មេរៀនទី ១៣៤
ភីលេម៉ូន
សេចក្តីផ្ដើម
ប៉ុលបានសរសើរដល់ភីលេម៉ូនចំពោះសេចក្ដីជំនឿ និងសេចក្ដីស្រឡាញ់របស់គាត់ចំពោះព្រះអង្គសង្គ្រោះ និងបងប្អូនសមាជិកសាសនាចក្រ ។ ប៉ុលបានទូន្មានដល់ភីលេម៉ូនឲ្យទទួលយកទាសកររបស់គាត់ ឈ្មោះ អូនេស៊ីម ដែលបានរត់គេចខ្លួនទុកជាប្អូនប្រុសក្នុងដំណឹងល្អវិញ ។
យោបល់សម្រាប់ការបង្រៀន
ភីលេម៉ូន ១
ប៉ុលទូន្មានដល់ភីលេម៉ូនឲ្យទទួលយកទាសករដែលបានរត់គេចខ្លួនពីម្ចាស់របស់គាត់ ឈ្មោះ អូនេស៊ីម ទុកជាប្អូនប្រុសក្នុងដំណឹងល្អវិញ
ចូរសុំឲ្យសិស្សនឹកគិតអំពីយុវវ័យនៅក្នុងវួដ ឬសាខារបស់ពួកគេ ។ សូមចង្អុលបង្ហាញថា ក្នុងនាមជាសមាជិកនៃសាសនាចក្រ យើងមានឱកាសដើម្បីប្រាស្រ័យទាក់ទងដោយជិតស្និទ្ធនឹងមនុស្សដែលខុសពីយើង ។
-
តើយុវវ័យនៅក្នុងវួដ ឬសាខារបស់អ្នកខុសពីគ្នាយ៉ាងដូចម្ដេច ? ( សូមរំឭកសិស្សឲ្យនិយាយដោយការគោរពដល់គ្នាទៅវិញទៅមក ) ។
សូមចង្អុលបង្ហាញថា ក្នុងនាមជាសមាជិកនៃសាសនាចក្រ យើងក៏បានជួបប្រទះនឹងមនុស្សថ្មីៗជាញឹកញាប់ផងដែរ ។ ចូរសុំឲ្យសិស្សស្រមៃថា មានមនុស្សថ្មីម្នាក់មកចូលរួមក្នុងវួដ ឬសាខារបស់ពួកគេ ។
-
តើមនុស្សម្នាក់អាចប្រឈមមុខនឹងបញ្ហាទំនាក់ទំនងខាងសង្គមយ៉ាងណា នៅពេលគេមកចូលរួមក្នុងសាសនាចក្រ ឬផ្លាស់ចូលមកក្នុងវួដ ឬសាខាថ្មីមួយនោះ ? ( ប្រសិនបើមានសិស្សណាបានចូលមកក្នុងសាសនាចក្រ ឬបានផ្លាស់ចូលមកវួដ ឬសាខាថ្មីក្នុងឆ្នាំថ្មីៗនេះ សូមអញ្ជើញពួកគេឲ្យពិពណ៌នាអំពីបញ្ហាទំនាក់ទំនងខាងសង្គមនានាដែលពួកគេបានជួបប្រទះ ) ។
សូមឲ្យសិស្សពិចារណាអំពីសំណួរខាងក្រោម ៖
-
តើអ្នកប្រព្រឹត្តនឹងសមាជិកសាសនាចក្រដែលមានឥរិយាបទផ្សេង ចំណាប់អារម្មណ៍ផ្សេង ឬនៅក្នុងក្រុមទំនាក់ទំនងខាងសង្គមផ្សេងពីអ្នកយ៉ាងដូចម្ដេច ?
-
តើអ្នកប្រព្រឹត្តនឹងសមាជិកថ្មីក្នុងវួដ ឬសាខារបស់អ្នកយ៉ាងដូចម្ដេច ?
សូមអញ្ជើញសិស្សឲ្យរកមើលសេចក្ដីពិត នៅពេលពួកគេសិក្សាពីសំបុត្ររបស់ប៉ុលផ្ញើទៅកាន់ភីលេម៉ូន ដែលអាចដឹកនាំពួកគេនៅក្នុងការប្រាស្រ័យទាក់ទងរបស់ពួកគេជាមួយនឹងបងប្អូនសមាជិកសាសនាចក្រ ។
សូមពន្យល់ថា ប៉ុលស្ថិតនៅក្នុងគុកនៅពេលគាត់សរសេរសំបុត្រទៅកាន់ភីលេម៉ូន ដែលប្រហែលជាអ្នកផ្លាស់ប្រែចិត្តជឿជនជាតិក្រិកមកក្នុងសាសនាចក្រ ។ សូមសង្ខេបភីលេម៉ូន ១:១–៣ដោយពន្យល់ថា ប៉ុលបានចាប់ផ្ដើមសំបុត្ររបស់លោកដោយជម្រាបសួរដល់ភីលេម៉ូន និងអ្នកដទៃទៀត រួមទាំងក្រុមជំនុំដែលបានជួបនៅផ្ទះភីលេម៉ូនផងដែរ ។
សូមអញ្ជើញសិស្សម្នាក់ឲ្យអាន ភីលេម៉ូន ១:៤–៧ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលហេតុផលដែលប៉ុលបានសរសើរដល់ភីលេម៉ូន ។ សូមពន្យល់ថា នៅក្នុងបរិបទនេះ ពាក្យថាសេចក្ដីប្រកបសំដៅទៅលើការចូលរួម និងភាពរាក់ទាក់ និងឃ្លា « បានកើតការឡើងឲ្យបានយល់ព្រមតាម » មានន័យថាប្រែក្លាយទៅជាសកម្ម ឬមានឥទ្ធិពលកើតឡើង ។
-
ហេតុអ្វីប៉ុលបានសរសើរដល់ភីលេម៉ូន ? ( ដោយសារសេចក្ដីជំនឿរបស់ភីលេម៉ូន និងសេចក្ដីស្រឡាញ់របស់គាត់ចំពោះព្រះអង្គសង្គ្រោះ និងបងប្អូនសមាជិកសាសនាចក្ររបស់គាត់ ។ អ្នកអាចនឹងចាំបាច់ត្រូវពន្យល់ថា នៅពេលប៉ុលបាននិយាយថា « ចិត្តនៃពួកបរិសុទ្ធបានស្បើយល្ហែដោយសារអ្នក » [ខទី ៧] គាត់មានន័យថា ដួងចិត្តរបស់ពួកគេត្រូវបានធ្វើឲ្យសប្បាយដោយសារភីលេម៉ូន ) ។
សូមអញ្ជើញសិស្សម្នាក់ឲ្យអានឭៗនូវព័ត៌មានដូចខាងក្រោមអំពីស្ថានភាពមួយ ដែលប៉ុលបានថ្លែងនៅក្នុងសំបុត្រនេះ ៖
ភីលេម៉ូនមានអ្នកបម្រើ ឬទាសករម្នាក់ ឈ្មោះថា អូនេស៊ីម ដែលបានរត់គេចខ្លួន ហើយប្រហែលជាបានលួចរបស់អ្វីមួយពីភីលេម៉ូន ( សូមមើលភីលេម៉ូន ១:១៨) ។ ទាសភាព មិនត្រូវបានមើលឃើញថាជាការអាក្រក់នៅក្នុងវប្បធម៌របស់គ្រីស្ទានសាសន៍យូដាក្នុងគម្ពីរសញ្ញាថ្មីទេ ហើយត្រូវបានគាំទ្រដោយច្បាប់រ៉ូម ។ ទណ្ឌកម្មចំពោះទាសករដែលរត់គេចខ្លួន រួមមានទាំងការវាយដំជាទម្ងន់ ឬបោះត្រានៅលើថ្ងាស ឬអាចត្រូវសម្លាប់ចោលទៀតផង ។ បន្ទាប់ពីការរត់គេចខ្លួន អូនេស៊ីម បានទៅជួបនឹងសាវកប៉ុល ។
សូមអញ្ជើញសិស្សម្នាក់ឲ្យអាន ភីលេម៉ូន ១:៨–១២ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាមរកមើលនូវអ្វីដែលប៉ុលបានអង្វរ ឬអង្វរកសុំឲ្យភីលេម៉ូនធ្វើ ។ បើចាំបាច់ សូមពន្យល់ថា នៅក្នុងខទី ៨ពាក្យបង្គាប់មានន័យថាបញ្ជា ហើយពាក្យធ្វើការដែលគួរគប្បីមានន័យថាត្រឹមត្រូវ ឬសម ។
-
តើប៉ុលបានសុំឲ្យភីលេម៉ូនធ្វើអ្វីខ្លះ ?
-
ប្រសិនបើអ្នកស្ថិតនៅក្នុងស្ថានភាពរបស់ភីលេម៉ូន តើអ្នកអាចនឹងមានគំនិត ឬអារម្មណ៍យ៉ាងណាដែរ នៅពេលអ្នកបានទទួលសំណើររបស់ប៉ុល ?
សូមចង្អុលបង្ហាញឃ្លាថា « ដែលខ្ញុំបានបង្កើតក្នុងវេលាជាប់ចំណង » (ខទី ១០) ។ ចូរពន្យល់ថា អត្ថន័យមួយនៃកិរិយាសព្ទបង្កើតគឺដើម្បីផ្ដល់ជីវិតដល់នរណាម្នាក់ ។
-
តើអ្នកគិតថា ប៉ុលចង់មានន័យយ៉ាងណាចំពោះឃ្លានេះ ? ( ខណៈដែលប៉ុលស្ថិតនៅក្នុងគុក នោះលោកបានជួយដល់អូនេស៊ីមឲ្យចាប់ផ្ដើមជីវិតថ្មីក្នុងនាមជាអ្នកដើរតាមព្រះយេស៊ូវគ្រីស្ទមួយរូប ) ។
សូមសង្ខេបភីលេម៉ូន ១:១៣–១៤ដោយពន្យល់ថា ប៉ុលចង់រក្សាអូនេស៊ីមឲ្យស្នាក់នៅជាមួយគាត់ ដើម្បីឲ្យអូនេស៊ីមអាចជួយដល់គាត់ ប៉ុន្ដែប៉ុលមិនចង់ធ្វើដូច្នោះ ដោយគ្មានការយល់ព្រមពីភីលេម៉ូននោះទេ ។
សូមអញ្ជើញសិស្សម្នាក់អាន ភីលេម៉ូន ១:១៥–១៦ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលថាប៉ុលបានលើកទឹកចិត្តភីលេម៉ូនយ៉ាងណាខ្លះ ដើម្បីឲ្យមើលពីទំនាក់ទំនងរបស់គាត់ជាមួយនឹងអ្នកផ្លាស់ប្រែចិត្តជឿថ្មីឈ្មោះ អូនេស៊ីម ។
-
យោងតាមខទី ១៦តើភីលេម៉ូនមើលទៅអូនេស៊ីមយ៉ាងដូចម្ដេច ?
-
ហេតុអ្វីក៏ការមើលទៅអូនេស៊ីមទុកជា « ប្អូនស្ងួនភ្ងា » អាចមានការលំបាកសម្រាប់ភីលេម៉ូន ? ( ចម្លើយដែលអាចទៅរួច អាចរួមមានថា ពួកគេស្ថិតនៅក្នុងឋានៈខាងសង្គម និងខាងសេដ្ឋកិច្ចខុសពីគ្នា ហើយថាអូនេស៊ីមអាចនឹងធ្វើខុសចំពោះភីលេម៉ូនយោងទៅតាមទំនៀមទម្លាប់នៃជំនាន់នោះ ) ។
-
តើយើងអាចរៀនសេចក្ដីពិតអ្វីខ្លះចេញមកពីខទី ១៦អំពីទំនាក់ទំនងរបស់យើងជាមួយគ្នាដោយសារតែដំណឹងល្អ ? ( សូមជួយសិស្សឲ្យប្រាប់ពីសេចក្ដីពិតស្រដៀងគ្នាមួយដូចខាងក្រោម ៖ យើងគឺជាបងប្អូនប្រុសស្រីនៅក្នុងដំណឹងល្អ ។ សូមសរសេរសេចក្ដីពិតនេះនៅលើក្ដារខៀន ) ។
-
តើអ្វីដែលធ្វើឲ្យយើងក្លាយជាបងប្អូនប្រុសស្រីនៅក្នុងដំណឹងល្អ ?
ប្រសិនបើចាំបាច់ សូមពន្យល់ថា យើងទាំងអស់គ្នាគឺជាកូនចៅវិញ្ញាណរបស់ព្រះវរបិតាសួគ៌ ( សូមមើលហេព្រើរ ១២:៩) ហេតុដូច្នេះហើយ យើងគឺជាបងប្អូនប្រុសស្រីនឹងគ្នា ។ លើសពីនោះ តាមរយៈពិធីបរិសុទ្ធនានានៃពិធីបុណ្យជ្រមុជទឹក និងពិធីបញ្ជាក់ នោះការអនុវត្តសេចក្ដីជំនឿជាបន្ដបន្ទាប់ទៅលើព្រះយេស៊ូវគ្រីស្ទ គោរពប្រតិបត្តិ ហើយប្រែចិត្តដោយខ្ជាប់ខ្ជួន នោះយើងនឹងបានកើតឡើងវិញខាងវិញ្ញាណ ។ តាមរបៀបនេះ យើងប្រែក្លាយទៅជាបុត្រា និងបុត្រីរបស់ព្រះយេស៊ូវគ្រីស្ទ ( សូមមើល ម៉ូសាយ ៥:៧) ហេតុដូច្នោះ យើងគឺជាបងប្អូនប្រុសស្រីនៅក្នុងគ្រួសារនៃសេចក្ដីសញ្ញារបស់ទ្រង់ ។ មិនថាភេទ អាយុ ជីវប្រវត្តិ ឬស្ថានភាពសង្គមរបស់យើងយ៉ាងណាទេ យើងប្រែក្លាយទៅជាមានភាពស្មើគ្នានៅក្នុងនគររបស់ព្រះ ។
សូមអញ្ជើញសិស្សម្នាក់ឲ្យអានឮៗនូវសេចក្ដីថ្លែងការណ៍ដូចខាងក្រោមដោយ ប្រធាន ស្ពែនស៊ើរ ដបុលយូ ឃឹមបឹល ។ ចូរសុំឲ្យសិស្សក្នុងថ្នាក់ស្ដាប់រកមើល របៀបដែលសេចក្ដីពិតដែលពួកគេទើបបានរកឃើញ អាចជះឥទ្ធិពលទៅលើរបៀប ដែលយើងប្រព្រឹត្តចំពោះគ្នាទៅវិញទៅមក ជាពិសេសសមាជិកថ្មីក្នុងសាសនាចក្រ ។
« ខ្ញុំតែងតែត្រូវបានលើកតម្កើងដោយការអានសំបុត្រខ្លីរបស់ប៉ុល ទៅកាន់ភេលីម៉ូន វាបង្រៀនយើងនូវគោលការណ៍ និងវិញ្ញាណមួយអំពីភាតរភាពក្នុងដំណឹងល្អ ។ …
« វាគឺជាការបំផុសគំនិត និងអំណរដើម្បីមើលតាមវិញ្ញាណដូចគ្នានេះចំពោះការងារនៅក្នុងសាសនាចក្រ ដើម្បីមើលឃើញពួកបរិសុទ្ធឱបក្រសោបយក និងជួយ និងគាំទ្រ ហើយនិងអធិស្ឋានសម្រាប់អ្នកទាំងឡាយ ដែលចូលមកក្នុងនគរព្រះរបស់យើងប្រចាំថ្ងៃនោះ ។ សូមបន្ដជួយគ្នាទៅវិញទៅមក—ហើយមានមនុស្សកាន់តែច្រើនទៀតនឹងចូលមកក្នុងសាសនាចក្រនេះ ។ សូមស្វាគមន៍ពួកគេ ស្រឡាញ់ ហើយនិងរាក់ទាក់នឹងពួកគេ ។
« គួរឲ្យសោកស្ដាយ មានរឿងខ្លះៗដែលពួកយើងមួយចំនួនមិនបានធ្វើដូច្នោះ ក៏មានដំណើររឿងអំពីមនុស្សមួយចំនួន ដែលបានបដិសេធអស់អ្នកដែលព្រះអម្ចាស់បានទទួលយកដោយពិធីបុណ្យជ្រមុជទឹក ។ ប្រសិនបើព្រះអម្ចាស់ ‹ មិនខ្មាសនឹងហៅគេជាបងប្អូនទេ › (ហេព្រើរ ២:១១) ហេតុដូច្នោះហើយ ចូរយើង … ដឹកដៃបងប្អូនប្រុសស្រីរបស់យើង ហើយលើកពួកគេឡើង ចូលមកក្នុងរង្វង់នៃក្ដីស្រឡាញ់ និងការខ្វល់ខ្វាយរបស់យើង » (« Always a Convert Church: Some Lessons to Learn and Apply This Year » Ensign ខែកញ្ញា ឆ្នាំ ១៩៧៥ ទំព័រ ៤) ។
-
ស្របតាមប្រធាន ឃឹមបឹល តើបងប្អូនប្រុសស្រីគួរប្រព្រឹត្តនឹងគ្នានៅក្នុងដំណឹងល្អយ៉ាងដូចម្ដេច ?
សូមរំឭកដល់សិស្សអំពីសំណួរនានា ដែលពួកគេត្រូវបានអញ្ជើញឲ្យពិចារណានៅខាងដើមមេរៀន ស្ដីអំពីរបៀបដែលពួកគេគួរប្រព្រឹត្តចំពោះសមាជិកសាសនាចក្រដែលទីទៃពីពួកគេ ឬដែលថ្មីនៅក្នុងវួដ ឬសាខារបស់ពួកគេ ។
-
ហេតុអ្វីអ្នកគិតថា វាសំខាន់ដើម្បីយល់ថា យើងគឺជាបងប្អូនប្រុសស្រីនឹងគ្នានៅក្នុងដំណឹងល្អ ?
-
តើអ្នកធ្លាប់ឃើញនរណាម្នាក់ប្រព្រឹត្តចំពោះអ្នកដទៃ ដូចជាបងប្អូនប្រុសស្រីនៅក្នុងដំណឹងល្អនៅពេលណា ?
ដើម្បីរៀបចំសិស្សឲ្យស្គាល់សេចក្ដីពិតបន្ថែម ដែលបានចង្អុលបង្ហាញនៅក្នុងសំបុត្ររបស់ប៉ុល ទៅកាន់ភីលេម៉ូន ចូរសុំឲ្យពួកគេគិតអំពីគ្រាមួយ ដែលមាននរណាម្នាក់អាក់អន់ចិត្ត ឬធ្វើខុសដាក់ពួកគេ ។ សូមអញ្ជើញសិស្សម្នាក់អាន ភីលេម៉ូន ១:១៧ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថាប៉ុលបានទូន្មានភីលេម៉ូនឲ្យធ្វើអ្វីខ្លះ ។
-
តើប៉ុលបានទូន្មានភីលេម៉ូនឲ្យធ្វើអ្វីខ្លះ ?
ចូរពន្យល់ថា ប៉ុលកំពុងសុំទៅភីលេម៉ូនឲ្យទទួលអូនេស៊ីមដូចគ្នានឹងរបៀប ដែលភីលេម៉ូននឹងទទួលប៉ុល ។ នៅក្នុងការណែនាំនៅខាងក្រោមនេះ ភីលេម៉ូននឹងលើកលែងចំពោះការដាក់ទោសធ្ងន់ធ្ងរ លើទាសករដែលរត់គេចធម្មតាត្រូវទទួលនោះ ។
-
ដូចបានចង្អុលបង្ហាញនៅក្នុងការណែនាំរបស់ប៉ុលទៅកាន់ភីលេម៉ូន តើសិស្សទាំងអស់របស់ព្រះយេស៊ូវគ្រីស្ទមានការទទួលខុសត្រូវអ្វីខ្លះ ចំពោះអ្នកទាំងឡាយ ដែលធ្វើឲ្យគេអាក់អន់ចិត្ត ឬធ្វើខុសនឹងគេនោះ ? ( សូមជួយសិស្សឲ្យស្គាល់ពីសេចក្ដីពិតដូចតទៅនេះ ៖ សិស្សរបស់ព្រះយេស៊ូវគ្រីស្ទបង្ហាញសេចក្ដីមេត្តា និងការអភ័យទោសដល់មនុស្សដទៃ ។ សូមសរសេរសេចក្ដីពិតនេះនៅលើក្ដារខៀន ) ។
-
ហេតុអ្វីពេលខ្លះអាចជាការលំបាកដើម្បីបង្ហាញសេចក្ដីមេត្តា និងការអភ័យទោសដល់មនុស្សដទៃ ?
ចូរចង្អុលបង្ហាញថា ការបង្ហាញសេចក្ដីមេត្តា និងការអភ័យទោសដល់មនុស្សដែលបានធ្វើខុសនឹងយើង ពុំចាំបាច់មានន័យថា ត្រូវអនុញ្ញាតឲ្យពួកគេចៀសផុតពីផលវិបាកនៃទង្វើរបស់ពួកគេ ឬមានន័យថា ត្រូវស្ដារឡើងវិញភ្លាមៗនូវការទុកចិត្តរបស់យើងទៅលើពួកគេនោះទេ ។ ផ្ទុយទៅវិញ វាមានន័យថា យើងបង្ហាញក្ដីមេត្តាចំពោះអ្នកដទៃ ហើយឈប់មានការអាក់អន់ចិត្ត ឈប់មានកំហឹង ឬឈប់មានការឈឺចាប់ដែលយើងមាន។ នៅពេលណាសមរម្យ យើងក៏អាចអនុញ្ញាតឲ្យអ្នកទាំងឡាយ ដែលបានធ្វើខុសចំពោះយើងទទួលបាននូវការទុកចិត្តរបស់យើងវិញផងដែរ ។ ថ្វីដ្បិតតែការអភ័យទោសដល់អ្នកដទៃប្រហែលជាលំបាកក្ដី ក៏យើងអាចអធិស្ឋានទៅកាន់ព្រះវរបិតាសួគ៌សុំជំនួយ ហើយទ្រង់នឹងជួយយើង ។
សូមអញ្ជើញសិស្សម្នាក់អាន ភីលេម៉ូន ១:១៨–២១ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថា តើប៉ុលបានស្នើសុំធ្វើអ្វីខ្លះ ជំនួសអូនេស៊ីម ។
-
តើប៉ុលបានស្នើសុំធ្វើអ្វីខ្លះជំនួសអូនេស៊ីម ? ( បង់សងថ្លៃប្រាក់កាសទៅភីលេម៉ូន ដែលភីលេម៉ូនបានបាត់បង់ ដោយសារតែទង្វើរបស់អូនេស៊ីម ) ។
-
តើកិច្ចខិតខំរបស់ប៉ុលជំនួសអូនេស៊ីម ស្រដៀងគ្នានឹងសកម្មភាពរបស់ព្រះអង្គសង្គ្រោះដែលមានជំនួសយើងយ៉ាងដូចម្ដេច ? ( ក៏ដូចជាប៉ុលបានជួយសុំទោសជំនួសអូនេស៊ីម នោះព្រះយេស៊ូវគ្រីស្ទបានជួយសុំទោសជំនួសយើង ហើយបានទូលអង្វរដល់ព្រះវរបិតាសួគ៌ដើម្បីបុព្វហេតុរបស់យើង [ សូមមើលគ. និងស. ៤៥:៣–៥] ។ ព្រះយេស៊ូវគ្រីស្ទក៏បានបង់ថ្លៃបំណុលខាងវិញ្ញាណ ដែលយើងជំពាក់ដោយសារអំពើបាបរបស់យើងផងដែរ ) ។
-
តើការចងចាំអំពីអ្វីដែលព្រះយេស៊ូវគ្រីស្ទបានធ្វើជំនួសយើង អាចជួយយើងឲ្យបង្ហាញក្ដីមេត្តា និងការអភ័យទោសដល់អ្នកដទៃយ៉ាងដូចម្ដេច ?
សូមបំបែកសិស្សជាក្រុមដែលមានគ្នាបី ឬបួននាក់ ( ឬ បញ្ចប់សកម្មភាពនេះរួមគ្នាក្នុងថ្នាក់ ប្រសិនបើអ្នកពុំមានសិស្សល្មមដើម្បីបំបែកជាក្រុមទេនោះ ) ។ សូមផ្ដល់សំណៅនៃការណែនាំដូចខាងក្រោមទៅដល់ក្រុមនីមួយៗ ដូចជាក្រដាសចែកចាយ៖
ព្រះគម្ពីរសញ្ញាថ្មី សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា—មេរៀនទី ១៣៤
ចូរពិភាក្សាអំពីសំណួរដូចខាងក្រោមជាមួយគ្នាក្នុងក្រុមរបស់អ្នក ។ នៅក្នុងចម្លើយរបស់អ្នក ចូរប្រាកដថាមិនត្រូវចែកចាយនូវអ្វីដែលផ្ទាល់ខ្លួន ឬ ឯកជនពេកនោះទេ ។
-
ដូចជាភីលេម៉ូនដែរ តើនៅពេលណា ដែលអ្នកចាំបាច់ត្រូវបង្ហាញក្ដីមេត្តា និងការអភ័យទោសដល់នរណាម្នាក់ទៀត ? តើអ្នកអាចផ្ដល់ក្ដីមេត្តា និងអភ័យទោសដល់មនុស្សម្នាក់នេះយ៉ាងដូចម្ដេច ? តើអ្នកបានទទួលពរ ពេលធ្វើដូច្នោះដោយរបៀបណា ?
-
ដូចជាអូនេស៊ីមដែរ តើនៅពេលណាដែលអ្នកសង្ឃឹមថា អ្នកទទួលបានក្ដីមេត្តា និងការអភ័យទោសមកពីមនុស្សដទៃទៀត ? តើអ្នកស្វែងរកក្ដីមេត្តា និងការអភ័យទោសពីបុគ្គលរូបនេះយ៉ាងដូចម្ដេច ? តើអ្នកបានទទួលពរ ពេលធ្វើដូច្នោះដោយរបៀបណា ?
-
ដូចជាប៉ុល តើនៅពេលណាដែលអ្នកបានបម្រើជាអ្នកសម្រុះសម្រួលរវាងនរណាម្នាក់ដែលស្វែងរកការអភ័យទោស និងមនុស្សម្នាក់ទៀតដែលចាំបាច់ត្រូវផ្ដល់នូវការអភ័យទោស និងក្ដីមេត្តា ? តើអ្នកអាចជួយអ្នកធ្វើខុសឲ្យទទួលបានការអភ័យទោស ហើយជួយមនុស្សដែលរងទុក្ខឲ្យអភ័យទោសដល់អ្នកធ្វើខុសយ៉ាងដូចម្ដេច ?
© 2015 by Intellectual Reserve, Inc. All rights reserved. ។
បន្ទាប់ពីសិស្សបានពិភាក្សាសំណួរទាំងនេះនៅក្នុងក្រុមរបស់ពួកគេហើយ សូមអញ្ជើញសិស្សម្នាក់មកពីក្រុមនីមួយៗ ឲ្យចែកចាយជាមួយនឹងសិស្សក្នុងថ្នាក់អំពីបទពិសោធន៍ផ្ទាល់ខ្លួនពួកគេនៅក្នុងស្ថានភាពមួយនៃស្ថានភាពទាំងនេះ ឬបទពិសោធន៍មួយរបស់សមាជិកនៃក្រុមរបស់ពួកគេ ( ដោយមានការយល់ព្រមពីសមាជិកក្រុម ) ។ ( វិធីសាស្ដ្រជម្រើសគឺត្រូវផ្ដល់សំណៅសំណួរដល់សិស្សម្នាក់ៗ ឬបង្ហាញសំណួរនៅលើក្ដារខៀន ហើយអញ្ជើញសិស្សឲ្យឆ្លើយសំណួរមួយនៅក្នុងសៀវភៅកំណត់ចំណាំក្នុងថ្នាក់ ឬសៀវភៅកំណត់ត្រាការសិក្សាព្រះគម្ពីររបស់ពួកគេ ។ ក្រោយពីផ្ដល់ពេលគ្រប់គ្រាន់ហើយ សូមអញ្ជើញសិស្សមួយចំនួនដែលស្ម័គ្រចិត្តធ្វើដូច្នោះ ឲ្យចែកចាយជាមួយសិស្សក្នុងថ្នាក់អំពីអ្វីដែលពួកគេបានសរសេរ ។
សូមអញ្ជើញសិស្សឲ្យសរសេរនៅក្នុងសៀវភៅកំណត់ចំណាំក្នុងថ្នាក់ ឬសៀវភៅកំណត់ត្រាការសិក្សាព្រះគម្ពីររបស់ពួកគេអំពីអ្វី ដែលពួកគេអាចធ្វើដើម្បីផ្ដល់នូវក្ដីមេត្តា និងការអភ័យទោសដល់អ្នកដទៃ ។ សូមលើកទឹកចិត្តសិស្សឲ្យអនុវត្តតាមអ្វីដែលពួកគេបានសរសេរ ។
សេចក្តីពន្យល់ និង ព័ត៌មានសាច់រឿង
ភីលេម៉ូន ១ ។ ទាសភាព
នៅក្នុងការសរសេរទៅកាន់ភីលេម៉ូន ដើម្បីឲ្យទទួលយកទាសករដែលបានរត់គេចខ្លួន ឈ្មោះ អូនេស៊ីម ប៉ុលពុំបានថ្លែងដោយត្រង់ៗអំពីរឿងទាសភាព ដែលត្រូវបានសង្គមដែលពួកគេរស់នៅទទួលស្គាល់យ៉ាងទូលំទូលាយនោះទេ ។ ទោះជាយ៉ាងណាក៏ដោយ ព្រះអម្ចាស់បានមានបន្ទូលនៅក្នុងវិវរណៈសម័យទំនើបថា « វាមិនត្រូវឲ្យមនុស្សណាមួយ ត្រូវជាប់ជាបាវបម្រើដល់អ្នកណាមួយឡើយ » (គ. និងស. ១០១:៧៩) ។
សំណើររបស់ប៉ុលសុំឲ្យភីលេម៉ូនទទួលយកអូនេស៊ីម « មិនមែនដូចជាបាវបម្រើទៀតឡើយ » (ភីលេម៉ូន ១:១៦) អាចមានន័យថា ប៉ុលចង់ឲ្យភីលេម៉ូនដោះលែងអូនេស៊ីមឲ្យមានសេរីភាព បន្ទាប់មកបញ្ជូនគាត់ឲ្យត្រឡប់មកជួយប៉ុលក្នុងការបម្រើវិញ ( សូមមើលខទី ១៣–១៤) ។
ភីលេម៉ូន ១:៧, ១២, ២០។ « ចិត្តនៃពួកបរិសុទ្ធបានស្បើយល្ហែ ដោយសារអ្នក »
ពាក្យនេះជាភាសាក្រិចបានបកប្រែថាជាចិត្តសំដៅទៅលើផ្នែកខាងក្នុងខ្លួន ។ វាគឺជាសេចក្ដីយោងប្រៀបធៀបទៅនឹងអារម្មណ៍ក្នុងដួងចិត្ត ក្ដីស្រឡាញ់ និងការអាណិតអាសូរក្នុងខ្លួនរបស់មនុស្សម្នាក់ ។ ពាក្យដួងចិត្តពេលខ្លះក៏ត្រូវបានប្រើស្រដៀងគ្នានេះ ។
ភីលេម៉ូន ១:១១។ « គ្មានប្រយោជន៍ » និង « ប្រយោជន៍ »
ឈ្មោះអូនេស៊ីម មានន័យថា ជាជំនួយ ឬ « មានប្រយោជន៍ » (ខទី ១១) ( សូមមើល Arthur A. Rupprecht, « Philemon » នៅក្នុងThe Expositor’s Bible Commentary,កែសម្រួលដោយ Frank E. Gaebelein, វ៉ុលទី ១២ [ ឆ្នាំ ១៩៧៦–១៩៩២ ] ១១:៤៦១ ) ។ អូនេស៊ីម អាចមានន័យថា « ឥតប្រយោជន៍ » (ខទី ១១) ចំពោះភីលេម៉ូន ដោយសារតែអូនេស៊ីម បានរត់គេច ហើយមិនអាចធ្វើកាតព្វកិច្ចរបស់គាត់ ឬដោយសារតែគាត់បានលួចអ្វីមួយពីភីលេម៉ូន នៅពេលគាត់រត់គេចខ្លួននោះ ( សូមមើលខទី ១៨) ។ ទោះជាយ៉ាងណាក៏ដោយ ប៉ុលបាននិយាយថា ចាប់តាំងពីពេលនោះមក អូនីស៊ីម បានក្លាយទៅជា « មានប្រយោជន៍ » ទាំងចំពោះភីលេម៉ូន និងប៉ុល (ខទី ១១) ។ នៅក្នុងករណីរបស់ប៉ុល នោះអូនេស៊ីមអាចនឹងមានប្រយោជន៍ ដោយសារតែគាត់អាចជួយដល់ប៉ុល នៅពេលប៉ុលស្ថិតនៅក្នុងគុក ( សូមមើលខទី ១៣)។