កិច្ចការ ១-៥ ( មេរៀនទី ១៧ )

ការរៀបចំមេរៀនសម្រាប់គ្រូបង្រៀនដល់សិស្សដែលសិក្សានៅផ្ទះ

សេចក្ដីសង្ខេបនៃមេរៀនសិក្សានៅផ្ទះប្រចាំថ្ងៃ

សេចក្ដីសង្ខេបខាងក្រោមនៃព្រឹត្តិការណ៍ និងគោលការណ៍ដែលសិស្សរបស់អ្នកបានរៀន នៅពេលពួកគេបានសិក្សា កិច្ចការ ១-៥ ( មេរៀនទី ១៧ ) ពុំមែនត្រូវយកមកបង្រៀនជាផ្នែកនៃមេរៀនរបស់អ្នកនោះទេ ។ មេរៀនដែលអ្នកបង្រៀនផ្ដោតលើគោលលទ្ធិ និង គោលការណ៍តែពីរបីនេះប៉ុណ្ណោះ ។ សូមធ្វើតាមការបំផុសគំនិតពីព្រះវិញ្ញាណបរិសុទ្ធ នៅពេលអ្នកគិតពីតម្រូវការរបស់សិស្ស ។

ថ្ងៃទី ១ ( កិច្ចការ ១-៨ )

សិស្សបានចាប់ផ្ដើមការសិក្សាពួកគេអំពីគម្ពីរកិច្ចការដោយរៀនថា ព្រះយេស៊ូវគ្រីស្ទដឹកនាំសាសនាចក្រទ្រង់តាមរយៈការបើកសម្ដែងព្រះឆន្ទៈទ្រង់ដល់ពួកសាវកតាម រយៈព្រះវិញ្ញាណបរិសុទ្ធ ហើយថាពួកសាវកគឺជាសាក្សីនៃព្រះយេស៊ូវគ្រីស្ទ ហើយថ្លែងទីបន្ទាល់អំពីទ្រង់ទៅកាន់ផែនដីទាំងមូល ។ បន្ទាប់មក សិស្សបានរៀនថា តាមរយៈព្រះចេស្ដានៃព្រះវិញ្ញាណបរិសុទ្ធ យើងក៏អាចក្លាយជាសាក្សីនៃព្រះយេស៊ូវគ្រីស្ទបានផងដែរ ។ ឯកសារនៅក្នុងមេរៀននេះក៏ផ្ដល់ពីទិដ្ឋភាពទូទៅមួយ នៃផ្នែកពាក់កណ្ដាលទៀតនៃព្រះគម្ពីរសញ្ញាថ្មីដល់សិស្សដែរ ។

ថ្ងៃទី ២ ( កិច្ចការ ១:៩-២៦ )

នៅពេលសិស្សបានសិក្សាដំណើររឿងអំពីការយាងទៅស្ថានសួគ៌វិញរបស់ព្រះយេស៊ូវគ្រីស្ទ ពួកគេបានរៀនថា ការយាងមកជាលើកទីពីររបស់ទ្រង់ ព្រះអង្គសង្គ្រោះនឹងយាងចុះមកពីស្ថានសួគ៌នៅក្នុងសិរីល្អ ។ នៅពេលពួកគេបានអានអំពីរបៀបជ្រើសសាវក ជំនួសតំណែងរបស់យូដាស នោះសិស្សបានរៀនថា ពួកសាវករបស់ព្រះយេស៊ូវគ្រីស្ទត្រូវបានហៅដោយព្រះតាមរយៈវិវរណៈ ។

ថ្ងៃទី ៣ ( កិច្ចការ ២ )

នៅពេលសិស្សបានសិក្សាពីព្រឹត្តិការណ៍នានា នៅបុណ្យថ្ងៃទីហាសិប ពួកគេបានរកឃើញសេចក្ដីពិតដូចខាងក្រោមនេះ ៖ នៅពេលយើងត្រូវបានបំពេញដោយព្រះវិញ្ញាណបរិសុទ្ធ ទ្រង់នឹងជួយយើងបង្រៀន និងថ្លែងទីបន្ទាល់ទៅដល់អ្នកដទៃ នៅពេលយើងទទួលព្រះបន្ទូលព្រះតាមរយៈព្រះចេស្ដានៃព្រះវិញ្ញាណបរិសុទ្ធ នោះដួងចិត្តយើងនឹងផ្លាស់ប្ដូរ ហើយយើងនឹងបានប្រែចិត្តជឿដល់ព្រះយេស៊ូវគ្រីស្ទ ។ នៅពេលយើងមានសេចក្ដីជំនឿលើព្រះយេស៊ូវគ្រីស្ទ ហើយបានជ្រមុជទឹក យើងបានត្រៀមខ្លួនទទួលអំណោយទាននៃព្រះវិញ្ញាណបរិសុទ្ធ ។

ថ្ងៃទី ៤ ( កិច្ចការ ៣-៥ )

នៅពេលពេត្រុស និងយ៉ូហានបានព្យាបាលបុរសខ្វិនម្នាក់នៅព្រះវិហារបរិសុទ្ធ សិស្សបានរៀនថា ព្រះវរបិតាសួគ៌ប្រហែលនឹងមិនឆ្លើយតប ចំពោះការអធិស្ឋានរបស់យើង តាមវិធីដែលយើងចង់បាន ឬរំពឹងចង់បានពីទ្រង់ឡើយ ប៉ុន្តែចម្លើយរបស់យើងតែងតែសម្រាប់សេចក្ដីល្អបំផុតដល់យើងជានិច្ច ។ គោលការណ៍ផ្សេងទៀតដែលបានរៀននៅក្នុងមេរៀននេះ រួមមានដូចខាងក្រោម ៖ ពួកអ្នកបម្រើរបស់ព្រះយេស៊ូវគ្រីស្ទ អាចធ្វើអព្ភូតហេតុតាមរយៈសេចក្ដីជំនឿទៅលើព្រះនាមរបស់ទ្រង់ ពួកព្យាការីនៅគ្រប់សម័យកាលទាំងអស់ បានប្រាប់ទុកជាមុនពីការស្តារឡើងវិញ នៃដំណឹងល្អ ។ ប្រសិនបើយើងកុហកដល់ពួកអ្នកបម្រើរបស់ព្រះ នោះដូចជាយើងកុហកដល់ទ្រង់ដែរ ។

សេចក្ដីផ្ដើម

មេរៀននេះអាចជួយសិស្សឲ្យស្គាល់ពីរបៀប ដែលពួកគេអាចឆ្លើយដោយក្លាហាន នៅពេលពួកគេមានឱកាស ដើម្បីចែកចាយ ឬ គាំទ្រដំណឹងល្អ ។

យោបល់សម្រាប់ការបង្រៀន

កិច្ចការ ៤:១-៣១

សមាជិកនៃពួកសានហេឌ្រីនបង្គាប់ឲ្យពេត្រុស និងយ៉ូហានឲ្យឈប់បង្រៀននៅក្នុងព្រះនាមនៃព្រះយេស៊ូវទៀត ។

ចូរសុំឲ្យសិស្សសញ្ជឹងគិតអំពីអ្វីដែលពួកគេគប្បីនឹងធ្វើ នៅក្នុងស្ថានភាពខាងក្រោមនេះ ( សូមពិចារណាសរសេរសាច់រឿងទាំងនេះនៅលើក្ដារខៀនពីមុនថ្នាក់ចាប់ផ្ដើម ) ៖

មានមិត្តម្នាក់ចុះផ្សាយរឿងមិនពិតមួយអំពីសាសនាចក្រលើប្រព័ន្ធផ្សព្វផ្សាយសង្គម ។
មានគ្រូបង្វឹកម្នាក់បានដាក់កាលវិភាគការប្រកួតយកពានរង្វាន់មួយ ដែលតម្រូវឲ្យក្រុមរបស់អ្នកលេងនៅថ្ងៃអាទិត្យ ។
មិត្តរបស់អ្នកសាកសួរមតិអ្នកអំពីបញ្ហាសង្គមមួយដែលពេញនិយម ហើយមានមនុស្សទូទៅគាំទ្រ ប៉ុន្តែវាផ្ទុយទៅនឹងការបង្រៀនរបស់សាសនាចក្រ ។

បន្ទាប់ពីផ្ដល់ពេលឲ្យសិស្សសញ្ជឹងគិតគ្រប់គ្រាន់ហើយ សូមសួរ ៖

តើមានកាលៈទេសៈមួយចំនួនណាផ្សេងទៀតដែលយើងត្រូវចែកចាយ ឬគាំទ្រសេចក្ដីជំនឿយើងនោះ ?

នៅពលពួកគេសិក្សា កិច្ចការ ៤–៥ សូមអញ្ជើញសិស្សឲ្យរកមើលសេចក្ដីពិតនានា ដែលអាចដឹកនាំពួកគេនៅក្នុងស្ថានភាពទាំងនេះ ។

ដើម្បីជួយសិស្សឲ្យយល់ពីបរិបទនៅក្នុង កិច្ចការ ៤សូមអញ្ជើញពួកគេឲ្យចងចាំពីព្រឹត្តិការណ៍ និងការបង្រៀនទាំងឡាយនៅក្នុង កិច្ចការ ៣ ។ ( នៅឯព្រះវិហារបរិសុទ្ធ ពេត្រុស និងយ៉ូហានបានព្យាបាលបុរសខ្វិនម្នាក់តាំងពីកំណើត ហើយបានបង្រៀនអំពីព្រះយេស៊ូវ ) ។

សូមសង្ខេប កិច្ចការ ៤:១–៦ ដោយពន្យល់ថា ពេត្រុស និងយ៉ូហានត្រូវបានគេចាប់ខ្លួន ដោយសារទង្វើទាំងនេះ ហើយបាននាំទៅជួបនឹងពួកសានហេឌ្រីន ដែលជាក្រុមប្រឹក្សាពួកសាសន៍យូដា ។ សូមរំឭកសិស្សថា មានសមាជិកជាច្រើនរបស់ពួកសានហេឌ្រីនធ្លាប់ចូលរួមនឹងការចាប់ព្រះកាយ និងការឆ្កាងដល់ព្រះអង្គសង្គ្រោះកាលពីមុន ។

សូមអញ្ជើញសិស្សម្នាក់អាន ម៉ាថាយ ៤:៧ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលសំណួរដែលពួកអ្នកដឹកនាំ សាសន៍យូដាបានចោទសួរដល់ពេត្រុស និងយ៉ូហាន ។

តើពួកអ្នកដឹកនាំ សាសន៍យូដាបានចោទសួរអ្វីខ្លះដល់ពេត្រុស និងយ៉ូហាន ?
តើអាចមានអ្វីកើតឡើងដល់ពេត្រុស និងយ៉ូហាន ប្រសិនបើពួកគាត់បាននិយាយប្រាប់ថា ខ្លួនគឺជាពួកអ្នកដើរតាមព្រះយេស៊ូវគ្រីស្ទនោះ ?

ចូរសុំឲ្យសិស្សពិចារណាពីអារម្មណ៍ ដែលពួកគេអាចមាន ប្រសិនបើពួកគេស្ថិតនៅក្នុងស្ថានភាពរបស់ពេត្រុស និងយ៉ូហាន ហើយថាពួកគេនឹងនិយាយអ្វីខ្លះទៅក្រុមប្រឹក្សានោះ ។

សូមអញ្ជើញសិស្សបីបួននាក់ឲ្យប្ដូរវេនគ្នាអានឮៗនៅក្នុង កិច្ចការ ៤:៨-២១ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលអ្វី ដែលពេត្រុសបានប្រកាសដល់ក្រុមប្រឹក្សានោះអំពីព្រះយេស៊ូវ ។

យោងតាម កិច្ចការ ៤:១៣ហេតុអ្វីក្រុមប្រឹក្សានោះ មានចិត្តស្ញប់ស្ញែងដល់ពេត្រុស និងយ៉ូហាន ?

សូមអញ្ជើញសិស្សឲ្យរំឭក កិច្ចការ ៤:៨ ឡើងវិញដោយស្ងៀមស្ងាត់ រកមើលអ្វីដែលបានជះឥទ្ធិលដល់ពេត្រុស ហើយបានជួយគាត់ឲ្យថ្លែងដោយភាពក្លាហានទៅកាន់ក្រុមប្រឹក្សានោះ ។

តើអ្នកគិតថាការពោរពេញដោយព្រះវិញ្ញាណបរិសុទ្ធបានជះឥទ្ធិពលដល់លទ្ធភាពរបស់ពេត្រុស ក្នុងការបង្រៀនដំណឹងល្អដោយភាពក្លាហានយ៉ាងដូចម្ដេចដែរ ?
តើយើងអាចរៀនគោលការណ៍អ្វីខ្លះពីគំរូរបស់ពេត្រុស ដូចដែលបានកត់ត្រានៅក្នុង ខទី ៨ និង ១៣ ? ( សិស្សអាចនឹងប្រើពាក្យខុសគ្នា ប៉ុន្តែត្រូវប្រាកដថាពួកគេស្គាល់ពីគោលការណ៍មួយ ដែលស្រដៀងនឹងគោលការណ៍ខាងក្រោមនេះ ៖នៅពេលយើងបានពេញដោយព្រះវិញ្ញាណបរិសុទ្ធ នោះយើងអាចចែកចាយដំណឹងល្អដោយភាពក្លាហាន ។ សូមសរសេរគោលការណ៍នេះនៅលើក្ដារខៀន ) ។
យោងតាម កិច្ចការ ៤:១៨ហេតុអ្វីក្រុមប្រឹក្សានោះចេញសេចក្ដីបង្គាប់អ្វីខ្លះដល់ពេត្រុស និងយ៉ូហាន ?
យោងតាម ខទី ១៩–២០តើពេត្រុស និងយ៉ូហានបានឆ្លើយតបយ៉ាងដូចម្ដេច ?

សូមសង្ខេប កិច្ចការ ៤:២៣–៣០ ដោយពន្យល់ថា បន្ទាប់ពីពេត្រុស និងយ៉ូហានបានដោះលែងខ្លួនមក ពួកគាត់បានប្រមូលផ្ដុំនឹងពួកអ្នកជឿផ្សេងទៀត ហើយបានអធិស្ឋានជាមួយនឹងពួកគេ ។

សូមអញ្ជើញសិស្សម្នាក់អាន កិច្ចការ ៤:៣១ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលអ្វី ដែលបានកើតឡើងបន្ទាប់ពីការអធិស្ឋានរបស់ពួកគេ ។

តើមានអ្វីកើតឡើង បន្ទាប់ពីមនុស្សបានអធិស្ឋាន ?
ពីអ្វីដែលយើងបានរៀននៅក្នុងខគម្ពីរនេះ តើយើងអាចធ្វើអ្វីខ្លះដើម្បីអញ្ជើញព្រះវិញ្ញាណបរិសុទ្ធឲ្យជួយយើង ថ្លែងព្រះបន្ទូលព្រះដោយភាពក្លាហាន ?

សូមលើកឡើងពីស្ថានភាពមួយចំនួននៅដើមមេរៀននេះ ។

តើយើងអាចមានភាពក្លាហាន ក្នុងការចែកចាយដំណឹងល្អនៅក្នុងស្ថានភាពដូចជាស្ថានភាពទាំងនេះបាន ដោយរបៀបណា ដោយនៅតែមានការគោរព និងតាមផ្លូវរដ្ឋ ? ( សូមមើល អាលម៉ា ៣៨:១២អ្នកគួរពន្យល់ថា ការមានភាពក្លាហានក្នុងការចែកចាយដំណឹងល្អមានន័យថា យើងចែកចាយអ្វីដែលយើងដឹងថាពិតដោយមានទំនុកចិត្ត ប៉ុន្តែយើងធ្វើវាដោយភាពរាបសា និងការគោរពដល់មនុស្សដទៃ ដែលគិត ឬមានអារម្មណ៍ខុសពីយើង ) ។
តើព្រះវិញ្ញាណបរិសុទ្ធធ្លាប់ជួយអ្នកឲ្យថ្លែងពីព្រះបន្ទូលនៃព្រះ ដោយភាពក្លាហាននៅពេលណាដែរ ?
តើអ្នកបានដឹងថា ព្រះវិញ្ញាណបរិសុទ្ធបានជួយអ្នកតាមរបៀបណា ?

កិច្ចការ ៥:១២-៤២

ពួកសាវកត្រូវបានគេចាប់ដាក់ឃុំឃាំង ដោយសារការព្យាបាលនៅក្នុងព្រះនាមនៃព្រះយេស៊ូវគ្រីស្ទ ។

ចូរសុំឲ្យសិស្សនឹកស្រមៃថា ពួកគេកំពុងរស់នៅក្នុងសម័យរបស់ពេត្រុស និងយ៉ូហាន ហើយគឺជាអ្នករាយការណ៍សម្រាប់សារព័តមាន Jerusalem Times ។ សូមពន្យល់ថា ពួកគេនឹងត្រូវបានអញ្ជើញឲ្យសិក្សាផ្នែកនៃ កិច្ចការ ៥:១២–៣២ រួចហើយសរសេរពីព័ត៌មានមួយដោយសង្ខេបរឿងដែលបានកើតឡើង ។ ( ដើម្បីផ្ដល់ជាបរិបទចំពោះសារលិខិតទាំងនេះ សូមរំឭកសិស្សថា ពួកសានហេឌ្រីនបានបង្គាប់ពេត្រុស និងយ៉ូហានឲ្យឈប់និយាយនៅក្នុងព្រះនាមរបស់ព្រះយេស៊ូវគ្រីស្ទ ) ។ សូមធ្វើតាមសេចក្ដីណែនាំដែលបានផ្ដល់ឲ្យ ជាមួយនឹងខគម្ពីរនីមួយៗ ។

កិច្ចការ ៥:១២–១៦ ( សូមអានខគម្ពីរនេះទាំងអស់គ្នា ហើយសរសេរព័ត៌មានមួយរួមគ្នា ) ។
កិច្ចការ ៥:១៧–២៣ ( សុំឲ្យសិស្សអានខគម្ពីរនេះជាមួយនឹងដៃគូម្នាក់ ហើយសរសេរព័ត៌មានមួយ ។ សូមអញ្ជើញដៃគូមួយចំនួនឲ្យចែកចាយព័ត៌មានខ្លួនដល់សិស្សក្នុងថ្នាក់ ) ។
កិច្ចការ ៥:២៤-៣២ ( សុំឲ្យសិស្សអានខគម្ពីរនេះរៀង ៗ ខ្លួន ហើយសរសេរព័ត៌មានមួយ ។ សូមអញ្ជើញសិស្សមួយចំនួនឲ្យ ចែកចាយព័ត៌មានខ្លួនដល់សិស្សក្នុងថ្នាក់ ) ។

បន្ទាប់ពីសិស្សចែកចាយព័ត៌មានខ្លួនរួចហើយ សូមសួរថា ៖

យោងតាម កិច្ចការ ៥:២៩ហេតុអ្វីពេត្រុស និងពួកសាវកផ្សេងទៀតបានពោលថា ពួកគាត់បានបន្តប្រកាស នៅក្នុងព្រះនាមរបស់ព្រះយេស៊ូវ ទោះជាមានសេចក្ដីបង្គាប់មកពីក្រុមប្រឹក្សានោះយ៉ាងណាក៏ដោយ ?

សូមសរសេរប្រយោគមិនពេញលេញខាងក្រោមនេះនៅលើក្ដារខៀន ៖ប្រសិនបើយើងជ្រើសគោរពតាមព្រះជាងមនុស្ស នោះ …

ចេញពី អ្វីដែលយើងបានអាននៅក្នុង កិច្ចការ ៤–៥តើវិធីមួយចំនួនដែលយើងអាចបំពេញឃ្លានេះមានអ្វីខ្លះ ? ( បន្ទាប់ពីសិស្សបានឆ្លើយហើយ សូមបំពេញសេចក្ដីថ្លែងការណ៍នៅលើក្ដារខៀន ដូចតទៅ ៖ប្រសិនបើយើងជ្រើសរើសគោរពតាមព្រះជាជាងមនុស្សនោះទ្រង់នឹងគង់នៅជាមួយយើង ) ។
តើព្រះបានគង់នៅជាមួយនឹងពេត្រុស និងពួកសាវកផ្សេងទៀត កាលពួកគាត់គោរពតាមទ្រង់ជាងក្រុមប្រឹក្សានោះតាមរបៀបណាខ្លះ? ( ព្រះបានបំពេញពួកគាត់ដោយព្រះវិញ្ញាណបរិសុទ្ធ [ សូមមើល កិច្ចការ ៤:៨, ៣១ ]ដោយផ្ដល់លទ្ធភាពឲ្យពួកគាត់ធ្វើអព្ភូតហេតុនានា [ សូមមើល កិច្ចការ ៥:១២–១៦ ] ហើយបានបញ្ជូនទេវតារបស់ ទ្រង់ឲ្យនាំពួកគាត់ចេញពីទីឃុំឃាំង [ សូមមើល កិច្ចការ ៥:១៧–២០ ] ) ។
តើអ្នក ឬមនុស្សម្នាក់ដែលអ្នកស្គាល់ធ្លាប់ជ្រើសរើសគោរពតាមព្រះជាងមនុស្សនៅពេលណា ? តើព្រះបានបង្ហាញថា ទ្រង់បានគង់នៅជាមួយនឹងអ្នក ឬបុគ្គលនោះតាមរបៀបណា ?

ចូរសុំឲ្យសិស្សពីរបីនាក់ប្ដូរវេនគ្នាអាននៅក្នុង កិច្ចការ ៥:៣៣-៤២ឲ្យឮៗ ។ សូមអញ្ជើញសិស្សក្នុងថ្នាក់ឲ្យផ្ទៀងតាម រកមើលគំរូបន្ថែមទៀតអំពីរបៀបដែលព្រះអម្ចាស់បានគង់នៅជាមួយនឹងពេត្រុស និងពួកសាវកផ្សេងទៀត ។

សូមចង្អុលបង្ហាញថា យើងបានរៀននៅក្នុង កិច្ចការ ៥:៣៣ ថា ក្រុមប្រឹក្សានោះបានចង់សម្លាប់ពេត្រុស និងយ៉ូហាន ។

យោងតាម ខទី ៤១–៤២តើពួកសាវកបានបន្តស្មោះត្រង់ចំពោះព្រះអម្ចាស់ទោះជាមានការគម្រាមកំហែងនេះបានដោយរបៀបណា ? តើព្រះអម្ចាស់បានគង់នៅជាមួយនឹងពួកគាត់នៅគ្រានោះតាមរបៀបណា ?
តើសេចក្ដីពិតដែលយើងបានស្គាល់ នៅក្នុងមេរៀននេះអាចជួយយើង នៅពេលយើងខិតខំរស់នៅតាមដំណឹងល្អ ហើយចែកចាយវាជាមួយអស់អ្នក ដែលនៅជុំវិញយើងបានដោយរបៀបណា ?

សូមចែកចាយទីបន្ទាល់ពីសេចក្ដីពិតដែលបានបង្រៀននៅថ្ងៃនេះ ហើយអញ្ជើញសិស្សឲ្យអនុវត្តសេចក្ដីពិតទាំងនេះនៅក្នុងជីវិតរបស់ពួកគេ ។

មេរៀនបន្ទាប់ ( កិច្ចការ ៦-១២ )

ចូរសួរដល់សិស្សថា មនុស្សដែលបានស្លាប់ដោយត្រូវបានធ្វើឃាតដោយដំណឹងល្អមានប៉ុន្មាននាក់ដែលពួកគេគិតឃើញ ។ សូមពន្យល់ថា នៅពេលពួកគេសិក្សា កិច្ចការ ៦–១២ នៅសប្ដាហ៍ក្រោយ ពួកគេនឹងរៀនអំពីទុក្ករបុគ្គលពីររូបដ៏ក្លាហានសម្រាប់ព្រះយេស៊ូវគ្រីស្ទ ៖បុគ្គលម្នាក់ជាពួកចិតសិបនាក់ ហើយម្នាក់ទៀតគឺជាសាវកម្នាក់ ។ ចូរសុំឲ្យសិស្សគិតពិចារណាអំពីសំណួរខាងក្រោម ៖ ហេតុអ្វីការនិមិត្តរបស់ពេត្រុសស្ដីពីកូនីលៀសមានសារៈសំខាន់ខ្លាំងម៉្លេះដល់សាសនាចក្រ ? តើមានអ្វីបានកើតឡើងចំពោះសូល ( ក៏ស្គាល់ថាជាប៉ុល ) ដែលបានផ្លាស់ប្ដូរជីវិតរបស់គាត់ ? តើគាត់ខ្វាក់ភ្នែកដោយរបៀបណា ហើយតើព្រះអម្ចាស់បានដឹកនាំនរណាឲ្យទៅធ្វើភ្នែកគាត់ឲ្យមើលឃើញវិញតាមរបៀបណា ?