មេរៀនទី ១២១
អេភេសូរ ២–៣
សេចក្តីផ្ដើម
ប៉ុលបានបង្រៀនពួកបរិសុទ្ធនៅក្រុងអេភេសូរថា អស់អ្នកដែលមានបាបអាចត្រូវបានសង្គ្រោះដោយព្រះគុណនៃព្រះ ហើយថាពួកសាសន៍យូដា និងសាសន៍ដទៃបានក្លាយទៅជាតែមួយនៅក្នុងក្រុមគ្រួសារនៃព្រះ ។ ប៉ុលក៏បានពន្យល់ផងដែរថា សាសនាចក្រនៃព្រះយេស៊ូវគ្រីស្ទ ត្រូវបានស្ថាបនាឡើងនៅលើគ្រឹះនៃពួកសាវក និងពួកព្យាការី ហើយលោកបានចែកចាយពីបំណងប្រាថ្នារបស់លោកថា ពួកបរិសុទ្ធនឹងទទួលបាននូវបទពិសោធន៍សេចក្ដីស្រឡាញ់របស់ព្រះយេស៊ូវគ្រីស្ទ ។
យោបល់សម្រាប់ការបង្រៀន
អេភេសូរ ២
ប៉ុលបង្រៀនអំពីរបៀប ដែលព្រះលោហិតរបស់ព្រះយេស៊ូវគ្រីស្ទសង្គ្រោះទាំងពួកសាសន៍យូដា និងពួកសាសន៍ដទៃ
នៅពេលចាប់ផ្ដើមថ្នាក់រៀន សូមអញ្ជើញសិស្សរបស់អ្នកម្នាក់ ឬច្រើននាក់ ( អាស្រ័យទៅលើទំហំថ្នាក់របស់អ្នក ) ឲ្យអង្គុយនៅលើកម្រាលឥដ្ឋនៅកន្លែងផ្សេងៗគ្នាក្នុងថ្នាក់រៀន ។ សូមដាក់ព្រំដែនមួយដែលខណ្ឌចែករវាងសិស្សទាំងនេះ និងសិស្សផ្សេងទៀត ដោយបិទបង់ស្អិត ឬខ្សែ បន្ទាប់មកណែនាំឲ្យសិស្សដែលបំបែកចេញនោះថា ពួកគេមិនអាចចូលរួមនិយាយស្តីក្នុងមេរៀននេះ ( នៅឡើយទេ ) ។ ចូរសួរដល់សិស្សផ្សេងទៀតក្នុងថ្នាក់ ៖
-
តើស្ថានភាពនេះអាចប្រាប់ឲ្យដឹងអំពីទំនាក់ទំនងរវាងអ្នក និងសិស្សដែលបានបំបែកចេញយ៉ាងដូចម្ដេច ? ( ថា ក្រុមមួយគឺជាទីពេញចិត្តជាងក្រុមមួយទៀត ) ។
-
តើអ្នកគិតថា សិស្សដែលបានបំបែកចេញអាចមានអារម្មណ៍យ៉ាងដូចម្ដេច ? ហេតុអ្វី ?
ចូរសុំឲ្យសិស្សគិតពិចារណា ប្រសិនបើពួកគេធ្លាប់មានអារម្មណ៍របៀបនេះក្នុងស្ថានភាពជីវិតជាក់លាក់ ។
សូមសរសេរពាក្យ សាសន៍ដទៃ និងសាសន៍យូដានៅលើក្ដារខៀន ដោយបង្កើតកូឡោនចំនួនពីរ ។
-
ផ្អែកទៅលើអ្វីដែលអ្នកបានរៀនអំពីស្ថានភាពសង្គមនៅក្នុងសាខាសាសនាចក្រមួយចំនួនអំឡុងពេលនៃការបម្រើរបស់ប៉ុល តើស្លាកមួយណា ដែលសក្តិសមចំពោះសិស្សដែលបំបែកចេញ ។ ( សាសន៍ដទៃ ) ។ តើស្លាកមួយណាដែលសក្តិសមនឹងសិស្សក្នុងថ្នាក់ ? ( សាសន៍យូដា ) ។
-
តើកត្តាអ្វីដែលបណ្ដាលឲ្យមានការបំបែកគ្នានេះ ? ( ពួកសាសន៍យូដាមួយចំនួនជឿថា ដោយសារតែពួកគេគឺជាពួកអ៊ីស្រាអែលពីកំណើត ហើយបានកាត់ស្បែក នោះពួកគេត្រូវបានព្រះសព្វព្រះទ័យជាងគេ ហើយត្រូវធ្វើជាមេលើពួកអ្នកផ្លាស់ប្រែចិត្តជឿសាសន៍ដទៃទៀត ) ។
សូមអញ្ជើញសិស្សម្នាក់អាន អេភេសូរ ២:១-៣ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលរបៀបដែលប៉ុលបានពិពណ៌នាអំពីស្ថានភាពខាងវិញ្ញាណរបស់ពួកបរិសុទ្ធសាសន៍ដទៃ ( « អ្នក » និង « អ្នករាល់គ្នា » នៅក្នុងខទី ១-២) និងពួកបរិសុទ្ធសាសន៍យូដា ( « យើងរាល់គ្នា » នៅក្នុងខទី ៣ពីមុនការផ្លាស់ប្រែចិត្តជឿរបស់ពួកគេចំពោះព្រះអង្គសង្គ្រោះ និងសាសនាចក្ររបស់ទ្រង់ ។ សូមពន្យល់ថា ឃ្លា « មេគ្រប់គ្រងរាជ្យលើអាកាស » នៅក្នុងខទី ២សំដៅទៅលើសេចក្ដីអាក្រក់ និងឥទ្ធិពលរាលដាលរបស់វានៅក្នុងពិភពលោកនេះ ។
-
យោងតាមខទី ១-២តើប៉ុលបានពិពណ៌នាអំពីពួកសាសន៍ដទៃពីមុនការផ្លាស់ប្រែចិត្តជឿរបស់ពួកគេយ៉ាងដូចម្ដេច ? ( សូមសរសេរចម្លើយរបស់សិស្សនៅលើក្ដារខៀនក្រោមកូឡោន ដែលមានដាក់ស្លាកថា « សាសន៍ដទៃ » ) ។
-
យោងតាមខទី ៣តើប៉ុលបានពិពណ៌នាអំពីខ្លួនលោក និងពួកសាសន៍យូដាពីមុនការផ្លាស់ប្រែចិត្តជឿរបស់ពួកគេយ៉ាងដូចម្ដេច ? ( សូមសរសេរចម្លើយរបស់សិស្សនៅលើក្ដារខៀនក្រោមកូឡោន ដែលមានដាក់ស្លាកថា « សាសន៍យូដា » ) ។
សូមចង្អុលបង្ហាញថា ពួកសាសន៍ដទៃក៏ដូចជាពួកសាសន៍យូដាគឺបានស្លាប់ខាងវិញ្ញាណ ឬបំបែកចេញពីព្រះ ដោយសារតែអំពើបាបរបស់ពួកគេ ( សូមមើល ខទី ១) ។
សូមអញ្ជើញសិស្សម្នាក់អាន អេភេសូរ ២:៤-៦ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលស្ថានភាពខាងវិញ្ញាណរបស់ពួកបរិសុទ្ធសាសន៍ដទៃ និងពួកសាសន៍យូដា បន្ទាប់ពីការផ្លាស់ប្រែចិត្តជឿរបស់ពួកគេ ។ សូមចង្អុលបង្ហាញថា ពាក្យប្រោសឲ្យបានរស់មានន័យថាធ្វើឲ្យរស់ឡើងវិញ ហើយពាក្យនៅស្ថានសួគ៌ដ៏ខ្ពស់សំដៅទៅលើអាណាចក្រនៅស្ថានសួគ៌ដែលមនុស្សទទួលគ្រងជាមរតក ។
-
តើប៉ុលបានពិពណ៌នាអំពីពួកបរិសុទ្ធ បន្ទាប់ពីការផ្លាស់ប្រែចិត្តជឿរបស់ពួកគេយ៉ាងដូចម្ដេច ? ( ព្រះអម្ចាស់បានប្រោសពួកគេឲ្យរស់ ឬធ្វើឲ្យពួកគេបានរស់ឡើងវិញ មកពីសេចក្ដីស្លាប់ខាងវិញ្ញាណ និងពីស្ថានភាពប្រកបដោយអំពើបាបរបស់ពួកគេ ។ សូមរំឭកសិស្សថា យើងសំដៅទៅលើការណ៍នេះថាជាការកើតជាថ្មីខាងវិញ្ញាណ [ សូមមើល ម៉ូសាយ ២៧:២៤-២៦] ) ។
សូមអញ្ជើញសិស្សម្នាក់អាន អេភេសូរ ២:៧-១០ឲ្យឮៗ ។ ចូរសុំឲ្យសិស្សក្នុងថ្នាក់ផ្ទៀងតាមរកមើលនូវអ្វី ដែលអាចធ្វើឲ្យពួកសាសន៍ដទៃ និងពួកសាសន៍យូដាធ្វើការផ្លាស់ប្រែនេះ ។
-
តើអ្វីខ្លះដែលអាចធ្វើឲ្យពួកបរិសុទ្ធទាំងពីរក្រុមនេះធ្វើការផ្លាស់ប្រែនេះ ? ( ព្រះគុណនៃព្រះយេស៊ូវគ្រីស្ទ ) ។
-
តើសេចក្ដីពិតអ្វីខ្លះដែលយើងអាចរៀនមកពីខគម្ពីរទាំងនេះ អំពីព្រះគុណរបស់ព្រះយេស៊ូវគ្រីស្ទ ដែលធ្វើឲ្យកើតមានឡើងសម្រាប់កូនចៅរបស់ព្រះទាំងអស់ ? ( បន្ទាប់ពីសិស្សបានឆ្លើយហើយ សូមសរសេរសេចក្ដីពិតខាងក្រោមនៅលើក្ដារខៀន ៖ តាមរយៈព្រះគុណនៃព្រះយេស៊ូវគ្រីស្ទ នោះមនុស្សលោកអាចត្រូវបានសង្គ្រោះតាមរយៈសេចក្ដីជំនឿលើទ្រង់) ។
សូមចង្អុលបង្ហាញថា ប៉ុលបានគូសបញ្ជាក់ថា យើងមិនអាចត្រូវបានសង្គ្រោះ ដោយសារតែកិច្ចការរបស់យើងតែម្យ៉ាងនោះទេ ទោះជាកិច្ចការទាំងនោះល្អប៉ុណ្ណាក៏ដោយ ( សូមមើលខទី ៨-៩) ។ ដើម្បីជួយសិស្សក្នុងថ្នាក់ឲ្យយល់ពីសេចក្ដីពិតដែលបានសំគាល់ឃើញនៅខាងលើកាន់តែប្រសើរឡើង សូមអញ្ជើញសិស្សម្នាក់ឲ្យអានសេចក្ដីថ្លែងការណ៍ខាងក្រោមនេះដោយប្រធាន ឌៀថើរ អេហ្វ អុជដូហ្វ នៃគណៈប្រធានទីមួយឲ្យឮៗ ៖
« ដោយសារតែយើងទាំងអស់គ្នា ‹ បានធ្វើបាប ហើយខ្វះមិនដល់សិរីល្អនៃព្រះ › [រ៉ូម ៣:២៣] ហើយដោយសារតែ ‹ គ្មានអ្វីដែលមិនស្អាតអាចចូលទៅក្នុងនគររបស់ព្រះ › បាន [នីហ្វៃទី១ ១៥:៣៤] នោះយើងគ្រប់គ្នាពុំសក្ដិសមនឹងត្រឡប់ទៅកាន់វត្តមាននៃព្រះវិញនោះឡើយ ។ …
« …យើងពុំអាចរកបានវិធីរបស់យើងត្រឡប់ទៅកាន់ស្ថានសួគ៌វិញទេ ការទាមទារនៃសេចក្ដីយុត្តិធម៌ឈរជារនាំង ដែលយើងគ្មានអំណាចដើម្បីនឹងយកឈ្នះដោយខ្លួនឯងឡើយ ។
« ប៉ុន្តែ មនុស្សគ្រប់រូបមិនវិនាសបង់ឡើយ ។
« ព្រះគុណនៃព្រះគឺជាសេចក្ដីសង្ឃឹមដ៏ធំ និងគ្មានទីបំផុត ។
« តាមរយៈពលិកម្មរបស់ព្រះយេស៊ូវគ្រីស្ទ ផែនការនៃសេចក្ដីមេត្តាករុណា រំងាប់ដល់តម្រូវការនៃសេចក្ដីយុត្តិធម៌ [ សូមមើលអាលម៉ា ៤២:១៥] ‹ ហើយ [ នាំមកនូវ ] មធ្យោបាយទាំងឡាយដល់មនុស្ស ដើម្បីឲ្យគេមានសេចក្ដីជំនឿចំពោះការប្រែចិត្ត › [អាលម៉ា ៣៤:១៥] ។
« ទោះបើអំពើបាបរបស់យើង អាចដូចជាពណ៌ក្រហមទែងក៏ដោយ គង់តែនឹងបានសដូចហិមៈ [ សូមមើលអេសាយ ១:១៨] ។ ដោយសារព្រះអង្គសង្គ្រោះជាទីស្រឡាញ់របស់យើង ‹ បានថ្វាយព្រះអង្គទ្រង់ទុកជាថ្លៃលោះមនុស្សទាំងអស់ › [ធីម៉ូថេទី ១ ២:៦] នោះច្រកទ្វារមួយចូលទៅក្នុងនគរដ៏អស់កល្បជានិច្ចរបស់ទ្រង់ នឹងត្រូវបានប្រទានដល់យើង [ សូមមើលពេត្រុសទី ២ ១:១១] ។
« ក្លោងទ្វារនោះត្រូវបានបើកហើយ ! …
« ដើម្បីទទួលគ្រងសិរីល្អ យើងត្រូវការលើសពីការបើកសោក្លោងទ្វារទៅទៀត យើងត្រូវតែចូលទៅតាមក្លោងទ្វារនោះ ដោយមានបំណងចិត្តដើម្បីផ្លាស់ប្ដូរ—ជាការផ្លាស់ប្ដូរមួយ ដែលព្រះគម្ពីរពិពណ៌នាថាជា ‹ ត្រូវតែកើតម្ដងទៀតឡើយ មែនហើយ គឺកើតមកពីព្រះ ផ្លាស់ប្រែពី [ ស្ថានភាពខាងលោកិយរបស់យើង ] និងការធ្លាក់ទៅកាន់ស្ថានភាពនៃសេចក្ដីសុចរិតវិញ ដោយបានព្រះទ្រង់ប្រោសលោះ នោះនឹងក្លាយទៅជាបុត្រាបុត្រីរបស់ទ្រង់ › [ម៉ូសាយ ២៧:២៥] ។ …
« ព្រះគុណគឺជាអំណោយរបស់ព្រះ ហើយបំណងប្រាថ្នារបស់យើងដើម្បីគោរពតាមបញ្ញត្តិនីមួយៗរបស់ព្រះ គឺជាការលាតដៃក្នុងជីវិតរមែងស្លាប់របស់យើងបង្ហាញដល់ព្រះវរបិតាសួគ៌ថា យើងចង់ទទួលអំណោយដ៏ពិសិដ្ឋនេះ » ( « The Gift of Grace » Ensign ឬ Liahona ខែ ឧសភា ឆ្នាំ ២០១៥ ទំព័រ ១០៨, ១១០ ) ។
-
តើការអនុវត្តសេចក្ដីជំនឿទៅលើព្រះយេស៊ូវគ្រីស្ទ និងការប្រែចិត្តពីអំពើបាបរបស់យើងអាចជួយយើង ឲ្យទទួលបានអំណោយជាព្រះគុណយ៉ាងដូចម្ដេច ?
ដើម្បីជួយសិស្សឲ្យយល់ពីបរិបទខាងប្រវត្តិសាស្ត្រអំពីទំនាក់ទំនងរបស់ពួកសាសន៍យូដា និងពួកសាសន៍ដទៃ ពីមុនដំណឹងល្អត្រូវបានផ្សាយទៅដល់កូនចៅទាំងអស់របស់ព្រះ សូមបង្ហាញនូវរូបភាពអំពី « ជញ្ជាំងដែលខាន់ » (អេភេសូរ ២:១៤) នៅទីធ្លាខាងក្រៅនៃព្រះវិហារបរិសុទ្ធនៅទីក្រុងយេរូសាឡិម ( ឬអញ្ជើញសិស្សឲ្យបើកទៅរូបភាពព្រះគម្ពីរប៊ីប លេខ ៩« ព្រះវិហារហេរ៉ូឌ ») ។ ចូរពន្យល់ថា ពួកសាសន៍ដទៃដែលមិនបានចុះសេចក្ដីសញ្ញាជាមួយនឹងព្រះអម្ចាស់ ត្រូវបានហាមឃាត់មិនឲ្យចូលហួសពីជញ្ជាំងនេះ ដែលជាកន្លែងកាន់តែពិសិដ្ឋក្នុងព្រះវិហារបរិសុទ្ធនោះទេ ពួកគេត្រូវបានចាត់ទុកថា « ជាអ្នកដទៃ ឬជាអ្នកគ្រាន់តែសំណាក់នៅ » ( អេភេសូរ ២:១៩ ) ។ ជញ្ជាំងខាន់ខាងសាច់ឈាម ជានិមិត្តសញ្ញានៃការបំបែកខាងវិញ្ញាណ ដែលមានរវាងពួកសាសន៍យូដា និងពួកសាសន៍ដទៃពីមុនវិវរណៈរបស់ពេត្រុសដែលថា ដំណឹងល្អគឺត្រូវផ្សាយទៅដល់ពួកសាសន៍ដទៃ ។
សូមអញ្ជើញសិស្សពីរបីនាក់ដែលបំបែកចេញពីសិស្សក្នុងថ្នាក់ ឲ្យផ្លាស់វេណគ្នាអានឮៗចេញមកពីអេភេសូរ ២:១២-១៥។ ចូរសុំឲ្យសិស្សក្នុងថ្នាក់ផ្ទៀងតាម រកមើលអ្វីដែលព្រះអង្គសង្គ្រោះបានធ្វើ ចំពោះរបាំងរវាងពួកសាសន៍យូដា និងពួកសាសន៍ដទៃនោះ ។ សូមចង្អុលបង្ហាញថា ពាក្យសេចក្ដីខ្មាំងមានន័យថា « សេចក្ដីជំទាស់សេចក្ដីប្រឆាំង សេចក្ដីស្អប់ » ( សេចក្ដីណែនាំដល់បទគម្ពីរទាំងឡាយ « សេចក្ដីខ្មាំង »scriptures.lds.org ) ។
-
តើអ្វីខ្លះបាននាំឲ្យពួកសាសន៍ដទៃ និងសាសន៍យូដារួបរួមគ្នា ? ( តាមរយៈព្រះលោហិតរបស់ព្រះគ្រីស្ទ ជញ្ជាំងដែលតំណាងឲ្យការបំបែកពួកសាសន៍យូដា និងពួកសាសន៍ដទៃខាងវិញ្ញាណ ត្រូវបានដកចេញ ហើយពួកគេបានក្លាយទៅជា « មនុស្សថ្មីតែមួយ » [អេភេសូរ ២:១៥] ឬរួបកាយរួមតែមួយនៅក្នុងព្រះគ្រីស្ទ ។ សូមសរសេរសេចក្តីពិតនេះនៅលើក្ដារខៀន ៖ នៅពេលយើងមករកព្រះយេស៊ូវគ្រីស្ទ ហើយទទួលបានព្រះគុណរបស់ទ្រង់ នោះយើងបានក្លាយទៅជារួមគ្នាតែមួយជាមួយនឹងពួកបរិសុទ្ធទាំងឡាយនៃព្រះ )។
សូមដោះបង់ស្អិត ឬខ្សែ ដែលបំបែកសិស្សចេញពីគ្នាចេញ ហើយអញ្ជើញឲ្យសិស្សដែលបំបែកចេញពីគេនោះមករួមគ្នាជាមួយនឹងសិស្សផ្សេងទៀតក្នុងថ្នាក់ ។ សូមលើកទឹកចិត្តសិស្សដែលតំណាងឲ្យពួកសាសន៍យូដា ឲ្យអញ្ជើញពួកសិស្សដែលបានបំបែកចេញឲ្យមកអង្គុយនៅជិតពួកគេ ។
សូមអញ្ជើញសិស្សពីរបីនាក់ឲ្យប្ដូរវេនគ្នាអានឮៗក្នុង អេភេសូរ ២:១៦-១៩ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលឃ្លាដែលគូសបញ្ជាក់បន្ថែមអំពីសេចក្ដីពិតដែលថា នៅពេលយើងមករកព្រះយេស៊ូវគ្រីស្ទ ហើយទទួលបានព្រះគុណរបស់ទ្រង់ នោះយើងអាចនឹងក្លាយទៅជារួមគ្នាតែមួយជាមួយនឹងពួកបរិសុទ្ធទាំងឡាយនៃព្រះ ។
-
តើឃ្លាអ្វីខ្លះដែលអ្នកបានរកឃើញ ដែលគូសបញ្ជាក់បន្ថែមអំពីសេចក្ដីពិតដែលថា នៅពេលយើងមករកព្រះយេស៊ូវគ្រីស្ទ ហើយទទួលបានព្រះគុណរបស់ទ្រង់ នោះយើងអាចនឹងក្លាយទៅជារួមគ្នាតែមួយជាមួយនឹងពួកបរិសុទ្ធទាំងឡាយនៃព្រះ ?
-
ហេតុអ្វីអ្នកគិតថា សេចក្ដីពិតនេះសំខាន់ចំពោះយើងដើម្បីយល់ដឹង និងអនុវត្តនៅក្នុងសាសនាចក្រនាសព្វថ្ងៃនេះ ?
-
តើយើងអាចជួយអ្នកដទៃឲ្យប្រែក្លាយ ឬមានអារម្មណ៍ដូចជា « ជាតិតែមួយ » ឡើងវិញ (ខទី ១៩) នៅក្នុងសាសនាចក្រជាជាង ដូចជាមនុស្សដទៃយ៉ាងដូចម្ដេច ?
-
តើនៅពេលណាដែលនរណាម្នាក់បានជួយអ្នកឲ្យមានអារម្មណ៍ថា ដូចជាជាជាតិតែមួយជាមួយនឹងពួកបរិសុទ្ធជាជាងដូចជាមនុស្សដទៃ ? តើនៅពេលណាដែលអ្នកបានព្យាយាមជួយដល់នរណាម្នាក់ឲ្យមានអារម្មណ៍បែបនេះ ?
សូមអញ្ជើញសិស្សឲ្យអានអេភេសូរ ២:២០-២២ឲ្យឮៗ។ សូមឲ្យសិស្សក្នុងថ្នាក់ផ្ទៀងតាម រកមើលថា តើប៉ុលបានបង្រៀនអ្វីខ្លះអំពីគ្រឹះនៃសាសនាចក្រនេះ ។
-
តើសេចក្ដីពិតអ្វីខ្លះ ដែលប៉ុលបានបង្រៀននៅក្នុងខគម្ពីរនេះ អំពីរចនាសម្ព័ន្ធក្នុងសាសនាចក្ររបស់ព្រះអម្ចាស់ ? ( សិស្សអាចនឹងប្រើពាក្យផ្សេងពីនោះ ប៉ុន្តែសូមជួយពួកគេឲ្យស្គាល់ថា សាសនាចក្ររបស់ព្រះអម្ចាស់ត្រូវបានស្ថាបនាឡើងនៅលើពួកសាវក និងពួកព្យាការីទាំងឡាយ ដែលមានព្រះយេស៊ូវគ្រីស្ទជាថ្មជ្រុងយ៉ាងឯក )។
-
តើថ្មជ្រុងគឺជាអ្វី ? ( ថ្មធំមួយដែលដាក់នៅជ្រុងនៃគ្រឹះមួយ ដើម្បីផ្ដល់ជាកម្លាំង និងលំនឹងរបស់សំណង់ទាំងមូល ) ។
សូមគូររូបភាពសាមញ្ញមួយនៃថ្មជ្រុងដែលភ្ជាប់ជញ្ជាំងទាំងពីរ ។
-
តើព្រះយេស៊ូវគ្រីស្ទជាថ្មជ្រុងយ៉ាងឯករបស់សាសនាចក្រតាមរបៀបណា ? យោងតាមខទី ២១តើមានអ្វីបានកើតឡើងចំពោះសាសនាចក្រទាំងមូលដោយសារតែថ្មជ្រុងនេះ ?
-
តើពួកសាវក និងពួកព្យាការីសង់គ្រឹះដែលនៅសេសសល់ផ្សេងៗទាំងប៉ុន្មានរបស់សាសនាចក្រតាមរបៀបណា ?
-
តើគ្រឹះនេះផ្ដល់នូវលំនឹងដល់សាសនាចក្រ ហើយការពារវាទាស់នឹងការវាយប្រហាររបស់អារក្សយ៉ាងដូចម្ដេច ?
អេភេសូរ ៣
ប៉ុលបង្ហាញអំពីក្ដីប្រាថ្នារបស់លោកចំពោះពួកបរិសុទ្ធនៅអេភេសូរ
សូមសង្ខេបអេភេសូរ ៣:១-១៦ដោយពន្យល់ថា ប៉ុលបានផ្សាយអំពីព្រះយេស៊ូវគ្រីស្ទ ហើយបានបង្រៀនថា តាមរយៈទ្រង់ ពួកសាសន៍ដទៃអាចក្លាយជា « អ្នកគ្រងមរតក » (ខទី ៦) ជាមួយនឹងសាសន៍អ៊ីស្រាអែល ហើយជាអ្នកទទួលការសន្យាទាំងឡាយរបស់ព្រះ ។
សូមអញ្ជើញសិស្សពីរបីនាក់ឲ្យប្ដូរវេនគ្នាអានឮៗក្នុង អេភេសូរ ៣:១៤-១៩ ។ ចូរសុំឲ្យសិស្សក្នុងថ្នាក់ផ្ទៀងតាម រកមើលថាតើប៉ុលប្រាថ្នាចង់បានអ្វីផ្សេងទៀត ដើម្បីជួយដល់ពួកបរិសុទ្ធឲ្យបានស្គាល់ និងទទួលអារម្មណ៍ដឹង ។
-
ស្របតាមខគម្ពីរទាំងនេះ តើប៉ុលចង់បានអ្វីខ្លះ ដើម្បីឲ្យពួកបរិសុទ្ធបានស្គាល់ និងទទួលអារម្មណ៍ដឹង ?
សូមសរសេរសេចក្តីពិតនេះនៅលើក្ដារខៀន ៖ ពួកសាវក និងពួកព្យាការីព្យាយាមជួយដល់កូនចៅរបស់ព្រះឲ្យស្គាល់ និងទទួលអារម្មណ៍ដឹងពីសេចក្ដីស្រឡាញ់របស់ព្រះយេស៊ូវគ្រីស្ទ ។
សូមបង្ហាញទំព័រដែលបង្ហាញពីគណៈប្រធានទីមួយ និងកូរ៉ុមនៃពួកដប់ពីរនាក់ ចេញមកពីច្បាប់ទស្សនាវដ្ដីសន្និសីទទូទៅថ្មីៗនេះ Ensign ឬLiahona ។
-
តើពួកសាវក និងពួកព្យាការីព្យាយាមជួយដល់កូនចៅរបស់ព្រះឲ្យស្គាល់ និងមានអារម្មណ៍ដឹងអំពីសេចក្ដីស្រឡាញ់របស់ព្រះយេស៊ូវគ្រីស្ទនៅក្នុងជំនាន់របស់យើងយ៉ាងដូចម្ដេច ?
-
តើនៅពេលណាដែលការបង្រៀនរបស់ពួកសាវក និងពួកព្យាការីបានជួយអ្នកឲ្យស្គាល់ និងមានអារម្មណ៍ដឹងកាន់តែច្បាស់អំពីសេចក្ដីស្រឡាញ់របស់ព្រះយេស៊ូវគ្រីស្ទនោះ ?
សូមបញ្ចប់ដោយការចែកចាយទីបន្ទាល់របស់អ្នកអំពីសេចក្ដីពិត ដែលបានពិភាក្សានៅក្នុងមេរៀន ឬអញ្ជើញសិស្សឲ្យធ្វើសកម្មភាពតាមសេចក្ដីពិតទាំងនេះ ។
សេចក្តីពន្យល់ និង ព័ត៌មានសាច់រឿង
អេភេសូរ ២:៨-១០ ។ « ដ្បិតគឺដោយព្រះគុណ ដែលអ្នករាល់គ្នាបានសង្គ្រោះ ដោយសារសេចក្តីជំនឿ …សម្រាប់ការល្អ »
« នៅក្នុងអេភេសូរ ២:៨-១០ប៉ុលបានពិភាក្សាអំពីទំនាក់ទំងរវាងព្រះគុណ សេចក្ដីជំនឿ និងកិច្ចការល្អ ។ ទីបំផុត សេចក្ដីសង្គ្រោះកើតមានមកតាមរយៈព្រះគុណូបការៈនៃកិច្ចការរបស់ព្រះយេស៊ូវគ្រីស្ទ គឺពុំមែនដោយខ្លួនយើងនោះទេ ។ ប៉ុលបានហៅអ្នកដើរតាមព្រះយេស៊ូវគ្រីស្ទ ‹ ជាស្នាដៃ [ របស់ព្រះ ] ដែលទ្រង់បានបង្កើតក្នុងព្រះគ្រីស្ទយេស៊ូវសម្រាប់ការល្អ› (អេភេសូរ ២:១០) ។ កន្លែងនេះ គូសបញ្ជាក់អំពីកិច្ចការរបស់ព្រះអម្ចាស់ជាជាងកិច្ចការរបស់យើងផ្ទាល់ ហើយបង្រៀនថាលទ្ធភាពរបស់យើងដើម្បីធ្វើការល្អផុសចេញឡើងមកពីការផ្លាស់ប្ដូរ ដែលព្រះគុណរបស់ព្រះយេស៊ូវគ្រីស្ទបណ្ដាលឲ្យកើតមានឡើងនៅក្នុងខ្លួនយើង នៅពេលយើងមករកទ្រង់ដោយសេចក្ដីជំនឿ ( សូមមើលផងដែរកូរិនថូសទី ១ ១៥:១០និងភីលីព ២:១៣) » (New Testament Student Manual [ Church Educational System manual ឆ្នាំ ២០១៤ ] ទំព័រ ៤២៥) ។
អែលឌើរ ប្រ៊ូស អ័រ ម៉ាក់ខន់ឃី ក្នុងកូរ៉ុមនៃពួកសាវកដប់ពីរនាក់បានពន្យល់ថា ៖
« សេចក្ដីសង្គ្រោះនៅគ្រប់ទម្រង់ ប្រភេទ និងកម្រិតទាំងអស់ កើតមកតាមរយៈព្រះគុណនៃព្រះ ។ នោះគឺដោយសារតែសេចក្ដីស្រឡាញ់ សេចក្ដីមេត្តាកុរណា និងការយាងចុះមករបស់ទ្រង់ នោះព្រះជាព្រះវរបិតារបស់យើងបានតែងតាំងផែនការ និងប្រព័ន្ធនៃសេចក្ដីសង្គ្រោះឡើងដែលនឹង ‹ នាំឲ្យមានអមតភាព និង ជីវិតដ៏នៅអស់កល្បជានិច្ចដល់មនុស្ស › ។ (ម៉ូសេ ១:៣៩) ។ ស្របតាមផែនការនេះ ទ្រង់បានបញ្ជូនព្រះរាជបុត្រាសំណព្វតែមួយគត់របស់ទ្រង់មកក្នុងពិភពលោកដើម្បីអនុវត្តនូវពលិកម្មធួនដ៏គ្មានទីបញ្ចប់ និងអស់កល្បជានិច្ច ។ …
« ដូច្នេះ មនុស្សត្រូវបានសង្គ្រោះដោយព្រះគុណតែម្យ៉ាង នៅក្នុងន័យថាជាតួអង្គដែលបានរស់ឡើងវិញ ពួកគេត្រូវបានសង្គ្រោះដោយព្រះគុណបួករួមនឹងការគោរពប្រតិបត្តិ ក្នុងន័យថាជាការទទួលបានជីវិតអស់កល្បជានិច្ច ។ ផែនការនៃដំណឹងល្អ គឺដើម្បីសង្គ្រោះមនុស្សនៅក្នុងនគរសេឡេស្ទាល ដូច្នេះហើយ ប៉ុលបង្រៀនថាសេចក្ដីសង្គ្រោះដោយព្រះគុណគឺតាមរយៈសេចក្ដីជំនឿ តាមរយៈការគោរពប្រតិបត្តិ តាមរយៈការទទួលយកព្រះគ្រីស្ទ តាមរយៈការកាន់តាមបទបញ្ញត្តិទាំងឡាយ ។ ដូច្នេះនីហ្វៃបានសរសេរថា ‹ ហើយឲ្យស្រុះស្រួលនឹងព្រះ ដ្បិតយើងដឹងថា មានតែដោយព្រះគុណទេ ទើបយើងបានសង្គ្រោះ បន្ទាប់ពីអ្វីៗទាំងអស់ ដែលយើងអាចធ្វើបាន › (នីហ្វៃទី ២ ២៥:២៣) ហើយមរ៉ូណៃបានកត់ត្រាថា ‹ ចូរមករកព្រះគ្រីស្ទ ហើយឲ្យបានល្អឥតខ្ចោះនៅក្នុងទ្រង់ ហើយចូរលះបង់ចោលនូវអស់ទាំងអំពើដ៏ឥតបរិសុទ្ធចុះ ហើយបើសិនជាអ្នករាល់គ្នានឹងលះបង់ចោលនូវអស់ទាំងអំពើដ៏ឥតបរិសុទ្ធ ហើយស្រឡាញ់ព្រះឲ្យអស់ពីសមត្ថភាព អស់ពីគំនិត និងអស់ពីកម្លាំងរបស់អ្នក នោះព្រះគុណរបស់ទ្រង់ល្មមដល់អ្នកហើយ ដោយសារព្រះគុណនៃព្រះ នោះអ្នករាល់គ្នាអាចបានល្អឥតខ្ចោះនៅក្នុងព្រះគ្រីស្ទ › ។ (មរ៉ូណៃ ១០:៣២ ) » ។ ( Doctrinal New Testament Commentary វ៉ុល ៣ [ ឆ្នាំ ១៩៦៥–៧៣ ] ២:៤៩៨-៩៩ ) ។
អេភេសូរ ២:២០-២២ ។ គ្រឹះ និងថ្មជ្រុងនៃសាសនាចក្រ
អែលឌើរ ជែហ្វ្រី អ័រ ហូឡិន នៃកូរ៉ុមនៃពួកសាវកដប់ពីរនាក់បានមានប្រសាសន៍អំពីរចនាសម្ព័ន្ធរបស់សាសនាចក្រ ៖
« នៅក្នុងជំនាន់គម្ពីរសញ្ញាថ្មី នៅក្នុងជំនាន់ព្រះគម្ពីរមរមន និងនៅក្នុងសម័យទំនើបនេះ អ្នកមានសិទ្ធិអំណាចទាំងនេះបង្កើតជាថ្មគ្រឹះនៃសាសនាចក្រដ៏ពិត ដែលបានតែងតាំងតំណែង និងទទួលបានកម្លាំងរបស់ពួកលោកពីថ្មជ្រុងយ៉ាងឯក ‹ សិលានៃព្រះដ៏ប្រោសលោះនៃយើងគឺ [ ព្រះយេស៊ូវ ] ព្រះគ្រីស្ទជាព្រះរាជបុត្រានៃព្រះ › [ ហេលេមិន ៥:១២ ] » ។ … គ្រឹះនៅលើព្រះគ្រីស្ទបែបនេះ ហើយតែងតែជាការការពារនៅក្នុងជំនាន់នានា ‹ កាលណាអារក្សបញ្ចេញខ្យល់ដ៏ខ្លាំងក្លារបស់វាមក មែនហើយ ព្រួញរបស់វានៅក្នុងខ្យល់គួច មែនហើយ កាលណាព្រិល និង ខ្យល់ព្យុះកំណាចទាំងអស់របស់វា បោកបក់មកលើកូន ›» (« Prophets, Seers, and Revelators » Ensign ឬ Liahona ខែ វិច្ឆិកា ឆ្នាំ ២០០៤ ទំព័រ ៧ ) ។
ឃ្លា « ផ្គុំភ្ជាប់គ្នា » នៅក្នុងអេភេសូរ ២:២១ផ្ដល់យោបល់ជាមេរៀនសំខាន់មួយអំពីសាមគ្គីភាពនៅក្នុងសាសនាចក្រ ។ ពុំមានដុំថ្មពីរដុំណាដែលបង្កើតបានជារចនាសម្ព័នមួយ ដែលដូចគ្នាបេះបិទនោះទេ ហើយមានដុំថ្មជាច្រើនមានទំហំ និងទម្រង់ខុសៗគ្នា ។ ប៉ុន្តែដុំថ្មទាំងឡាយគឺ « ត្រូវបានផ្គុំភ្ជាប់គ្នា » ដើម្បីបង្កើតបានជារចនាសម្ព័ន ។ ដូចគ្នានេះផងដែរ គ្មានសមាជិកសាសនាចក្រពីររូបណាមានលក្ខណៈដូចគ្នាបេះបិទនោះទេ ប៉ុន្តែទាំងអស់គ្នាគឺត្រូវបាន « ផ្គុំភ្ជាប់គ្នា » ដើម្បីបង្កើតជាសាសនាចក្ររបស់ព្រះអម្ចាស់ ។