សេចក្តីណែនាំអំពីគោលលទ្ធិគ្រឹះ
គោលលទ្ធិគ្រឹះខាងក្រោមនេះ គួរត្រូវបានគូសបញ្ជាក់នៅក្នុងថ្នាក់សិក្ខាសាលា ៖
-
ក្រុមព្រះ
-
ផែនការនៃសេចក្តីសង្គ្រោះ
-
ដង្វាយធួនរបស់ព្រះយេស៊ូវគ្រីស្ទ
-
គ្រាកាន់កាប់ត្រួតត្រា ការក្បត់សាសនា និង ការស្តារឡើងវិញ
-
ព្យាការី និង វិវរណៈ
-
បព្វជិតភាព និង កូនសោនៃបព្វជិតភាព
-
ពិធីបរិសុទ្ធ និងសេចក្តីសញ្ញាទំាងឡាយ
-
អាពាហ៍ពិពាហ៍ និង គ្រួសារ
-
ព្រះបញ្ញត្តិទាំងឡាយ
គ្រូបង្រៀនជួយសិស្សឲ្យស្គាល់ យល់ ជឿ ពន្យល់ ហើយអនុវត្តតាមគោលលទ្ធិគ្រឹះនៃដំណឹងល្អទាំងនេះ នៅពេលពួកគេសិក្សាព្រះគម្ពីរ ។ ការធ្វើដូច្នោះនឹងជួយសិស្សឲ្យពង្រឹងទីបន្ទាល់ ហើយបង្កើនអំណរគុណរបស់ពួកគេ ចំពោះដំណឹងល្អរបស់ព្រះយេស៊ូគ្រីស្ទដែលបានស្តារឡើងវិញនេះ ។ ការរៀនសូត្រពីគោលលទ្ធិគ្រឹះទាំងនេះ ក៏នឹងជួយសិស្សឲ្យរៀបចំខ្លួនបានយ៉ាងប្រសើរ ដើម្បីរស់នៅតាមដំណឹងល្អ និង បង្រៀនពីសារៈសំខាន់នៃសេចក្តីពិតទាំងនេះដល់អ្នកដទៃទៀតផងដែរ ។ មេរៀននៅក្នុងសៀវភៅសិក្សានេះ ត្រូវបានបង្កើតឡើងជាមួយនឹងគោលលទ្ធិគ្រឹះទាំងនេះនៅក្នុងគំនិត ។ វាសំខាន់ដើម្បីទទួលស្គាល់ថា គោលលទ្ធិសំខាន់ផ្សេងទៀតនៃដំណឹងល្អ ក៏នឹងត្រូវបានគូសបញ្ជាក់ផងដែរនៅក្នុងសៀវភៅសិក្សានេះ ទោះបីជាគោលលទ្ធិនោះពុំបានកត់ត្រាក្នុងគោលលទ្ធិគ្រឹះក៏ដោយ ។ ការបង្រៀនពីគោលលទ្ធិគ្រឹះនៃដំណឹងល្អកើតឡើង នៅពេលអ្នកសិក្សាព្រះគម្ពីររាល់ថ្ងៃជាមួយសិស្ស និងនៅពេលអ្នកជួយពួកគេឲ្យសូត្រចាំនូវវគ្គបទគម្ពីរគន្លឹះទាំងនេះ ។ ការយល់ដឹង ការជឿ និងការរស់នៅតាមគោលលទ្ធិគ្រឹះកាន់តែច្រើនគឺជាដំណើរការមួយ ដែលកើតឡើងពេញទាំងបួនឆ្នាំក្នុងថ្នាក់សិក្ខាសាលា ហើយបន្តពេញមួយជីវិតរបស់សិស្ស ។ អ្នកគួរតែផ្តល់ដល់សិស្សនូវបញ្ជីគោលលទ្ធិគ្រឹះ ។
ការវាយតម្លៃគោលលទ្ធិគ្រឹះ
ការវាយតម្លៃគោលលទ្ធិគ្រឹះត្រូវបានបង្កើតឡើងដើម្បីផ្តល់ព័ត៌មានដល់គ្រូបង្រៀន ដែលពួកគេអាចប្រើវាដើម្បីប្រទានពរដល់សិស្សរបស់ខ្លួនកាន់តែច្រើនឡើង ។ យើងសូមផ្តល់ជាអនុសាសន៍ថា គ្រូបង្រៀនធ្វើការវាយតម្លៃនេះ អំឡុងសប្តាហ៍ដំបូងនៃថ្នាក់រៀន ហើយមួយទៀតនៅចុងឆ្នាំសិក្សា ។ ដើម្បីរកការវាយតម្លៃគោលលទ្ធិគ្រឹះ និងការវាយតម្លៃផ្សេងទៀតនៅលើគេហទំព័រ ស. និង វ. បាន (si.lds.org) សូមស្រាវជ្រាវដោយប្រើពាក្យគន្លឹះ ការវាយតម្លៃ ។
គ្រូបង្រៀនដែលបានបញ្ជូនលទ្ធផលនៃការវាយតម្លៃរបស់សិស្សខ្លួនទៅកាន់ការិយាល័យស្រាវជ្រាវនៃ ស. & វ. នឹងទទួលបានរបាយការណ៍មួយ ដែលនឹងជួយសម្របការបង្រៀនរបស់ខ្លួន ដើម្បីបំពេញតម្រូវការរបស់សិស្ស ។ ឧទាហរណ៍ ប្រសិនបើលទ្ធផលបង្ហាញថា សិស្សពុំយល់គោលលទ្ធិនៃការប្រែចិត្ត នោះមេរៀនមួយចំនួននៅក្នុងកម្មវិធីឆ្នាំសិក្សាអាចត្រូវបានវិភាគបន្ថែម ដើម្បីអាចជួយសិស្សឲ្យយល់បន្ថែមទៀតអំពីគោលលទ្ធិនេះ ។ នៅពេលគ្រូបង្រៀនប្រើព័ត៌មាននេះ នៅក្នុងការបង្រៀនព្រះគម្ពីរតាមលំដាប់លំដោយប្រកបដោយការអធិស្ឋាន នោះយុវវ័យ និង យុវមជ្ឈិមវ័យរបស់យើងនឹងត្រៀមខ្លួនបានកាន់តែប្រសើរ ដើម្បីសម្រេចបាននូវគោលបំណងរបស់ថ្នាក់សិក្ខាសាលា និង ថ្នាក់វិទ្យាស្ថានសាសនា ។