មេរៀនទី ១២៦ ៖ កូល៉ុស

មេរៀនទី ១២៦

កូល៉ុស

សេចក្តីផ្ដើម

ប៉ុលបានបង្រៀនអំពីភាពខ្ពង់ខ្ពស់របស់ព្រះយេស៊ូវគ្រីស្ទ ( ភាពឧត្តុង្គឧត្តម, ភាពអស្ចារ្យ ឬភាពវិសេសវិសាល ) ហើយបានព្រមានទាស់នឹងគោលលទ្ធិខុសឆ្គង ។ លោកបានលើកទឹកចិត្តដល់ពួកបរិសុទ្ធនៅកូល៉ុសឲ្យដាក់សេចក្ដីស្រឡាញ់របស់ពួកគេទៅលើរឿងខាងសួគ៌ា ហើយអភិវឌ្ឍចរិតលក្ខណៈដូចព្រះគ្រីស្ទ ។ ប៉ុលក៏បានណែនាំពួកគេឲ្យប្រកបដោយព្រះគុណ ហើយឈ្លាសវៃនៅក្នុងការប្រាស្រ័យទាក់ទងជាមួយអ្នកដទៃផងដែរ ។

យោបល់សម្រាប់ការបង្រៀន

កូល៉ុស ១–២

ប៉ុលបង្រៀនអំពីភាពខ្ពង់ខ្ពស់របស់ព្រះយេស៊ូវគ្រីស្ទ ហើយបានព្រមានទាស់នឹងគោលលទ្ធិខុសឆ្គង

ការប្រើប្រាស់ក្ដារខៀន

ការប្រើក្តារខៀនដី-ស ឬក្ដារខៀនហ្វឺតឲ្យមានប្រសិទ្ធភាពអំឡុងពេលបង្រៀន អាចរៀបចំសិស្សឲ្យរៀន និងអញ្ជើញឲ្យមានការចូលរួមប្រកបដោយអត្ថន័យ ជាពិសេសសម្រាប់អ្នកទាំងឡាយណាដែលរៀនចូលដោយការមើលរូបភាព ។ នៅលើក្ដារខៀន គ្រូបង្រៀនអាចសង្ខេបចំណុចសំខាន់ ឬគោលការណ៍ទាំងឡាយនៃមេរៀន គូសតារាងគោលលទ្ធិមួយ គូសផែនទី បង្កើតតារាង ដាក់តាំង ឬគូររូបនៃវត្ថុដែលមាននៅក្នុងខគម្ពីរ ឬធ្វើសកម្មភាពចម្រុះដទៃទៀតជាច្រើន ដែលនឹងអភិវឌ្ឍន៍ការរៀនសូត្រ ។

សូមគូររូបភាពដូចខាងក្រោមនេះនៅលើក្ដារខៀន ។

រូបភាព

គំនូរដើមឈើ និងខ្យល់គួច

ប្រសិនបើមានខ្យល់គួចខ្លាំងមកដល់ តើដើមឈើទាំងនេះមួយណា ដែលនឹងទំនងជារលំដួល ? ហេតុអ្វី ?

សូមឲ្យសិស្សម្នាក់អានសេចក្ដីថ្លែងការណ៍ខាងក្រោមនេះឲ្យឮៗមកពីអែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់ ៖ ចូរសុំឲ្យសិស្សក្នុងថ្នាក់ស្ដាប់រកមើលថា ខ្យល់គួចអ្វីដែលយើងចាំបាច់ត្រូវប្រុងប្រយ័ត្ន ។

រូបភាព
អែលឌើរ នែល អិល អាន់ឌើរសិន

« កង្វល់ដែលធំជាងការរញ្ជួយដី និងសង្គ្រាមដែលបានព្យាករណ៍ទុកទៅទៀតនោះគឺ ខ្យល់គួចខាងវិញ្ញាណដែលអាចផ្ដាច់អ្នកចេញពីគ្រឹះខាងវិញ្ញាណរបស់អ្នក ហើយដាក់វិញ្ញាណអ្នកឲ្យនៅទីកន្លែង ដែលអ្នកនឹកស្មានមិនដល់ ពេលខ្លះអ្នកមិនបានទាំងដឹងខ្លួនថា អ្នកត្រូវបានផ្ដាច់ចេញឡើយ (« Spiritual Whirlwinds » Ensign ឬ Liahona ខែ ឧសភា ឆ្នាំ ២០១៤ ទំព័រ ១៨ ) ។

តើឧទាហរណ៍មួយចំនួនអំពីខ្យល់គួចខាងវិញ្ញាណអ្វីខ្លះ ដែលអាចដក ឬបំបែកយើងឲ្យចេញពីសេចក្ដីជំនឿរបស់យើងទៅលើព្រះយេស៊ូវគ្រីស្ទ ? ( អ្នកអាចនឹងចង់អញ្ជើញឲ្យសិស្សសរសេរចម្លើយរបស់ពួកគេនៅលើក្តារខៀនជិតនឹងគំនូរខ្យល់គួច ) ។
ហេតុអ្វីក៏ខ្យល់គួចខាងវិញ្ញាណទាំងនេះ អាចមានបញ្ហាខ្លាំងជាងឧបសគ្គខាងរូបកាយ ដូចជាការរញ្ជួយដី ឬសង្គ្រាមដូច្នេះ ?

សូមអញ្ជើញសិស្សឲ្យពិចារណាអំពីខ្យល់គួចខាងវិញ្ញាណអ្វីខ្លះ ដែលអាចនឹងជះឥទ្ធិពលដល់ពួកគេ ។

ចូរពន្យល់ថា ប៉ុលបានសរសេរសំបុត្រមួយទៅកាន់សមាជិកសាសនាចក្រនៅក្រុងកូល៉ុល ( សំដៅទៅលើប្រជាជនកូល៉ុស ) បន្ទាប់ពីបានដឹងអំពីឥទ្ធិពល និងការបង្រៀនខុសឆ្គងនៅទីនោះ ដែលបានគម្រាមគំហែងដើម្បីផ្តាច់ពួកគេចេញពីសេចក្ដីជំនឿទៅលើព្រះយេស៊ូវគ្រីស្ទ ។ ( អ្នកអាចនឹងចង់អញ្ជើញឲ្យសិស្សរកទីតាំង ក្រុងឡៅឌីសេ ដែលនៅមិនឆ្ងាយប៉ុន្មានពីភាគខាងលិចនៃក្រុងកូល៉ុស នៅលើផែនទីក្នុងព្រះគម្ពីរ ល.រ. ១៣ « ដំណើររបស់សាវកប៉ុលទៅផ្សាយសាសនា » ) ។ សូមអញ្ជើញសិស្សឲ្យរកមើលពីរបៀប ដែលប៉ុលបានព្យាយាមពង្រឹងសេចក្ដីជំនឿលើព្រះគ្រីស្ទរបស់សមាជិកសាសនាចក្រ និងពរជ័យនៃការមានគ្រឹះនៃសេចក្ដីជំនឿរឹងមាំលើព្រះគ្រីស្ទ នៅពេលពួកគេសិក្សាគម្ពីរកូល៉ុស ។

សូមសង្ខេប កូល៉ុល ១:១–១១ដោយពន្យល់ថា បន្ទាប់ពីការជម្រាបសួរដល់ពួកបរិសុទ្ធនៅក្រុងកូល៉ុលហើយ ប៉ុលបានទទួលស្គាល់សេចក្ដីស្មោះត្រង់របស់ពួកគេ ហើយបានពន្យល់ថា ដំណឹងល្អនាំមកនូវផលផ្លែ ឬពរជ័យនៅក្នុងជីវិតនៃអ្នកទាំងឡាយណាដែលទទួលយក ហើយរស់នៅតាមដំណឹងល្អ ។ បន្ទាប់មក ប៉ុលបានបង្រៀនពួកគេអំពីព្រះយេស៊ូវគ្រីស្ទ ។

សូមអញ្ជើញសិស្សបីបួននាក់ឲ្យប្ដូរវេនគ្នាអានឮៗនៅក្នុង កូល៉ុស ១:១២–១៩ ។ សូមឲ្យសិស្សក្នុងថ្នាក់ផ្ទៀងតាមរកមើលសេចក្ដីពិត ដែលប៉ុលបានបង្រៀនអំពីព្រះយេស៊ូវគ្រីស្ទ ។ ( អ្នកអាចនឹងចង់ពន្យល់ថា ពាក្យ « មើលមិនឃើញ » នៅក្នុងខទី ១៥ត្រូវបានបកប្រែមកពីភាសាក្រិច ពាក្យ aoratosដែលអាចមានន័យថា « មើលមិនឃើញ » ផងដែរ ។ សូមកត់ចំណាំថា ហេព្រើរ ១១:២៧បញ្ជាក់ថា ម៉ូសេបានឃើញ « ព្រះដ៏មើលមិនឃើញ » មានន័យថាតាមធម្មតាគឺមើលមិនឃើញ [ សូមមើលផងដែរគ. និងស. ៦៧:១១] ) ។

តើប៉ុលបានបង្រៀនអ្វីខ្លះអំពីព្រះយេស៊ូវគ្រីស្ទ ? ( សូមសរសេរសេចក្ដីពិតនៅលើក្ដារខៀន ក្រោមដើមឈើ ដែលមានឬសចាក់យ៉ាងជ្រៅ ដោយប្រើពាក្យសម្ដីរបស់សិស្ស ) ។ ព្រះយេស៊ូវគ្រីស្ទគឺជាព្រះប្រោសលោះ ជាបុត្រច្បងខាងវិញ្ញាណរបស់ព្រះវរបិតាសួគ៌ ជាព្រះបង្កបង្កើតរបស់សព្វសារពើ ជាសិរសានៃសាសនាចក្រ និងជាតួអង្គដំបូងគេបង្អស់ដែលបានរស់ឡើងវិញ) ។
ហេតុអ្វីក៏អ្នកគិតថា វាសំខាន់សម្រាប់យើងដើម្បីដឹង ហើយជឿលើសេចក្ដីពិតទាំងនេះអំពីព្រះយេស៊ូវគ្រីស្ទ? តើការដឹង និងការស្គាល់សេចក្ដីពិតទាំងនេះអាចពង្រឹងដល់សេចក្ដីជំនឿរបស់យើងទៅលើទ្រង់យ៉ាងដូចម្ដេច ?

សូមយោងទៅពាក្យ ព្រះប្រោសលោះនៅក្នុងសេចក្ដីថ្លែងការណ៍នៅលើក្ដារខៀន ហើយពន្យល់ថា ប៉ុលបានរំឭកដល់ពួកបរិសុទ្ធនៅកូល៉ុស អំពីមូលហេតុដែលពួកគេត្រូវការព្រះប្រោសលោះមួយអង្គ ។

សូមអញ្ជើញសិស្សម្នាក់អាន កូល៉ុស ១:២០–២២ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាមរកមើលនូវអ្វីប៉ុលបានបង្រៀនដល់ពួកបរិសុទ្ធនៅកូល៉ុសអំពីការត្រូវការព្រះប្រោសលោះរបស់ពួកគេ ។

យោងតាមខទី ២១តើនរណាម្នាក់អាចត្រូវពង្រាត់ចេញ ឬបំបែកចេញពីព្រះយ៉ាងដូចម្ដេច ?
តើពាក្យ ផ្សះផ្សា នៅក្នុង ខទី ២០ មានន័យយ៉ាងណា ? ( ដើម្បីនាំមកនូវការចុះសម្រុង ឬសុខដុមរមនាវិញ ) ។
យោងតាមខទី ២០និង២២តើព្រះយេស៊ូវគ្រីស្ទផ្សះផ្សាយើងនឹងព្រះយ៉ាងដូចម្ដេច ? ( ចូរពន្យល់ថា ឃ្លា « តាំងស្ពានមេត្រីដោយសារព្រះលោហិតនៃឈើឆ្កាងទ្រង់ » សំដៅទៅលើដង្វាយធួនរបស់ព្រះយេស៊ូវគ្រីស្ទ ) ។

ចូរពន្យល់ថា ពរជ័យនៃការផ្សះផ្សានឹងព្រះមានលក្ខខណ្ឌ ។ សូមសរសេរឃ្លាខាងក្រោមនៅលើក្តារខៀន ៖ យើងអាចត្រូវបានផ្សះផ្សានឹងព្រះ តាមរយៈដង្វាយធួននៃព្រះយេស៊ូវគ្រីស្ទ ប្រសិនបើ…

សូមអញ្ជើញសិស្សម្នាក់អាន កូល៉ុស ១:២៣ ឲ្យឮៗ ។ ចូរសុំសិស្សក្នុងថ្នាក់ឲ្យផ្ទៀងតាម រកមើលអ្វីដែលតម្រូវឲ្យធ្វើ ដើម្បីបានផ្សាះផ្សានឹងព្រះ ។

តើវាតម្រូវឲ្យមានអ្វីខ្លះនៅចំណែករបស់យើងដើម្បីបានផ្សាះផ្សានឹងព្រះ ?
តើពាក្យ « បានតាំងនៅជាប់លាប់ ហើយមាំមួននៅក្នុងសេចក្ដីជំនឿ » មានន័យយ៉ាងណាចំពោះយើង ? ( ដើម្បីបន្ដនៅខ្ជាប់ខ្ជួនក្នុងសេចក្ដីជំនឿរបស់យើងទៅលើព្រះយេស៊ូវគ្រីស្ទ ) ។
ផ្អែកលើអ្វីដែលយើងបានរៀនមកពី ខទី ២៣ តើអ្នកនឹងបំពេញសេចក្ដីថ្លែងការណ៍នៅលើក្ដារខៀនយ៉ាងដូចម្តេច ? ( សូមបំពេញគោលការណ៍ដូចខាងក្រោមនេះនៅលើក្ដារខៀនដោយប្រើពាក្យរបស់សិស្ស ៖ យើងអាចត្រូវបានផ្សះផ្សានឹងព្រះ តាមរយៈដង្វាយធួននៃព្រះយេស៊ូវគ្រីស្ទ ប្រសិនបើយើងបានតាំងនៅជាប់លាប់ ហើយមាំមួននៅក្នុងសេចក្ដីជំនឿរបស់យើង) ។

ចូរបង្វែរអារម្មណ៍របស់សិស្សមកផ្ដោតលើគំនូរនៅលើក្ដារខៀន ហើយសួរថា

តើអ្នកស្គាល់នរណាម្នាក់ទៀត ដែលប្រៀបដូចជាដើមឈើដែលមានឬសចាក់ជ្រៅ— ដែលបានតាំងនៅជាប់លាប់ ហើយមាំមួននៅក្នុងសេចក្ដីជំនឿរបស់ពួកគេឬទេ ?
តើគំរូរបស់ពួកគេក្លាយជាពរជ័យដល់អ្នកយ៉ាងដូចម្ដេច ?

សូមអញ្ជើញសិស្សឲ្យអានកូល៉ុស ២:៤, ៨ដោយស្ងាត់ស្ងៀម ហើយរកមើលខ្យល់គួចខាងវិញ្ញាណដែលគម្រាមគំហែងដកពួកបរិសុទ្ធនៅកូល៉ុសឲ្យអស់ទាំងឫស ។

តើខ្យល់គួចខាងវិញ្ញាណដែលបានគម្រាមគំហែងដកពួកបរិសុទ្ធនៅកូល៉ុសឲ្យអស់ទាំងឫសមានអ្វីខ្លះ ? ( សូមពន្យល់ថា មានទស្សនវិជ្ជា និងទំនៀមទម្លាប់ជាច្រើនត្រូវបានបង្រៀនដោយមនុស្សមួយចំនួន ដែលកំពុងព្យាយាមកាត់បន្ថយសារៈសំខាន់របស់ព្រះយេស៊ូវគ្រីស្ទ ) ។
ហេតុអ្វីក៏ការជឿទៅលើការបង្រៀនខុសឆ្គង រួមមានទាំងការបង្រៀនដែលកាត់បន្ថយសារៈសំខាន់របស់ព្រះយេស៊ូវគ្រីស្ទ ធ្វើឲ្យវាងាយស្រួលក្នុងការដកទាំងឫសខាងវិញ្ញាណរបស់នរណាម្នាក់ដូច្នេះ ?

សូមអញ្ជើញសិស្សម្នាក់ឲ្យអាន កូល៉ុស ២:៥–៧ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលការទូន្មានរបស់ប៉ុលផ្ដល់ទៅឲ្យពួកបរិសុទ្ធ ដើម្បីជួយពួកគេឲ្យចៀសវាងពីការដឹកនាំឲ្យរង្វេងដោយទស្សនវិជ្ជា និងទំនៀមទម្លាប់ខាងលោកិយនានា ។

តើកូល៉ុស ២:៥–៧បង្រៀនអ្វីខ្លះ ដែលអាចជួយយើងឲ្យចៀសវាងពីការដឹកនាំឲ្យវង្វេង ដោយសារតែទស្សនវិជ្ជាខាងលោកិយ ការបង្រៀនខាងសាសនា ឬទំនៀមទម្លាប់ទាំងឡាយនោះ ? ( សិស្សអាចនឹងប្រើពាក្យផ្ទាល់ខ្លួន ដើម្បីប្រាប់ពីគោលការណ៍មួយ ដែលស្រដៀងនឹងគោលការណ៍ខាងក្រោមនេះ ៖ តាមរយៈការចាក់ឫស ហើយរឹងមាំនៅក្នុងព្រះយេស៊ូវគ្រីស្ទ យើងអាចចៀសវាងពីការដឹកនាំឲ្យវង្វេងដោយទស្សនវិជ្ជា និងទំនៀមទម្លាប់ខាងលោកិយ) ។

សូមសរសេរសំណួរខាងក្រោមនេះនៅលើ ក្តារខៀន ៖

តើអ្នកជឿថា អ្វីខ្លះគឺជារឿងដ៏សំខាន់បំផុតមួយ ដែលយើងអាចធ្វើដើម្បីចាក់ឫស ហើយរឹងមាំនៅក្នុងព្រះយេស៊ូវគ្រីស្ទ ? ហេតុអ្វីអ្នកជឿថា រឿងមួយនេះគឺសំខាន់ខ្លាំងដូច្នេះ ?

សូមបំបែកសិស្សជាក្រុមដែលមានគ្នាបី ឬបួននាក់ ។ សូមអញ្ជើញសិស្សម្នាក់ៗ ឲ្យពន្យល់អំពីចម្លើយរបស់ពួកគេចំពោះសំណួរនៅលើក្ដារខៀនទៅដល់សមាជិកក្រុម ។ បន្ទាប់ពីផ្ដល់ពេលគ្រប់គ្រាន់ហើយ សូមអញ្ជើញសិស្សពីរបីនាក់ឲ្យប្រាប់ពីអ្វីដែលពួកគេបានរៀនពីសមាជិកក្រុម ។

សូមអញ្ជើញសិស្សឲ្យរំឭកមើលខ្យល់គួចខាងវិញ្ញាណផ្ទាល់ខ្លួន ដែលពួកគេបានពិចារណាតាំងពីដើមមេរៀនមក ។ សូមអញ្ជើញពួកគេឲ្យសរសេរនៅក្នុងសៀវភៅកំណត់ចំណាំក្នុងថ្នាក់ ឬសៀវភៅកំណត់ត្រាការសិក្សាព្រះគម្ពីររបស់ពួកគេ អំពីអ្វីដែលពួកគេនឹងធ្វើដើម្បីបន្ដចាក់ឬស ហើយស្ថាបនាយ៉ាងរឹងមាំនៅក្នុងព្រះយេស៊ូវគ្រីស្ទ ហើយចៀសវាងពីការដកទាំងឫសដោយសារខ្យល់គួចខាងវិញ្ញាណ ។

កូល៉ុស ៣–៤

ប៉ុលបានលើកទឹកចិត្តដល់ពួកកូល៉ុសឲ្យដាក់សេចក្ដីស្រឡាញ់របស់ពួកគេទៅលើរឿងខាងសួគ៌ា ហើយឈ្លាសវៃ

សូមសង្ខេបកូល៉ុស ៣–៤ដោយពន្យល់ថា ប៉ុលបានដាស់តឿនដល់ពួកបរិសុទ្ធនៅកូល៉ុសឲ្យឈប់ពីសេចក្ដីមិនសុចរិត ហើយអភិវឌ្ឍចរិតលក្ខណៈដូចព្រះយេស៊ូវគ្រីស្ទ ។ លោកក៏បានលើកទឹកចិត្តពួកគេឲ្យអធិស្ឋាន និងឈ្លាសវៃ ជាពិសេសនៅក្នុងការប្រាស្រ័យទាក់ទងរបស់ពួកគេជាមួយនឹងអ្នកដែលពុំមែនជាគ្រីស្ទសាសនិកផងដែរ ។ បន្ទាប់មក លោកបានបន្ដជម្រាបសួរដល់ពួកអ្នកបម្រើដែលជាបងប្អូនលោកជាច្រើនទៀត រួមមានទាំងលូកាផងដែរ ។

សូមចែកចាយទីបន្ទាល់របស់អ្នកអំពីសេចក្ដីពិតទាំងឡាយ ដែលបានពិភាក្សានៅក្នុងមេរៀននេះ ។

សេចក្តីពន្យល់ និង ព័ត៌មានសាច់រឿង

កូល៉ុស ១:១៥, ១៨ ។ ព្រះយេស៊ូវគ្រីស្ទ គឺជាបងច្បង

ឃ្លា « បងច្បងនៃគ្រប់ទាំងអស់ដែលព្រះបានបង្កើតមក » (កូល៉ុស ១:១៥) ថ្លែងទីបន្ទាល់ថា ព្រះយេស៊ូវគ្រីស្ទគឺជាបងច្បងនៃកូនចៅវិញ្ញាណរបស់ព្រះវរបិតាសួគ៌របស់យើងទាំងអស់គ្នា ។ គណៈប្រធានទីមួយបានបញ្ជាក់ថា

« នៅក្នុងចំណោមកូនចៅវិញ្ញាណរបស់អេឡូហីម [ ព្រះជាព្រះបិតា ] បុត្រច្បងគឺជាព្រះយេហូវ៉ា ឬព្រះយេស៊ូវគ្រីស្ទ ដែលវិញ្ញាណផ្សេងទៀតទាំងអស់គឺជាប្អូន » (« The Father and the Son: A Doctrinal Exposition by the First Presidency and the Quorum of the Twelve Apostles » Ensign ខែ មេសា ឆ្នាំ ២០០២ ទំព័រ ១៨ ) ។

ឃ្លា « បានរស់ពីស្លាប់ឡើងវិញមុនគេបង្អស់ » នៅក្នុង ខទី ១៨មានន័យថាព្រះយេស៊ូវគ្រីស្ទ គឺជាបុគ្គលដំបូងគេនៅលើផែនដីនេះដែលត្រូវបានរស់ឡើងវិញ ។ ទ្រង់ក៏ត្រូវបានហៅថា « ជាផលដំបូងពីពួកអ្នកដែលបានដេកលក់ទៅហើយ » (កូរិនថូសទី១ ១៥:២០) ។

កូល៉ុស១:១៦–១៧ ។ ព្រះយេស៊ូវគ្រីស្ទ « បង្កើតគ្រប់ទាំងអស់ »

អែលឌើរ ដាល្លិន អេក អូក ក្នុងកូរ៉ុមនៃពួកសាវកដប់ពីរនាក់បានពន្យល់ថា ព្រះយេស៊ូវគ្រីស្ទ គឺជាព្រះបង្កបង្កើត ហើយមានអំណាចគ្រប់គ្រងលើការបង្កបង្កើតទាំងអស់របស់ទ្រង់ ។

« នៅក្រោមការដឹកនាំ និងស្របតាមផែនការរបស់ព្រះជាព្រះវរបិតា នោះព្រះយេស៊ូវគ្រីស្ទគឺជាអង្គបង្កបង្កើត ប្រភពនៃពន្លឺ និងជាជីវិតនៃគ្រប់របស់ទាំងអស់ ។ តាមរយៈវិវរណៈសម័យទំនើប យើងមានទីបន្ទាល់អំពីយ៉ូហាន ដែលបានថ្លែងកំណត់ត្រាថា ព្រះយេស៊ូវគ្រីស្ទ ‹ ជាពន្លឺ និងជាព្រះដ៏ប្រោសលោះនៃពិភពលោក ជាព្រះវិញ្ញាណនៃសេចក្ដីពិត ដែលបានយាងមកក្នុងពិភពលោក ពីព្រោះពិភពលោកត្រូវបានកើតមកដោយសារទ្រង់ ហើយនៅក្នុងទ្រង់ គឺជាជីវិតនៃមនុស្សលោក និងជាពន្លឺនៃមនុស្សលោក ។

«‹ ពិភពទាំងឡាយត្រូវបានកើតមកដោយសារទ្រង់ មនុស្សលោកត្រូវបានកើតមកដោយសារទ្រង់ គ្រប់ទាំងអស់ត្រូវបានកើតមកដោយសារទ្រង់ និងតាមរយៈទ្រង់ និងមកពីទ្រង់ › ( គ. និង ស. ៩៣:៩–១០) » (« The Light and Life of the World » Ensign ខែ វិច្ឆិកា ឆ្នាំ ១៩៨៧ ទំព័រ ៦៣; សូមមើលផងដែរ យ៉ូហាន ១:១–៣; ហេព្រើរ ១:២; គ. និង ស. ៧៦:២៤; ម៉ូសេ ១:៣៣) ។

កូល៉ុស ២:៩។ « សេចក្តីពោរពេញរបស់ព្រះ សណ្ឋិតនៅក្នុងទ្រង់ទាំងមានរូបអង្គផង »

ពេលថ្លែងអំពីព្រះយេស៊ូវគ្រីស្ទ ប៉ុលបានថ្លែងទីបន្ទាល់ថា « ដ្បិតមានគ្រប់ទាំងសេចក្តីពោរពេញរបស់ព្រះ សណ្ឋិតនៅក្នុងទ្រង់ទាំងមានរូបអង្គផង » ។ ឃ្លានេះបង្ហាញថា ព្រះយេស៊ូវគ្រីស្ទគឺពេញដោយទេវភាព ហើយមានគ្រប់ព្រះចេស្ដានៃភាពជាព្រះ ( សូមមើលផងដែរម៉ាថាយ ២៨:១៨) ។

គំនិតបន្ថែមសម្រាប់ការបង្រៀន

កូល៉ុស ៣។ ប៉ុលបានលើកទឹកចិត្តពួកកូល៉ុស ឲ្យដាក់សេចក្ដីស្រឡាញ់របស់ពួកគេទៅលើរឿងខាងសួគ៌ា

សូមគូររូបភាពដូចខាងក្រោមនៅលើក្ដារខៀន សូមគូរឲ្យធំល្មមដើម្បីឲ្យសិស្សអាចសរសេរនៅខាងក្នុងរូបភាពនីមួយៗបាន ។ សូមសរសេរពាក្យលះអស់នៅពីខាងលើគំនូរមួយ ហើយសរសេរពាក្យប្រដាប់ខ្លួននៅពីខាងលើគំនូរមួយទៀត ។

រូបភាព

គំនូរ មនុស្សពីរនាក់

សូមពន្យល់ថា ដូចបានកត់ត្រានៅក្នុងកូល៉ុស ៣:១–៤ប៉ុលបានដាស់តឿនពួកបរិសុទ្ធឲ្យផ្ដោតការយកចិត្តទុកដាក់របស់ពួកគេទៅលើរឿងសួគ៌ា ជាជាងរឿងលើផែនដី ហើយបានបង្រៀនថា ព្រះយេស៊ូវគ្រីស្ទនឹងលេចចេញមកនៅក្នុងសិរីល្អនៅការយាងមកជាលើកទីពីររបស់ទ្រង់ ។

ប្រសិនបើអ្នកមានវត្តមាន នៅពេលព្រះអង្គសង្គ្រោះលេចមកក្នុងសិរីល្អ តើអ្នកចង់ពាក់សម្លៀកបំពាក់បែបណា ?
តើអ្នកគិតថា អ្វីនឹងមានសារៈសំខាន់ជាងសម្លៀកបំពាក់ដែលអ្នកនឹងស្លៀកពាក់ ?

ចូរពន្យល់ថា នៅក្នុងកូល៉ុស ៣:៥–១៥ប៉ុលបានបង្រៀនពួកបរិសុទ្ធនៅក្រុងកូល៉ុសអំពីអ្វីដែលពួកគេគួរតែ « លះអស់ » (ខទី ៨) និងអ្វីដែលពួកគេគួរ « ប្រដាប់ខ្លួន » (ខទី ១០) ក្នុងនាមជាពួកសិស្សរបស់ព្រះយេស៊ូវគ្រីស្ទ ។ សូមបំបែកថ្នាក់ជាពីរ ហើយអញ្ជើញឲ្យសិស្សពាក់កណ្ដាលអាន កូល៉ុស ៣:៥–៩ រកមើលនូវអ្វីដែលប៉ុលបានបង្រៀនថា យើងគួរតែលះអស់ ។ សូមអញ្ជើញសិស្សពាក់កណ្ដាលទៀតអាន កូល៉ុស ៣:១០–១៥រកមើលនូវអ្វីដែលប៉ុលបានបង្រៀនថា យើងគួរប្រដាប់ខ្លួន ។ ( អ្នកអាចនឹងចាំបាច់ត្រូវកំណត់ន័យដូចខាងក្រោម ៖ ការសហាយស្មន់ [ ភាពអសីលធម៌ខាងផ្លូវភេទ ], សម្រើបសម្រាល [ លោភ ], និង តណ្ហាអាក្រក់ [ ប៉ងប្រាថ្នាអាក្រក់ ] ) ។

បន្ទាប់ពីផ្ដល់ពេលគ្រប់គ្រាន់ហើយ សូមអញ្ជើញសិស្សជាច្រើនឲ្យសរសេរនៅលើក្ដារខៀនក្នុងគំនូរត្រឹមត្រូវអំពីអ្វីដែលប៉ុលបាននិយាយថា គួរតែលះអស់ និងប្រដាប់ខ្លួននោះ ។

ចូរបង្វែរអារម្មណ៍របស់សិស្សមកផ្ដោតលើគំនូរដែលដាក់ស្លាកថា « លះអស់ » ហើយសួរ ៖

តើអ្នកគិតថា លះអស់របស់ទាំងនេះមានន័យយ៉ាងដូចម្ដេច ?
តើនរណាម្នាក់ដែលបានប្រព្រឹត្តអំពើបាបទាំងនេះ ហើយមិនប្រែចិត្តអាចមានអារម្មណ៍នៅក្នុងវត្តមានរបស់ព្រះអង្គសង្គ្រោះយ៉ាងដូចម្ដេច ? ( សូមមើលផងដែរ មរមន ៩:៣–៤ ) ។

ចូរបង្វែរអារម្មណ៍របស់សិស្សមកផ្ដោតលើគំនូរដែលដាក់ស្លាកថា « ប្រដាប់ខ្លួន » ហើយសួរ ៖

តើនរណាម្នាក់ដែលបានប្រដាប់ខ្លួននូវចរិតលក្ខណៈទាំងនេះ អាចមានអារម្មណ៍នៅក្នុងវត្តមានរបស់ព្រះអង្គសង្គ្រោះយ៉ាងដូចម្ដេច ?
នៅពេលមនុស្សម្នាក់ប្រដាប់ខ្លួនដោយចរិតលក្ខណៈទាំងនេះ តើពួកគេកំពុងប្រែក្លាយដូចជានរណា ? ( ព្រះយេស៊ូវគ្រីស្ទ [ សូមមើលកូល៉ុស ៣:១០] ។ ( សូមសរសេរគោលការណ៍ខាងក្រោមនៅលើក្តារខៀន ៖ នៅពេលយើងលះអស់ទាំងសេចក្ដីឥតសុចរិតចោល ហើយព្យាយាមប្រដាប់ខ្លួនដោយចរិតលក្ខណៈរបស់ព្រះយេស៊ូវគ្រីស្ទ នោះយើងប្រែក្លាយជាបុគ្គលថ្មីដែលដូចជាទ្រង់ )។
តើយើងអាចអភិវឌ្ឍចរិតលក្ខណៈរបស់ព្រះយេស៊ូវគ្រីស្ទទាំងនេះយ៉ាងដូចម្ដេច ?

ចូរសុំឲ្យសិស្សគិតអំពីនរណាម្នាក់ ដែលពួកគេស្គាល់ដែលកំពុងព្យាយាមប្រដាប់ខ្លួនដោយចរិតលក្ខណៈរបស់ព្រះយេស៊ូវគ្រីស្ទ ។ សូមពិចារណាសុំសិស្សមួយចំនួន ឲ្យចែកចាយរបៀបដែលបុគ្គលម្នាក់នេះបានអភិវឌ្ឍចរិតលក្ខណៈទាំងនេះ ។

សូមអញ្ជើញសិស្សឲ្យពិចារណាអំពីអំពើបាបអ្វីខ្លះ ដែលពួកគេចាំបាច់ត្រូវលះអស់ ហើយចរិតលក្ខណៈរបស់ព្រះយេស៊ូវគ្រីស្ទអ្វីខ្លះ ដែលពួកគេចាំបាច់ត្រូវប្រដាប់ខ្លួន ។ ចូរសុំឲ្យសិស្សដាក់គោលដៅមួយដើម្បីលះអស់ទាំងអំពើបាបជាក់លាក់ ហើយប្រដាប់ខ្លួនដោយចរិតលក្ខណៈរបស់ព្រះគ្រីស្ទ ។ ចូរអញ្ជើញសិស្សឲ្យសរសេរគោលដៅរបស់ពួកគេនៅក្នុងសៀវភៅកំណត់ត្រាការសិក្សាព្រះគម្ពីររបស់ពួកគេ ឬនៅលើក្រដាសមួយសន្លឹក ។

ចូរពន្យល់ថា ដូចបានកត់ត្រានៅក្នុងកូល៉ុស ៣:១៦–២៥ប៉ុលបានផ្ដល់ការណែនាំដល់ពួកបរិសុទ្ធកូល៉ុស ដែលនឹងជួយដល់ពួកគេឲ្យប្រែក្លាយដូចជាព្រះគ្រីស្ទ ហើយមានភាពសុខសាន្ដកាន់តែខ្លាំងនៅក្នុងជីវិតរបស់ពួកគេ ។

កូល៉ុស ៤:១៦។ ប៉ុលណែនាំពួកបរិសុទ្ធនៅកូល៉ុសឲ្យអានសំបុត្រមួយមកពីក្រុងឡៅឌីសេ

សូមពន្យល់ថា នៅក្នុងជំនាន់របស់ប៉ុល សាខាទាំងឡាយនៃសាសនាចក្រអានសំបុត្ររបស់ប៉ុលនៅក្នុងក្រុមជំនុំរបស់ពួកគេឮៗរួមគ្នា ។ សំបុត្រទាំងឡាយដែលបានផ្ញើទៅសាខាមួយ ពេលខ្លះត្រូវបានផ្ញើបន្ដទៅសាខាផ្សេងទៀត ដើម្បីឲ្យសមាជិកកាន់តែច្រើនអាចស្ដាប់ឮការបង្រៀនទាំងឡាយ និងការទូន្មានរបស់ប៉ុល ។ សូមអញ្ជើញសិស្សម្នាក់អាន កូល៉ុស ៤:១៦ ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលសំបុត្រខុសគ្នាពីរ ដែលប៉ុលបានសរសេរ ។ សូមឲ្យសិស្សរាយការណ៍ពីអ្វីដែលពួកគេរកឃើញ ។

សូមពន្យល់ថា ព្រះគម្ពីរប៊ីបមាននូវសំបុត្រដែលប៉ុលបានសរសេរទៅកាន់ពួកកូល៉ុស ប៉ុន្តែសំបុត្រមកពីក្រុងឡៅឌីសេ ដែលប៉ុលបានប្រាប់ ឥឡូវបានបាត់ហើយ ហើយមិនមាននៅក្នុងព្រះគម្ពីរប៊ីបសព្វថ្ងៃនេះទេ ព្រមជាមួយនឹងសំបុត្រផ្សេងទៀតរបស់ប៉ុល ( សូមមើលកូរិនថូសទី ១ ៥:៩,អេភេសូរ ៣:៣) ។ ការណ៍នេះចង្អុលបង្ហាញថា ព្រះគម្ពីរប៊ីបសព្វថ្ងៃនេះ ពុំមាននូវបទគម្ពីរទាំងអស់ដែលពួកព្យាការី និងពួកសាវករបស់ព្រះអម្ចាស់បានសរសេរនោះទេ ។