មេរៀនទី ៩៥
កិច្ចការ ១៨-១៩
សេចក្តីផ្ដើម
ប៉ុលត្រូវពួកសាសន៍យូដាជាច្រើននៅក្រុងកូរិនថូសបដិសេធ ប៉ុន្តែទទួលបានជោគជ័យជាមួយនឹងសាសន៍ដទៃដែលនៅទីនោះ ។ ស្វាមីភរិយារៀបការដ៏ស្មោះត្រង់មួយគូ គឺអ័គីឡា និងព្រីស៊ីល បានជួយអ័ប៉ុឡូសឲ្យយល់ពីផ្លូវរបស់ព្រះ ។ ប៉ុលបានប្រកាសពីព្រះវិញ្ញាណបរិសុទ្ធ បានធ្វើអព្ភូតហេតុ ហើយបានចេញពីក្រុមមនុស្សដ៏គ្មានសណ្ដាប់ធ្នាប់ក្នុងសាលាប្រជុំនៅឯអេភេសូរ ។
យោបល់សម្រាប់ការបង្រៀន
កិច្ចការ ១៨:១-១៧
ប៉ុលប្រកាសដំណឹងល្អនៅក្រុងកូរិនថូស
ចូរអានសំណួរដូចខាងក្រោមនេះឲ្យឮៗ ហើយអញ្ជើញសិស្សឲ្យសរសេរចម្លើយនៅក្នុងសៀវភៅកំណត់ចំណាំក្នុងថ្នាក់របស់ពួកគេ ឬក្នុងសៀវភៅកំណត់ហេតុការសិក្សាព្រះគម្ពីរ ៖
-
តើមានវិធីមួយចំនួនណាខ្លះ ដែលអ្នកអាចចូលរួមនៅក្នុងកិច្ចការរបស់ព្រះអម្ចាស់ ?
-
តើមានឧបសគ្គណាខ្លះ ដែលអ្នកធ្លាប់បានជួប នៅពេលអ្នកព្យាយាមធ្វើកិច្ចការរបស់ព្រះអម្ចាស់ ?
សូមឲ្យសិស្សពីរបីនាក់ចែកចាយចម្លើយរបស់ពួកគេ ។ នៅពេលសិស្សសិក្សា កិច្ចការ ១៨ សូមអញ្ជើញពួកគេឲ្យរកមើលគោលការណ៍មួយ ដែលអាចជួយពួកគេ នៅពេលពួកគេព្យាយាមធ្វើកិច្ចការរបស់ព្រះអម្ចាស់ ។
សូមសង្ខេប កិច្ចការ ១៨:១–៤ ដោយពន្យល់ថា ប៉ុលបានចាកចេញពីទីក្រុងអាថែនទៅកូរិនថូស ជាទីកន្លែងដែលលោកបានបង្រៀនអំពីព្រះយេស៊ូវគ្រីស្ទនៅក្នុងសាលាប្រជុំ ។ ( អ្នកគួរអញ្ជើញសិស្សឲ្យបើកទៅផែនទីក្នុងព្រះគម្ពីរប៊ីប ល.រ. ១៣ « ដំណើររបស់សាវកប៉ុលទៅផ្សាយសាសនា » ហើយស្វែងរកក្រុងអាថែន និងកូរិនថូស ) ។
សូមឲ្យសិស្សម្នាក់អានកិច្ចការ ១៨:៥-៦ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលឧបសគ្គនានា ដែលប៉ុលបានជួបប្រទះ នៅពេលលោកបានបង្រៀនពួកសាសន៍យូដាអំពីព្រះយេស៊ូវគ្រីស្ទនៅកូរិនថូស ។
-
តើឧបសគ្គអ្វីខ្លះដែលប៉ុលបានជួបប្រទះ ?
-
តើប៉ុលបានដាក់ផែនការធ្វើអ្វីខ្លះ ដោយសារពួកសាសន៍យូដានៅក្នុងសាលាប្រជុំនោះបានបដិសេធសារលិខិតរបស់លោក ?
សូមអញ្ជើញឲ្យសិស្សម្នាក់អាន កិច្ចការ ១៨:៧-១០ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម ហើយរកមើលថាតើមានអ្វីបានកើតឡើង ដែលវាបានផ្ដល់ជាការលើកទឹកចិត្តដល់ប៉ុល ។
-
តើមានអ្វីបានកើតឡើងដែលវាបានផ្ដល់ជាការលើកទឹកចិត្តដល់ប៉ុល ?
-
យោងតាម ខទី ១០តើព្រះអម្ចាស់បានសន្យាអ្វីខ្លះដល់ប៉ុល ប្រសិនបើលោកបានប្រកាសដំណឹងល្អ ?
-
តើយើងអាចរៀនពីគោលការណ៍អ្វីខ្លះ នៅក្នុងខគម្ពីរទាំងនេះ អំពីអ្វីដែលព្រះអម្ចាស់នឹងធ្វើសម្រាប់ជនដែលធ្វើកិច្ចការរបស់ទ្រង់ដោយសក្ដិសម ? ( សិស្សអាចនឹងប្រើពាក្យផ្សេងៗ ប៉ុន្តែចូរប្រាកដថា ពួកគេគួរស្គាល់គោលការណ៍ដូចខាងក្រោមនេះ ៖ប្រសិនបើយើងរស់នៅដោយសក្ដិសម នោះព្រះអម្ចាស់នឹងគង់នៅជាមួយយើង កាលយើងធ្វើកិច្ចការរបស់ទ្រង់ )។
-
ហេតុអ្វីវាជារឿងយ៉ាងសំខាន់ដើម្បីដឹងថា ព្រះអម្ចាស់នឹងគង់នៅជាមួយអ្នក កាលអ្នកធ្វើកិច្ចការរបស់ទ្រង់ ?
ចូរសុំសិស្សម្នាក់ឲ្យអានឮៗនូវសេចក្ដីថ្លែងការណ៍ដូចខាងក្រោមដោយប្រធាន ថូម៉ាស អេស ម៉នសុន ៖
« ឥឡូវនេះ អ្នកទាំងអស់គ្នាមួយចំនួនអាចមានការខ្មាស់អៀនពីធម្មជាតិ ឬគិតថាខ្លួនឯងគ្មានសមត្ថភាពគ្រប់គ្រាន់ ដើម្បីឆ្លើយតបដោយវិជ្ជមានទៅនឹងការហៅបម្រើ ។ សូមចងចាំថា នេះ … គឺជាកិច្ចការរបស់ព្រះអម្ចាស់ ហើយពេលយើងស្ថិតនៅក្នុងកិច្ចការរបស់ព្រះអម្ចាស់ នោះយើងនឹងទទួលបានជំនួយពីព្រះអម្ចាស់ ។ ចូរចាំថា ព្រះអម្ចាស់នឹងដុសខាត់ខ្នងដើម្បីរែកបន្ទុក ដែលនឹងដាក់មកលើខ្នងនោះ » ( « To Learn, to Do, to Be »Ensign ឬ លីអាហូណា ខែ វិច្ឆិកា ឆ្នាំ ២០០៨ ទំព័រ ៦២ ) ។
-
តើនៅពេលណា ដែលព្រះអម្ចាស់បានគង់នៅជាមួយអ្នកនៅពេលអ្នកបានធ្វើកិច្ចការរបស់ទ្រង់ ? តើអ្នកបានដឹងថាទ្រង់គង់នៅជាមួយអ្នកដោយរបៀបណា ?
សូមសង្ខេប កិច្ចការ ១៨:១១–១៧ ដោយពន្យល់ថា ប៉ុលបានបន្តផ្សព្វផ្សាយនៅក្នុងកូរិនថូសអស់រយៈពេលមួយឆ្នាំកន្លះ ( ហើយទំនងជាសរសេរសំបុត្ររបស់លោកទៅកាន់ពួកថែស្សាឡូនីចនៅគ្រានេះ ) ។ កាលលោកនៅក្នុងកូរិនថូស មានពួកយូដាមួយក្រុមបានព្យាយាមធ្វើឲ្យប៉ុលមានទោស ចំពោះអ្វីដែលលោកកំពុងបង្រៀន ប៉ុន្តែអ្នកតំណាងផ្នែកច្បាប់បានបដិសេធករណីនេះ ។
កិច្ចការ ១៨:១៨-២៨
អ័គីឡា និង ព្រីស៊ីល បានជួយអ័ប៉ុឡូសឲ្យយល់ពីមាគ៌ារបស់ព្រះ
សូមសង្ខេប កិច្ចការ ១៨:១៨–២៣ ដោយពន្យល់ថា មានស្វាមីភរិយាមួយគូ គឺអ័គីឡា និងព្រីស៊ីល បានអមដំណើរប៉ុលទៅអេភេសូរ ។ ប៉ុលបានធ្វើដំណើរទៅយេរូសាឡិម រួចហើយទៅភាគខាងជើងអាន់ទីយ៉ូក ដោយទុកឲ្យស្វាមីភរិយាគូនេះនៅអេភេសូរ ។ នៅអាន់ទីយ៉ូក លោកបានបញ្ចប់ដំណើរផ្សាយសាសនាជាលើកទីពីររបស់លោក ដែលមានរយៈពេលបីខែ ហើយមានចម្ងាយផ្លូវប្រមាណជា ៤,៨២៨ គីឡូម៉ែត្រ ។ បន្ទាប់មកមិនយូរប៉ុន្មាន លោកបានចាកចេញពីអាន់ទីយ៉ូក ហើយបានចាប់ផ្ដើមដំណើរផ្សាយសាសនាលើកទីបីរបស់លោក ដោយធ្វើដំណើរទៅតាមសាខាដែលលោកបានស្ថាបនាកាលពីមុន ហើយពង្រឹងដល់សមាជិកទាំងឡាយ ។
សូមអញ្ជើញសិស្សម្នាក់ឲ្យអាន កិច្ចការ ១៨:២៤-២៥ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលថាតើមានអ្វីបានកើតឡើងនៅអេភេសូរ បន្ទាប់ពីប៉ុលបានចេញទៅ ។
-
តើមានអ្វីបានកើតឡើងនៅអេភេសូរ បន្ទាប់ពីប៉ុលបានចាកចេញនោះ ?
-
តើអ័ប៉ុឡូសបានយល់អ្វីរួចទៅហើយអំពី « សេចក្តីខាងឯព្រះអម្ចាស់ » ? ( ខទី ២៥ )
-
តើអ័ប៉ុឡូសនៅខ្វះចំណេះដឹងអ្វីខ្លះ ? ( ដោយបាន « ស្គាល់តែបុណ្យជ្រមុជទឹករបស់លោកយ៉ូហាន » [ ខទី ២៥ ] ប៉ុន្តែអ័ប៉ុឡូសនៅខ្វះការយល់ដឹងពីភាពពេញលេញនៃដំណឹងល្អរបស់ព្រះអង្គសង្គ្រោះ ) ។
សូមអញ្ជើញសិស្សម្នាក់ឲ្យអាន កិច្ចការ ១៨:២៦ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលនូវអ្វីដែល អ័គីឡា និងព្រីស៊ីលបានធ្វើ កាលពួកគេបានស្ដាប់ឮការបង្រៀនរបស់អ័ប៉ុឡូស ។
-
តើអ័គីឡា និងព្រីស៊ីលបានធ្វើអ្វីខ្លះ កាលពួកគេបានស្ដាប់ឮការបង្រៀនរបស់អ័ប៉ុឡូស ?
-
តើឃ្លាដែលថាពួកគេ « ពន្យល់ពីផ្លូវព្រះឲ្យរឹតតែច្បាស់ទៅទៀត » មានន័យដូចម្ដេច ? (ខ ២៦) ។ ( អ័គីឡា និងព្រីស៊ីល បានបង្រៀនអ័ប៉ុឡូសបន្ថែមទៀតអំពីព្រះយេស៊ូវគ្រីស្ទ និងដំណឹងល្អរបស់ទ្រង់ ដោយជួយបន្ថែមចំណេះ និងការយល់ដឹងដល់អ័ប៉ុឡូស ) ។
សូមអញ្ជើញឲ្យសិស្សម្នាក់អាន កិច្ចការ ១៨:២៧-២៨ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលភស្ដុតាងថា អ័គីឡា និងព្រីស៊ីលបានជួយអ័ប៉ុឡូសឲ្យយល់ដឹងពីផ្លូវព្រះរឹតតែច្បាស់ ។
-
តើឃ្លាអ្វីនៅក្នុងខគម្ពីរទាំងនេះដែលចង្អុលបង្ហាញថា អ័គីឡា និងព្រីស៊ីលបានជួយអ័ប៉ុឡូសឲ្យយល់ដឹងពីផ្លូវរបស់ព្រះរឹតតែច្បាស់ ?
កិច្ចការ ១៩:១-២០
ប៉ុលផ្តល់អំណោយទានជាព្រះវិញ្ញាណបរិសុទ្ធ ហើយធ្វើអព្ភូតហេតុ
សូមពន្យល់ថា បន្ទាប់ពីប៉ុលបានធ្វើដំណើរទៅកន្លែងជាច្រើន នោះលោកបានត្រឡប់មកអេភេសូរវិញ ។ សូមអញ្ជើញឲ្យសិស្សម្នាក់អាន កិច្ចការ ១៩:២-៦ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាមរកមើលថា តើប៉ុលបានជួយប្រជាជននៅអេភេសូរឲ្យយល់ពីផ្លូវរបស់ព្រះរឹតតែច្បាស់តាមរបៀបណា ។
-
តើគោលលទ្ធិអ្វីទៅ ដែលប៉ុលបានបង្រៀនដល់ពួកសិស្សនៅអេភេសូរឲ្យយល់រឹតតែច្បាស់នោះ ?
សូមអញ្ជើញសិស្សម្នាក់ឲ្យអានឮៗនូវសេចក្ដីថ្លែងការណ៍ខាងក្រោម ដែលបានបោះពុម្ពឡើងក្រោមការដឹកនាំរបស់ព្យាការី យ៉ូសែប ស្ម៊ីធ ហើយឲ្យសិស្សក្នុងថ្នាក់ស្ដាប់រកហេតុផល ដែលប្រជាជនទាំងនេះត្រូវការបុណ្យជ្រមុជទឹក ៖
« វាទំនងដូចជា … មានពួកនិកាយយូដាមួយចំនួនបានធ្វើបុណ្យជ្រមុជទឹកដូចជាយ៉ូហាន [ បាទីស្ទ ] ប៉ុន្តែភ្លេចប្រាប់ពួកគេថា នឹងមានមនុស្សម្នាក់ផ្សេងទៀតមកតាមក្រោយដោយព្រះនាមរបស់ព្រះយេស៊ូវគ្រីស្ទ ដើម្បីធ្វើបុណ្យជ្រមុជទឹកដោយភ្លើង និងព្រះវិញ្ញាណបរិសុទ្ធ ៖—ដែលវាបានបង្ហាញដល់ពួកអ្នកប្រែចិត្តជឿទាំងនេះថា បុណ្យជ្រមុជទឹកដំបូងរបស់ពួកគេជារឿងមិនស្របច្បាប់នោះទេ ហើយកាលពួកគេបានស្ដាប់ឮរឿងនេះហើយ ពួកគេបានជ្រមុជទឹកដោយរីករាយ ហើយបន្ទាប់ពីមានដៃបានដាក់នៅលើក្បាលពួកគេ នោះពួកគេបានទទួលអំណោយទានស្របតាមការសន្យា » ( « Baptism » ការបោះពុម្ពបានធ្វើឡើងនៅក្នុង Times and Seasons ចុះថ្ងៃទី ១ ខែ កញ្ញា ឆ្នាំ ១៨៤២ ទំព័រ ៩០៤, ការប្រកបពាក្យត្រូវបានកែសម្រួលឲ្យមានលក្ខណៈទំនើប, យ៉ូសែប ស៊្មីធជានិពន្ធនាយកនៅគ្រានោះ ) ។
-
ហេតុអ្វីបានជាមនុស្សមួយចំនួននៅអេភេសូរត្រូវជ្រមុជទឹកជាថ្មី ?
-
តើយើងអាចរៀនពីការពិតណាខ្លះអំពីបុណ្យជ្រមុជទឹកកិច្ចការ ១៩:២–៦ ? ( ទោះបីជាសិស្សអាចនឹងប្រើពាក្យខុសគ្នាក្ដី សូមជួយពួកគេឲ្យស្គាល់ពីសេចក្ដីពិតខាងក្រោមនេះ ៖ពិធីបុណ្យជ្រមុជទឹកត្រូវតែបានធ្វើឡើងដោយអ្នកបម្រើម្នាក់របស់ព្រះដែលមានសិទ្ធិអំណាច ។ ដើម្បីឲ្យពិធីបុណ្យជ្រមុជទឹកមានលក្ខណៈពេញលេញ វាត្រូវអមដោយការទទួលព្រះវិញ្ញាណបរិសុទ្ធ ) ។
ចូរអញ្ជើញសិស្សម្នាក់ឲ្យអានសេចក្ដីថ្លែងការណ៍ដូចខាងក្រោមដោយព្យាការី យ៉ូសែប ស៊្មីធ ៖
« ប្រសិនបើអ្នកពុំបានទទួលពិធីបុណ្យជ្រមុជទឹកដោយការផ្ដាច់បាប ហើយទទួលព្រះវិញ្ញាណបរិសុទ្ធទេនោះ អ្នកដូចជាជ្រមុជទឹកឲ្យបាវខ្សាច់ដូច្នោះដែរ ។ ពិធីបុណ្យជ្រមុជទឹកដោយទឹក គឺជាពិធីបុណ្យជ្រមុជទឹកពាក់កណ្ដាល ហើយវាពុំល្អទេ បើគ្មានពាក់កណ្ដាលទៀត--ដែលជាពិធីបុណ្យជ្រមុជដោយព្រះវិញ្ញាណបរិសុទ្ធ » ( Teachings of Presidents of the Church:Joseph Smith [ ឆ្នាំ ២០០៧], ៩៥) ។
សូមសង្ខេប កិច្ចការ ១៩:៧–១០ ដោយពន្យល់ថា ប៉ុលបានបន្តផ្សព្វផ្សាយនៅអេភេសូរអស់រយៈពេលជាងពីរឆ្នាំ ។
សូមអញ្ជើញឲ្យសិស្សម្នាក់អាន កិច្ចការ ១៩:១១-១២ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថា មានអព្ភូតហេតុអ្វីខ្លះបានកើតឡើងនៅអេភេសូរ ខណៈពេលដែលប៉ុលនៅទីនោះ ។
-
តើព្រះបានធ្វើអព្ភូតហេតុអ្វីខ្លះតាមរយៈប៉ុល ?
-
តើយើងអាចរៀនសេចក្ដីពិតអ្វីខ្លះ នៅក្នុងដំណើររឿងនេះអំពីអ្វីដែលព្រះធ្វើ តាមរយៈពួកអ្នកបម្រើដែលមានសិទ្ធិអំណាចរបស់ទ្រង់ ? ( ដោយប្រើពាក្យសម្ដីផ្ទាល់ខ្លួនរបស់ពួកគេ សិស្សគប្បីបង្ហាញសេចក្ដីពិតមួយស្រដៀងគ្នានឹងគោលការណ៍ខាងក្រោមនេះ ៖វិធីមួយដែលព្រះបង្ហាញព្រះចេស្ដាទ្រង់ គឺតាមរយៈពួកអ្នកបម្រើរបស់ទ្រង់ដែលមានសិទ្ធិអំណាច) ។
សូមអញ្ជើញឲ្យសិស្សម្នាក់អាន កិច្ចការ ១៩:១៣-១៦ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលថា តើមានអ្វីខ្លះបានកើតឡើង កាលពួកយូដាមួយចំនួនបានព្យាយាមបណ្ដេញអារក្សចេញ ដូចជាប៉ុលបានធ្វើ ។
-
តើមានអ្វីខ្លះបានកើតឡើង នៅពេលកូនប្រុសទាំងប្រាំពីររបស់សង្គ្រាជបានព្យាយាមបណ្ដេញវិញ្ញាណអាក្រក់នោះ ?
-
តើវិញ្ញាណអាក្រក់នោះបានស្គាល់នរណា ? តើវិញ្ញាណអាក្រក់នោះពុំបានស្គាល់នរណា ?
-
ហេតុអ្វីវិញ្ញាណអាក្រក់នោះពុំស្គាល់ពួកកូនប្រុសរបស់ស្កេវ៉ា ? ( ដោយសារពួកគេគ្មានសិទ្ធិអំណាចដើម្បីធ្វើការងារបម្រើនៅក្នុងព្រះនាមនៃព្រះយេស៊ូវគ្រីស្ទ ) ។
សូមអញ្ជើញឲ្យសិស្សម្នាក់អាន កិច្ចការ ១៩:១៧-២០ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលថា តើមនុស្សជាច្រើនបានធ្វើអ្វីខ្លះ បន្ទាប់ពីបានរៀនអំពីព្រឹត្តិការណ៍នេះហើយ ។ សូមពន្យល់ថា « ក្បួនដំរា » ( ខទី ១៩) សំដៅទៅលើអំពើអាបធ្មប់ និងអំពើអាក្រក់ផ្សេងទៀត ។
-
តើមនុស្សជាច្រើនបានធ្វើអ្វីខ្លះបន្ទាប់ពីព្រឹត្តិការណ៍នេះ ដើម្បីបង្ហាញថា ពួកគេមានសេចក្តីជំនឿលើព្រះយេស៊ូវគ្រីស្ទ ? ( ពួកគេបានសារភាព ហើយបានលះបង់ទំនៀមទម្លាប់អាក្រក់របស់ខ្លួនដោយការដុតគម្ពីរដែលទាក់ទងនឹងទំនៀមទម្លាប់ទាំងនោះចោល ) ។
-
តើយើងអាចរៀនគោលការណ៍អ្វីខ្លះ ពីក្នុងខគម្ពីរទាំងនេះ អំពីរបៀបបង្ហាញសេចក្ដីជំនឿរបស់យើងលើព្រះយេស៊ូវគ្រីស្ទ ? ( សិស្សអាចនឹងប្រើពាក្យផ្សេងៗ ប៉ុន្តែចូរប្រាកដថា ពួកគេគួរស្គាល់គោលការណ៍ដូចខាងក្រោមនេះ ៖តាមរយៈការសារភាព ហើយការបោះបង់ចោលការអនុវត្តអាក្រក់នានា នោះយើងបង្ហាញសេចក្ដីជំនឿរបស់យើងលើព្រះយេស៊ូវគ្រីស្ទ) ។
-
តើយើងត្រូវមានការលះបង់អ្វីខ្លះ ដើម្បីបោះបង់ចោលអំពើបាបមួយដែលយើងបានសារភាព ?
សូមថ្លែងទីបន្ទាល់ពីសារៈសំខាន់នៃការបង្ហាញសេចក្ដីជំនឿរបស់យើងទៅលើព្រះយេស៊ូវគ្រីស្ទ ដោយពុំគ្រាន់តែសារភាពអំពើបាបរបស់យើងប៉ុណ្ណោះទេ ប៉ុន្តែក៏ត្រូវលះបង់អ្វីៗទាំងអស់ ដែលអាចដឹកនាំយើងត្រឡប់ទៅរកអំពើបាបទាំងនោះផងដែរ ។
សូម អញ្ជើញ សិស្សឲ្យសញ្ជឹងគិតថា តើមានអ្វីខ្លះនៅក្នុងជីវិតរបស់ពួកគេ ដែលព្រះអម្ចាស់សព្វព្រះទ័យឲ្យពួកគេលះបង់ចោល ។ សូមលើកទឹកចិត្តពួកគេឲ្យធ្វើសកម្មភាពតាមការបំផុសគំនិត ដែលពួកគេបានទទួលនៅក្នុងមេរៀននេះ ។
កិច្ចការ ១៩:២១-៤១
អ្នកថ្វាយបង្គំព្រះ ឌីអានក្លែងក្លាយ និយាយជំទាស់នឹងប៉ុល ហើយបានបង្កឲ្យមានភាពចលាចលនៅក្នុងទីក្រុង
សូមសង្ខេប កិច្ចការ ១៩:២១–៤១ ដោយពន្យល់ថា ផ្នែកមួយនៃសេដ្ឋកិច្ចនៅក្រុងអេភេសូរត្រូវបានដឹកនាំដោយការថ្វាយបង្គំព្រះឌីអាន ដែលជាព្រះរបស់ពួករ៉ូម ។ ការផ្សព្វផ្សាយរបស់ប៉ុលជំទាស់ចំពោះការថ្វាយបង្គំព្រះក្លែងក្លាយនេះបានធ្វើឲ្យជាងចម្លាក់រូបសំណាកព្រះឌីអានដែលមានមន្តអាគម ធ្វើការដឹកនាំប្រជាជនឲ្យទាស់នឹងប៉ុល ។ ប្រជាជនបានប្រមូលផ្ដុំគ្នានៅរោងល្ខោននៅក្រុងនោះ ( ដែលអាចដាក់មនុស្សដល់ទៅ ២៤,០០០ នាក់ ) មានភាពច្របូកច្របល់ និងភាពចលាចល ។ ប៉ុលមានបំណងថ្លែងទៅក្រុមមនុស្សនេះ ប៉ុន្តែពួកសិស្ស និងពួកអ្នកដឹកនាំរដ្ឋាភិបាលមួយចំនួនបានបញ្ចុះបញ្ចូលលោកមិនឲ្យចូលទៅក្នុងរោងល្ខោននោះទេ ។ នៅទីបំផុត ស្មៀនក្រុងបាននិយាយនឹងក្រុមនេះ ហើយពួកគេបានបំបែកផ្លូវគ្នា ។ សូមចង្អុលបង្ហាញថា ការការពាររបស់ប៉ុលគឺជាឧទាហរណ៍មួយអំពីរបៀបដែលកិច្ចការរបស់ព្រះនឹងពុំត្រូវបានរារាំង ទោះជាមានការប្រឆាំងតវ៉ារបស់មនុស្សទុច្ចរិតក្ដី ។ ( នៅគ្រានេះហើយនៅអេភេសូរ [ ប្រមាណ គ.ស៥៧] ដែលប៉ុលបានសរសេរកូរិនថូសទី ១ ) ។
សូមបញ្ចប់មេរៀនដោយថ្លែងទីបន្ទាល់អំពីសេចក្ដីពិត ដែលបានបង្រៀននៅក្នុងមេរៀននេះ ។