មេរៀនទី ១២០
អេភេសូរ ១
សេចក្តីផ្ដើម
ប៉ុលបានសរសេរសំបុត្រមួយដល់ពួកបរិសុទ្ធនៅក្រុងអេភេសូរ ទាក់ទងនឹងការតែងតាំងពីមុនរបស់ពួកគេដើម្បីទទួលបានដំណឹងល្អ ។ លោកបានសរសេរអំពីការកាន់កាប់ត្រួតត្រាចុងក្រោយ ឬការកាន់កាប់ត្រួតត្រាដែលយើងរស់នៅសព្វថ្ងៃនេះ ។ ប៉ុលបានបង្រៀនថា យើងអាចស្គាល់ព្រះវរបិតាសួគ៌ និងព្រះយេស៊ូវគ្រីស្ទតាមរយៈវិវរណៈ ។
យោបល់សម្រាប់ការបង្រៀន
អេភេសូរ ១:១-៨
ប៉ុលបង្រៀនពួកបរិសុទ្ធថា ពួកគេបានតែងតាំងពីមុនដើម្បីទទួលបានដំណឹងល្អ
សូមអញ្ជើញសិស្សឲ្យពិចារណាពីគ្រាមួយ ដែលពួកគេយល់ព្រមទទួលយកការទទួលខុសត្រូវដ៏សំខាន់មួយ ហើយបានសន្យាថា ពួកគេនឹងបានរង្វាន់សម្រាប់ការបំពេញកិច្ចការនេះ ។
-
នៅពេលកិច្ចការនោះកាន់តែមានការប្រឈមច្រើនឡើងៗ តើចំណេះដឹងថា អ្នកបានធ្លាប់យល់ព្រមចំពោះកិច្ចការនេះ ហើយថាមានមនុស្សម្នាក់បានជឿជាក់ថា អ្នកអាចបំពេញវាបាននោះ បានជួយអ្នកយ៉ាងដូចម្ដេច ?
-
តើអ្នកត្រូវបានពរ ឬ បានរង្វាន់ចំពោះការបំពេញតាមការទទួលខុសត្រូវរបស់អ្នកយ៉ាងដូចម្ដេច ?
សូមពន្យល់ថា នៅក្នុងសំបុត្ររបស់លោក ដែលបានកត់ត្រានៅក្នុង អេភេសូរ ១–៦ សាវកប៉ុលបានលើកឡើងពីពួកបរិសុទ្ធដែលរស់នៅក្រុងអេភេសូរ និងតំបន់ជុំវិញនោះ ។ លោកមានបំណងដើម្បីពង្រឹងដល់អស់អ្នក ដែលជាសមាជិកសាសនាចក្ររួចហើយ ហើយជួយពួកអ្នកប្រែចិត្តជឿថ្មីឲ្យរីកចម្រើនឡើង ក្នុងចំណេះដឹងខាងវិញ្ញាណរបស់ពួកគេ ហើយបន្តស្មោះត្រង់ចំពោះសេចក្ដីសញ្ញារបស់ពួកគេ ។
សូមអញ្ជើញសិស្សបួនប្រាំនាក់ឲ្យប្ដូរវេនគ្នាអានឮៗនៅក្នុង អេភេសូរ ១:៣-៨ ។ ចូរសុំសិស្សក្នុងថ្នាក់ឲ្យផ្ទៀងតាមរកមើលសេចក្ដីពិត ដែលប៉ុលបានបង្រៀនពួកបរិសុទ្ធ ដើម្បីជួយពួកគេឲ្យនៅបន្តស្មោះត្រង់ចំពោះសេចក្ដីសញ្ញារបស់ពួកគេ ។
-
តើសេចក្ដីពិតអ្វីខ្លះ ដែលប៉ុលបានបង្រៀនដើម្បីជួយពួកគេឲ្យនៅបន្តស្មោះត្រង់ ? ( នៅពេលសិស្សឆ្លើយតប អ្នកគួរអញ្ជើញពួកគេឲ្យពន្យល់ថា ការយល់ដឹងពីរបៀបដែលសេចក្ដីពិត ដែលពួកគេលើកមកនិយាយអាចជួយពួកបរិសុទ្ធឲ្យបន្តស្មោះត្រង់ ) ។
-
តើអ្នកគិតថា វាមានន័យយ៉ាងណានៅក្នុង ខទី ៤ ដែលថាព្រះបានរើសយកមនុស្សមួយចំនួន « តាំងពីមុនកំណើតលោកីយ៍មក » ?
សូមពន្យល់ថា ឃ្លានេះ រួមជាមួយនឹងពាក្យ តម្រូវទុកជាមុន និងឃ្លា « ឲ្យទ្រង់បានទទួលយើងជាកូនចិញ្ចឹមដោយសារព្រះយេស៊ូវគ្រីស្ទ » នៅក្នុង ខទី ៥សំដៅទៅលើជនដែលបានរើស ឬបានតែងតាំងពីមុននៅជីវិតមុនផែនដីដើម្បីទទួលដំណឹងល្អ ។ សូមសរសេរសេចក្តីពិតនេះនៅលើក្ដារខៀន ៖ កូនចៅរបស់ព្រះត្រូវបានតែងតាំងពីមុន ដើម្បីទទួលពរជ័យនៃដំណឹងល្អ ។ ការទទួលបានពរជ័យទាំងនេះ គឺជាលក្ខខណ្ឌដែលអាស្រ័យទៅលើសេចក្ដីស្មោះត្រង់របស់យើងនៅក្នុងជីវិតនេះ ។
ដើម្បីជួយសិស្សឲ្យយល់អំពីសេចក្ដីពិតនេះ សូមអញ្ជើញសិស្សម្នាក់អានឲ្យឮៗពីឃ្លាដូចខាងក្រោមនេះ ៖
« ក្នុងពិភពវិញ្ញាណមុនផែនដី ព្រះបានចាត់វិញ្ញាណជាក់លាក់ទាំងឡាយ ឲ្យបំពេញបេសកកម្មជាក់លាក់នានា អំឡុងជីវិតរមែងស្លាប់របស់ពួកគេ ។ ការណ៍នេះត្រូវបានហៅថា ការតែងតាំងជាមុន ។
« ការតែងតាំងជាមុនពុំបានធានាថា បុគ្គលទាំងឡាយនឹងទទួលការហៅបម្រើ ឬ ការទទួលខុសត្រូវជាក់លាក់នោះទេ ។ ឱកាសបែបនោះចូលមកក្នុងជីវិត ជាលទ្ធផលមួយនៃការអនុវត្តយ៉ាងសុចរិតនូវសិទ្ធិជ្រើសរើស គឺដូចជាការតែងតាំងជាមុនបានមក ជាលទ្ធផលមួយនៃភាពសុចរិត ដែលនៅក្នុងជីវិតមុនផែនដីនេះដែរ ។ …
« គោលលទ្ធិអំពីការតែងតាំងជាមុនអនុវត្តចំពោះសមាជិកសាសនាចក្រទាំងអស់ គឺមិនគ្រាន់តែសម្រាប់ព្រះអង្គសង្គ្រោះ និងព្យាការីរបស់ទ្រង់ឡើយ ។ ពីមុនការបង្កើតផែនដី ស្ត្រីស្មោះត្រង់ជាច្រើនត្រូវបានប្រទានឲ្យនូវទំនួលខុសត្រូវច្បាស់លាស់ ហើយបុរសស្មោះត្រង់ជាច្រើនត្រូវបានតែងតាំងជាមុននូវកាតព្វកិច្ចបព្វជិតភាពច្បាស់លាស់ ។ ទោះបីជាអ្នកពុំចាំពីគ្រានោះក្ដី អ្នកពិតជាបានយល់ព្រម ដើម្បីបំពេញកិច្ចការដ៏សំខាន់នៅក្នុងការបម្រើដល់ព្រះវរបិតារបស់អ្នក ។ នៅពេលអ្នកបង្ហាញថា អ្នកស្មោះត្រង់ នោះអ្នកនឹងត្រូវបានប្រទានឱកាសឲ្យបំពេញកិច្ចការ ដែលអ្នកបានទទួលនៅពេលនោះ » ( ពិតចំពោះសេចក្ដីជំនឿ ៖ ឯកសារយោងនៃដំណឹងល្អ [ ឆ្នាំ ២០០៤ ] ទំព័រ ៦៩-៧០ ) ។
-
តើការយល់ដឹងថា យើងបានតែងតាំងពីមុនដើម្បីទទួលដំណឹងល្អ និងពរជ័យជាច្រើនរបស់វា អាចជួយយើងឲ្យបន្តស្មោះត្រង់នឹងសេចក្ដីសញ្ញារបស់យើងយ៉ាងដូចម្ដេច ?
អេភេសូរ ១:៩-១២
ប៉ុលថ្លែងពីការកាន់កាប់ត្រួតត្រានៃពេលពេញកំណត់
សូមគូរ រូបភាព សាមញ្ញមួយអំពីទន្លេខុសៗគ្នាជាច្រើនបានហូរចូលគ្នាទៅជាទឹកមួយដ៏ធំ ។ សូមឲ្យសិស្សនឹកស្រមៃថា ទន្លេនីមួយៗតំណាងឲ្យការកាន់កាប់ត្រួតត្រាមួយនៃដំណឹងល្អ ។
-
តើការកាន់កាប់ត្រួតត្រាមួយនៃដំណឹងល្អគឺជាអ្វី ?
អ្នកគួររំឭកឡើងវិញនូវអត្ថន័យនៃ គ្រាកាន់កាប់ត្រួតត្រា នៃដំណឹងល្អដោយអញ្ជើញសិស្សម្នាក់ឲ្យអានឮៗនូវសេចក្ដីថ្លែងការណ៍នៅក្នុង Bible Dictionary ៖
« គ្រាកាន់កាប់ត្រួតត្រានៃដំណឹងល្អ គឺជារយៈកាលមួយដែលព្រះអម្ចាស់ទ្រង់មានអ្នកបម្រើ ដែលមានសិទ្ធិអំណាចយ៉ាងតិចម្នាក់នៅលើផែនដី ដែលកាន់កូនសោទាំងឡាយនៃបព្វជិតភាពដ៏បរិសុទ្ធ និង ជាអ្នកដែលមានការអនុញ្ញាតដ៏ទេវភាព ដើម្បីចែកចាយដំណឹងល្អទៅដល់ប្រជាជាតិនានានៅលើផែនដី ។ នៅពេលការណ៍នេះកើតឡើង ដំណឹងល្អត្រូវបានបើកសម្ដែងសារជាថ្មី ដើម្បីកុំឲ្យមនុស្សដែលរស់នៅក្នុងគ្រាកាន់កាប់ត្រួតត្រានោះ ពឹងផ្អែកជាពិសេសលើចំណេះដឹងនៃផែនការនៃសេចក្ដីសង្គ្រោះក្នុងគ្រាកាន់កាប់ត្រួតត្រាដែលបានកន្លងហួសទៅហើយ ។ ចាប់តាំងពីដើមមកមាននូវគ្រាកាន់កាប់ត្រួតត្រានៃដំណឹងល្អជាច្រើន ។ ព្រះគម្ពីរប៊ីបបង្ហាញថា យ៉ាងហោចណាស់មានសម័យកាន់កាប់ត្រួតត្រាមួយ ដែលត្រូវបានសំគាល់ឃើញជាមួយនឹងអ័ដាម មួយទៀតជាមួយអេណុក មួយទៀតជាមួយណូអេ និងបន្តបន្ទាប់ទៀតជាមួយអ័ប្រាហាំ ម៉ូសេ និងព្រះយេស៊ូវជាមួយនឹងសាវករបស់ទ្រង់នៅក្នុងកាលដ៏ខ្ពង់ខ្ពស់បំផុត » ( Bible Dictionary« Dispensations » ) ។
សូមអញ្ជើញសិស្សម្នាក់អាន អេភេសូរ ១:៩-១០ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលថា ប៉ុលបាននិយាយសំដៅទៅលើគ្រាកាន់កាប់ត្រួតត្រាមួយណា ។ សូមពន្យល់ថា ឃ្លា « សេចក្តីអាថ៌កំបាំងនៃព្រះហឫទ័យទ្រង់ » នៅក្នុង ខទី ៩ សំដៅទៅលើផែនការ និងព្រះរាជបំណងរបស់ព្រះ ។
-
តើប៉ុលបានលើកឡើងពីគ្រាកាន់កាប់ត្រួតត្រាណានៅក្នុង អេភេសូរ ១:១០ ?
សូមចង្អុលបង្ហាញថា សម័យកាន់កាប់ត្រួតត្រានៃពេលពេញកំណត់គឺជាគ្រាកាន់កាប់ត្រួតត្រា ដែលយើងរស់នៅនាពេលនេះ ។
-
តើសម័យកាន់កាប់ត្រួតត្រានៃពេលពេញកំណត់អាចប្រៀបបាននឹងទឹកទន្លេ ដែលហូរចាក់ចូលទៅក្នុងទន្លេនោះយ៉ាងដូចម្ដេច ?
-
តើប៉ុលបានព្យាករថានឹងមានអ្វីកើតឡើង នៅសម័យកាន់កាប់ត្រួតត្រានៃពេលពេញកំណត់នោះ ? ( សូមពន្យល់ថា នៅពេលប៉ុលសរសេរថា « គ្រប់ទាំងអស់ក្នុងព្រះគ្រីស្ទ » ទាំងនៅលើស្ថានសួគ៌ និងផែនដីនឹងត្រូវបាន ‹ បំព្រួម › [ ខទី ១០ ] លោកសំដៅទៅលើការស្ដារឡើងវិញ និងការប្រមូលផ្ដុំនៃរាល់កូនសោ អំណាច និងសន្យាដែលព្រះបានបើកសម្ដែងដល់កូនចៅរបស់ទ្រង់ ចាប់តាំងពីដើមកំណើតនៃលោកិយមកម៉្លេះ រួមទាំងចំណេះដឹងផ្សេងទៀតដែលពុំទាន់បើកសម្ដែងពីមុនផងដែរ [ សូមមើល គ. និង ស. ១២៨:១៨ ] ។ សូមសរសេរគោលលទ្ធិខាងក្រោមនៅលើក្តារខៀន ៖ នៅក្នុងសម័យកាន់កាប់ត្រួតត្រានៃពេលពេញកំណត់ អ្វីៗទាំងអស់នៅគ្រាកាន់កាប់ត្រួតត្រាមុនៗ នឹងត្រូវបានស្ដារឡើងវិញ ) ។
សូមអញ្ជើញឲ្យសិស្សម្នាក់អានឮៗពីសេចក្ដីថ្លែងការណ៍ខាងក្រោមនេះដោយអែលឌើរ ប៊ី អេច រ៉ូប៊ឺត នៃក្រុមចិតសិបនាក់ ៖
« នេះគឺជាសម័យកាន់កាប់ត្រួតត្រានៃពេលពេញកំណត់ ហើយយើងឃើញថា យើងកំពុងរត់ចូលទៅក្នុងសម័យនោះ ដែលប្រៀបបាននឹងក្រុមទឹកស្ទឹងដែលមានកម្លាំងដ៏ធំហូរចាក់ចូលយ៉ាងលឿនទៅក្នុងមហាសមុទ្រ ជាគ្រាកាន់កាប់ត្រួតត្រាកាលពីមុននៅគ្រប់ជំនាន់ ដោយតយើងភ្ជាប់ជាមួយពួកគេ ហើយតពួកគេភ្ជាប់ជាមួយយើង ហើយយើងឃើញថា ព្រះមានព្រះរាជបំណងដ៏អស្ចារ្យតែមួយគត់តាំងពីដើមដំបូងមក ហើយវាគឺជាសេចក្ដីសង្គ្រោះរបស់កូនចៅទ្រង់ ។ ហើយឥឡូវនេះថ្ងៃចុងក្រោយបានមកដល់ហើយ ជាគ្រាកាន់កាប់ត្រួតត្រាចុងក្រោយ កាលដែលសេចក្ដីពិត និងពន្លឺ ហើយនិងសេចក្ដីសុចរិតត្រូវគ្របដណ្ដប់ផែនដីទាំងមូល » ( នៅក្នុង Conference Report ខែ តុលា ឆ្នាំ ១៩០៤ ទំព័រ ៧៣ ) ។
សូមអញ្ជើញសិស្សឲ្យឡើងមកក្ដារខៀន ហើយសរសេរឃ្លាថាសេចក្ដីពិត បទគម្ពីរ សេចក្ដីសញ្ញា និងអំណាចមកពីគ្រាកាន់កាប់ត្រួតត្រាមុនដែលបានស្ដារឡើងវិញ ឬបាននាំមកសម័យកាន់កាប់ត្រួតត្រានៃពេលពេញកំណត់នៅត្រង់រូបទន្លេ ។ ( ស្លាកពាក្យនោះអាចរួមមានអំណាចនៃការផ្សារភ្ជាប់ ពិធីបរិសុទ្ធនៃការសង្គ្រោះ ព្រះគម្ពីរមរមន ជាដើម សិស្សអាចគូររូបទន្លេបន្ថែមទៀត ប្រសិនបើចាំបាច់ ) ។
-
តើការរស់នៅក្នុងសម័យកាន់កាប់ត្រួតត្រានៃពេលពេញកំណត់ គឺជាពរជ័យមួយសម្រាប់អ្នកយ៉ាងដូចម្ដេចដែរ ?
-
យោងតាមសេចក្ដីថ្លែងរបស់អែលឌើរ រ៉ូប៊ឺត តើរឿងអ្វីត្រូវកើតឡើងនៅគ្រាកាន់កាប់ត្រួតត្រានេះ ? ( សេចក្ដីពិត ពន្លឺ និងសេចក្ដីសុចរិតត្រូវគ្របដណ្ដប់ផែនដីទាំងមូល ) ។
-
តើធនធានអ្វីនៅគ្រាកាន់កាប់ត្រួតត្រារបស់យើងអាចជួយយើង ឲ្យពន្លិចផែនដីនេះដោយសេចក្ដីពិត និងពន្លឺនៃដំណឹងល្អ ?
សូមអញ្ជើញឲ្យសិស្សម្នាក់អានឮៗពីសេចក្ដីថ្លែងការណ៍ខាងក្រោមនេះដោយអែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ ៖
« បងប្អូនប្រុសស្រីជាទីស្រឡាញ់របស់ខ្ញុំអើយ កិច្ចការដែលសម្រេចបានយ៉ាងច្រើនមកដល់ពេលនេះ នៅក្នុងគ្រាកាន់កាប់ត្រួតត្រានេះដោយផ្សព្វផ្សាយសារលិខិតដំណឹងល្អតាមរយៈប្រព័ន្ធបណ្ដាញសង្គម គឺជាការចាប់ផ្ដើមមួយដ៏ល្អ—ប៉ុន្តែនៅតែតិចនៅឡើយ ។ ឥឡូវនេះ ខ្ញុំសូមបន្តការអញ្ជើញដល់អ្នកឲ្យជួយបំប្លែងដំណក់ទឹកនោះទៅជាទឹកជំនន់មួយ ។ … ខ្ញុំសូមដាស់តឿនបងប្អូនឲ្យបោសសម្អាតផែនដីនេះ ដោយសារលិខិតដែលពេញដោយសេចក្ដីសុចរិត និងសេចក្ដីពិត—ជាសារលិខិតដែលពិត មានប្រយោជន៍ ហើយសក្ដិសម—ហើយពិតជាបណ្ដាលឲ្យបោសផែនដីដូចជាទឹកជំនន់មែន » ( « To Sweep the Earth as with a Flood » [ Brigham Young University Campus Education Week devotional ថ្ងៃទី ១៩ ខែ សីហា ឆ្នាំ២០១៤ ] LDS.org ) ។
សូមអញ្ជើញសិស្សឲ្យចែកចាយពីកិច្ចការ ដែលពួកគេកំពុងធ្វើដើម្បីជួយពន្លិចផែនដីនេះជាមួយនឹងសារលិខិត ដែលពេញដោយសេចក្ដីសុចរិត និងសេចក្ដីពិត ។
សូមសង្ខេប អេភេសូរ ១:១១–១២ ដោយពន្យល់ថា ប៉ុលបានបង្រៀនថា តាមរយៈព្រះយេស៊ូវគ្រីស្ទ នោះពួកបរិសុទ្ធបានទទួល « កេរ្ដិ៍អាករ » ( ខទី ១១ ) នៅក្នុងនគរព្រះ ។
អេភេសូរ ១:១៣-២៣
ប៉ុលបង្រៀនអំពីព្រះវិញ្ញាណបរិសុទ្ធនៃសេចក្ដីសន្យា
សូមឲ្យសិស្សម្នាក់អាន អេភេសូរ ១:១៣–១៤ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម រកមើលពរជ័យមួយ ដែលពួកបរិសុទ្ធបានទទួល ដោយព្រោះតែសេចក្ដីស្មោះត្រង់របស់ពួកគេ ព្រមទាំងការទុកចិត្ត និងជំនឿរបស់ពួកគេទៅលើព្រះយេស៊ូវគ្រីស្ទ ។
-
យោងតាម ខទី ១៣ តើពួកបរិសុទ្ធបានទទួលពរជ័យអ្វីខ្លះ ? ( ពួកគេត្រូវបាន « ដៅចំណាំដោយព្រះវិញ្ញាណបរិសុទ្ធ [ នៃសេចក្ដីសន្យា ] » ) ។
សូមពន្យល់ថា ការ« ដៅចំណាំដោយព្រះវិញ្ញាណបរិសុទ្ធ [ នៃសេចក្ដីសន្យា ] » មានន័យថា ព្រះវិញ្ញាណបរិសុទ្ធ « ធ្វើជាសាក្សីដល់ព្រះវរបិតាថា ពិធីបរិសុទ្ធនៃសេចក្ដីសង្គ្រោះត្រូវបានធ្វើឡើងយ៉ាងត្រឹមត្រូវ ហើយថាសេចក្ដីសញ្ញាដែលបានទាក់ទងជាមួយនឹងពួកគេត្រូវបានរក្សាទុក » ( សេចក្ដីណែនាំដល់បទគម្ពីរទាំងឡាយ « ព្រះវិញ្ញាណបរិសុទ្ធនៃសេចក្តីសន្យា »scriptures.lds.org ។ ព្រះវិញ្ញាណគឺជា « ទីបញ្ចាំចិត្តពីដំណើរកេរ្ដិ៍អាករ » ( ខទី ១៤ ) ។ វាមានន័យថា វត្តមាននៃព្រះវិញ្ញាណបរិសុទ្ធនៅក្នុងជីវិតរបស់យើង គឺជារង្វាន់ ជាការរំឭកចាំ និងជាការបង្ហាញមកពីព្រះថា ប្រសិនបើយើងស្មោះត្រង់ នោះយើងនឹងទទួលបានជីវិតដ៏នៅអស់កល្បជានិច្ច ។
សូមសង្ខេប អេភេសូរ ១:១៥–១៦ ដោយពន្យល់ថា ប៉ុលបានប្រាប់ពួកបរិសុទ្ធថា លោកបានបន្តថ្លែងអំណរគុណចំពោះព្រះសម្រាប់ភាពស្មោះត្រង់របស់ពួកគេ ។
សូមឲ្យសិស្សម្នាក់អាន អេភេសូរ ១:១៧-១៨ ឲ្យឮៗ ។ ចូរសុំសិស្សក្នុងថ្នាក់ផ្ទៀងតាម រកមើលថាប៉ុលបានអធិស្ឋានទូលសុំព្រះឲ្យប្រទានអ្វីខ្លះដល់ពួកបរិសុទ្ធ ។
-
តើប៉ុលបានអធិស្ឋានទៅព្រះឲ្យប្រទានអ្វីខ្លះដល់ពួកបរិសុទ្ធ ?
-
តើខគម្ពីរទាំងនេះបង្រៀនអ្វីខ្លះ ដល់យើងអំពីរបៀបដែលយើងអាចស្គាល់ព្រះវរបិតាសួគ៌ ? ( ដោយប្រើពាក្យផ្ទាល់ខ្លួន សិស្សគួរស្គាល់សេចក្ដីពិតដូចខាងក្រោម ៖ យើងអាចស្គាល់ព្រះវរបិតាសួគ៌បាន តាមរយៈវិញ្ញាណនៃវិវរណៈ ) ។
ដើម្បីជួយសិស្សយល់អំពីវិញ្ញាណនៃវិវរណៈ សូមអញ្ជើញសិស្សម្នាក់ឲ្យអានសេចក្តីថ្លែងការណ៍ខាងក្រោមដោយអែលឌើរ ដេវីឌ អេ បែដណាឲ្យឮៗ ។ សូមឲ្យសិស្សក្នុងថ្នាក់ស្ដាប់រកអត្ថន័យអំពីវិញ្ញាណនៃវិវរណៈ ។
« វិវរណៈគឺជាទំនាក់ទំនងរវាងព្រះ និងកូនចៅរបស់ទ្រង់នៅលើផែនដី ហើយជាពរជ័យដ៏ធំមួយដែលភ្ជាប់មកជាមួយនឹងអំណោយទាន និងគូកនដ៏ខ្ជាប់ខ្ជួននៃព្រះវិញ្ញាណបរិសុទ្ធ ។ ព្យាការី យ៉ូសែប ស៊្មីធ បានបង្រៀនថា ‹ ព្រះវិញ្ញាណបរិសុទ្ធគឺជាអ្នកទទួលវិវរណៈ › ហើយ ‹ គ្មានមនុស្សណាម្នាក់អាចទទួលព្រះវិញ្ញាណបរិសុទ្ធដោយពុំទទួលវិវរណៈនោះទេ › ( Teachings of Presidents of the Church: Joseph Smith [ ឆ្នាំ ២០០៧ ] ទំព័រ ១៣២ ) ។
« វិញ្ញាណនៃវិវរណៈមានសម្រាប់មនុស្សគ្រប់រូប ដែលបានទទួលពិធីបរិសុទ្ធនៃសេចក្ដីសង្គ្រោះនៃបុណ្យជ្រមុជទឹក ដោយការជ្រមុជសម្រាប់ការផ្ដាច់បាប និងការដាក់ដៃលើសម្រាប់អំណោយទាននៃព្រះវិញ្ញាណបរិសុទ្ធ តាមរយៈសិទ្ធិអំណាចបព្វជិតភាពដ៏ត្រឹមត្រូវ—និងអ្នកដែលអនុវត្តតាមក្នុងសេចក្ដីជំនឿដើម្បីបំពេញតាមបង្គាប់នៃបព្វជិតភាពដើម្បី ‹ ទទួលព្រះវិញ្ញាណបរិសុទ្ធ › » ( « The Spirit of Revelation » Ensign ឬ Liahona ខែ ឧសភា ឆ្នាំ ២០១១ ទំព័រ ៨៧ ) ។
-
តើវិញ្ញាណនៃវិវរណៈគឺជាអ្វី ?
-
តើវិវរណៈតាមរយៈព្រះវិញ្ញាណបរិសុទ្ធអាចជួយយើង ឲ្យស្គាល់ព្រះវរបិតាសួគ៌បានយ៉ាងដូចម្ដេច ?
អ្នកគួរអញ្ជើញសិស្សឲ្យចែកចាយថា វិវរណៈតាមរយៈព្រះវិញ្ញាណបរិសុទ្ធបានជួយពួកគេឲ្យស្គាល់ព្រះវរបិតាសួគ៌កាន់តែប្រសើរឡើងតាមរបៀបណា ។ សូមគិតពីការចែកចាយនូវបទពិសោធន៍ផ្ទាល់ខ្លួនអ្នក ។ សូមលើកទឹកចិត្តសិស្សឲ្យខិតខំ ដើម្បីមានភាពសក្ដិសមជាដៃគូនៃព្រះវិញ្ញាណបរិសុទ្ធ ដើម្បីពួកគេអាចបន្តស្គាល់ព្រះវរបិតាសួគ៌កាន់តែប្រសើរឡើង ។
សូមសង្ខេប អេភេសូរ ១:១៩–២៣ ដោយពន្យល់ថា ប៉ុលបានបន្តបង្រៀនអំពីមរតករបស់ពួកបរិសុទ្ធនៃសេចក្ដីសន្យា និងតួនាទីរបស់ព្រះយេស៊ូវគ្រីស្ទជាសិរសានៃសាសនាចក្ររបស់ទ្រង់ ។
សេចក្តីពន្យល់ និង ព័ត៌មានសាច់រឿង
អេភេសូរ ១:១៣ ។ « ព្រះវិញ្ញាណបរិសុទ្ធនៃសេចក្ដីសន្យា »
ព្រះវិញ្ញាណបរិសុទ្ធនៃសេចក្ដីសន្យា គឺជាព្រះនាមមួយទៀតសម្រាប់ព្រះវិញ្ញាណបរិសុទ្ធ ។ វាត្រូវបានគេប្រើជាសេចក្ដីយោងទៅនឹងអំណាចផ្សារភ្ជាប់ និងអំណាចអនុម័តនៃព្រះវិញ្ញាណបរិសុទ្ធ ( សូមមើល គ. និង ស. ៧៦:៥៣, ១៣២:៧ ) ។
« ព្រះវិញ្ញាណបរិសុទ្ធនៃសេចក្ដីសន្យា … បញ្ជាក់នូវសេចក្ដីសុចរិត ពិធីបរិសុទ្ធ និងសេចក្ដីសញ្ញានៃមនុស្ស ដែលរាប់ថាគួរសមដល់ព្រះ ។ ព្រះវិញ្ញាណបរិសុទ្ធនៃសេចក្ដីសន្យា ធ្វើទីបន្ទាល់ដល់ព្រះវរបិតាថា ពិធីបរិសុទ្ធទាំងឡាយខាងការសង្គ្រោះនោះត្រូវបានធ្វើឡើងដោយត្រឹមត្រូវ ហើយថាសេចក្ដីសញ្ញាដែលរួមនឹងពិធីទាំងនោះ នោះក៏បានកាន់តាមដែរ ។
« ពួកគេនេះហើយដែលបានភ្ជាប់ដោយព្រះវិញ្ញាណបរិសុទ្ធនៃសេចក្ដីសន្យា ហើយបានទទួលនូវគ្រប់ទាំងអ្វីៗ ដែលព្រះវរបិតាទ្រង់មាន [ សូមមើល អេភេ. ១:១៣–១៤, គ. និង ស. ៧៦:៥១–៦០ ] ។ ទាំងសេចក្ដីសញ្ញា និងការប្រព្រឹត្តទាំងអស់ ត្រូវតែបានភ្ជាប់ដោយព្រះវិញ្ញាណបរិសុទ្ធនៃសេចក្ដីសន្យា ដើម្បីឲ្យមានប្រសិទ្ធិភាព បន្ទាប់ពីជីវិតនេះទៅ [ សូមមើល គ. និង ស. ១៣២:៧, ១៨–១៩, ២៦ ] » ( សេចក្ដីណែនាំដល់បទគម្ពីរទាំងឡាយ « ព្រះវិញ្ញាណបរិសុទ្ធនៃសេចក្ដីសន្យា » scriptures.lds.org ) ។
នៅពេលដែលប៉ុលបានសរសេរថា ពួកបរិសុទ្ធបាន « ដៅចំណាំដោយព្រះវិញ្ញាណបរិសុទ្ធ [ នៃសេចក្ដីសន្យា ] » ( អេភេសូរ ១:១៣ ) លោកបានកំពុងសំដៅទៅលើការសន្យានៃជីវិតដ៏នៅអស់កល្បជានិច្ច ដែលបានប្រទានដល់ពួកបរិសុទ្ធស្មោះត្រង់នៅក្នុងជីវិតរមែងស្លាប់នេះ ។ នៅពេលមនុស្សបានដៅចំណាំដោយព្រះវិញ្ញាណបរិសុទ្ធនៃសេចក្ដីសន្យា នោះព្រះវិញ្ញាណបរិសុទ្ធអនុម័តពួកគេជាពួកអ្នកគ្រងមរតកសេឡេស្ទាល ទោះជាពួកគេជាមនុស្សមានជីវិតរមែងស្លាប់ក្ដី ។ គោលលទ្ធិនេះពេលខ្លះសំដៅទៅលើការមានការហៅបម្រើ និងការរើសតាំងរបស់មនុស្សម្នាក់ពិតប្រាកដ ( សូមមើល ពេត្រុសទី ២ ១:៤–១៩, គ. និង ស. ១៣១:៥–៦, គ. និង ស. ១៣២:៦–៧, Bruce R. McConkie Doctrinal New Testament Commentary វ៉ុលទី ៣ [ ឆ្នាំ១៩៦៥–៧៣ ] ២:៤៩៣–៩៥, History of the Church ៣:៣៧៩–៨០ ) ។
នៅក្នុងសេចក្ដីយោងទៅនឹងព្រះវិញ្ញាណបរិសុទ្ធនៃសេចក្ដីសន្យា ប្រធាន យ៉ូសែប ហ៉្វីលឌីង ស៊្មីធ បានថ្លែងថា ៖
« ព្រះវិញ្ញាណបរិសុទ្ធនៃសេចក្តីសន្យាគឺជាព្រះវិញ្ញាណបរិសុទ្ធ ដែលបោះត្រាអនុញ្ញាតលើគ្រប់ពិធីបរិសុទ្ធដូចជា ៖ ពិធីបុណ្យជ្រមុជទឹក ពិធីបញ្ជាក់ ពិធីតែងតាំង និងពិធីរៀបអាពាហ៍ពិពាហ៍ ។ ការសន្យានេះគឺថា ពរជ័យនេះនឹងត្រូវបានទទួលតាមរយៈភាពស្មោះត្រង់ ។
« បើសិនមនុស្សម្នាក់រំលងសេចក្តីសញ្ញា ទោះវាជាបុណ្យជ្រមុជទឹក ពិធីតែងតាំង និងពិធីអាពាហ៍ពិពាហ៍ ឬអ្វីផ្សេងទៀតក្តី នោះព្រះវិញ្ញាណនឹងដកត្រានៃការអនុម័តចេញ ហើយពរជ័យនឹងមិនត្រូវបានទទួលទៀតឡើយ ។
« គ្រប់ពិធីតែងតាំងគឺត្រូវបានផ្សារភ្ជាប់ជាមួយនឹងការសន្យានៃរង្វាន់ ដោយផ្អែកទៅលើភាពស្មោះត្រង់ ។ ព្រះវិញ្ញាណបរិសុទ្ធដកត្រានៃការអនុម័តចេញ នៅពេលសេចក្តីសញ្ញាត្រូវបានរំលង [ សូមមើល គ. និង ស. ៧៦:៥២–៥៣; ១៣២:៧] » (Doctrines of Salvation, និពន្ធដោយ ប្រ៊ូស អ័រ ម៉ាក់ខន់ឃី វ៉ុលទី ៣ [ ឆ្នាំ ១៩៥៤–៥៦ ] ១:៤៥ ) ។
អេភេសូរ ១:១៣–១៤ ។ « ជាទីបញ្ចាំចិត្ត ពីដំណើរកេរ្ដិ៍អាកររបស់យើង »
ឃ្លាថា « ជាទីបញ្ចាំចិត្ត ពីដំណើរកេរ្ដិ៍អាកររបស់យើង » នៅក្នុង អេភេសូរ ១:១៤ ចង្អុលបង្ហាញថា នៅពេលពួកបរិសុទ្ធស្មោះត្រង់ត្រូវបានដៅចំណាំដោយព្រះវិញ្ញាណបរិសុទ្ធនៃសេចក្ដីសន្យាហើយ នោះ ពួកគេនឹងទទួលបានការអះអាងផ្ទាល់ខ្លួនមួយថា ពួកគេនឹងគ្រងនគរសេឡេស្ទាលជាមរតក ។ ពាក្យថា ជាទីបញ្ចាំចិត្ត នៅត្រង់នេះមានន័យថា « រង្វាន់សម្រាប់រឿងដែលនឹងមកដល់ » ( Merriam-Webster’s Collegiate Dictionary កំណែទី ១១ [ ឆ្នាំ ២០០៣ ] « earnest » ) ។ « អំណោយទានព្រះវិញ្ញាណបរិសុទ្ធ គឺជាអំណោយទានដ៏មានតម្លៃបំផុតមួយពីព្រះវរបិតាសួគ៌នៃយើង ។ … អំណោយនេះគឺជាគំរូតូចមួយនៃសេចក្ដីស្រឡាញ់ដ៏អស់កល្បជានិច្ច និងសេចក្ដីសន្យាមួយនៃជីវិតដ៏អស់កល្បជានិច្ច » ( ប្រកាសដំណឹងល្អរបស់យើង ៖ មគ្គុទេសន៍ចំពោះការបម្រើជាអ្នកផ្សព្វផ្សាយសាសនា [ ឆ្នាំ ២០០៤ ] ទំព័រ ៦៥ ) ។