សេចក្តីណែនាំស្ដីពីចំណេះចំណានខគម្ពីរ
ថ្នាក់សិក្ខាសាលា និង ថ្នាក់វិទ្យាស្ថានសាសនាបានជ្រើសរើសវគ្គចំណេះចំណានខគម្ពីរចំនួន ២៥ សម្រាប់វគ្គនីមួយៗនៃថ្នាក់សិក្ខាសាលាទាំងបួនវគ្គ ។ វគ្គគម្ពីរទាំងនេះ ផ្តល់សារៈសំខាន់ជាមូលដ្ឋានមួយ ខាងបទគម្ពីរសម្រាប់ការយល់ដឹង និង ការចែកចាយដំណឹងល្អ និង សម្រាប់ការពង្រឹងសេចក្តីជំនឿ ។ វគ្គចំណេះចំណានខគម្ពីរសម្រាប់វគ្គសិក្សាព្រះគម្ពីរសញ្ញាថ្មីមានដូចខាងក្រោមនេះ ៖
សិស្សថ្នាក់សិក្ខាសាលាត្រូវបានលើកទឹកចិត្តឲ្យសូត្រ « ចាំស្ទាត់ » វគ្គខគម្ពីរទាំងនេះ ។ អ្នកអាចជួយដល់សិស្សទាំងឡាយរបស់អ្នកកាន់តែប្រសើរ ប្រសិនបើអ្នកសូត្រវគ្គខគម្ពីរទាំងនេះឲ្យចាំស្ទាត់យ៉ាងល្អផងដែរ ។ ការសូត្រចាំស្ទាត់ខគម្ពីរនេះរួមមាន ៖
-
ទីតាំង នៃខគម្ពីរទាំងនេះ ដោយការស្គាល់សេចក្តីយោងព្រះគម្ពីរដែលទាក់ទងគ្នា
-
ការយល់ ពីបរិបទ និង មាតិកានៃវគ្គបទគម្ពីរទាំងនេះ
-
ការអនុវត្តតាម គោលការណ៍ និង គោលលទ្ធិទាំងឡាយនៃដំណឹងល្អដែលបានបង្រៀននៅក្នុងវគ្គបទគម្ពីរទាំងនេះ
-
ការទន្ទេញឲ្យចាំ វគ្គបទគម្ពីរ
ភាពខ្ជាប់ខ្ជួន ការរំពឹងទុក និង វិធីសាស្ត្រនានា
នៅពេលអ្នកដាក់ផែនការជួយសិស្សឲ្យសូត្រចាំវគ្គបទគម្ពីរ នោះអ្នកនឹងមានជោគជ័យកាន់តែខ្លាំង ប្រសិនបើអ្នកយោងទៅលើវគ្គចំណេះចំណានខគម្ពីរដោយខ្ជាប់ខ្ជួន រក្សាការរំពឹងទុកដ៏សមហេតុផល និង ប្រើវិធីសាស្ដ្រនានា ដែលទាក់ទាញឲ្យមានរបៀបរៀនខុសប្លែកពីគ្នា ។
ភាពខ្ជាប់ខ្ជួន និង ការសូត្រដដែលៗនៅក្នុងការបង្រៀនចំណេះចំណានខគម្ពីរ នឹងជួយសិស្សឲ្យចងចាំពីសេចក្តីពិតបានយូរអង្វែងសម្រាប់ប្រើនាពេលអនាគត ។ វាអាចមានប្រយោជន៍ ដើម្បីរៀបគម្រោងវគ្គសិក្សាសម្រាប់ឆ្នាំសិក្សា ហើយបង្កើតគម្រោងដើម្បីផ្តល់ឱកាសឲ្យបានជាប់លាប់ដល់សិស្សក្នុងថ្នាក់ ដើម្បីសូត្រចាំវគ្គខគម្ពីរទាំងឡាយ ។ សូមមានភាពឆ្លាតវៃក្នុងការសម្រេចចិត្តពីភាពញឹកញាប់ និង ការប្រើប្រាស់ពេលច្រើនប៉ុណ្ណា ក្នុងការជួយសិស្សឲ្យរៀនវគ្គចំណេះចំណានខគម្ពីរទាំងនេះ ។ សូមប្រាកដថា សកម្មភាពចំណេះចំណានខគម្ពីរនេះ ពុំយកម៉ោងពីការសិក្សាព្រះគម្ពីរតាមលំដាប់ប្រចាំថ្ងៃនោះឡើយ ។ អ្នកអាចសម្រេចចិត្តដើម្បីចំណាយពេលពីរបីនាទីរាល់ថ្ងៃ រំឭកវគ្គចំណេះចំណានខគម្ពីរនេះជាមួយសិស្សរបស់អ្នក ។ ឬ អ្នកអាចសម្រេចចិត្តធ្វើសកម្មភាពចំណេះចំណានខ្លីម្តង ឬ ពីរដងក្នុងសប្តាហ៍នីមួយៗដោយប្រើពេល ១០ ទៅ ១៥ នាទី ។ មិនថាអ្នកដាក់ផែនការជួយសិស្សឲ្យរៀនវគ្គចំណេះចំណានខគម្ពីរតាមរបៀបណានោះទេ សូមប្រឹងប្រែងយ៉ាងខ្ជាប់ខ្ជួន និងសមរម្យ ។
សូមផ្តោតការរំពឹងទុករបស់អ្នកអាស្រ័យលើសមត្ថភាពរបស់សិស្សម្នាក់ៗសម្រាប់ចំណេះចំណានខគម្ពីរ ។ វគ្គចំណេះចំណានខគម្ពីរតម្រូវឲ្យមានការខិតខំប្រឹងប្រែងនៅក្នុងចំណែករបស់សិស្ស ។ សូមប្រាប់សិស្សថា ភាពជោគជ័យជាមួយនឹងចំណេះចំណានខគម្ពីររបស់ពួកគេ គឺអាស្រ័យលើអត្តចរិត និងឆន្ទៈដ៏មោះមុតរបស់ពួកគេក្នុងការអនុវត្ត ។ សូមលើកទឹកចិត្តពួកគេឲ្យដាក់គោលដៅ ដែលនឹងជំរុញសមត្ថភាពពួកគេទៅកាន់កម្រិតកាន់តែខ្ពស់ជាងនេះ ។ សូមស្គាល់ពីសិស្សណាដែលអាចមានការពិបាកក្នុងការទន្ទេញ ហើយសូមមានឆន្ទៈសម្របការរំពឹងទុក និង វិធីសាស្ត្របង្រៀនរបស់អ្នកឲ្យស្របទៅតាមតម្រូវការរបស់សិស្សអ្នក ។
ដើម្បីធ្វើឲ្យបុគ្គលិកលក្ខណៈ និង វិធីសាស្ត្រអ្នកអាចផ្លាស់ប្តូរនោះមានវិធីសាស្ត្រផ្សេងៗទៀតជាច្រើនដើម្បីជួយសិស្សឲ្យសូត្រចាំស្ទាត់វគ្គបទគម្ពីរទាំងនោះ ។ នៅក្នុងគ្រប់ការបង្រៀន និងការរៀនសូត្រដំណឹងល្អទាំងអស់ សូមជ្រើសរើសយកសកម្មភាពនានាដោយឆ្លាតវៃ ដើម្បីឲ្យព្រះវិញ្ញាណបរិសុទ្ធអាចជួយឲ្យសិស្សសូត្រចាំស្ទាត់នូវខគម្ពីរ និង គោលលទ្ធិ ។ អ្នកនឹងរកឃើញវិធីសាស្ត្របង្រៀនចំណេះចំណានខគម្ពីរសមរម្យមួយចំនួន នៅក្នុងមេរៀននានាក្នុងសៀវភៅសិក្សានេះ ។ សម្រាប់វិធីសាស្ត្របង្រៀនចំណេះចំណានខគម្ពីរបន្ថែមទៀត សូមមើលវគ្គ « សកម្មភាពចំណេះចំណានខគម្ពីរ » នៅក្នុងឧបសម្ព័ន្ធនេះ ។
ចំណេះចំណានខគម្ពីរនៅក្នុងកម្មវិធីសិក្សា
ចំណេះចំណានខគម្ពីរត្រូវបានសរសេរក្នុងកម្មវិធីសិក្សាតាមរបៀបជាច្រើន ។ និមិត្តសញ្ញាចំណេះចំណានខគម្ពីរ បង្ហាញពីសកម្មភាពនៃវគ្គចំណេះចំណានខគម្ពីរនៅក្នុងមេរៀន ។ វគ្គចំណេះចំណានខគម្ពីរត្រូវបានណែនាំប្រាប់ និង ពិភាក្សានៅក្នុងបរិបទនៃជំពូកដែលមាននៅក្នុងមេរៀននោះ ។ គំនិតបន្ថែមសម្រាប់ការបង្រៀនវគ្គចំណេះចំណានខគម្ពីរមានដាក់នៅចុងមេរៀន ។ គំនិតបន្ថែមសម្រាប់ការបង្រៀនទាំងនេះ ជួយធ្វើឲ្យធាតុទាំងបួននៃចំណេះចំណានខគម្ពីរ ( ទីតាំង ការយល់ ការអនុវត្តតាម និង ការទន្ទេញឲ្យចាំ ) មានភាពស្មើគ្នា ដែលវាទាក់ទងនឹងវគ្គខគម្ពីរនីមួយៗ ។ ឧទាហរណ៍ ប្រសិនបើមេរៀនជួយសិស្សឲ្យយល់ ហើយអនុវត្តវគ្គចំណេះចំណានខគម្ពីរ នោះគំនិតបន្ថែមសម្រាប់ការបង្រៀននឹងជួយពួកគេឲ្យរកទីតាំង ឬទន្ទេញឲ្យចាំវគ្គខគម្ពីរនោះ ។
កម្មវិធីសិក្សាក៏ផ្តល់យ៉ាងទៀងទាត់ដើម្បីរំឭកចំណេះចំណានខគម្ពីរ ដែលអាចប្រើបានទៅតាមពេលវេលាអំណោយផលឲ្យ ហើយស្របតាមគោលដៅនៃចំណេះចំណានខគម្ពីរនៅក្នុងថ្នាក់របស់អ្នក ។ ការរំឭកទាំងនេះ អាចត្រូវបានដាក់បន្ថែមជាមួយសកម្មភាពចំណេះចំណានខគម្ពីរដែលបានរៀបរាប់នៅក្នុងឧបសម្ព័ន្ធនេះ ។ អ្នកអាចចំណាយពេលបន្ថែមនៅពេលចាប់ផ្តើម ឬពេលបញ្ចប់មេរៀនសង្ខេបខ្លី ដើម្បីធ្វើសកម្មភាពរំឭកទាំងនេះ ណាមួយ។
វិធីសាស្ត្រនានាដែលបានផ្តល់ឲ្យសម្រាប់រៀនចំណេះចំណានខគម្ពីរ
ដើម្បីជួយសិស្សឲ្យជំនាញ រកទីតាំងខគម្ពីរ នោះអ្នកអាចដាក់ផែនការណែនាំវគ្គចំណេះចំណានខគម្ពីរទាំង ២៥ នៅជិតពេលចាប់ផ្តើមវគ្គសិក្សា ហើយក្រោយមកខិតខំសូត្រចំណេះចំណានខគម្ពីរទាំងនេះតាំងពីដើមរហូតដល់ចប់វគ្គសិក្សា ។ ឬ អ្នកណែនាំវគ្គខគម្ពីរពីរបីរាល់ខែ ហើយផ្តោតលើការសូត្រឲ្យចាំនូវវគ្គបទគម្ពីរទាំងនោះអំឡុងខែនោះ ។ ការណែនាំបែបនោះអាចរួមបញ្ចូលនូវ ការផ្តល់យោបល់ឲ្យសិស្សគូសចំណាំវគ្គចំណេះចំណានខគម្ពីរនៅក្នុងព្រះគម្ពីររៀងៗខ្លួនរបស់ពួកគេ ការជួយសិស្សឲ្យគិតអំពីរបៀបចាំពាក្យ និង វគ្គគម្ពីរយោងគន្លឹះ ហើយការពន្យល់គោលលទ្ធិ និង គោលការណ៍ដែលមាននៅក្នុងវគ្គបទគម្ពីរនីមួយៗ ។ អ្នកក៏អាចណែនាំវគ្គចំណេះចំណានខគម្ពីរដល់សិស្ស ដោយចាត់តាំងពួកគេឲ្យប្រើវគ្គខគម្ពីរទាំងនោះនៅក្នុងការប្រជុំធម្មនិដ្ឋានរបស់ពួកគេ ឬ ដោយអញ្ជើញពួកគេឲ្យបង្រៀនគ្នាទៅវិញទៅមកពីរបៀបដើម្បីចងចាំ ហើយវិធីរកទីតាំងនៃវគ្គខគម្ពីរទាំងនោះ ។ សូមផ្តល់នូវទំនួលខុសត្រូវក្នុងការចងចាំពីវគ្គចំណេះចំណានខគម្ពីរជាមួយសកម្មភាពចំណោទសំណួរ និង ការស្វែងរកខគម្ពីរទាំងនោះ ( សូមមើលសកម្មភាពវគ្គចំណេះចំណានខគម្ពីរនៅក្នុងឧបសម្ព័ន្ធនេះសម្រាប់ជាឧទាហរណ៍ ) ។ បញ្ជីនៃវគ្គចំណេះចំណានខគម្ពីរទាំង ២៥ សម្រាប់វគ្គសិក្សានេះអាចរកបាននៅក្នុងវត្ថុស៊កក្នុងសៀវភៅសម្រាប់ចំណាំរបស់សិស្ស និង កាតចំណេះចំណានខគម្ពីរ ។
ដើម្បីជួយសិស្សឲ្យ យល់ ពីវគ្គចំណេះចំណានខគម្ពីរ សូមគូសបញ្ជាក់វគ្គបទគម្ពីរទាំងនេះ នៅពេលវាប្រាកដឡើង នៅក្នុងមេរៀនប្រចាំថ្ងៃរបស់អ្នក ។ អ្នកអាចប្រើសកម្មភាពចំណេះចំណានខគម្ពីរនៅក្នុងឧបសម្ព័ន្ធនេះ ដើម្បីបង្កើនចំណេះដឹង និង សមត្ថភាពរបស់សិស្ស ដើម្បីពន្យល់ពីសេចក្តីពិតដែលមាននៅក្នុងវគ្គបទគម្ពីរនានា ។ សូមផ្តល់ឱកាសដល់សិស្សនៅក្នុងការប្រជុំធម្មនិដ្ឋាន ឬ អំឡុងពេលរៀនដើម្បីពន្យល់ពី របៀបដែលសេចក្តីពិតនៅក្នុងវគ្គចំណេះចំណានខគម្ពីរនេះ ជួយពួកគេឲ្យយល់កាន់តែប្រសើរឡើងពីគោលលទ្ធិគ្រឹះ ។
ដើម្បីគាំទ្រសិស្សក្នុង ការអនុវត្ត សេចក្តីពិតដែលមាននៅក្នុងវគ្គចំណេះចំណានខគម្ពីរនោះ សូមលើកទឹកចិត្តពួកគេឲ្យធ្វើតាមការបំផុសគំនិតនៃព្រះវិញ្ញាណបរិសុទ្ធ ឲ្យយល់ពីរបៀបដែលសេចក្តីពិតនៅក្នុងវគ្គបទគម្ពីរទាំងនេះអនុវត្តក្នុងជីវិតរបស់ពួកគេ ។ ដើម្បីជួយសិស្សឲ្យអនុវត្តតាមសេចក្តីពិតដែលពួកគេរៀន អ្នកអាចសរសេរបញ្ហាមួយដែលទាក់ទងនឹងវគ្គចំណេះចំណានខគម្ពីរ នៅលើក្តារខៀនបិទប្រកាសនៅក្នុងថ្នាក់ម្តងម្កាល ។ ឬ អ្នកអាចផ្តល់ឱកាសឲ្យសិស្សអំឡុងពេលរៀន ឲ្យអនុវត្តការបង្រៀនគោលលទ្ធិ និង គោលការណ៍នៃដំណឹងល្អដោយប្រើវគ្គចំណេះចំណានខគម្ពីរ ( សូមមើលសកម្មភាពចំណេះចំណានខគម្ពីរនៅក្នុងឧបសម្ព័ន្ធនេះសម្រាប់ជាយោបល់ ) ។ អ្នកក៏អាចអញ្ជើញសិស្សឲ្យអនុវត្តគោលការណ៍ ដែលពួកគេរៀននៅក្នុងមេរៀនដែលមានវគ្គចំណេះចំណានខគម្ពីរទាំងនេះផងដែរ ។ សូមផ្តល់ឱកាសដល់សិស្ស—នៅក្នុងការប្រជុំធម្មនិដ្ឋាន ឬ ឱកាសផ្សេងទៀត—ឲ្យរាយការណ៍ពីបទពិសោធន៍របស់ពួកគេ ។ ការធ្វើបែបនេះនឹងជួយពួកគេឲ្យបង្កើនទីបន្ទាល់របស់ខ្លួន អំពីសេចក្តីពិតដែលពួកគេបានរៀនពីវគ្គចំណេះចំណានខគម្ពីរទាំងឡាយ ។
ដើម្បីជួយសិស្ស ទន្ទេញឲ្យចាំ វគ្គចំណេះចំណានខគម្ពីរទាំង ២៥ នេះ អ្នកអាចដាក់ផែនការដើម្បីប្តេជ្ញាចិត្តសូត្រវគ្គបទគម្ពីរពីរ ឬបីរៀងរាល់ខែនៅក្នុងថ្នាក់ ។ អ្នកក៏អាចអញ្ជើញសិស្សឲ្យសូត្រវគ្គខគម្ពីរជាក់លាក់នានានៅផ្ទះ ( ពួកគេអាចសូត្រវាជាមួយគ្រួសារខ្លួន ឬ សូត្រវគ្គបទគម្ពីរទាំងនេះទៅឪពុកម្តាយ ឬ សមាជិកគ្រួសារស្តាប់ ) ។ អ្នកអាចធ្វើឲ្យការសូត្រនេះក្លាយជាផ្នែកមួយនៃការប្រជុំធម្មនិដ្ឋានប្រចាំថ្ងៃ ដោយសុំឲ្យសិស្សសូត្រវគ្គបទខគម្ពីរមួយ ឬដោយទុកពេលឲ្យសិស្សទន្ទេញវាជាគូៗ ។ ការផ្តល់ឱកាសឲ្យសិស្សសូត្រវគ្គចំណេះចំណានខគម្ពីរជាគូៗ ឬជាក្រុមតូចៗ ឬនៅមុខក្តារខៀន អាចជួយពួកគេមានទំនួលខុសត្រូវចំពោះការខិតខំរបស់ពួកគេផងដែរ ។ សកម្មភាពចំណេះចំណានខគម្ពីរនៅក្នុងឧបសម្ព័ន្ធនេះ រួមមានវិធីសាស្ត្រទន្ទេញជាច្រើនផ្សេងៗគ្នា ។ សូមយកចិត្តទុកដាក់បន្ថែមបន្ថយលើការរំពឹងទុកនៃការទន្ទេញឲ្យចាំ ទៅតាមសមត្ថភាព និង កាលៈទេសៈរបស់សិស្សម្នាក់ៗ ។ មិនគួរធ្វើឲ្យសិស្សខ្មាស់អៀន ឬ អន់ចិត្តឡើយ បើសិនជាពួកគេមិនអាចទន្ទេញចាំវគ្គបទគម្ពីរមួយនោះ ។