសញ្ញារបស់ទ្រង់ ( សូមមើល នីហ្វៃទី១ ១៥:១៣–១៤; នីហ្វៃទី៣ ៥:២៤; ១៦:៥; ២៩:១, ៣ ) ។ ពូជអំបូររបស់យ៉ាកុប និង រាស្ត្រដទៃទៀតត្រូវបានប្រមូលទៅកាន់អាណាចក្ររបស់ព្រះអម្ចាស់តាមរយៈកិច្ចការផ្សព្វផ្សាយសាសនា ។ កូនសោបព្វជិតភាពដែលម៉ូសេ បានស្ដារឡើងវិញនោះ បានពង្រីកឡើងជាកិច្ចការផ្សព្វផ្សាយសាសនានៅក្នុងសាសនាចក្រនៅពាសពេញផ្ទៃផែនដី ។
អែលឌើរ រ័សុល អិម ណិលសុន ក្នុងកូរ៉ុមនៃពួកសាវកដប់ពីរនាក់បានពន្យល់ ៖ « កិច្ចការផ្សព្វផ្សាយសាសនាគឺចាំបាច់ ក្នុងការប្រមូលពួកអ៊ីស្រាអែល ។… នៅក្នុងប្រទេសជាតិជាច្រើន អ្នកផ្សព្វផ្សាយសាសនារបស់យើងបានស្វែងរកកូនចៅនៃសាសន៏អ៊ីស្រាអែលដែលបានបែកខ្ញែក » (The Gathering of Scattered Israel » Ensign ឬ លីអាហូណា ខែ វិច្ឆិកា ឆ្នាំ ២០០៦ ទំព័រ ៨១ ) ។
ប្រធាន ស្ពែនស៊ើរ ដបុលយូ ឃឹមបឹល បានបង្រៀន ៖ « ការប្រមូលផ្តុំសាសន៍អ៊ីស្រាអែលរួមមាន ការចូលរួមក្នុងសាសនាចក្រដ៏ពិត និង ការស្គាល់ព្រះដ៏ពិត ។… ហេតុដូច្នេះហើយ បើសិនជាបុគ្គលណាម្នាក់ដែលបានទទួលយកដំណឹងល្អដែលបានស្តារឡើងវិញ និង អស់អ្នកដែលឥឡូវនេះស្វែងរកការថ្វាយបង្គំព្រះអម្ចាស់ជាភាសារបស់ខ្លួន ព្រមទាំងជាមួយនឹងពួកបរិសុទ្ធនៅក្នុងប្រទេសដែលខ្លួនរស់នៅ នោះមានន័យថាបានអនុវត្តតាមក្រឹត្យវិន័យនៃការប្រមូលផ្តុំសាសន៍អ៊ីស្រាអែល ហើយទទួលបានមរតកនៃពរជ័យទាំងអស់ ដែលបានសន្យាចំពោះពួកបរិសុទ្ធនៅក្នុងថ្ងៃចុងក្រោយបង្អស់ » (The Teachings of Spencer W. Kimballការបោះពុម្ពរបស់ អ៊ីវើត អិល ឃឹមបឹល [ ឆ្នាំ ១៩៨២ ] ទំព័រ ៤៣៩ ) ។
អ្នកអាចនឹងចង់សរសេរពាក្យ កិច្ចការផ្សព្វផ្សាយសាសនា នៅលើតារាង ក្នុងប្រអប់ឈរពីក្រោមចំណងជើង « ម៉ូសេ » ។
« សម័យកាន់កាប់ត្រួតត្រា នៃដំណឹងល្អនៃលោកអ័ប្រាហាំ »
សម័យកាន់កាប់ត្រួតត្រា នៃដំណឹងល្អនៃលោកអ័ប្រាហាំ ត្រូវបានប្រគល់ទៅឲ្យព្យាការី យ៉ូសែប ស៊្មីធ និង អូលីវើរ ខៅឌើរី ដោយ អេលីយ៉ា ដែលបានបំពេញការសន្យាដែលព្រះអម្ចាស់បានធ្វើជាមួយអ័ប្រាហាំ ។ អែលឌើរ ប្រ៊ូស អ័រ ម៉ាក់ខន់ឃី ក្នុងកូរ៉ុមនៃពួកសាវកដប់ពីរនាក់បានពន្យល់ ៖ « អេលីយ៉ាស បាននាំត្រឡប់មកវិញ នូវ ‹ ដំណឹងល្អនៃលោកអ័ប្រាហាំ › គឺជាសេចក្តីសញ្ញានៃអ័ប្រាហាំដ៏អស្ចារ្យ ដែលពួកអ្នកស្មោះត្រង់ទទួលបានការសន្យាឲ្យមានការរីកចម្រើនដ៏អស់កល្បជានិច្ច គឺជាការសន្យាថា តាមរយៈអាពាហ៍ពិពាហ៍សេឡេស្ទាល នោះពូជពង្សដ៏អស់កល្បជានិច្ចរបស់ពួកគេនឹងមានចំនួនច្រើនដូចខ្សាច់នៅមាត់សមុទ្រ ឬ ដូចជាផ្កាយរាប់មិនអស់នៅលើមេឃ ។ អេលីយ៉ាស បានផ្ដល់ការសន្យា—ដែលទទួលបានដោយអ័ប្រាហាំ អ៊ីសាក និង យ៉ាកុបពីបូរាណ—ថាមនុស្សនៅសម័យថ្មី និង កូនចៅរបស់លោកគ្រប់ជំនាន់នឹងមានពរ ។ ហើយយើងកំពុងផ្ដល់ពរជ័យរបស់ អ័ប្រាហាំ អ៊ីសាក និងយ៉ាកុប ដល់អ្នកដែលនឹងទទួលយកវា » ( The Keys of the Kingdom » Ensign, ខែ ឧសភា ឆ្នាំ ១៩៨៣ ទំព័រ ២២ ) ។
អ្នកអាចនឹងចង់សរសេរពាក្យ អាពាហ៍ពិពាហ៍សេឡេស្ទាល និង ពូជពង្សដ៏អស់កល្បជានិច្ច នៅលើតារាង ក្នុងប្រអប់ឈរពីក្រោមចំណងជើង « អេលីយ៉ាស » ។
« កូនសោទាំងឡាយនៃគ្រាកាន់កាប់ត្រួតត្រានេះ »
ដើម្បីជួយអ្នកយល់អំពីកូនសោបព្វជិតភាពដែល អេលីយ៉ាបានស្ដារឡើងវិញ សូមអានសេចក្ដីថ្លែងការណ៍ដូចខាងក្រោម ៖
ប្រធាន យ៉ូសែប ហ្វីលឌីង ស្ម៊ីធ បានបង្រៀន ៖ « អំណាចនៃការផ្សារភ្ជាប់នេះបានប្រទានដល់អេលីយ៉ា គឺជាអំណាចដែលចងភ្ជាប់ស្វាមី និង ភរិយា ព្រមទាំងកូនចៅទៅនឹងឪពុកម្តាយសម្រាប់ពេលនេះ និង ពេលដ៏នៅអស់កល្បជានិច្ច ។ វាគឺជាអំណាចនៃចងភ្ជាប់ ដែលមាននៅក្នុងគ្រប់ពិធីបរិសុទ្ធទាំងអស់នៃដំណឹងល្អ ។… ដោយសារតែអំណាចនេះហើយ ទើបគ្រប់ពិធីបរិសុទ្ធទាំងអស់ដែលទាក់ទងនឹងសេចក្តីសង្គ្រោះត្រូវបានចងភ្ជាប់ ឬ ផ្សារភ្ជាប់ ហើយនោះគឺជាបេសកកម្មរបស់អេលីយ៉ាដែលត្រូវបង្ហាញខ្លួនមក ហើយស្តារវាឡើងវិញ » (Elijah the Prophet and His Mission [ ឆ្នាំ ១៩៥៧ ] ទំព័រ ៥ ) ។
អែលឌើរ ដាវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ បានពន្យល់ ៖
« ក្នុងនាមជាសមាជិកនៃសាសនាចក្រ ដែលត្រូវបានស្ដារឡើងវិញរបស់ព្រះគ្រីស្ទនេះ យើងមានទំនួលខុសត្រូវដោយសេចក្ដីសញ្ញាក្នុងការស្រាវជ្រាវរកជីដូនជីតារបស់យើង ហើយធ្វើពិធីបរិសុទ្ធការសង្គ្រោះនៃដំណឹងល្អសម្រាប់ពួកលោក ។ ‹ ដើម្បីមិនឲ្យអ្នកទាំងនោះបានគ្រប់លក្ខណ៍ ក្រៅពីយើងឡើយ › ( ហេព្រើរ ១១:៤០ … ) ។ ហើយ ‹ រីឯយើងក៏ពុំអាចបានល្អឥតខ្ចោះក្រៅពីមនុស្សស្លាប់របស់យើងដែរ › ( គ. និង ស. ១២៨:១៥ ) ។
« ដោយសារតែមូលហេតុនេះហើយ ទើបយើងធ្វើការស្រាវជ្រាវពង្សប្រវត្តិ កសាងព្រះវិហារបរិសុទ្ធ និង ធ្វើពិធីបរិសុទ្ធជំនួសមនុស្សដែលបានចែកឋានទៅ ។ ដោយសារហេតុផលនេះ អេលីយ៉ា ត្រូវបានបញ្ជូនឲ្យទៅស្ដារអំណាចផ្សារភ្ជាប់ ចំណងនៅលើផែនដី និងនៅស្ថានសួគ៌ » ( « The Hearts of the Children Shall Turn » Ensign ឬ លីអាហូណា ខែ វិច្ឆិកា ឆ្នាំ ២០១១ ទំព័រ ២៥-២៦ ) ។
យោងតាមការបកស្រាយទាំងនេះ តើអំណាច ឬ សិទ្ធិអំណាចអ្វីដែលអេលីយ៉ាបានស្ដារឡើងវិញ ? ( អ្នកអាចនឹងចង់សរសេរចម្លើយរបស់អ្នក នៅលើតារាងក្នុងប្រអប់ឈរ ពីខាងក្រោមចំណងជើង « អេលីយ៉ា » ) ។
នៅពេលអេលីយ៉ា បានបង្ហាញខ្លួននៅក្នុងព្រះវិហារបរិសុទ្ធទីក្រុង ខឺតឡង់ លោកបានបំពេញការព្យាករណ៍ដែលថា អេលីយ៉ានឹងមក « មុនដែលថ្ងៃដ៏ធំ ហើយគួរស្ញែងខ្លាចរបស់ព្រះយេហូវ៉ាបានមកដល់ » ដើម្បី « នឹងបង្វែរចិត្តពួកឪពុកមកឯកូន និងចិត្តកូនមកឯឪពុកវិញ » ( ម៉ាឡាគី ៤:៥–៦ ) ។
-
សូមសរសេរនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នកអំពីថាតើជីវិតរបស់អ្នកទទួលបានអត្ថប្រយោជន៍អ្វីខ្លះ តាមរយៈការស្ដារឡើងវិញនៃយ៉ាងហោចណាស់កូនសោបព្វជិតភាពមួយ ( កិច្ចការផ្សព្វផ្សាយសាសនា អាពាហ៍ពិពាហ៍សេឡេស្ទាល និង ពូជពង្សដ៏អស់កល្បជានិច្ច ឬ អំណាចនៃការផ្សារភ្ជាប់ រួមបញ្ចូលទាំងព្រះវិហារបរិសុទ្ធ និង កិច្ចការពង្សប្រវត្តិ ) ។
ប្រធាន យ៉ូសែប ហ្វីលឌីង ស្ម៊ីធ បានកត់ត្រាថា ព្រះវិហារបរិសុទ្ធទីក្រុង ខឺតឡង់ « ត្រូវបានកសាងឡើងជាបឋម សម្រាប់ការស្ដារឡើងវិញនៃកូនសោសិទ្ធិអំណាច ។ នៅក្នុងការទទួលកូនសោទាំងនេះ នោះភាពពោរពេញនៃពិធីបរិសុទ្ធនៃដំណឹងល្អទាំងនេះ [ ត្រូវបាន ] សម្តែងឡើង » (Doctrines of Salvation, comp . Bruce R. McConkie 3 vols. [១៩៥៤–៥៦] ២:២៤២ ) ។ កូនសោនេះមាននៅដល់សព្វថ្ងៃនេះ ដែលកាន់ដោយប្រធាននៃសាសនាចក្រ និង កូរ៉ុមនៃពួកសាវកដប់ពីរនាក់ ។
សូមបញ្ចប់សេចក្ដីថ្លែងការណ៍ដូចតទៅនេះ ៖ ចេញពី គោលលទ្ធិ និង សេចក្តីសញ្ញា ១១០:១១–១៦ យើងរៀនថា កូនសោនៃកិច្ចការផ្សព្វផ្សាយសាសនា ក្រុមគ្រួសារដ៏នៅអស់កល្បជានិច្ច និង កិច្ចការក្នុងព្រះវិហារបរិសុទ្ធ ជួយយើងត្រៀមខ្លួនសម្រាប់ ។
អ្នករស់នៅក្នុងជំនាន់ដែលអ្នកអាចធ្វើកិច្ចការផ្សព្វផ្សាយសាសនា កិច្ចការពង្សប្រវត្តិ និង កិច្ចការក្នុងព្រះវិហារបរិសុទ្ធ និង ជាពេលដែលអ្នកអាចសម្លឹងមើលទៅមុខទៀតរួមបញ្ចូលទាំងពិធីបរិសុទ្ធនៃការផ្សារភ្ជាប់ផងដែរ ។ សូមគិតអំពីការដាក់គោលដៅដើម្បីរួមចំណែកក្នុងកិច្ចខ្នះខ្នែងទាំងនេះ ដើម្បីត្រៀមខ្លួនទទួលការយាងមកជាលើកទីពីររបស់ព្រះអម្ចាស់ ។ អ្នកក៏អាចដាក់គោលដៅជាក់លាក់មួយ លើរបៀបដែលអ្នកនឹងត្រៀមខ្លួនរៀបអាពាហ៍ពិពាហ៍សេឡេស្ទាល ។ សូមទូលសូមព្រះវរបិតាសួគ៌ ដើម្បីជួយអ្នកឲ្យសម្រេចបានគោលដៅនោះ ។
-
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា គោលលទ្ធិ និង សេចក្តីសញ្ញា ១១០ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែម ដែលខ្ញុំចង់ចែកចាយជាមួយគ្រូរបស់ខ្ញុំ ៖