មេរៀនទី ៩៧
កិច្ចការ ២៣-២៦
សេចក្ដីផ្ដើម
ពួកអ្នកដឹកនាំសាសន៍យូដាបានចោទសួរទៅប៉ុល ហើយពួកសាសន៍យូដាមួយក្រុមបានរួមគំនិតគ្នាចង់សម្លាប់លោក ។ ប៉ុលត្រូវគេនាំខ្លួនទៅជួបស្ដេចសេសារា ហើយលោកទទួលបានការការពារខ្លួនទាស់នឹងការចោទប្រកាន់ខុសឆ្គងនានានៅចំពោះមុខពួកអ្នកដឹកនាំរ៉ូមមួយចំនួន ។ លោកបានតំណាលអំពីការប្រែចិត្តជឿរបស់លោក ហើយបានថ្លែងទីបន្ទាល់អំពីព្រះយេស៊ូវគ្រីស្ទ ។
យោបល់សម្រាប់ការបង្រៀន
កិច្ចការ ២៣-២៥
ប៉ុលត្រូវបានគេបៀតបៀន, កាត់សេចក្ដី ហើយត្រូវគេចាប់ដាក់គុក
ពីមុនថ្នាក់ចាប់ផ្ដើម សូមសរសេរឃ្លាខាងក្រោមនេះនៅលើក្រដាសមួយសន្លឹក ៖បទបញ្ញត្តិ និងពរជ័យរបស់ព្រះ ។ សូមប្រើបង់ស្អិត ឬខ្សែដើម្បីកំណត់តំបន់មួយក្នុងថ្នាក់រៀន ហើយដាក់ក្រដាសនោះនៅលើកម្រាលឥដ្ឋត្រង់តំបន់កំណត់ទុកនេះ ។ នៅពេលថ្នាក់ចាប់ផ្ដើម សូមអញ្ជើញសិស្សម្នាក់ឲ្យឈរនៅក្នុងតំបន់នោះ ដែលជាតំណាងឲ្យបទបញ្ញត្តិ និងពរជ័យរបស់ព្រះ ។
-
នៅពេលយើងខិតទៅជិតព្រះដោយធ្វើតាមបទបញ្ញត្តិ និងការបង្រៀនទាំងឡាយរបស់ទ្រង់ តើពរជ័យមួយចំនួន ដែលយើងអាចទទួលមានអ្វីខ្លះ ?
សូមអញ្ជើញសិស្សឲ្យដើរនៅខាងក្រៅតំបន់ ដែលតំណាងឲ្យបទបញ្ញត្តិ និងពរជ័យរបស់ព្រះ ។
-
តើឥទ្ធិពលមួយចំនួនអ្វីខ្លះ នៅក្នុងពិភពលោកនេះ ដែលអាចអូសទាញមនុស្សម្នាក់ឲ្យងាកចេញ ហើយឈប់រស់នៅស្របតាមបទបញ្ញត្តិ និងការបង្រៀនរបស់ព្រះនោះ ?
-
តើមានអ្វីខ្លះអាចកើតឡើង នៅពេលមនុស្សដកខ្លួនចេញពីព្រះ ?
សូមអរគុណដល់សិស្ស ហើយអញ្ជើញពួកគេទៅកន្លែងអង្គុយវិញ ។ សូមឲ្យសិស្សពិចារណាថា តើពួកគេកំពុងតែដើរទៅទិសដៅមួយណាឥឡូវនេះ ហើយតើពួកគេមានអារម្មណ៍ថា ពួកគេនៅជិត ឬឆ្ងាយពីព្រះវរបិតាសួគ៌ប៉ុណ្ណាដែរ ។ នៅពេលសិស្សសិក្សា កិច្ចការ ២៣–២៦ សូមអញ្ជើញពួកគេឲ្យរកមើលសេចក្ដីពិតដែលនឹងជួយពួកគេ នៅពេលពួកគេបានឃ្លាតឆ្ងាយពីព្រះ និងពរជ័យទាំងឡាយរបស់ទ្រង់ ។
សូមរំឭកសិស្សថា ប៉ុលត្រូវបានគេចាប់ខ្លួននៅខាងក្រៅព្រះវិហារបរិសុទ្ធនៅក្រុងយេរូសាឡិម ហើយបាននាំទៅជួបនឹងពួកអ្នកដឹកនាំសាសន៍យូដា ( សូមមើល កិច្ចការ ២១:៣០–៣៣, ២២:២៣–៣០ ) ។ សូមសង្ខេប កិច្ចការ ២៣:១–១០ ដោយពន្យល់ថា ប៉ុលត្រូវពួកអ្នកដឹកនាំសាសន៍យូដាទាំងនេះចោទសួរ ហើយចាប់ដាក់គុក ។
សូមអញ្ជើញសិស្សម្នាក់អាន កិច្ចការ ២៣:១១ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលថា តើមានអ្វីបានកើតឡើងកាលប៉ុលនៅក្នុងគុក ។ សូមអញ្ជើញសិស្សឲ្យរៀបរាប់ពីអ្វីដែលពួកគេរកឃើញ ។
-
តើព្រះអម្ចាស់បានប្រាប់អ្វីខ្លះដល់ប៉ុលនៅក្នុងគុក ?
សូមរំឭកសិស្សអំពីការសន្យាដែលបានកត់ត្រានៅក្នុង កិច្ចការ ១៨:៩–១០ ថាព្រះអម្ចាស់បានគង់នៅជាមួយប៉ុល ហើយការពារលោក កាលលោកបានធ្វើកិច្ចការរបស់ព្រះអម្ចាស់ ។ សូមអញ្ជើញសិស្សឲ្យពិចារណាធ្វើការគូសចំណាំឃ្លា « ព្រះអម្ចាស់បានគង់នៅជាមួយនឹងលោក » ហើយសរសេរ កិច្ចការ ១៨:៩–១០ ជាសេចក្តីយោងបទគម្ពីរនៅរឹមទំព័រក្បែរនឹង ខទី ១១ ។
សូមឲ្យសិស្សម្នាក់អានសេចក្ដីសង្ខេបខាងក្រោមឲ្យឮៗ ៖
នៅក្នុង កិច្ចការ ២៣:១២–២៥:២៧ យើងរៀនថា មេទ័ពរ៉ូមបានចាប់ខ្លួនប៉ុលបញ្ជូនទៅស្ដេចសេសារា ដើម្បីការពារកុំឲ្យពួកសាសន៍យូដាមួយក្រុមមកសម្លាប់លោក ។ ប៉ុលបានប្រកាសអំពីភាពគ្មានទោសរបស់លោកនៅមុខចៅហ្វាយខេត្តរ៉ូមឈ្មោះ ភេលីច ។ ទោះបីជាដឹងថា ប៉ុលគ្មានទោសក្ដី ក៏ភេលីចបានបន្តដាក់ប៉ុលឲ្យជាប់ឃុំនៅក្នុងផ្ទះរយៈពេលពីរឆ្នាំដែរ ។ ភេស្ទុសបានទទួលតំណែងជំនួសភេលីចជាចៅហ្វាយខេត្តរ៉ូមនៅស្រុកយូដា ។ ស្ដេចហេរ៉ូឌអ័គ្រីប៉ាដែលបានគ្រប់គ្រងក្នុងតំបន់មួយនៅទិសឦសាន្តនៃសមុទ្រកាលីឡេបានយាងមកជួបនឹងភេស្ទុស មានបំណងចង់ស្ដាប់អំពីករណីរឿងក្ដីរបស់ប៉ុល ។ ប៉ុលត្រូវគេនាំខ្លួនទៅជួបនឹងស្ដេចហេរ៉ូឌអ័គ្រីប៉ា ។
កិច្ចការ ២៦
ប៉ុលតំណាលប្រាប់អំពីការប្រែចិត្តជឿរបស់លោក ហើយថ្លែងទីបន្ទាល់អំពីព្រះយេស៊ូវគ្រីស្ទនៅមុខស្ដេចហេរ៉ូឌអ័គ្រីប៉ា
សូមឲ្យសិស្សពីរបីនាក់ប្ដូរវេណគ្នាអានឮៗនៅក្នុង កិច្ចការ ២៦:៤-១១ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលថា តើប៉ុលបានពិពណ៌នាអំពីអតីតកាលរបស់លោកដល់ស្ដេចអ័គ្រីប៉ាយ៉ាងដូចម្ដេចដែរ ។
-
តើប៉ុលបានពិពណ៌នារឿងរ៉ាវអតីតកាលរបស់លោកដល់ស្ដេចអ័គ្រីប៉ាយ៉ាងដូចម្ដេចដែរ ?
សូមពន្យល់ថា ក្រោយមកប៉ុលបានរៀបរាប់ប្រាប់អំពីការនិមិត្តរបស់លោកអំពីព្រះអង្គសង្គ្រោះ ។ សូមអញ្ជើញសិស្សម្នាក់អាន កិច្ចការ ២៦:១៦-១៨ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលបេសកកម្ម ដែលព្រះអម្ចាស់បានប្រទានដល់ប៉ុលនៅលើផ្លូវទៅស្រុកដាម៉ាស ។
-
តើបេសកកម្មអ្វីដែលព្រះអម្ចាស់បានប្រទានដល់ប៉ុល ? ( អ្នកគួរណែនាំសិស្សឲ្យគូសចំណាំឃ្លា ដែលពិពណ៌នាអំពីបេសកកម្ម ដែលព្រះអម្ចាស់បានប្រទានដល់ប៉ុល ) ។
សូមពន្យល់ថា នៅក្នុងបរិបទនេះពាក្យថា ទទួលមរតក ( ខទី ១៨ ) សំដៅទៅលើការចូលទៅក្នុងនគរសេឡេស្ទាលនៃព្រះ ។
-
តើអ្វីខ្លះដែលអាចជួយនរណាម្នាក់ងាកចេញពីសេចក្ដីងងឹត និងឥទ្ធិពលនៃសាតាំង ហើយបែរឆ្ពោះទៅរកពន្លឺ និងបទបញ្ញត្តិ និងពរជ័យនៃព្រះវិញនោះ ?
សូមអញ្ជើញសិស្សម្នាក់អាន កិច្ចការ ២៦:១៩-២៣ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថា តើប៉ុលបាននិយាយអ្វីខ្លះ ដែលលោកបានបង្រៀនដល់ទាំងពួកសាសន៍យូដា និងពួកសាសន៍ដទៃត្រូវធ្វើអ្វីខ្លះ ដើម្បីទទួលបានពរជ័យដែលបានលើកឡើងនៅក្នុង ខទី ១៨ ។ អ្នកអាចពន្យល់ថា ឃ្លា « ទាំងប្រព្រឹត្តបែបសំណំនឹងការប្រែចិត្តផង » នៅក្នុង ខទី ២០ អាចមានន័យថា រស់នៅដោយសុចរិតដើម្បីបង្ហាញថា អ្នកបានប្រែចិត្តពិតមែន ។
-
យោងតាម ខទី ២០តើប៉ុលបានបង្រៀនដល់ពួកសាសន៍យូដា និងពួកសាសន៍ដទៃឲ្យធ្វើអ្វីខ្លះ ?
ចូរសរសេរសេចក្ដីថ្លែងការណ៍ពុំពេញលេញដូចខាងក្រោម នៅលើក្ដារខៀន៖ បើយើងប្រែចិត្ត ហើយងាកទៅរកព្រះ…
-
ផ្អែកលើអ្វីដែលយើងរៀននៅក្នុងខទី ១៨ តើអ្នកនឹងបំពេញសេចក្ដីថ្លែងការណ៍នៅលើក្ដារខៀនយ៉ាងដូចម្តេច ? ( សូមសង្ខេបចម្លើយរបស់សិស្សដោយបំពេញប្រយោគនៅលើក្ដារខៀន ដែលមានន័យដូចខាងក្រោមនេះ ៖ ប្រសិនបើយើងប្រែចិត្ត ហើយងាកទៅរកព្រះ នោះយើងអាចយកឈ្នះលើអំណាចរបស់សាតាំងនៅក្នុងជីវិតរបស់យើង ទទួលការអត់ទោសពីអំពើបាបយើង ហើយសក្ដិសមចូលក្នុងនគរសេឡេស្ទាល) ។
ដើម្បីជួយសិស្សឲ្យយល់អំពីគោលការណ៍នេះ សូមអញ្ជើញសិស្សម្នាក់ឲ្យអានសេចក្ដីថ្លែងការណ៍ដូចខាងក្រោមដោយអែលឌើរ នែល អិល អាន់ឌើរសិន នៃកូរ៉ុមនៃពួកសាវកដប់ពីរនាក់ឲ្យឮៗ ( សូមពិចារណាផ្ដល់សំណៅនៃសេចក្ដីថ្លែងការណ៍មួយច្បាប់ដល់សិស្ស ) ៖
« នៅពេលយើងមានបាប យើងងាកចេញពីព្រះ ។ នៅពេលយើងប្រែចិត្ត យើងត្រឡប់មករកព្រះវិញ ។
ការអញ្ជើញឲ្យប្រែចិត្តគឺកម្រជាសំឡេងមួយនៃការដាក់ទណ្ឌកម្មណាស់ ផ្ទុយទៅវិញវាជាសំឡេងអង្វករឲ្យងាកក្រោយ និង ដើម្បី ‹ ត្រឡប់ › ទៅរកព្រះវិញ [ សូមមើល ហេលេមិន ៧:១៧ ] ។ វាគឺជាការដង្ហោយហៅរបស់ព្រះវរបិតាដែលពេញដោយក្តីស្រឡាញ់ និង ព្រះរាជបុត្រាបង្កើតតែមួយរបស់ទ្រង់ ដើម្បីធ្វើឲ្យយើងក្លាយជាមនុស្សដែលលើសពីអ្វីដែលជាខ្លួនយើង ដើម្បីឈានជើងឡើងទៅផ្លូវមួយដែលខ្ពស់ជាងនេះនៃជីវិតនេះ ដើម្បីផ្លាស់ប្តូរ ហើយទទួលអារម្មណ៍នៃសុភមង្គលក្នុងការគោរពព្រះបញ្ញត្តិ » ( « Repent… That I May Heal You »Ensign ឬLiahona ខែ វិច្ឆិកា ឆ្នាំ ២០០៩ ទំព័រ ៤០ ) ។
-
យោងតាមអែលឌើរ អាន់ឌើរសិន តើយើងទទួលបានអ្វីខ្លះ នៅពេលយើងប្រែចិត្ត ហើយត្រឡប់ទៅរកព្រះវរបិតាសួគ៌ និងព្រះយេស៊ូវគ្រីស្ទវិញ ?
នៅពេលសិស្សបន្តសិក្សា កិច្ចការ ២៦ សូមអញ្ជើញសិស្សឲ្យរកមើលអ្វីដែលបានរារាំងភេស្ទុស និងស្ដេចអ័គ្រីប៉ាពីការប្រែចិត្ត ពីការងាកទៅរកព្រះ និងការប្រែចិត្តជឿព្រះយេស៊ូវគ្រីស្ទនោះ។ ចូរសរសេរសេចក្ដីថ្លែងការណ៍ពុំពេញលេញដូចខាងក្រោមនៅលើក្ដារខៀន៖ ដើម្បីប្រែចិត្តជឿលើព្រះយេស៊ូវគ្រីស្ទ …
សូមចែកសិស្សជាគូ ។ សូមអញ្ជើញសិស្សម្នាក់ឲ្យអាន កិច្ចការ ២៦:២៤-២៨ជាមួយដៃគូរបស់ពួកគេ ។ សូមឲ្យពួកគេប្រាប់ ហើយប្រៀបធៀបវិធីដែលភេស្ទុស និងស្ដេចអ័គ្រីប៉ាបានមានប្រតិកម្មចំពោះការបង្រៀន និងទីបន្ទាល់របស់ប៉ុលអំពីព្រះយេស៊ូវគ្រីស្ទ ។ នៅពេលសិស្សអាន ហើយពិភាក្សាជាមួយដៃគូខ្លួន សូមចម្លង តារាង ខាងក្រោមនេះដាក់នៅលើក្ដារខៀន ( សូមកុំដាក់សេចក្ដីថ្លែងនៅពីខាងក្រោមក្បាលចំណងជើងនីមួយៗឡើយ ) ៖
|
ប្រតិកម្មចំពោះការបង្រៀនរបស់ប៉ុល | |
|---|---|
|
ភេស្ទុស |
ស្ដេច អ័គ្រីប៉ា |
|
និយាយក្នុងសំឡេងខ្លាំងមួយ បាននិយាយថាប៉ុលឆ្កួត បានចោទប្រកាន់ប៉ុលថាឆ្កួតលីលា |
បានបញ្ចុះបញ្ចូលស្ទើរតែក្លាយជាពួកគ្រីស្ទានទៅហើយ |
ក្រោយពីមានពេលគ្រប់គ្រាន់ហើយ សូមឲ្យសិស្សបីបួននាក់ឡើងមកក្ដារខៀន សរសេរចម្លើយដែលពួកគេបានរកឃើញ ( ចម្លើយគួរស្រដៀងគ្នានឹងឃ្លានៅក្នុងតារាងខាងលើ ) ។
-
តើប្រតិកម្មរបស់ភេស្ទុសបង្ហាញឲ្យឃើញ អំពីទស្សនៈរបស់គាត់ទាក់ទងនឹងការបង្រៀនរបស់ប៉ុលយ៉ាងណាខ្លះ ? ( សូមបន្ថែមពាក្យ ឥតជំនឿ ទៅនឹងចម្លើយរបស់សិស្សនៅក្រោមចំណងជើង « ភេស្ទុស » ) ។
-
យោងតាម ខទី ២៧ តើប៉ុលបាននិយាយថា លោកបានដឹងអ្វីខ្លះអំពីស្ដេចអ័គ្រីប៉ា ? ( សូមបន្ថែមពាក្យ បានជឿដល់ពួកព្យាការី នៅក្រោមចំណងជើង « ស្ដេចអ័គ្រីប៉ា » ) ។
-
តើយើងអាចរៀនអ្វីខ្លះ អំពីមតិរបស់ស្ដេចអ័គ្រីប៉ាទៅកាន់ប៉ុលអំពីការតាំងចិត្តរបស់ស្ដេចអ័គ្រីប៉ា ធ្វើជាគ្រីស្ទាន ( សូមមើល ខទី ២៨ ) ? ( សូមបន្ថែមពាក្យ គ្មានឆន្ទៈដើម្បីតាំងចិត្តពេញលេញ នៅក្រោមក្បាលចំណងជើង« ស្ដេចអ័គ្រីប៉ា » ) ។
សូមអញ្ជើញសិស្សម្នាក់អាន កិច្ចការ ២៦:២៩ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលថា តើប៉ុលបានឆ្លើយតបនឹងមតិរបស់ស្ដេចអ័គ្រីប៉ាយ៉ាងដូចម្ដេច កាលទ្រង់មានបន្ទូលថា ឯងនឹងនាំឲ្យយើងត្រឡប់ទៅជាអ្នកគ្រីស្ទានដែរ ។
-
តើប៉ុលមានបំណងចង់បានអ្វីសម្រាប់ស្ដេចអង្គ និងអស់អ្នកដែលបានស្ដាប់ឮការបង្រៀនរបស់លោក ?
-
តើអ្នកគិតថា មានអ្វីខ្លះដែលបានរារាំងភេស្ទុសពីការប្រែចិត្តជឿលើព្រះយេស៊ូវគ្រីស្ទ ?
-
តើអ្នកគិតថា មានអ្វីខ្លះដែលបានរារាំងស្ដេចអ័គ្រីប៉ាពីការប្រែចិត្តជឿ ?
-
តើយើងអាចរៀនអ្វីខ្លះមកពីភេស្ទុស និងស្ដេចអ័គ្រីប៉ា អំពីអ្វីដែលយើងត្រូវធ្វើដើម្បីបានប្រែចិត្តជឿលើព្រះយេស៊ូវគ្រីស្ទ ? ( សិស្សអាចនឹងប្រើពាក្យផ្សេងៗ ប៉ុន្តែចូរប្រាកដថា ពួកគេគួរស្គាល់គោលការណ៍ដូចខាងក្រោមនេះ ៖ដើម្បីប្រែចិត្តជឿលើព្រះយេស៊ូវគ្រីស្ទ យើងត្រូវតែជ្រើសរើសជឿ ហើយតាំងចិត្តរស់នៅតាមដំណឹងល្អឲ្យបានពេញលេញ) ។
ដើម្បីជួយឲ្យយល់គោលការណ៍នេះ ចូរសុំឲ្យសិស្សម្នាក់អានដំណើររឿងខាងក្រោមនេះមកពីប្រធាន ឌៀថើរ អេហ្វ អុជដូហ្វ នៃគណៈប្រធានទីមួយឲ្យឮៗ ៖
« មានបងប្អូនប្រុសពីរនាក់ បានឈរនៅលើច្រាំងថ្មចោតតូចមួយ ដើម្បីគយគន់មើលទឹកដ៏ថ្លាឆ្វង់នៅក្នុងបឹងខៀវស្រងាត់មួយ ។ វាគឺជាកន្លែងមុជទឹកមួយដ៏ល្បីល្បាញ ហើយជារឿយៗបងប្អូនប្រុសទាំងពីរនាក់នេះ បាននិយាយគ្នាពីការលោតចុះទៅក្នុងបឹងនោះ—ជាអ្វីមួយដែលពួកគេបានឃើញអ្នកដទៃធ្វើ ។
ទោះបីពួកគេទាំងពីរនាក់ចង់លោតចុះទៅក្ដី ប៉ុន្តែគ្មាននរណាម្នាក់ចង់លោតទៅមុនឡើយ ។ កម្ពស់នៅច្រាំងថ្មចោតនោះ គឺវាពុំសូវខ្ពស់ប៉ុន្មានទេ ប៉ុន្តែចំពោះក្មេងប្រុសទាំងពីរនាក់នេះ វាហាក់ដូចចម្ងាយនោះកាន់តែកើនឡើង ពេលណាពួកគេបានចាប់ផ្ដើមឱនទេរទៅមុខ—ហើយសេចក្ដីក្លាហានរបស់ពួកគេបានរសាយបាត់មួយរំពេច ។
នៅទីបំផុត មានម្នាក់បានដាក់ជើងម្ខាងរបស់ខ្លួននៅគែមច្រាំងថ្មចោតនោះ ហើយបានរំកិលទៅមុខបន្តិចម្ដងៗ ។ នៅពេលនោះប្អូនប្រុសរបស់គាត់ម្នាក់ទៀតបានខ្សឹបថា ‹ ប្រហែលជាយើងត្រូវចាំរហូតដល់រដូវក្ដៅឆ្នាំក្រោយ › ។
ប៉ុន្តែទម្ងន់របស់ក្មេងប្រុសទីមួយបានទាញគាត់ចុះទៅមុខរួចទៅហើយ ។ គាត់បានតបថា ‹ បងប្រុសខ្ញុំតាំងចិត្តរួចហើយ ! ›
គាត់បានលោតគ្រាំចូលទៅក្នុងបឹងនោះ ហើយបានងើបចេញពីទឹកមកវិញដោយសម្រែកនៃភាពជោគជ័យ ។ ក្មេងប្រុសទីពីរក៏បានលោតទៅតាមភ្លាមដែរ ។ ក្រោយមកទៀតពួកគេទាំងពីរបានអស់សំណើចពីពាក្យចុងក្រោយរបស់ក្មេងប្រុសទីមួយពីមុនលោតចូលទៅក្នុងទឹកថា ៖ « បងប្រុសខ្ញុំតាំងចិត្តហើយ » ។
ការតាំងចិត្តគឺដូចគ្នានឹងការលោតចូលទៅក្នុងបឹងនោះផងដែរ ។ អ្នកអាចតាំងចិត្តធ្វើវា ឬ ក៏ដកថយ ។ អ្នកអាចរំកិលទៅមុខ ឬ ឈរនៅស្ងៀម ។ វាពុំមែនបញ្ចប់ត្រឹមតែពាក់កណ្ដាលផ្លូវនោះឡើយ ។ …
អស់អ្នកណាដែលមានការតាំងចិត្តបែបនេះ អាចរំពឹងទុកថានឹងទទួលបានពរជ័យនៃទីបន្ទាល់អំណរ និង សេចក្ដីសុខសាន្ត ។ ទ្វារនៃស្ថានសួគ៌អាចនឹងបើកឡើងចំពោះពួកគេ ។ …
ភាគច្រើនយើងម្នាក់ៗឈរនៅត្រង់ចំណុចនៃការសម្រេចចិត្តមួយដែលឈរមើលពីលើផ្ទៃទឹកនោះ ។ នេះគឺជាការអធិស្ឋានរបស់ខ្ញុំថា យើងនឹងមានសេចក្ដីជំនឿបោះជំហានទៅមុខ ប្រឈមមុខនឹងសេចក្ដីភ័យខ្លាច និងការមន្ទិលសង្ស័យនានារបស់យើងដោយសេចក្ដីក្លាហាន រួចហើយនិយាយមកខ្លួនឯងថា ‹ ខ្ញុំបានតាំងចិត្តហើយ ! › (« Brother, I’m Committed » Ensign ខែ កក្កដា ឆ្នាំ ២០១១ ទំព័រ ៤, ៥ ) ។
-
តើការតាំងចិត្តដើម្បីរស់នៅតាមដំណឹងល្អដូចគ្នានឹងការលោតចូលទៅក្នុងទឹកដូចម្ដេចដែរ ?
-
យោងតាមប្រធាន អុជដូហ្វ ហេតុអ្វីវាជារឿងដ៏សំខាន់ដែលត្រូវមានការតាំងចិត្តទាំងស្រុង ជាជាង « មានការតាំងចិត្តតែមួយផ្នែក » ដើម្បីរស់នៅតាមដំណឹងល្អនោះ ?
-
តើការតាំងចិត្តរបស់អ្នកដើម្បីរស់នៅតាមបទបញ្ញត្តិ ឬគោលការណ៍នៃដំណឹងល្អបានជួយពង្រឹងដល់ការប្រែចិត្តជឿរបស់អ្នកទៅលើព្រះយេស៊ូវគ្រីស្ទយ៉ាងដូចម្ដេច ? ( សូមពិចារណាធ្វើការចែកចាយឧទាហរណ៍ផ្ទាល់ខ្លួនរបស់អ្នក ) ។
សូមអញ្ជើញសិស្សឲ្យសរសេរជាបញ្ជីបទបញ្ញត្តិ ឬគោលការណ៍នៃដំណឹងល្អមួយ ដែលពួកគេបានគិតថា ពួកគេបានរស់នៅតាមយ៉ាងពេញលេញ ដាក់នៅក្នុងសៀវភៅសរសេរ ឬសៀវភៅកំណត់ត្រាការសិក្សាព្រះគម្ពីររបស់ពួកគេ ។ សូមឲ្យពួកគេពិចារណាពីគោលការណ៍នៃដំណឹងល្អនានា ដែលពួកគេគិតថា « នៅបន្តិចទៀត » ប៉ុន្តែពុំ « យូរទៀត » ( កិច្ចការ ២៦:២៩ ) ពួកគេបានតាំងចិត្តរស់នៅតាម ។ សូមអញ្ជើញសិស្សឲ្យសរសេរគោលដៅមួយអំពីកិច្ចការដែលពួកគេអាចធ្វើ ដើម្បីបង្កើនការយល់ដឹង និងការតាំងចិត្តរបស់ពួកគេចំពោះគោលការណ៍មួយនៅក្នុងចំណោមគោលការណ៍ទាំងនេះ ។ សូមលើកទឹកចិត្តសិស្សឲ្យអធិស្ឋានសូមជំនួយ នៅពេលពួកគេខិតខំប្រែចិត្តជឿលើព្រះយេស៊ូវគ្រីស្ទតាមរយៈការរស់នៅតាមដំណឹងល្អកាន់តែពេញលេញ ។
សូមសង្ខេប កិច្ចការ ២៦:៣០–៣២ ដោយពន្យល់ថា ភេស្ទុស និងស្ដេចអ័គ្រីប៉ាបានដឹងថា ប៉ុលគ្មានកំហុស ហើយចង់ដោះលែងលោក ប៉ុន្តែដោយសារប៉ុលបានប្ដឹងតវ៉ាការចោទប្រកាន់របស់លោកទៅស្ដេចសេសារ នោះពួកគាត់ត្រូវតែបញ្ជូនលោកទៅកាន់ក្រុងរ៉ូម ។
សូមបញ្ចប់ដោយរំឭកឡើងវិញ ហើយថ្លែងទីបន្ទាល់អំពីគោលការណ៍ដែលបានបង្រៀននៅក្នុង កិច្ចការ ២៣-២៦ ។
សេចក្តីពន្យល់ និង ព័ត៌មានសាច់រឿង
កិច្ចការ ២៥:១៣ ។ តើស្ដេចហេរ៉ូឌអ័គ្រីប៉ាជានរណា ?
សម្រាប់តារាងដ៏ជាជំនួយមួយដែលមានបង្ហាញអំពីទំនាក់ទំនងរវាងសមាជិកគ្រួសារមួយចំនួនរបស់ហេរ៉ូឌ ដែលបានលើកឡើងនៅក្នុងព្រះគម្ពីរសញ្ញាថ្មី សូមចូលទៅរកពាក្យ « ហេរ៉ូឌ » នៅក្នុងសេចក្ដីណែនាំដល់បទគម្ពីរទាំងឡាយ ។
« ហេរ៉ូឌអ័គ្រីប៉ាទី ២ ( ក៏ត្រូវបានគេហៅថា ម៉ាកុស ជូលីស អ័គ្រីប៉ា ដែរ ) គឺជាស្ដេចទីប្រាំពីរ និងស្ដេចចុងក្រោយនៅក្នុងតំណរាជវង្សហេរ៉ូឌជាសាសន៍យូដា ។ ទ្រង់បានគ្រប់គ្រងតំបន់ទិសឦសាន្តនៃសមុទ្រកាលីឡេប្រមាណជា គ.ស.៥៥ ទៅ ៩៣ ។ ទ្រង់គឺជាបុត្រានៃស្ដេចហេរ៉ូឌអ័គ្រីប៉ាទី ១ ដែលបានបង្គាប់ឲ្យសម្លាប់យ៉ាកុប ហើយចាប់ខ្លួនពេត្រុសដាក់គុក ( សូមមើល កិច្ចការ ១២:១–៤ ) ជាចៅប្រុសរបស់ហេរ៉ូឌ អាន់ទីប៉ាស ដែលបានកាត់ក្បាលយ៉ូហាន បាទីស្ទ ( សូមមើល ម៉ាថាយ ១៤:១–១២ ) និងជាចៅទួតរបស់ស្ដេចហេរ៉ូឌដ៏អស្ចារ្យ ដែលបានបង្គាប់ឲ្យសម្លាប់ទារកទាំងឡាយនៅភូមិបេថ្លេហិម ( សូមមើល ម៉ាថាយ ២:១៦ ) ។
« នគររបស់អ័គ្រីប៉ាលាតសន្ធឹងទៅភាគខាងជើងនៃព្រំប្រទល់របស់ភេស្ទុស ។ អ័គ្រីប៉ា និងប្អូនស្រីរបស់ទ្រង់ បេរេនីស … បានយាងទៅលេងនឹងភេស្ទុសនៅសេសារា កាលប៉ុលកំពុងជាប់គុកនៅទីនោះ ។ ដោយសារអ័គ្រីប៉ាជាសាសន៍យូដា ដូច្នេះហើយទ្រង់ស្គាល់កិច្ចការរបស់សាសន៍យូដា ច្រើនជាងភេស្ទុសដែលជាសាសន៍រ៉ូម ភេស្ទុសបានសង្ឃឹមថា អ័គ្រីប៉ាអាចជួយលោកឲ្យយល់អំពីការចោទប្រកាន់ទាស់នឹងប៉ុល ហើយជួយពង្រាងលិខិតរបស់លោកទៅស្ដេចសេសារ ( សូមមើល កិច្ចការ ២៥:២៤–២៧, ២៦:៣ ) » ( New Testament Student Manual [ Church Educational System manual ឆ្នាំ ២០១៤ ] ទំព័រ ៣២៦ ) ។
កិច្ចការ ២៦:២៤ ។ « ប៉ុលអើយ ឯងឆ្កួតទេ ឯងរៀនសូត្រជាច្រើនដល់ម៉្លេះ បានជាឆ្កួតហើយ »
ព្យាការី យ៉ូសែប ស្ម៊ីធ បានប្រៀបធៀបការបៀតបៀនដែលលោកបានជួបបន្ទាប់ពីការនិមិត្តដំបូងរបស់លោក ទៅនឹងបទពិសោធន៍ទាំងឡាយរបស់សាវកប៉ុល ( សូមមើល យ៉ូសែប ស៊្មីធ—ប្រវត្តិ ១:២៤–២៥ ) ។ ទាំងប៉ុល និងយ៉ូសែប ស្ម៊ីធ បានឃើញព្រះអង្គសង្គ្រោះ ហើយស្ដាប់ឮព្រះសូរសៀងរបស់ទ្រង់ ។ លោកទាំងពីរបានថ្លែងទីបន្ទាល់ថា ពួកលោកបានឃើញការនិមិត្តមួយ ។ ជាលទ្ធផល លោកទាំងពីរត្រូវបានគេបៀតបៀន ហើយត្រូវគេជេរប្រមាថ ប៉ុន្តែពួកលោកបានបន្តស្មោះត្រង់ចំពោះសាក្សី និងទីបន្ទាល់របស់ពួកលោកអំពីព្រះយេស៊ូវគ្រីស្ទ ។ លើសពីនេះទៅទៀត មានដំណើររឿងជាច្រើនអំពីការនិមិត្តដំបូងរបស់យ៉ូសែប ស្ម៊ីធ ដូចជាដំណើររឿងជាច្រើនអំពីការនិមិត្តរបស់ប៉ុលអំពីព្រះអង្គសង្គ្រោះដែរ ( សូមមើល កិច្ចការ ៩:៣–៩, កិច្ចការ ២២:៦–១១, កិច្ចការ ២៦:១៣–១៨ ) ។ ថ្វីបើមានភាពខុសគ្នាបន្តិចបន្តួចក្ដី ក៏ដំណើររឿងជាច្រើនមានសេចក្ដីពិតសំខាន់ដែលចុះសម្រុងនឹងគ្នា ដែលពួកលោកម្នាក់ៗបានឃើញ ហើយបានសន្ទនានឹងព្រះយេស៊ូវគ្រីស្ទដែរ ។
កិច្ចការ ២៦:២៨ ។ « ឯងនឹងនាំឲ្យយើងត្រឡប់ទៅជាអ្នកគ្រីស្ទានដែរ »
កាលកំពុងបម្រើជាសមាជិកម្នាក់នៃពួកចិតសិប អែលឌើរ ប្រូស ស៊ី ហាហ្វិន បានបង្រៀនថា
« ប្រសិនបើយើងត្រូវលះបង់អ្វីៗទាំងអស់ដែលយើងមាន ប៉ុន្ដែយើងគ្រាន់តែផ្ដល់ឲ្យនូវ ភាគច្រើន នៃអ្វីៗទាំងអស់ដែលយើងមាន នោះគឺពុំល្មមគ្រប់គ្រាន់ឡើយ ។ ប្រសិនបើយើង ស្ទើរតែ គោរពតាមបទបញ្ញត្តិ នោះយើង ស្ទើរតែ ទទួលបានពរជ័យដែរ » ( « The Atonement: All for All,»Ensign ឬ Liahona, ខែឧសភា ឆ្នាំ ២០០៤ ទំព័រ ៩៨ ) ។
ប្រធាន ហារ៉ូល ប៊ី លី បានអនុវត្តតាមពាក្យរបស់ស្ដេចអ័គ្រីប៉ាដល់សមាជិកសាសនាចក្រ ដែលចង់ដោះសារអំពីការគោរពតាមបទបញ្ញត្តិ ៖
« ប៊ីស្សពល្អម្នាក់បានលើកឡើងអំពីមតិមួយដ៏គួរឲ្យចាប់អារម្មណ៍អំពីអ្វី ដែលគាត់ហៅថាពាក្យដ៏សោកសៅបំផុត ដែលគាត់ដឹងពីបុរសម្នាក់ដែលមានឋានៈខ្ពស់ ។ គាត់បានអានពាក្យពេចន៍នៅជំនាន់របស់សាវកប៉ុល កាលប៉ុលបានថ្លែងទីបន្ទាល់យ៉ាងអស្ចារ្យអំពីការប្រែចិត្តជឿរបស់លោក នៅចំពោះមុខស្ដេចអ័គ្រីប៉ា ។ ស្តេចអ័គ្រីប៉ាបានតបថា ‹ ឯងនឹងនាំឲ្យយើងត្រឡប់ទៅជាអ្នកគ្រីស្ទានដែរ › ។ (កិច្ចការ ២៦:២៨ ) ។ បន្ទាប់មក ប៊ីស្សពនោះបានពោលថា ‹ ស្ដេចអង្គនេះបានដឹងអំពីសេចក្ដីពិត ប៉ុន្តែទ្រង់ខ្វះសេចក្ដីក្លាហានដើម្បីធ្វើអ្វីដែលតម្រូវឲ្យធ្វើ ។ … ›
« រួចហើយ [ ប៊ីស្សពនេះ ] បានបង្ហាញសញ្ញាពិសេសអំពីរឿងមួយចំនួន ដែលគាត់បានរកឃើញនៅក្នុងវួដរបស់គាត់នៅក្នុងការបង្រៀនដ៏ខ្លី ប៉ុន្តែជាទេសនកថាដ៏មានឥទ្ធិពលអស្ចារ្យ ។ គាត់បានពោលថា ‹ នៅក្នុងការឆ្លើយតបនឹងការអញ្ជើញរបស់លោកចៅហ្វាយថា … មកតាមខ្ញុំចុះ » ( ម៉ាកុស ១០:២១ ) មានសមាជិកមួយចំនួនស្ទើរតែធ្វើតាម ប៉ុន្តែនិយាយថា « ទ្រង់ស្ទើរតែធ្វើឲ្យខ្ញុំមានភាពស្មោះត្រង់ទាំងស្រុង ប៉ុន្តែខ្ញុំត្រូវតែលួចមើលដើម្បីប្រឡងឲ្យជាប់ » › ។ …
« [ ប៊ីស្សពរូបនេះបានបន្តទៀតថា ] ‹ ទ្រង់ស្ទើរតែធ្វើឲ្យខ្ញុំរក្សាថ្ងៃឈប់សម្រាកឲ្យបរិសុទ្ធទៅហើយ ប៉ុន្តែវាសប្បាយដើម្បីលេងកីឡានៅថ្ងៃអាទិត្យ ។
« ‹ ទ្រង់ស្ទើរធ្វើឲ្យខ្ញុំស្រឡាញ់អ្នកជិតខាងរបស់ខ្ញុំទៅហើយ ប៉ុន្តែគាត់ជាមនុស្សខូចខិល ទ្រង់ស្ទើរតែធ្វើឲ្យខ្ញុំចេះអត់ឱនដល់មនុស្សដទៃ ប៉ុន្តែវាជារឿងខុសឆ្គងទាំងស្រុង … ទ្រង់ស្ទើរតែធ្វើឲ្យខ្ញុំចេញទៅបង្រៀនតាមផ្ទះ ប៉ុន្តែធាតុអាកាសនៅខាងក្រៅត្រជាក់ខ្លាំងណាស់នៅយប់នេះ ទ្រង់ស្ទើរតែធ្វើឲ្យខ្ញុំបង់ដង្វាយមួយភាគក្នុងដប់ និងដង្វាយផ្សេងៗទៅហើយ ប៉ុន្តែយើងត្រូវការទូរទស្សន៍ពណ៌ថ្មីមួយ ។ … ស្ទើរតែ ! ស្ទើរតែ ! ស្ទើរតែ !» ( នៅក្នុង Conference Report ខែ មេសា ឆ្នាំ ១៩៦៤ ទំព័រ ២៣-២៤ ) ។